HEBREOS

1 Fütra cuifi Chau Ngünechen eli tañi pu huerquen ñi nütramcayafiel taiñ pu cuifiqueche. Fentren rupa femi ta tüfa, cafei caquerumei chumngechi ñi dungufiel engün. 2 Famülque mu* dunguqueiñmeu quisu tañi Fotüm mu. Chau Ngünechen dullicünufi ñi llohual com dungu, fei ñi duam mu elcünui huenu ca mapu mu müleyechi dungu.* 3 Fei cüme pengelquei Chau Ngünechen ñi afmatufalngen. Tañi chumngechi chengen, Chau Ngünechen mu trüri. Cafei com dungu quiñeucünuquefi Chau Ngünechen ñi nehuen-ngechi dungun meu.* Fei liftueiñmeu taiñ culpan mu,* fei hula huenu mu anücünuhui tañi Fütra Chau Ngünechen ñi man püle. 4 Feimu doicülei tati pu cümeque püllü meu. Doi yamfal üi elungei ta fei engün meu.

5 Raquiduamaimün, Chau Dios feipilafi chem caquelu cüme püllü no rume: “Eimi iñche tañi fotüm, fachantü tami chaungerpun iñche”. Ca feipilafi ta caquelu: “Iñche, quisu tañi chaungean, fei iñche tañi fotümngeai”. 6 Feichi huiño huercüfile tañi Hunen Fotüm mapu meu,* feipiai: “Chau Ngünechen ñi pu cümeque püllü mülei ñi püramyeaeteu”.*

7 Cafei tati pu cümeque püllü meu feipi: “Elcünuquefi ñi rume nehuen-ngeal* tañi pu cümeque püllü, ca tañi pu serfiqueteu hueihuiñ cütral reque* femcünuquefi”. 8 Huelu tañi Fotüm meu feipi: “Chau Ngünechen elueimu autoridad* rumel meu, ca ngünenieaimi nor dungu mu. 9 Piuqueyefimi ti nor dungu ca üdefimi ti huesaque dungu.* Feimu Ngünechen, eimi tami Chau Ngünechen, hutruleimu aceite tami dullieteu ca doi ayühun elueimu tami pu compañ mu”. 10 Cafei Chau Ngünechen ñi huirintucuel feipi: “Ahuem Ñidol, ellaca mu elcünuimi cheu ñi anümngeal ti mapu, ca quisu tami cuhu mu deumaimi ti callfü huenu. 11 Com tüfa ngehuelayai, huelu eimi mongelecayaimi. Mapu ca ti callfü huenu huesañmahuai chumngechi huesañmauquei quiñe tacun. 12 Fei eimi müchamtucuafimi quiñe macuñ reque, quiñe tacun, modaungetuai reque.* Huelu eimi felecaimi müten, aflayai tami mongelen”.

13 Huelu Chau Dios cangelu cüme püllü feipilafi: “Anüpange iñche tañi man püle, famnacümfili hula tami pu caiñe tami pünoafiel namun meu”. 14 Com pu cümeque püllü serfiquefingün ta Chau Ngünechen, huercüngeingün ñi quelluafiel tati pu montulngealu.

2 Iñchiñ huimtuleiñ taiñ ngüneduamafiel chem taiñ allcütuel, huelu mülei taiñ doi cüme ngüneduamafiel, femngechi taiñ quiñe püle tripanoal ti cüme rüpü meu. 2 Chem ñi amuldunguel pu cümeque püllü rüf huechurpui. Cafei com pu che culpalu* ñi inanofiel ti ley ca feyentunolu castigangei nor dungu mu. 3 Fei, ¿chumngechi montutripayafuiñ falintunofiliyiñ ti fütra montuluhun dungu? Taiñ Ñidol hune huldungui tüfachi montuluhun dungu, ca tati pu che allcütufilu nütrameleiñmu feitachi dungu. 4 Chau Ngünechen quimfalcünui ñi rüfngen tañi feipin engün,* feimu eli fütraque afmatun dungu ca elufi tañi pu che quisu tañi nehuen chumngechi ñi ayüel.

5 Chau Ngünechen elulafi pu cümeque püllü ñi ngünenieafiel feichi mapu ñi müleal,* feichi mapu mu nütramcamequeiñ. 6 Quiñe huentru huldungui nga: “¿Tunte fali tati huentru tami duamtunieafiel? ¿Tunte fali ti huentru ñi fotüm tami ngüneduamnieafiel? 7 Eimi elufimi ñi inaleal pu cümeque püllü meu. Eimi elufimi ñi püramyengeal ca ñi saquingeal ca elfalcünulelfimi com tami deumael. 8 Com famnacümfimi tañi miñche namun mu”. Chau Ngünechen elufi ñi ngünenieal com dungu, ngelai chem no rume tañi ngünenienoel. Petu pengequelai ñi ngüneniemequen com dungu. 9 Huelu Jesús cutrancaulu cai tañi lan mu, deu elungei ñi püramyengeal ca tañi saquingeal. Iñchiñ peniefiyiñ, elcünungelu rume ñi inaleal pu cümeque püllü mu. Fei Chau Ngünechen ñi rume cutranpiuqueyechen mu, Jesús lai com pu che ñi duam mu.

10 Com ñi mülen deumangei Chau Ngünechen tañi püramyengeal. Chau Ngünechen ñi duam mu deumangei llemai. Fei ñi saquingeal tañi fentrenque yall, cümei ñi elufiel tañi cutrancahual tati Fütra Loncolelu. Femngechi fei tüfa pepicaucüleafui ñi montulafiel tati pu yall. 11 Jesús ca feichi pu che quisu ñi dullicünufiel quiñe chau müten nieingün, feimu yehuequelai ñi peñi piafiel engün. 12 Feipi: “Eimi tami üi huldungulelafiñ tañi pu peñi. Rangiñ ti trahunche mu püramyeayu ülcantun mu”. 13 Ca feipi: “Maneluhuan fei mu”. Ca femngechi feipi: “¡Ahuem! Iñche ca tati pu yall* Jehová tañi elueteu iñche”.*

14 Tüfachi “pu yall”* che cuerpo nieingün,* feimu llemai Jesús che cuerpo niepai, femngechi ñi apümcayafiel ta Huecüfü, feiti nielu pepiluhun ñi langümcheal. 15 Ca lifrenentupafi com pu che llicaquefilu ti lan dungu, fei engün com tañi mongen mu esclavo reque felefuingün. 16 Rüfcünu mai, Jesús cüpalai ñi quelluafiel pu cümeque püllü, doi mai ñi quelluafiel Abrahán ñi pu cüpanche. 17 Feimu mülefui ñi trürcüleal tañi “pu peñi” engün com dungu meu, femngechi ñi hunen lonco sacerdotengeal, ñi cutranpiuqueyechefengeal ca ñi manelfalngeal Chau Ngünechen tañi dungu meu. Feimu huli tañi mongen com pu che ñi culpan mu,* femngechi ñi cümelcautual Chau Dios engün. 18 Jesús rupalu huesaque dungu cutrancahui. Feimu pepicaucülei ñi quelluafiel tati pu rupamequelu huesaque dungu.

3 Pu peñi, eimün ta Chau Ngünechen ñi pu che,* mangelngeimün tamün amual huenu meu. Raquiduamaimün Jesús mu. Iñchiñ quimnieiñ ca feipiqueiñ ñi apostolngen* ca hunen lonco sacerdotengen. 2 Jesús feyentufi inei tañi elfalcünueteu. Ca femngechi feyentui Moisés cüdaulu Chau Dios ñi ruca mu.* 3 ¿Chem doi saquifali? ¿Tati deumalu ti ruca, cam ti ruca? Tati deumafilu llemai. Feimu Jesús felei ñi doi saquingeal ta Moisés meu. 4 Rüfcünu mai, chem ruca rume niei tañi deumaeteu. Huelu Chau Ngünechen itrocom deumafi. 5 Moisés manelfali cüdaulu Chau Dios ñi ruca mu. Ñi femün mu pengeli* chem ñi feipicünungeal cüpalechi antü meu. 6 Huelu Cristo tañi fotümngen mu, elfalcülei Chau Ngünechen ñi ruca mu, fei manelfali. Feichi ruca, iñchiñ tati. Taiñ femngechi feleal, huldungumequeaiñ llicanon mu ca rumel nüucüleaiñ ti maneluhun taiñ ayühuelqueteu.

7 Fei rupai chumngechi feipi Chau Ngünechen ñi nehuen: “Fachantü allcütulmün tañi feipin, 8 yafü piuquecünuulayaimün, chumngechi rume lladcülcaeneu tamün pu cuifiqueche feichi tañi chaftueteu engün huellin mapu mu.* 9 Meli mari tripantu peingün iñche tañi femün, huelu chaftueneu engün. 10 Feimu rume lladcütufiñ* feichi pu che, fei feipin: ‘Rumel huelulcauquei tañi piuque engün, quimlaeneu engün’. 11 Fei lladcülu iñche,* feipicünun:* ‘Conlayaingün iñche tañi ürcütun mu’”.

12 Pu peñi, cuñiutuculemün. Femnolmün, püntütripayafuimün* taiñ mongelechi Ngünechen mu. Fei huesa piuque nierpuafuimün ca feyentuhuelayafuimün. 13 Doi mai, fill antü hueluconque yafültucuniehuaimün, petu ñi rupanon feichi antü “fachantü” pingequelu. Femngechi yafü piuquecünuulayaimün tati culpan ñi pepiluhun mu,* feiti ngünencachequelu. 14 Rumel nüucüleaiñ ti maneluhun taiñ nieel ellaca mu. Femngechi müten llohuaiñ chem ñi elungeel ta Cristo. 15 Femngechi feipingequei: “Fachantü allcütulmün tañi feipin, yafü piuquecünuulayaimün, chumngechi rume lladcülcaeneu tamün pu cuifiqueche”.

16 ¿Inei engün allcütufi ta Chau Ngünechen, huelu rume lladcülcafingün? Femngechi femi feichi pu che tripalu Egipto mapu meu Moisés ñi adnieteu. 17 Cafei, ¿inei engün lladcütunierquefi* Chau Ngünechen 40 tripantu mu? Feichi pu che culpalu* ca lalu huellin mapu meu. 18 ¿Inei engün ta feipicünufi ñi connoal quisu tañi ürcütun mu? Feiti pu feyentunolu llemai. 19 Feimu, ¿chem ngüneduamiyiñ? Tañi feyentunon mu pepi conlaingün.

4 Chumngechi feipicünui Chau Ngünechen, petu conafuiñ tañi ürcütun meu. Fei cuñiutuculeaiñ,* femngechi catrütungelayaimün tamün llohual feitachi dungu. 2 Iñchiñ ca quimelelngeiñ Chau Ngünechen ñi cümeque dungu taiñ pu cuifiqueche reque. Tuchi allcütulu nehuentulefui tañi feyentun, huelu taiñ pu cuifiqueche femlai. Feimu inalaingün ti cümeque dungu, fei tüfa cümelcalaeyu engün. 3 Huelu iñchiñ pu feyentulelu, conqueiñ Chau Ngünechen ñi ürcütun mu, feichi feipilu: “Fei lladcülu iñche,* feipicünun:* ‘Conlayaingün iñche tañi ürcütun mu’”. Huelu hue choyüngelu pu che mapu meu, Chau Ngünechen eluhui ñi ürcütual fentecünulu tañi deuman. 4 Quiñe troquiñ Chau Ngünechen tañi huirintucuel feipilei ti reglengechi antü mu: “Chau Ngünechen fentecünulu ñi deuman, eluhui ñi ürcütual reglengechi antü mu”. 5 Ca feipilei: “Conlayaingün iñche tañi ürcütun mu”.

6 Tati pu hune quimelelngelu ti cümeque dungu feyentulaingün, feimu conlaingün Chau Ngünechen ñi ürcütun meu. Huelu quiñeque che petu conafuingün. 7 Feimu chumngechi deu feipingei tüfachi carta mu, Chau Ngünechen feipi David ñi salmo mu: “Fachantü allcütulmün tañi feipin, yafü piuquecünuulayaimün”. Fei feipilu “fachantü”, Chau Ngünechen huiño elcünui quiñe medin antü. 8 Josué yefule tati pu Israel che cheu ñi ürcütuam Chau Ngünechen engün, fei Chau Ngünechen feipilayafui ñi elcünuel cangelu antü. 9 Feimu petu mülehuei quiñe saquin ürcütun antü ñi conal Chau Ngünechen ñi pu che. 10 Feichi che conlu Chau Ngünechen ñi ürcütun mu, ca ürcütuquei quisu ñi femquen mu, chumngechi Chau Dios ürcütui fentecünulu tañi deuman.

11 Feimu rume yafüluhuaiñ taiñ conal Chau Ngünechen ñi ürcütun meu, femngechi inei no rume inayentulayafi tati pu feyentunolu. 12 Chau Ngünechen ñi dungu niei mongen* ca nehuen-ngei. Doi yungei ta chem fütra cuchillo epuñpüle yungelu, alüconquei ponhui ti che meu. Fei rüf pengelquei ñi chumngen tati che ñi ad ca tañi piuque. Foro meu* hudamentuquefi reque tañi matra foro,* ca quimfalcünuquei* tati che ñi raquiduam ca chem ñi ayünieel piuque meu. 13 Inei no rume ca chem no rume ellcalelai Chau Ngünechen ñi adquiñ meu. Chem no rume taculelai quisu ñi adquiñ meu, fei com cüme adquintuniefi. Quisu meu cai entudungualu iñchiñ chem taiñ femquen.

14 Rume falin-ngei ti hunen lonco sacerdote taiñ nieel, fei ta Jesús, Chau Ngünechen ñi Fotüm. Huenu meu conpui,* feimu huldungumequeaiñ taiñ feyentulen Jesús meu. 15 Taiñ hunen lonco sacerdote cutranpiuqueyequeiñmeu taiñ ngañhuadcülen, fei ca femngechi rupai com taiñ rupamequen iñchiñ, huelu culpalai.* 16 Chau Ngünechen rume cutranpiuqueyechequei. Feimu fülconpuaiñ* tañi ülmen huancu meu,* fei llicanon mu llellipuafiyiñ. Femngechi duamnieliyiñ taiñ quellungeal, müchai müten fürenengeaiñ ca rume cutranpiuqueyengeaiñ.

5 Chem huentru rume dullingele ñi hunen lonco sacerdotengeal, elfalcünungei ñi serfiafiel ta Chau Ngünechen, fei ñi quelluafiel tati pu che. Femngechi hulai mañumtun ca chalintucun* pu che ñi culpan mu.* 2 Ti hunen lonco sacerdote ca culpaquei,* fei cutranpiuqueyequefi* feichi che quimnon mu huelulcaulu. 3 Feimu hulquei chalintucun quisu tañi culpan mu* chumngechi femquei ti troquiñche ñi culpan mu.*

4 Inei no rume hunen lonco sacerdotengelayafui quisu tañi pin mu. Chau Ngünechen mai ta mangelqueyu ñi llohual feichi cüdau. Femngechi mangelngei Aarón. 5 Ca femngechi Cristo hunen lonco sacerdotecünuulai ñi quisu saquihual. Chau Ngünechen saquieyu llemai, feipilu: “Eimi iñche tañi fotüm, fachantü tami chaungerpun iñche”. 6 Rupai chumngechi ñi feipiel cangelu troquiñ Chau Ngünechen ñi huirintucuel: “Eimi rumel sacerdotengeaimi Melquisedec reque”.

7 Cristo mülepalu mapu mu, nehuentu dungui ca ngümai cütu ñi llellipufiel ca ñi ngillatufiel ta Chau Ngünechen com piuque mu, fei montulafeyu ñi lanoal. Fei ñi fente yamniefiel* ta Chau Dios, allcütuñmangei tañi llellipun. 8 Fei tañi fotümngefui rume, cutrancahun mu quim feyenturpui. 9 Fei rüf cüme pepicaulu Cristo, com pu che tañi feyentueteu rumel meu montulngeai fei tañi duam mu. 10 Chau Ngünechen dullieyu ñi hunen lonco sacerdotengeal Melquisedec reque.

11 Fentren dungu feipiafuiñ Cristo mu, huelu eimün ngellu loncontucuqueimün tamün allcütuel,* feimu cüdaungei tamün quimelelngeal. 12 Fanten mu, quimeltuchefengeafulu eimün, huelu ca quiñe rupa duamnieimün tamün quimelelngeal ti hunenque dungu mülelu Chau Dios ñi dungu meu. Huiño duamtunieimün tamün lichitual, fütaqueche ñi iyael no. 13 Tati pichiqueche lichituquei, feimu quimlafi Chau Dios ñi nor dungu. 14 Huelu tati pu nehuencülelu tañi feyentun duamniei fütaqueche ñi iyael. Fill antü pepicantuquei tañi raquiduam, feimu quim ngüneduamquei chem ñi cümen ca chem ñi cümenon.

6 Deu feyentuiñ tati hunenque dungu taiñ quimelelngeel ta Cristo meu. Feimu rume yafüluhuaiñ taiñ quimchengeal, fei müchaique huiño ngüneduamlayaiñ ti hunenque quimeltun. ¿Chem quimeltun? Nor raquiduamtual ti falinochi femün mu, feyentual Chau Ngünechen mu, 2 fillque fautizahun, fampuhulelafiel ti cuhu quiñe che, ñi huiñomongetual pu layelu ca ñi rumel mülequen chem ñi dulliel Chau Dios juicio meu. 3 Chau Dios pile, quimchengeaiñ.

4 Quiñeque che elungei ta pelon, elungei ti yehun* huenu mu cüpalu ca Chau Ngünechen ñi nehuen. 5 Llohuingün Chau Ngünechen ñi cüme dungu ca peingün ti cüme felen* mülealu cüpalechi antü mu. 6 Huelu püntütripaingün,* pepi quellungequelai ñi nor raquiduamtual engün. Feichi che huiño clafantucuquefingün Chau Ngünechen ñi Fotüm orcon mamüll meu, fei yehuelcaquefingün pu che ñi adquiñ meu. 7 Ti mahun nagpaquelu mapu mu, fei ta quiñe cüme dungu Chau Ngünechen mu cüpalu. Tati co narfüquefi ti mapu, fei tüfa eluquefi fün feichi cüdaumapuquelu. 8 Huelu re chacai* ca troltro hueftripale, cümehuelayai ti mapu. Pichiñma mu Chau Ngünechen malisiayafi feichi mapu, af meu lüpümngeai.

9 Saquin pu peñi, saquin pu lamngen, femngechi dungu nütramcahuiyiñ rume, maneluucüleiñ tamün llohual doi cümeque dungu. Tüfachi dungu quelluaimünmeu tamün montual. 10 Chau Ngünechen norngei, fei ngoimaquelai* tamün femquen ca tamün piuqueyefiel tañi üi. Femngechi pengelimün tamün serfituniefiel fantepu mu tamün chaf feyentulelu.* 11 Huelu ayünieiñ caque quiñeque eimün tamün cüdaucüleal chumngechi femquefuimün ellaca mu. Femngechi rumel maneluucüleaimün ñi femtripayal chem tamün üngümnieel. 12 Fei chofüngelayaimün, doi mai inayentuafimün feichi pu che feyentulu ca ñom piuquengelu, feimu llohuingün tañi feipicünungeel.

13 Chau Ngünechen feipicünufilu ta Abrahán chem tañi llohual, quisu tañi üi mu feipicünui ñi chumal,* inei no rume doicülelai ta fei meu. 14 Feipifi: “Rüfcünu mai iñche cümelcayayu, fei femcünuan ñi alün-ngerpual tami cüpanche”. 15 Feimu Abrahán tañi ñom piuquengen llohui chem tañi feipicünulelngeel. 16 Pu che feipicünulu chem tañi chumal, doi falin che ñi üi mu feipicünuquei. Femngechi pengelqueingün ñi rüfngen tañi feipicünuel. Fei ca chem feipingequelai. 17 Chau Ngünechen ñi piel* caletuquelai. Fei ta ayüfui ñi cüme quimfalcünulelafiel tati pu che llohualu ñi feipicünuel, feimu pengeli ñi rüfngen tañi feipicünun. 18 Chau Ngünechen feipicünui ñi chumal ca pengeli ñi rüfngen tañi feipin. Tüfachi epu dungu caletuquelai ca Chau Ngünechen coilatuquelai. Tüfachi dungu müna yafültucuqueiñmeu iñchiñ, pu eluucülelu ñi incayaeteu Chau Dios. Femngechi nüucüleaiñ taiñ maneluhun mu. 19 Taiñ maneluhun rüfngei ca nehuen-ngei, nülcühue farcu reque felei* taiñ mongen mu. Tüfachi maneluhun yequeiñmeu ti mülehue furitu fütra cortina mu mülelu.* 20 Iñchiñ taiñ duam mu Jesús hune conpui feichi mülehue mu, fei pepicacünui ti rüpü ñi conpual iñchiñ. Fei rumel meu hunen lonco sacerdotengetui Melquisedec reque.

7 Tüfachi huentru Melquisedec ngünenierquefi Salem huaria, sacerdotecünueyu Chau Ngünechen, tati Doi Alüpüralelu. Abrahán huiñotulu ñi langümfiel tati pu lonco ülmen, Melquisedec trafmeyu, ngillatuñmaeyu. 2 Feimu Abrahán hudamcai ñi nieel mari troquiñ meu, fei elufi quiñe ta Melquisedec. Tañi üi feipilei: “Lonco ülmen nor chengelu”. Cafei Salem ñi lonco ülmen pingei, tüfa cüpa feipi: “Lonco ülmen cüpalquelu tüngün”.* 3 Quimngelai tañi chau, tañi ñuque, tañi tuhun pu che, tuntepu tañi choyüngen ca chumül tañi lan. Huelu femcünungei Chau Ngünechen ñi Fotüm reque, feimu rumel sacerdotengei.

4 Ngüneduamaimün ñi fente falin-ngen tüfachi huentru. Feimu taiñ cuifi lacu Abrahán mari troquiñ meu hudamcai ti doi cümelu tañi huehuel, fei quiñe troquiñ elufi ta Melquisedec. 5 Rüfcünu llemai, chumngechi feipi Moisés ñi ley, Leví tañi pu cüpanche sacerdotecünungelu huercüngeingün ñi cofrayafiel ti diezmo tati troquiñche,* tüfa tañi pu peñi, Abrahán tañi cüpanchengelu rume engün.* 6 Melquisedec, Leví ñi cüpanchengelai. Huelu Abrahán elueyu ti diezmo. Fei Melquisedec ngillatuñmafi tüfachi huentru llohualu Chau Dios ñi feipicünun. 7 Ti cümelcachequelu doicülei tati cümelcangelu meu, com pu che felei tati feipiafui. 8 Pu Leví che elungequefui ti diezmo, huelu fei engün laquechi huentru ürque. Ti cangelu huentru elungelu ti diezmo mongelei chumngechi feipi Chau Ngünechen ñi huirintucuel. 9 Feimu feipiafuiñ, Leví elungequelu rume ti diezmo, fei ca cullifi Abrahán ñi duam mu. 10 ¿Chumngelu cai?* Melquisedec trafmefilu ta Abrahán, Leví petu choyüngelafui Abrahán ñi cüpanchengeal, tañi cuifi lacu.

11 Moisés ñi ley elungelu pu Israel che elcünui ñi sacerdotengeal pu Leví che. Pu sacerdote Leví tuhun-ngelu quellufile pu che ñi culpafengehuenoal,* ¿duamngepeafui mai quiñe sacerdote Melquisedec reque? ¿Cümehuelai am quiñe sacerdote Aarón reque? 12 Chumngechi huecünungetui pu sacerdotengen, ca femngechi mülei ñi huecünungetual Moisés ñi ley. 13 Tüfachi huentru ñi nütramcangeel, cangelu troquiñche mu cüpai. Inei no rume feichi troquiñche mu cüpalu cüdauquelafui altar meu.* 14 Quimfali llemai, Judá troquiñche mu cüpai taiñ Ñidol. Moisés feipilai ñi tripayal sacerdote feichi troquiñche mu.

15 Tüfachi dungu doi cüme quimfali feula tripalu cangelu sacerdote Melquisedec reque. 16 Sacerdotengelai Leví ñi cüpanchengen mu, chumngechi feipi Moisés ñi ley. Huelu mai sacerdotengei nielu cai nehuen ñi elueteu mongen apümcangenolu. 17 Chau Ngünechen ñi huirintucuel mu feipingei: “Eimi rumel sacerdotengeaimi Melquisedec reque”.

18 Feimu ti cuifi huercün dungu famentungei, topalai ca quelluchequelai. 19 Moisés ñi ley quellulafi pu che ñi culpafengehuenoal.* Huelu Chau Ngünechen elueiñmu doi cüme maneluhun, femngechi fülconafuiñ* fei mu. 20 Chau Ngünechen pengelcünui ñi rüfngen tañi feipicünuel* sacerdotecünufilu ta Jesús. 21 Quiñeque huentru sacerdotecünungelu, Chau Ngünechen chem feipicünulai rume. Huelu tüfachi huentru sacerdotengerpui Chau Ngünechen feipilu: “Chau Jehová* feipicünui ñi chumal, fei huiño huitraulayai* tañi feipin mu. Eimi rumel sacerdotengeaimi”. 22 Feimu Jesús pengeli ñi rüf femtripayal quiñe doi cüme eldungu. 23 Cafei lalu pu sacerdote fentecünui tañi cüdau engün, feimu fentren sacerdote hueluconingün tañi cüdau mu. 24 Huelu Jesús afquelai ñi mongen, feimu inei no rume hueluconquelai tañi sacerdotengen mu. 25 Fei pepicaucülei ñi rüf montulafiel tati pu ngillatuquefilu ta Chau Dios Jesús ñi üi mu. Rumel mongelequei ñi dunguñpeafiel feichi pu che.

26 Iñchiñ duamnieiñ quiñe hunen lonco sacerdote Jesús reque. Fei manelfali, huesalcaquelai, lif chengei, püntütripalei* pu culpafe che meu,* huente callfü huenu mu püramyengei.* 27 Fei trürümngelai caquelu hunen lonco sacerdote meu. Duamfal-lai ñi fill antü hulal chalintucun,* hunelu mu quisu tañi culpan mu,* fei hula tati pu che ñi culpan mu.* Quiñe rupa müten femi tüfa chalintuculu tañi mongen, femngechi ñi quelluafiel pu che rumel meu. 28 Pu huentru hunen lonco sacerdotengelu tati ley ñi feipin mu culpaquei.* Huelu Chau Ngünechen, deu elcünulu Moisés ñi ley, feipicünui ñi hunen lonco sacerdotecünuafiel tañi Fotüm. Fei rüf pepicaucülei rumel meu.

8 Feitachi dungu taiñ nütramcamequen doi falin-ngei: femngechi chengei taiñ hunen lonco sacerdote, man püle anücünuhui Fütra Chau Ngünechen ñi ülmen huancu huenu mu. 2 Serfiquei ti doi Yamfal Mülehue mu ca ti rüfngechi tolto ruca* Chau Jehová ñi deumael.* Che ta deumalafi. 3 Com pu hunen lonco sacerdote dullingei ñi hulal mañumtun ca chalintucun.* Ca femngechi tüfachi hunen lonco sacerdote duamfalngefui ñi hulal chalintucun. 4 Mapu mu mülefule, sacerdotengelayafui, deu müleuyei pu huentru hulquelu chalintucun chumngechi feipi Moisés ñi ley. 5 Tüfachi pu huentru ñi cüdau adentulei ca pengelquei huenu mu müleyechi dungu. Tüfa quimfalcünungei Chau Dios feipifilu ta Moisés chumngechi ñi deumayal ti tolto ruca. Fei feipi: “Cüme ngüneduamnge com tami femal chumngechi pengelcünueyu huincul meu”. 6 Huelu feula Jesús elfalcünungei quiñe doi falin cüdau. Cafei rangiñelhuelei quiñe doi cüme eldungu meu. Tüfachi eldungu cüme elcünungei tati ley ñi feipin mu feipicünungelu ñi cüpayal doi cümeque dungu.

7 Nienofule huelulcan ti hunen eldungu, duamngelayafui quiñe hue eldungu. 8 Cüme quimfali tati, Chau Ngünechen peñmafi huelulcan tati troquiñche, feimu feipi: “‘Ngüneduamnge, püllelepai ti antü, fei feman quiñe hue eldungu pu Israel che ca pu Judá che engün’ feipi Chau Jehová.* 9 ‘Trürümngelayai feichi eldungu reque ñi femün iñche tamün pu cuifiqueche yem engün feichi nüñmafilu ñi cuhu engün ñi nentuafiel ta Egipto mapu meu. Inahuelafingün tañi eldungu, fei duamtuhuelafiñ engün’ pi Chau Jehová.*

10 ‘Rupale feichi antü, eldungucünulelafiñ pu Israel che tüfachi dungu’ pi Chau Jehová.* ‘Fei engün ñi raquiduam mu tucuan tañi ley, fei tañi piuque meu huirintucuafiñ. Taiñ Ngünechen piaeneu engün, fei iñche tañi troquiñchengeai engün.

11 Inei no rume quimeltuhuelayafi tañi pu chaf huaria che* ca tañi pu peñi. “¡Quimfinge ta Chau Jehová!”* pilayafi engün, feichi mu quimaeneu com che, itrocom engün.* 12 Iñche cutranpiuqueyeafiñ tañi norngenochi femün engün, raquiduamtucuhuelayafiñ tañi culpan engün’”.*

13 Fei “hue eldungu” feipilu, cümehuetulai tati cuifi eldungu. Pichiñma mu, ngehuetulayai feiti cuifi tuhun-ngelu ca cümehuenolu.

9 Ti hunen eldungu nierquefui fillque ley chumngechi ñi poyengeal ta Chau Dios. Mapu mu mülerquei ti tolto ruca* cheu ñi püramyengeal. 2 Tüfachi tolto ruca nierquefui epu mülehue. Ti hunelu Yamfal Mülehue pingei, tüfa mu mülerquei ti candelabro,* ti mesa ca ti yamfal cofque. 3 Cafei furitu ti epungechi cortina meu mülerquei tati Doi Yamfal Mülehue pingelu. 4 Fei mu mülerquei quiñe chemcün orongelu* ñi lüpümngeal incienso.* Ca mülerquei ti falin caja pengelquelu Chau Dios ñi eldungu re orongelu. Tüfa mu tucungerquei ti oro metahue nielu ti mana, Aarón ñi retrü rayülu, ca ti chapüd cura huirintucunielu Moisés ñi ley. 5 Huente ti falin caja mülerquei ti epu afmatufal querubin, tañi llaufeñ mu tacunierquefi ti tapa.* Huelu feula com cüme nütramcalayaiñ tüfachi dungu.

6 Femngechi deumangelu tüfachi dungu, pu sacerdote conpuqueingün ti hunen mülehue tolto ruca mu, femngechi ñi serfiafiel ta Chau Dios. 7 Huelu quiñe rupa tripantu mu ti hunen lonco sacerdote quisu conpuquei ti epungechi mülehue mu. Yeniequei ti mollfüñ ñi hulal quisu tañi femün mu ca tati pu che ñi culpan* quimnon mu. 8 Femngechi Chau Ngünechen ñi nehuen pengeli tüfachi dungu: petu mülelu tati hunen tolto ruca* inei no rume quimelelngelai ti rüpü ñi conal tati Doi Yamfal Mülehue meu.* 9 Feichi tolto ruca adentulei fantepu müleyechi dungu. Petu hulngequei mañumtun ca chalintucun,* huelu tüfa quelluquelafi tati serfiquefilu ta Chau Ngünechen ñi rüf cüme raquiduam nieal. 10 Tüfachi mañumtun ca chalintucun mu coneltulei ti iyael, chem ñi pütocongeal ca fillque liftun dungu.* Ti ley feipiquefui ñi femal tüfachi dungu nüucülelu ti cuerpo mu.* Mülefui ñi femngeal tüfa puulu hula ti medin antü ñi norümngetual ti dungu.

11 Huelu mai Cristo mülepalu hunen lonco sacerdote reque, cüpali cümelcan. Iñchiñ deu lloufiyiñ feichi dungu. Fei conpui tati tolto ruca doi falilu ca doi cümelu. Pu che deumalafi feichi tolto ruca, mapu tuhun-ngelai. 12 Quiñe rupa müten conpui tati Doi Yamfal Mülehue meu. Fei yenielai pu capüra ca hueque toro ñi mollfüñ, doi mai yeniei quisu tañi mollfüñ. Femngechi lifrenentueiñmu rumel meu. 13 Tati pu sacerdote pünequeingün ti capüra ca toro ñi mollfüñ. Ca lüpümngequei quiñe hue huaca, fei ti trufquen pachügtulelngequei tati pod chengetulu Chau Ngünechen ñi adquiñ mu, femngechi tañi liftungeal engün. 14 Chau Ngünechen ñi nehuen quellufi ta Cristo ñi chalintuculelafiel ta Chau Ngünechen tañi mongen nienolu culpan.* Feimu Cristo tañi mollfüñ doi fali. Fei liftuai taiñ raquiduam taiñ cuifique huesa femün mu, femngechi ñi serfiafiel taiñ mongelechi Ngünechen.

15 Feimu Cristo rangiñelhuelei tati hue eldungu mu. Fei tati pu mangelngelu feipicünulelngei ñi llohual afnoachi cümelcan. Cristo tañi lan mu femtripai tüfachi dungu. Femngechi ngillanentungei ta che, fei montulngei tañi huesa femün mu petu inaniefilu ti cuifi eldungu. 16 Quiñe che eldungucünulu Chau Dios engu duamfali ñi layal. 17 Petu mongelele ti che eldungucünulu, falin-ngelai tañi eldungucünuel. Lan mu falintungequei feitachi eldungu.* 18 Feimu ti cuifi eldungu, mollfüñ mu amultucungei. 19 Moisés deu feipifilu com ti troquiñche tati huercün dungu ñi feipiel ti ley, co meu reyülfi* ti mollfüñ tripalu hueque toro ca capüra mu. Nüi quiñe rüngi* quelü huilüf füu nielu huechuñ mu, fei pachügtufi ti lifru* ca com pu che. 20 Fei feipi: “Tüfachi mollfüñ mu falintungei Chau Dios ñi eldungu. Fei ayüniei tamün inanieafiel”. 21 Cafei mollfüñ mu pachügtufi* ti tolto ruca ca ti fillque chemcün pünengequelu ñi püramyengeal ta Chau Ngünechen. 22 Felei llemai, chumngechi feipi Moisés ñi ley, epe com dungu mollfüñ mu liftungequei. Hutrulngenole mollfüñ, rulpacünungequelai ti culpan.*

23 Feimu duamfalngefui ñi chalintucungeal culliñ, femngechi ñi liftungeal ti adentulelu huenu müleyechi dungu. Huelu ti huenu meu müleyechi dungu duamniei doi cümeque chalintucun. 24 Cristo conpulai tati Doi Yamfal Mülehue pu che ñi deumael, fei tüfa re adentulei müten tati rüfngechi Doi Yamfal Mülehue. Doi mai huenu mu conpui. Feula mai ta mülei Chau Dios ñi adquiñ mu iñchiñ taiñ fürenengeal. 25 Duamfalngelai Cristo ñi chalintucual tañi mongen fentren rupa chumngechi femquefui ti hunen lonco sacerdote, fill tripantu conpuquefui tati Doi Yamfal Mülehue mu ñi chalintucual pu culliñ ñi mollfüñ.* 26 Femngechi femfule, Cristo fentren rupa cutrancahuafui hue choyüngelu pu che mapu mu ta fantepu meu. Huelu feula Cristo peufaluhui quiñe rupa müten epe aflu ti müleyechi dungu,* fei ñi apümcayafiel ti culpan dungu* hulpalu quisu tañi mongen. 27 Quiñe rupa müten laquei ta che, fei hula mülei quiñe juicio. 28 Ca femngechi Cristo quiñe rupa müten chalintucui tañi mongen, fei ñi famentuafiel fentren che ñi culpan. Ca huiño peufaluule, duamfalngelayai ñi famentuafiel ti culpan.* Fei peaeyu tati pu che rüf piuque mu llihuatulelu* tañi montulngeal.

10 Cümeque dungu cüpayai. ¿Moisés ñi ley feichi dungu pemai? Fei no tati. Fei tüfa quiñe llaufeñ reque felei pengelquelu tati cüpayalu. Tati ley* ca tati chalintucun* hulngequelu fillque tripantu mu quelluquelafi pu püramyequefilu ta Chau Dios ñi culpafengehuenoal.* 2 Tati chalintucun quellufile ta che ñi culpafengehuenoal,* duamngehuelayafui ñi hulal chalintucun. Feimu pu serfiquefilu ta Chau Dios deu liftungelu, culpafengenolu* troquiafui tañi raquiduam. 3 Huelu mai tüfachi chalintucun mu fillque tripantu acordangequei* ti culpan dungu.* 4 Ti toro ca capüra ñi mollfüñ pepi apümquelafi ti culpan dungu.*

5 Cristo cüpalu mapu mu feipi: “‘Lloulaimi mañumtun ca chalintucun no rume, huelu eluen* quiñe cuerpo.* 6 Ayülaimi ti lüpümngeelchi culliñ ca tati chalintucungelu pu che ñi culpan mu no rume’.* 7 Feimu feipin: ‘¡Tüfei! Cüpan tati. Chau Ngünechen ñi huirintucuel* nütramcaquei ta iñche meu. Ahuem Chau Dios, cüpan tañi femal eimi tami ayünieel’”. 8 Hune feipi: “Ayülaimi ca lloulaimi chalintucun, mañumtun, lüpümngeelchi culliñ, ca tati chalintucungelu pu che ñi culpan mu no rume”.* Com tüfachi chalintucun hulngequei chumngechi feipi Moisés ñi ley. 9 Fei hula feipi: “¡Tüfei! Cüpan tañi femal eimi tami ayünieel”. Famentufi ti cuifi dungu,* fei elcünufi ti hue dungu.* 10 Feimu Chau Dios tañi ayünieel mu dullicünungeiñ. Jesucristo quiñe rupa müten chalintucui tañi cuerpo, fei tañi duam mu dullicünungeiñ.

11 Cafei com pu sacerdote fill antü eluuquei ñi femal tañi cüdau, femngechi ñi püramyengeal ta Chau Ngünechen. Fentren rupa hulquei chalintucun engün, huelu caquerumequelai chem tañi chalintucuel. Chem chalintucun no rume puulai ñi rulpacünungeal com ti culpan dungu.* 12 Huelu tüfachi huentru huli quiñe chalintucun müten ñi apümcayal ti culpan rumel meu,* fei Chau Dios tañi man püle anücünuhui. 13 Feimu üngümcülei tañi famnacümngeal tañi pu caiñe tañi miñche namun mu. 14 Quiñe chalintucun meu müten Cristo quelluquefi ti pu che dullicünungelu ñi culpafengehuenoal rumel meu.* 15 Cafei Chau Ngünechen ñi nehuen pengelquei ñi rüfngen tüfachi dungu, hune feipicünui: 16 “‘Rupale feichi antü, eldungucünulelafiñ engün tüfachi dungu’ pi Chau Jehová.* ‘Fei engün tañi piuque mu tucuan tañi ley, fei tañi raquiduam mu huirintucuafiñ’”. 17 Fei hula feipi: “Cafei raquiduamtucuhuelayafiñ tañi culpan engün* ca tañi huesaque femün no rume”.* 18 Feimu mai rulpacünungelu ñi culpan engün* duamngehuelai quiñe chalintucun tati culpan ñi duam mu.*

19 Feimu llemai pu peñi, Jesús tañi mollfüñ mu llicaquelaiñ* taiñ conpual tati Doi Yamfal Mülehue meu. 20 Jesús furitu ti cortina meu rupai, femngechi nülai quiñe hue rüpü yequelu ta mongen, ti cortina fei tañi cuerpo. 21 Iñchiñ ta nieiñ quiñe fütra sacerdote, elfalcünungei Chau Dios ñi ruca. 22 Feimu rüf piuque mu fülconafuiñ* ta Chau Dios mu. Rüf maneluucülequeiñ taiñ femngechi femal. Deu liftuñmangeiñ* taiñ piuque huesaque raquiduam mu, cafei lif co meu cüchañmangeiñ reque taiñ cuerpo. 23 Amulepe taiñ huldungual taiñ maneluhun, epu rume raquiduamquelayaiñ. Tati feipicünulu tüfachi dungu manelfali. 24 Hueluquentu duamtuniehuaiñ, fei yafültucuhuaiñ ñi pengelal piuqueyehun ca femal cümeque dungu. 25 Fentecünulayaiñ taiñ trahuluhual chumngechi huimtulequei quiñeque che. Huelu mai, hueluconque yafültucuhuaiñ, doyelchi mai püllelepalu cai Chau Dios ñi antü.

26 Deu cüme quimlu iñchiñ ti rüf dungu, huelu culpaliyiñ* quisu taiñ pin mu, ngehuelai quiñe chalintucun no rume ñi rulpacünungeal taiñ culpan.* 27 Re castigo müten üngümnieafuiñ llican mu ca ñi cüpayal iñchiñ mu fütra illcun* cütral reque apümcayafilu tati pu caiñetuquefilu ta Chau Dios. 28 Inei rume inanofile Moisés ñi ley cutranpiuqueyengequelai, fei epu cam cüla che ñi feipin mu langümngequei. 29 ¿Chem pimün cai? Mülei ñi doi castigangeal feichi che illamcafilu* Chau Ngünechen ñi Fotüm. Feichi che dullicünungei ti mollfüñ mu amultucungelu ti eldungu, huelu falintulafi. Cafei yamlafi* Chau Dios ñi nehuen, feiti cutranpiuqueyechequelu. 30 Iñchiñ quimniefiyiñ feichi feipilu: “Iñche mülei ñi cutrancayafiel engün. Huiñoleltuafiñ tunte tañi huesa femün engün”. Tañi huirintucuel ca feipilei: “Jehová* juzgayafi tañi troquiñche”. 31 Llicafali ti mongelechi Ngünechen ñi castigafiel quiñe che.

32 Huelu mai raquiduamnieafimün ti rupayechi antü. Feichi mu deu lloulu eimün ta pelon cutrancahuimün, huelu nehuentuimün rupalu fentren huesaque dungu mu. 33 Quiñeque mu pu che ñi adquiñ meu* hulelcangeimün ca lucatungeimün.* Caquelu rupa compañquefimün* tati pu femngechi rupamequelu. 34 Eimün cutranpiuqueyefimün tati pu carcelconcülelu. Müntuñmangeimün rume* tamün nieel, huelu fentecünulaimün tamün ayühun. Eimün quimnieimün chem tamün nieel doi fali ca afquelai.

35 Feimu llemai, amulepe tamün nehuen piuquengen,* fei rumeñma cümelcangeaimün. 36 Eimün duamnieimün tamün nehuentuleal, fei femülmün Chau Dios ñi ayünieel, llohuaimün chem tañi feipicünuel. 37 “Pichiñma mu” “feiti cüpalelu acuai, alüñmalayai”.* 38 “Ñi feyentun mu mongeleai tañi serfiqueteu nor chengelu”, fei “huiño huitrautule, lloulayafiñ”. 39 Huelu iñchiñ huiño huitrautuquelaiñ feichi che reque, fei engün apümcangeingün. Doi mai feyentuqueiñ, fei amuleai taiñ mongen.

11 Tati feyentulelu rüf quimniei ñi femtripayal chem tañi maneluucülen. Cafei tati feyentulelu cüme quimniei ñi rüfngen chem tañi maneluucülen pengequenolu rume. 2 Taiñ pu cuifiqueche feyentuingün, feimu Chau Ngünechen cüme troquieyu engün.

3 Taiñ feyentulen mu ngüneduamqueiñ, com dungu huenu mu ca mapu mu mülelu* cüme elcünungei Chau Ngünechen ñi pin mu. Feimu llemai, Chau Ngünechen adcünufi feichi dungu pengequenolu ñi deumayal tati pengequelu.

4 Abel tañi feyentun mu elufi ta Chau Ngünechen quiñe chalintucun* doi falilu ta Caín ñi chalintucun meu. Tañi feyentulen mu, Chau Dios pengelelfi ñi nor che troquifiel, feimu cüme llohui tañi chalintucun. Abel tañi feyentun mu petu dungumequei lalu rume.

5 Enoc tañi feyentulen mu yengetui ñi cutrancaunoal tañi lan mu. Chau Ngünechen yetueyu, feimu inei no rume pehuelaeyu. Petu ñi yengenon pengelelngei* ñi ayühuelfiel ta Chau Dios. 6 Quiñe che feyentunole, turpu ayühuel-layafi ta Chau Ngünechen. Ñi fülmaucüleal Chau Dios mu, ¿chem mülei ñi femal quiñe che? Mülei ñi maneluhual ñi mülen ta Chau Dios ca ñi fürenequefiel feichi pu che tañi serfiqueteu com piuque mu.

7 Noé tañi feyentulen mu pengeli ñi rume yamniefiel* ta Chau Ngünechen feipicünungelu chem ñi rupayal petu ñi pengenon. Fei deumai quiñe huampo ruca ñi montulafiel tañi pu che. Noé tañi feyentun mu quimfalcünui tüfachi dungu: duamfalngefui ñi apümcangeal mapu müleyechi dungu. Fei nor che pingetui tañi feyentulen mu.

8 Abrahán tañi feyentulen mu allcütufi ta Chau Ngünechen feipingelu ñi elcünual tañi mapu. Amui feichi mapu feipicünungelu ñi ngen-ngeal. Quimnolu rume cheu ñi amual, amui müten. 9 Tañi feyentun mu Abrahán catripanche reque miyahui* feichi mapu Chau Ngünechen ñi feipicünueteu tañi llohual. Tolto ruca mu* mülerquei quiñentrür ta Isaac ca Jacob engu. Fei engu ca feipicünungerquei ñi llohual tüfachi mapu. 10 Abrahán üngümnierquei feichi huaria rume cüme anümcünungelu. Chau Dios adcünufi ca deumafi feichi huaria.

11 Tañi feyentulen mu Sara niepüñeñi* deu cushelu rume, feyentui ñi manel chengen feiti feipicünulu ñi chem rupayal. 12 Abrahán tañi cuerpo* lalefui reque,* huelu tüfachi huentru mu cüpai fentren yall. Pu huangülen callfü huenu mu mülelu trüri tañi alün-ngen. Cafei chumngechi pepi raquingequelai ti cuyüm inaltu lafquen mu, ca femngechi felei Abrahán tañi cüpanche.

13 Com tüfachi pu che fentecünulai tañi feyentun puulu hula tañi layal. Fei engün lloulaingün chem tañi feipicünungeel, huelu puquintufingün, ayühun mu lloufingün. Pu che ñi adquiñ meu huldunguingün reque tañi catripanchengen ca tañi alüñmanoal feichi mapu mu. 14 Tati pu che femngechi huldunguquelu cüme quimfalcünuqueingün ñi nehuentu quintuyauquen cheu ñi müleal engün. 15 Fei raquiduamtucuniefule engün feichi mapu ñi elcünuel, peafuingün chumngechi tañi huiñotual. 16 Huelu feula nehuentuqueingün tañi llohual quiñe doi cüme mülehue. Fei tüfa coneltulei huenu mu, feimu Chau Ngünechen yehuequelai fei engün tañi Ngünechen ñi pingeal, fei pepicalelfi engün quiñe huaria.

17 Abrahán tañi feyentun mu hulcünufi reque ta Isaac ngüneduamngelu tunte tañi feyentulen. Felei llemai, tati huentru ayühunquechi lloulu chem tañi feipicünungeel, cüpa huli tañi quiñen fotüm 18 deu feipicünungelu rume tüfachi dungu: “Isaac meu tripayai tami cüpanche”. 19 Huelu Abrahán quimniefui Chau Dios ñi huiñomongeltuafiel tañi fotüm rangiñ ti pu layelu. Fei Chau Ngünechen montulfi ta Isaac ñi layal, femngechi adentucünui chem ñi rupayal cüpalechi antü mu.

20 Tañi feyentulen mu Isaac ngillatuñmafi tañi epu fotüm, Jacob engu Esaú. Feipicünulelfi engu chem dungu ñi rupayal.

21 Tañi feyentulen mu Jacob, epe lalu, ngillatuñmafi José ñi epu fotüm, recüluhui tañi retrü mu ñi püramyeafiel ta Chau Ngünechen.

22 Ñi feyentulen José, nütramcai ñi lifretripayal pu Israel che. Cafei epe puulu ñi layal, huercüi ñi yelelngetual tañi foro.*

23 Tañi feyentulen mu, Moisés tañi chau ca tañi ñuque cüla cüyen ellcacünufingu hue choyüngelu. Ngüneduamingu ñi cüme adngen tañi pichiche. Llicalaingu chem ñi huercüel ti lonco ülmen. 24 Tañi feyentulen mu Moisés, deu tremlu pilai ñi feipingeal Faraón ñi ñahue tañi püñeñngen. 25 Dulli ñi huesalcangeal quiñentrür Chau Dios tañi pu che engün. Famentufi ñi cüme rupaleal culpan dungu meu.* Feichi cüme rupan pichiñmaquei müten. 26 Moisés illamcangei tañi Dullinchengen mu,* huelu doi falintufi tañi illamcangen ta com falinque dungu Egipto mapu mülelu. Müna üngümniequefui llohual tañi cullitu. 27 Ñi feyentulen mu Moisés, elcünui Egipto mapu. Llicalafi ti lonco ülmen ñi illcun,* nehuentulefui, peniefi reque tati pengequenolu. 28 Tañi feyentulen mu, femi ti fiesta Pascua pingelu.* Pachügtufi* ti mollfüñ, femngechi Chau Dios ñi cüme püllü ñi langümnoafiel tati pu hunenque fotüm.

29 Ñi feyentulen mu pu Israel che, rupaingün Quelü pingechi lafquen mu anquen mapu püle reque. Huelu pu Egipto che ayülu ñi ca femngechi rumeal, ürfingün lafquen mu.

30 Ñi feyentulen mu, pu Israel che regle antü mu hualloñmafingün Jericó huaria ñi cura malal, fei tüfa teifünagi. 31 Ñi feyentulen mu, ti cüri domo* Rahab cüme lloufi tati pu lloftumefilu ti mapu, feimu lalai quiñentrür tati pu feyentunolu engün.

32 ¿Ca chem piafun iñche? Rume alüñmayafun tamün nütramcalelafiel ta Gedeón, Barac, Sansón, Jefté, David, Samuel ca Chau Ngünechen ñi caquelu huerquen. 33 Tañi feyentulen mu hueufingün pu gobierno, nor dungu femingün, llohuingün chem tañi feipicünulelngeel, catrütufingün ñi allfülnoaeteu pu trapial, 34 lüpümlaeyu engün ti üicülechi cütral, montuingün ñi langümngenoal fütra cuchillo mu, ngañhuadcülelu engün nehuencontuingün, llicalaingün hueichan mu,* inantucufingün pu soltau caiñetupafilu tañi troquiñche. 35 Quiñeque domo lai tañi pu che, huelu huiñomongetui engün. Cafei quiñeque huentru ahucangeingün, famentulafingün tañi feyentun femngechi ñi lifretripayal. Doyümingün ñi llohual quiñe doi cüme huiñomongetun. 36 Felei llemai, caquelu che huesaque dungu mu rupaingün, ayentungeingün, huimacangeingün, doyelchi mai cadena meu traricünungei, fei presungeingün. 37 Curatungeingün, ngüchaltucungei ñi huelulcayal engün, catrücangei ñi cuerpo engün, fütra cuchillo mu langümngeingün, fill püle miyaulu engün trülque ufisa ca trülque capüra tucutuhuingün, fillalefuingün, cüdaungechi dungu rupaingün ca huesalcangeingün. 38 ¿Coneltuafulu cai tüfachi mapu meu femngechi cümeque che? Huellin mapu* ca mahuidantu püle mülepuingün. Cafei fütraque cura ñi huechod ca lolo mapu meu ellcahuingün.

39 Tañi feyentulen mu, com engün pengelelngei* ñi ayühuelfiel ta Chau Ngünechen, huelu lloulaingün chem tañi feipicünungeel. 40 Chau Ngünechen raquiduamniefui taiñ eluaeteu doi cümeque dungu, femngechi fei engün hunelelayai* ta iñchiñ meu ñi culpafengehuenoal.*

12 Tüfachi fentren che tromü reque felei taiñ hualloñmanieteu. Fei engün huldunguquei chem tañi peel ca chem tañi allcütuel. Feimu llemai quiñe püle nentuaiñ com fanechi dungu ca feichi culpan* taiñ catrütufemqueteu. Fei yafüluhun mu lefcüleaiñ ti cuden cheu taiñ coneltulen. 2 Fei puquintunieafiyiñ ta Jesús, Chau Dios ñi dulliel. Fei quelluqueiñmu ñi tutelcaleal taiñ feyentun.* Quimnielu cai ñi ayüucüleal cüpalechi antü mu, eluhui ñi layal orcon mamüll meu,* yehuelai ñi illamcangen meu rume. Fei anüpui man püle Chau Ngünechen ñi ülmen huancu meu. 3 Felei llemai, tamün ngañhuadnoal ca afeluunoal rume, cüme raquiduamafimün ta Jesús. Fei afeluulai pu culpafe* ñi rume caiñetudungueteu. Feichi pu che quisu huesalcahuingün.

4 Eimün hueichamequefimün* ti culpan dungu,* huelu petu laconlaimün tamün hueichan mu.* 5 Cafei ngoimanentufimün* com ti ngülam tamün elungeel yall reque. Feipilei: “Saquin yall, illamcaquelayaimi Chau Jehová ñi ngülam.* Fei norümtuelmu, afeluulayaimi. 6 Chau Jehová* ngülamtuquefi feichi pu che ñi piuqueyeniefiel. Felei tati, norümtuquefi* com feichi che fei tañi yall ñi troquifiel”.

7 Norümtungelu eimün,* duamnieimün tamün nehuentuleal. Chau Ngünechen, quisu tañi yall troquieimünmeu. ¿Mülepei mai quiñe yall ñi norümtunoeteu tañi chau? 8 Com iñchiñ mülei taiñ norümtungeal, huelu eimün femngechi norümtungenolmün, Chau Dios ñi yallngelaimün, cangelu chau nieimün. 9 Cafei quisuque taiñ pu chau norümtuquefeiñmeu, fei iñchiñ yamniequefuiñ engün.* Ca femngechi Chau Dios adniequeiñmeu taiñ mongen quisu tañi nehuen mu. Fei, ¿eluucülenoafulu cai iñchiñ taiñ ngünenieaeteu, fei taiñ mongeleal? 10 Quisuque taiñ pu chau pichiñma norümtuqueiñmeu chumngechi ta cümelu ñi troquifiel. Huelu taiñ Fütra Chau norümtuqueiñmeu taiñ cümelcaleal, femngechi taiñ lif mongen nieal fei reque. 11 Rüfcünu mai, inei no rume ayüucülequelai tañi norümtungeel, doi mai hueñancün-ngei. Huelu tati pu eluucülelu ñi doi quimal, müna cümelcaqueyu, fei nieafuingün nor mongen ca cüme felen.

12 Feimu mai ta yafültucuafimün tati cuhu ngañhuadcülelu ca tati lucu nehuen-ngenolu. 13 Nor amuleaimün tati cüme rüpü meu, fei ñi doi huesalcanoal ti cüntrolelu, huelu mai tañi tremotual.* 14 Yafüluhuaimün tamün cüme yeucüleal com pu che meu ca tamün lif mongen nieal. Chem che rume lif mongen nienole, pelayafi ta Ñidol. 15 Llihuatulemün,* femngechi com che ñi llohual Chau Ngünechen ñi fütra cutranpiuqueyechen. Cafei llihuatulemün* femngechi tremlayai ta eimün meu chem huesa folil no rume* huesalcachequelu ca podümquefilu fentren che. 16 Llihuatulemün* ñi mülenoal ta eimün meu chem che no rume femquelu pod cudumuhun,* ca inei no rume illamcaquefilu Chau Dios ñi dungu chumngechi femi Esaú. Quiñe rali iyael mu hulcünui chem tañi llohuafel tañi hunen fotümngen mu. 17 Eimün quimnieimün, rupalu ta antü Esaú ayüniefui ñi llohual ti cümelcan, huelu famentungei. Ngümai, fei yafüluhui ñi cacünutual tañi chau ñi dulliel, huelu allcüngelai.

18 Eimün fülconpulaimün* quiñe huincul nüngequelu cuhu mu ca üicülelu, curü tromü nielu, fütra dumiñcülelu ca ñi hualloñmanieteu quiñe fütra cürüf. 19 Fülconpulaimün dungulngelu quiñe trompeta, ca ti huenu mu cüpachi dungun no rume. Tati pu che allcülu feichi dungun llellipuingün ñi dungungehuenoal. 20 Llicalerqueingün tüfachi huercün dungu mu: “Quiñe culliñ rume pünoconle ti huincul meu, mülei ñi curatungeal”. 21 Chem ñi rupan rume llicafalngefui, feimu Moisés feipi: “Müllmüllcülen fente tañi llican”. 22 Huelu eimün fülconpuimün quiñe huincul Sion pingelu huenu meu mülelu, taiñ mongelechi Ngünechen ñi huaria, ti huenu mülechi Jerusalén. Fülconpuimün rume fentren cümeque püllü meu* 23 quiñentrür trahulelu. Ca fülconpuimün Chau Ngünechen ñi hunenque yall trahulelu ca huirintucungelu tañi üi huenu meu, cafei Chau Ngünechen, tati itrocom juzgaquelu, ca tati pu nor che ñi adnieteu Chau Ngünechen ñi nehuen ca culpafengehuenolu.* 24 Cafei fülconpuimün ta Jesús meu rangiñelhuelelu ti hue eldungu mu, ca tañi mollfüñ pachügtueteu ta iñchiñ.* Feichi mollfüñ doi cümei ta Abel ñi mollfüñ meu.

25 Cuñiutuculemün tamün allcütuafiel feichi huenu mu dungumequelu. Cuifi tati pu che mapu meu allcütulafi Chau Dios ñi feipin,* feimu castigangei engün. ¡Doyelchi mai castigangeafuiñ iñchiñ allcütunoliyiñ tati dungumequelu huenu meu! 26 Feichi mu tañi dungun nengümcafi ti mapu, huelu feula feipicünui: “Ca quiñe rupa nengümcayafiñ tati mapu, huelu ca nengümcayafiñ tati huenu”. 27 Feipilu “ca quiñe rupa” pengeli ñi ngehuenoal feichi dungu nengümcangelu, tüfa tati deumangelu, femngechi ñi mülecayal tati nengümcangenolu. 28 Iñchiñ ta elungeaiñ taiñ ngünenieal, fei tüfa nengümcangelayai. Feimu llounieafiyiñ Chau Ngünechen ñi fütra cutranpiuqueyechen. Fei tüfachi fütra cutranpiuqueyechen mu serfinieafiyiñ ta Chau Ngünechen chumngechi ñi ayünieel, fütra yamün meu ca taiñ afmatufiel mu. 29 Taiñ Chau Ngünechen trürümfali quiñe cütral apümcaquelu.

13 Piuqueyeniehuaimün chumngechi piuqueyeuquei pu familia. 2 Pengelqueaimün tamün poyechefengen,* quiñeque che quimnolu rume lloufingün pu cümeque püllü tañi poyechefengen mu. 3 Raquiduamnieafimün tati pu presulelu,* quiñentrür engün presulelu troquihuaimün. Raquiduamnieafimün tati pu huesalcangelu, petu mongelelu cai eimün mapu mu fei engün reque.* 4 Com pu che mülei ñi yamnieafiel* ti curehuen dungu. Ti füta ca tañi domo ngelai ñi ñihualuhual engu. Chau Ngünechen juiciayafi tati pu che femquelu pod cudumuhun* ca tati pu ñihuañpeuquelu. 5 Tamün mongen meu, ngelai tamün diñmatuafiel ta plata,* ayüucülemün chem tamün nieel mu. Chau Dios feipicünui: “Turpu elcünulayayu, quisucünulayayu rume”. 6 Feimu rume maneluucüleafuiñ, fei feipiafuiñ: “Chau Jehová* quelluqueneu. Llicalayan. ¿Chumafeneu cai tati che?”.

7 Raquiduamniefimün feichi pu huentru tamün adnieteu, fei engün nütramcaeimünmeu Chau Dios ñi dungu. Ngüneduamlu eimün tañi cüme miyahun engün, inayentuñmayafimün tañi feyentun.

8 Cuifi, famülque, ca rumel meu Jesucristo caletuquelai.

9 Eluulayaimün tamün ngünencangeal fill caque quimeltun meu. Chau Ngünechen ñi rume cutranpiuqueyechen rüf nehuentucuaimünmeu tamün piuque. Rüfcünu mai, tati pu che doi falintuquefilu re iyael müten quelluquelaeyu engün tüfachi dungu.

10 Iñchiñ nieiñ quiñe altar, tüfa mu elungequelai ñi iyal feichi pu che serfiquefilu ta Chau Dios tolto ruca meu.* 11 Tati hunen lonco sacerdote conpuquei tati Doi Yamfal Mülehue meu, yeniequei pu culliñ ñi mollfüñ ñi chalintucuafiel pu che ñi culpan mu.* Huelu pu lachi culliñ lüpümngequei doi camapu cheu ñi mülenon pu che.* 12 Feimu Jesús ca cutrancahui huecuntu huaria mu,* fei quisu tañi mollfüñ mu huichucünufi tati troquiñche. 13 Feimu amuaiñ ta Jesús meu doi camapu cheu ñi mülenon pu che. Nehuentuleaiñ taiñ illamcangeal Jesús reque. 14 Tüfa mu nielaiñ quiñe huaria rumel mülealu, fei yafüluuqueiñ taiñ peal feichi huaria cüpayalu. 15 Feimu rumel püramyenieafiyiñ ta Chau Ngünechen, Jesús ñi duam mu. Tüfa ta chalintucun reque felei* taiñ eluafiel ta Chau Ngünechen, hun mu huldunguqueiñ tañi üi pu che ñi adquiñ meu. 16 Cafei ngoimalayaimün* tamün femal cümeque dungu ca misauqueaimün* tamün nieel caquelu che engün. Feichi dungu chalintucun reque felei, rume ayühuelquefi ta Chau Ngünechen.

17 Feichi pu huentru tamün adnieteu cuñiutucunieimünmeu, ca ramtucadungungeai tañi femün engün. Feimu allcütuafimün ca eluhuaimün tamün adnieteu engün.* Femngechi ayühunquechi femaingün tañi cüdau, huesa duamquechi no. Femnolmün, huesalcaleafuimün.

18 Ngillatuñmaniemuiñ. Iñchiñ cüme quimnieiñ taiñ nieel lif raquiduam, ayünieiñ taiñ nor chengeal com dungu mu. 19 Doyelchi mai feipihuiyiñ tamün llellipuafiel ta Chau Ngünechen, femngechi alüñmalayan ñi huiñotual ta eimün meu.

20 Chau Ngünechen niei ca hulquei tüngün.* Ti eldungu afquenolu, mollfüñ mu amultucungei. Feichi mollfüñ mu Chau Ngünechen huiñomongeltufi taiñ Ñidol Jesús rangiñ ti pu layelu. Jesús, fei tati fütra camañ ufisa. Feimu llellipuquefiñ ta Chau Ngünechen 21 tamün eluaeteu com tamün duamnieel. Fei pepicaucüleaimün tamün femal quisu tañi piel. Jesucristo ñi duam mu Chau Ngünechen yafültucuqueiñmeu taiñ femal quisu tañi ayünieel. Rumel püramyengepe ta Chau Ngünechen. Felepe mai.

22 Pu peñi, pu lamngen, llellipuhuayiñ: ñom piuque mu allcütumün tüfachi yafüluhun dungu, pichi amulcünun müten tüfachi carta. 23 Cüpa quimeleluhuiyiñ ñi lifreletun taiñ peñi Timoteo. Pichiñma mu cüpale, trür pemehuayiñ.

24 Lemoria* piafimün com pu huentru tamün adnieteu ca com pu chaf feyentulelu.* Pu peñi Italia mapu mülelu lemoria pieimünmeu.

25 Llellipulen tamün rume cutranpiuqueyeaeteu taiñ Chau Ngünechen.