1 TIMOTEO

1 Iñche Pablo, Cristo Jesús ñi apostol,* chumngechi elfalcünueneu Chau Ngünechen, taiñ Montulchefe, cafei Cristo Jesús. Fei tañi duam mu nieiñ maneluhun. 2 Huirintuculelfiñ tüfachi carta ta Timoteo,* tañi chaf feyentulelu,* fotüm reque troquiniefiñ.

Llellipulen tami rume füreneaeteu, cutranpiuqueyeaeteu ca tami eluaeteu cüme felen taiñ Fütra Chau Ngünechen ca taiñ Ñidol Cristo Jesús.

3 Epe amualu iñche Macedonia mapu mu, feipicünueyu tami mülenagal Éfeso huaria mu. Ca huiño feipiayu feula tami mülenagal, fei catrütuafimi quiñeque che ñi quimeltunoal caque feyentun, 4 ca tañi allcütunoal engün coilaque nütram ca chem rume huirintucungelu pu cuifique lacu meu. Fei tüfa ta re ngünam dungu, ngüchaltucuchequei ñi chaftudungual falinochi dungu mu, ca hulquelai chem ñi elcünuel Chau Dios taiñ doi feyentual. 5 ¿Chemu am feipicünueyu tüfachi dungu? Taiñ nieal lif piuque, cüme raquiduam ca taiñ feyentual rüf piuque mu, femngechi taiñ hueluconque piuqueyehual. 6 Quiñeque che quiñepülecünuquefi tüfachi dungu, feimu ngünam chaftudungumequei engün. 7 Ayüquei ñi quimeltucheal ti ley dungu mu. Huelu adümquelai quisu tañi feipin engün ca chem ñi rume quimeltuqueel engün.

8 Iñchiñ cümelu troquiquefiyiñ Moisés ñi ley, huelu mülei ñi cüme inangeal. 9 Ti ley elcünungelai pu nor che ñi duam mu, doi mai elcünungei tüfachi pu che ñi duam mu: tati pu che chaftuquefilu ti ley, pu feyentuquenolu, tati pu ngünefalngenolu, pu culpafe,* pu manelfalngenolu,* pu illamcaquefilu tati yamfal dungu, pu langümquefilu tañi chau, ñuque ca pu langümchefe. 10 Cafei tati pu che femquelu pod cudumuhun,* pu cudumuuquelu chaf huentru engu,* tati pu nüchequelu, pu coilatufe, pu femquenolu tañi feipicünuel,* ca com pu caiñetuquefilu ti cümeque quimeltun. 11 Taiñ ayühun-ngechi Chau Ngünechen mu cüpai tüfachi quimeltun, femngechi pengeli ti afmatufal cümeque dungu tañi elfalcünulelngeel ta iñche.

12 Mañumquefiñ taiñ Ñidol Cristo Jesús, elueneu nehuen, manelfal che troquieneu, fei elfalcünueneu quiñe cüdau. 13 Cuifi caiñetudunguquefun ta Chau Ngünechen, inantucuquefun tañi pu che, checauquefun. Quimnolu ca feyentunolu iñche femün tüfachi dungu, feimu rume cutranpiuqueyengen. 14 Ñidol rumeñma cutranpiuqueyeneu. Tañi inaniefiel ta Cristo Jesús, feyentulen ca nien piuqueyehun. 15 Tüfachi dungu manelfali ca mülei ñi rüf feyentungeal: Cristo Jesús cüpai mapu mu ñi montulpayafiel pu culpafe.* Com engün meu, iñche tati doi fütra culpafe.* 16 Huelu cutranpiuqueyengen, femngechi Cristo Jesús pengeli ñi ñom piuquengen iñche meu, tati doi fütra culpafe.* Fei elcünueneu tañi inaquintuaeteu com pu feyentualu Cristo mu, fei ñi llohual engün rumel mongen.

17 Rumel yamniengepe* ca püramyengepe ti Lonco Ülmen rumel mülequelu, laquenolu,* pengequenolu, taiñ quiñen Chau Ngünechen. Felepe mai.

18 Saquin fotüm Timoteo, chumngechi feipicünuingün eimi mu Chau Ngünechen ñi pu huerquen, iñche feipicünueyu tüfachi dungu, femngechi amuleai tami cüme hueichamequen reque.* 19 Elcünulayaimi tami feyentun ca tami cüme raquiduam. Quiñeque che elcünuingün ñi cüme raquiduam, fei ñamtui tañi feyentun chumngechi quiñe farcu ñamconquei lafquen meu. 20 Femngechi rupai Himeneo ca Alejandro. Hultucufiñ engu ta Satanás meu, fei norümtungeai engu, femngechi quimaingu ñi caiñetudungunoafiel ta Chau Ngünechen.

2 Feimu hune ngülamtuhuayiñ. Itrofill che ngillatuñmayafimün, com piuque mu llellipuafimün Chau Dios tañi quellu ca mañumtuafimün. 2 Ngillatuñmayafimün pu lonco ülmen, com pu gobernante,* femngechi cüme feleaiñ ca tüngcüleaiñ* taiñ serfiniefiel ta Chau Dios com piuque ca cüme raquiduam mu. 3 Tüfachi dungu cümei ca ayüfali Chau Ngünechen ñi adquiñ meu, taiñ Montulchefe. 4 Fei ayüniei itrofill che ñi montual ca ñi cüme quimürpuafiel ti rüf dungu. 5 Quiñelei müten ta Chau Ngünechen, ca quiñe huentru müten rangiñelhuelei Chau Ngünechen ca tati pu che meu, tüfa ta Cristo Jesús. 6 Fei hultucui ñi mongen, femngechi culli chem ñi duamniengeel tañi ngillanentuafiel com pu che* culpan mu.* Tüfachi dungu huldungungeai puuchi antü meu. 7 Iñche dullingen, fei amuldunguquen ca apostolngen. Coilatulan, rüf dungu tati. Feimu quimeltuquefiñ pu catripanche,* femngechi ñi feyentual engün ca quimürpual ti rüf dungu.

8 Feimu llemai ayünien huall püle pu huentru llellipulepe, lif piuque mu huitrañpürampe ñi cuhu engün, ngelai ñi illculeal* ca chaftudungumequeal caquelu che engün. 9 Cafei pu domo cüme tucutuucülepe,* quimfalngepe ñi mallmangenon ca ñi nien cüme raquiduam. Ngelai ñi rumeñma adelcaleal tañi lonco.* Ngelai ñi adelcahual engün oro meu,* llancatu,* rume falichi tacun no rume. 10 Doi mai tañi cüme adngeal engün, mülei ñi femal cümeque dungu. Femngechi femquei pu domo poyequefilu ta Chau Dios.

11 Ti domo ñi allcütual ti quimeltun, ñücüfcülepe* ñom piuque mu.* 12 Eluquelafiñ ti domo ñi quimeltucheal, ngelai ñi ngünenieafiel tati huentru. Doi mai ñücüfcülepe.* 13 Ti huentru Adán hune deumangei, fei hula deumangei ti domo Eva. 14 Cafei ngünencangelai ta Adán, ti domo mai ta ngünencangei, fei culpafengetui.* 15 Ti domo nien mu püñeñ cümelcaleai,* huelu cüme raquiduam mu mülei ñi maneluucüleal Chau Dios mu. Amulepe tañi piuqueyehun ca tañi lif piuquengen Chau Ngünechen ñi adquiñ meu.

3 Tüfachi feipin manelfali: quiñe huentru yafüluule ñi loncoleal trahunche mu, müna cüme cüdau ayüniei. 2 Feimu ti loncolelu mülei ñi cüme yenieal ñi mongen, femngechi dunguyengelayai. Mülei ñi nieal quiñe domo müten. Quim ngünenieupe. Mülei ñi cüme raquiduam nieal ca cüme adnieal tañi mongen.* Poyechefengepe,* adümuucülepe ñi quimeltucheal. 3 Ngelai ñi ngollifengeal ca quehuatufengeal, doi mai ñom piuquengepe.* Ngelai ñi illcufengeal,* diñmatunoal* plata no rume. 4 Ti huentru mülei ñi cüme adnieafiel tañi pu che. Tañi pu yall mülei ñi feyentuaeteu ca cüme miyahual. 5 Quiñe huentru quim adnienofile quisu tañi pu che, ¿chumngechi cuidayafui Chau Dios ñi trahunche? 6 Ngelai ñi elfalcünungeal quiñe hue feyentulelu. Mallmahuafui, fei condenangeafui chumngechi condenangei ti Huecüfü. 7 Cafei mülei ñi cüme nütramyeaeteu tati pu che feyentulenolu, fei dunguyengelayai* ca pünoconlayai ti Huecüfü ñi ngünen mu.*

8 Ca femngechi tati pu quelluquefilu pu loncolelu mülei ñi yamfal huentrungeal. Cafei ngelai ñi epu rume dungual.* Putufengelayai ca diñmatulayai quisu ñi cümelcahual. 9 Doi mai ngelai ñi püntütripayal* ti feyentun mu, fei tüfa ta Chau Dios ñi ellcalechi dungu. Cafei mülei ñi nieal lif cüme raquiduam.

10 Hune ngüneduamngepe ñi pepicaucülepen mai tañi femal tüfachi cüdau. Fei peñmangenole huesa dungu, quelluconpe trahunche mu.

11 Ca femngechi pu domo mülei ñi yamfal chengeal ca dallucachefengenoal. Mülei ñi quim ngüneniehual. Com ñi femün meu quimfalngepe tañi feyentuniefiel ta Chau Dios.

12 Pu quelluquefilu pu loncolelu mülei ñi nieal quiñe domo müten. Cafei mülei ñi cüme adnieafiel tañi pu yall ca quisu tañi pu che. 13 Pu huentru cüme femquelu tañi cüdau, cüme nütramyengequei. Chem no rume catrütuquelaeyu ñi dungual tañi feyentulen Cristo Jesús mu.

14 Pichiñma mu ayünien tami pemeafiel, huelu huirintuculelayu tüfachi dungu. 15 Fei matu amunoli, quimaimi chumngechi tami miyahual tami coneltulen Chau Dios ñi pu che meu, tüfa taiñ mongelechi Chau Dios ñi trahunche. Ti trahunche quelluntucuquefi ca nehuentucuquefi ti rüf dungu. 16 Rüfcünu llemai, falin-ngei Chau Ngünechen ñi ellcalechi dungu feipilelu chumngechi taiñ serfiafiel com piuque mu: ‘Jesús cüpai huentru reque, püllüngetulu nor che troquingei, peufaluhui pu cümeque püllü meu, nütramyengei rangiñ pu catripanche meu,* mapu mülechi pu che feyentueyu, huenu mu lloungei, fei saquingei’.

4 Huelu Chau Ngünechen mu cüpachi dungu cüme feipilei, cüpalechi antü mu quiñeque che elcünutuai tañi feyentun. Fei engün allcütuai coilaque dungu, Chau Ngünechen mu cüpalu troquingeai, ca ngüneduamai engün pu huecüfü ñi quimeltun. 2 Ca ngüneduamai engün ñi cüme piuquefaluuquen pu huentru coilatuquelu. Feichi pu huentru ñi raquiduam yafülei, marcalei reque quiñe cofilechi pañillhue meu. 3 Catrütuquefingün ta che ñi curengenoal cam fütangenoal, ca feipiquefingün ta che ñi inoal quiñeque iyael. Huelu Chau Dios elcünulelfi feichi iyael tati pu che feyentulelu ca cüme quimfilu ti rüf dungu, fei ñi iyafiel engün feichi iyael ca mañumafiel ta Chau Ngünechen. 4 Rume cümei com ñi deumael Chau Ngünechen. Chem hueringequelai rume,* ingele mañumtun mu. 5 Ti iyael lifngei, Chau Dios feipicünulu cai ñi lifngen ca iñchiñ taiñ llellipuquen mañumtun mu.

6 Femngechi ngülamtufilmi tati pu peñi, cüme serfiafimi ta Cristo Jesús. Cüme quimeltungeaimi, llohun mu ti huercün dungu taiñ feyentulqueteu Chau Dios mu ca tami lloufiel tati cümeque quimeltun tami inaniequefiel. 7 Huelu quiñepülecünuafimi feichi coilaque nütram caiñetuquefilu ta Chau Dios. Feichi nütram falin-ngelai.* Huelu eimi pepicaunge,* fei pengelaimi tami serfiquefiel ta Chau Dios com piuque mu. 8 Cümelcaquei ti che pepicauquelu ñi nehuentucual tañi cuerpo.* Huelu quiñe che ñi serfiquefiel ta Chau Dios com piuque mu, tüfa cümelcaqueyu com dungu meu. Feichi che llohuai cümelcan famülque mu ca cüpalechi antü meu. 9 Tüfachi feipin manelfali ca mülefui ñi cüme feyentungeal. 10 Feimu fütra cüdaumequeiñ ca yafüluumequeiñ. Taiñ mongelechi Chau Ngünechen mu maneluucüleiñ. Fei montulquefi itrofill che, doyelchi mai pu che ñi serfiqueteu com piuque mu.

11 Amulepe tami feipiel ca tami quimeltuel tüfachi ngülam. 12 Eluulayaimi tami illamcangeal tami hueche huentrungen mu. Doi mai eluunge tami inayentuaeteu tati pu serfiquefilu ta Chau Ngünechen com piuque mu. Inayentufalngepe chumngechi tami dunguquen, chumngechi tami miyahun, tami piuqueyehun, tami feyentun ca tami nien lif mongen. 13 Petu ñi puunon, nehuentulenge tami cüme papeltual pu che ñi adquiñ meu. Cafei nehuentulenge tami ngülamtucheal* ca quimeltucheal. 14 Elcünulayaimi ti adümuhun tami elueteu Chau Ngünechen, quisu tañi feipicünuel mu llohuimi feichi adümuhun, feichi pu loncolelu fampuhulfilu ñi cuhu eimi meu. 15 Raquiduamcülenge tüfachi dungu mu. Eluucülenge tami inanieafiel, femngechi com pu che peai tami cüme cüdaucülen. 16 Cüme ngüneduamnienge chumngechi tami miyahun ca tami quimeltuchequen. Elcünulayaimi tami femquen tüfachi dungu, femngechi montuaimi eimi ca tami pu allcütuqueteu.

5 Eimi huesa illcutuquelayafimi* quiñe füchache, doi mai quiñe chau reque ngülamtuafimi. Peñi reque ngülamtuafimi pu huecheque huentru. 2 Ñuque reque ngülamtuafimi pu cusheque domo. Cafei deya reque* ngülamtuafimi pu üllchaque domo lif piuque mu.

3 Falintuafimi* pu lantu domo rüf duamnielu ñi quellungeal. 4 Huelu pu püñeñ, chuchu cam cucu* mülei ñi duamtunieafiel quisu tañi pu che. Fei pengelaingün ñi serfiquefiel ta Chau Ngünechen com piuque mu. Mülei ñi cuidanieafiel tañi pu füchaqueche, fei tañi femafel engün. Tüfachi dungu ayüniei Chau Ngünechen. 5 Huelu ti lantu domo fillalelu ca rüf duamnielu ñi quellungeal, maneluucülequei Chau Ngünechen mu. Fentecünuquelai ñi llellipun ca ngillatun antü ca pun meu. 6 Huelu ti lantu domo eluucülelu ñi femal tañi illutuqueel müten, la reque felei, mongelelu rume. 7 Feimu llemai quimeltunieafimi pu che tüfachi dungu.* Femngechi cüme miyahuai engün tañi dunguyengenoal. 8 Tuchi eluquenofilu chem ñi duamnieel quisu tañi pu che, doyelchi mai tati pu che ñi ruca mu mülelu, quiñepülecünuquefi tañi feyentun. Doi huesalcalei tati feyentuquenolu mu.

9 Raquingepe pu lantu domo doi 60 tripantu nielu, ñihuanofilu tañi füta yem* 10 ca quimüñmangelu tañi cümeque femün. ¿Chem cümeque femün? Ñi tremümfiel tañi pu püñeñ, tañi poyechefengen,* ñi cüchanamunfiel Chau Ngünechen ñi pu che,* ñi quellufiel pu cutrancaucülelu ca tañi femquen itrofill cümeque dungu.

11 Raquilayafimi pu lantu domo petu üllcha domolelu. Tañi illutuqueel engün ti cudumuhun dungu catrütuqueyu ñi cüdahuelquefiel ta Cristo, feimu ayüquei ñi fütangeal. 12 Quiñepülecünuquefingün chem ñi feipicünuel ellaca mu,* feimu condenangeai engün. 13 Cafei chofüngeingün, fill ruca püle miyauqueingün. Mai, chofüyauqueingün. Huelu feica müten no, ca dunguyechequeingün, dunguconqueingün caquelu che ñi dungu mu. Nütramcayauqueingün tati feipifalngenolu. 14 Feimu ayülen tüfachi dungu: fütangepe tati pu lantu domo petu üllcha domolelu. Niepe püñeñ engün, ngüneitupe ñi ruca, femngechi elulayafingün ti caiñe taiñ dunguyeaeteu. 15 Quiñeque lantu domo cüme miyauhuelai, fei tañi inayafiel ta Satanás. 16 Quiñe domo feyentulelu parienteyefile quiñe lantu domo, mülei ñi quelluafiel. Duamfal-lai ti trahunche ñi quelluafiel. Femngechi ti trahunche quelluafi pu lantu domo rüf duamnielu ñi quellungeal.

17 Mülei tamün rume yamnieafiel* tati pu loncolelu cüme adniefilu ti trahunche. Doyelchi mai pu nehuentu cüdauquelu ñi dungucheal ca quimeltucheal. 18 Chau Ngünechen ñi huirintucuel feipilei: “Petu pünoquetranle ti mansun,* moraltuculayafimi”.* Ca feipilei: “Ti cüdaufe felei ñi cullingeal”. 19 Inei rume dalluntucufile quiñe loncolelu,* chumlayaimi rume. Huelu epu che cam cüla che dalluntucufile, eluhuaimi tami ngüneduamafiel ti dalluntucun. 20 Com pu che ñi adquiñ meu norümdungufinge tati pu culpaquelu,* femngechi caquelu che cuñiutucuhuai.* 21 Chau Ngünechen, Cristo Jesús ca pu dullin cümeque püllü ñi adquiñ meu feipicünueyu tami femal tüfachi dungu. Petu tami dullinon chem femal, cüme ngüneduamaimi com dungu ca dullintuchequelayaimi.

22 Matucaulayaimi tami elfalcünuafiel* quiñe huentru ñi nieal falin cüdau. Cafei culpaconlayaimi caquelu che ñi culpan mu.* Lif mongen nieaimi.

23 Re co pütocohuelayaimi, doi cümei tami pichiquen pulcutual. Fei cümelcaleai tami pütra ca quelluaimu tami cutranquen mu.

24 Quiñeque che quimüñmangequei ñi culpan,* feimu müchai müten juiciantucungequei. Huelu caquelu che doi alüñmaquei ñi quimüñmangeal tañi culpan.* 25 Ca femngechi quimngequei ti cümeque femün, ca tati cümenolu pepi ellcangequelai.

6 Tati pu esclavo mülei ñi rume yamnieafiel* tañi pu ngünenieteu. Femngechi turpu dunguyengelayai Chau Ngünechen ñi üi ca tañi quimeltun. 2 Ngelai ñi illamafiel tañi ngünenieteu feyentulelu, fei tañi peñi cai tati. Huelu mai mülei ñi doi cüme serfitunieafiel, serfiniefilu cai tañi saquin peñi chaf feyentulelu.*

Eimi quimeltunieafimi tüfachi dungu, ca amulepe tami ngülamtuchequen. 3 Quiñe huentru quimeltuafui caque feyentun, huelu nüucülelai ti cümeque quimeltun* taiñ Ñidol Jesucristo mu cüpalu, ca tañi quimeltuel quelluchequelai ñi serfiafiel ta Chau Dios com piuque mu. 4 Feichi huentru mallma chengei ca chem quimlai rume. Re ayüniei ñi yafcahual ca notucadungual fillque feipin mu. Tüfachi dungu mu pu che ütriruuquei, yafcauquei, dallucauquei,* hueluconque cangentuuquei,* 5 ca pichiquen dungu meu lladcütuuqueingün. Tüfa ñi amultucuqueel pu huentru hueluraquiduamcülelu ca nienolu ti rüf dungu. Tañi serfiniefiel ta Chau Ngünechen, raquiduamqueingün ñi quisu cümelcahual müten. 6 Rüfcünu mai, taiñ serfiniefiel ta Chau Ngünechen com piuque mu cümelcaqueiñmeu ayüucüleliyiñ taiñ nieelchi dungu meu. 7 Choyüngelu iñchiñ, chem no rume cüpal-laiñ mapu mu. Ca laliyiñ, chem no rume yetulayaiñ. 8 Feimu llemai, nieliyiñ iyael ca tacun, ayüucülequeaiñ feichi dungu mu.

9 Tati pu eluucülelu ñi ricungeal, pünoconqueingün huesaque dungu mu, ngünencan dungu* ca huesaque illutun falin-ngenolu. Tüfachi dungu yequeyu engün ñi cutrancahual ca ñi layal. 10 Diñmatufiel ta plata* itrofill huesaque dungu cüpalquei. Feimu quiñeque che ñi diñmatufiel ta plata elcünuingün tañi feyentun, fei cutrancauqueingün fentren huesaque dungu mu.

11 Huelu eimi serfiquefimi ta Chau Dios. Feimu püntütripange* tüfachi dungu mu. Doi mai yafüluunge tami femal nor dungu, tami serfiafiel ta Chau Dios com piuque mu, tami nieal feyentun, piuqueyehun, tami nehuentuleal ca tami ñom chengeal. 12 Yafüluhun mu hueichange* tami incayafiel tati feyentun. Eimi dullingeimi tami llohual afnoachi mongen. Feimu nehuentulepe tami piuque mu tüfachi maneluhun. Fentren che ñi adquiñ mu cüme huldunguimi tüfachi dungu.

13 Chau Dios eluquefi mongen ta itrocom. Cafei Cristo Jesús cüme huldungui tañi feyentun mu Poncio Pilato ñi adquiñ meu. Fei engu ñi adquiñ mu feipicünuayu: 14 lif piuque meu cüme inanienge ti huercün dungu peufaluule hula taiñ Ñidol Jesucristo. 15 Tati ayühun nielu, tati Fütra Pepiluhun Nielu, quimfalcünuai tüfachi dungu puule ti medin antü. Fei Lonco Ülmencülei ti pu lonco ülmen meu, ca Ñidolcülei tati pu ñidol meu. 16 Fei müten laquelai. Fente ñi huilüfngen cheu ñi mülen,* inei no rume pepi fülcontulaeyu.* Chem che no rume pequelaeyu ca turpu pelayaeyu rume. Püramyengepe, niepe tañi pepiluhun rumel meu. Felepe mai.

17 Tüfachi dungu feipiafimi tati pu ricungelu tüfachi mapu meu: ngelai ñi doicülelu troquihual,* ca ngelai ñi maneluhual ti falinque fillem mu, tüfa aftuquei. Doi mai maneluupe Chau Ngünechen mu, fei eluqueiñmeu itrocom taiñ ayühuelqueteu. 18 Feipiafimi ñi femal fentren cümeque dungu, ñi rücüngenoal, ca eluucülepe ñi misahual* tañi nieel. 19 Femngechi femle, ngülümaingün falinque dungu Chau Ngünechen mu cüpalu. Femngechi cüme felen nieaingün cüpalechi antü mu, fei nüucüleaingün reque tati rüfngechi mongen meu.

20 Saquin Timoteo, incayafimi chem tami elfalcünungeel. Famentuafimi ti falinochi dungun, feiti caiñetuquefilu ta Chau Dios. Ca famentuafimi ñi feipiel tati pu huentru quimchefaluuquelu, huelu tañi quimün engün caiñetuquefi ti rüf dungu. 21 Quiñeque che mallmauquei feichi quimün mu, feimu elcünuingün tañi feyentun.

Llellipuleiñ tamün rume cutranpiuqueyeaeteu Chau Ngünechen.