SANTIAGO

1 Iñche ta Santiago, cüdahuelquefiñ ta Chau Ngünechen ca taiñ Ñidol Jesucristo. Huirintuculelfiñ tüfachi carta tati mari epu troquiñche huall püle mülelu.

Chalihuiyiñ.

2 Saquin pu peñi,* fill huesaque dungu rupalmün, rume ayüucülemün. 3 Eimün quimnieimün, tamün feyentun hueutripale femngechi huesaque dungu, fei quimürpuaimün tamün nehuentuleal. 4 Fei tamün nehuentulen mu cüme adümuucüleaimün, femngechi com dungu mu pepicaucüleaimün ca nielayaimün huelulcan chem dungu meu no rume.

5 Feimu müte nienolmün quimün, llellipuqueafimün ta Chau Ngünechen, fei llohuaimün quimün. Chau Ngünechen com piuque mu hulquei alün dungu, fei lladcütuquelafi tuchi tañi llellipueteu. 6 Huelu feyentun mu ngillatuleaimün, epu rume raquiduamquelayaimün. Tati epu rume raquiduamcülelu reu lafquen reque felei,* huall püle yequeyu ti cürüf. 7 Chau Jehová* eluaeneu tañi ngillatuel pilayafui feichi che. 8 Feichi che epu rume raquiduamcülequei, müchaique calerumequei tañi femün.

9 Huelu ti peñi pofrengelu, ayüucülepe* tañi saquingen mu. 10 Ca tati ricu ayüucülepe tañi illamcangen mu. Ti ricungelu afrumetuai lelfün mülechi rayen reque. 11 Tripan mu ti antü, tañi fütra are tonfüquefi ti anümca, fei llancünagquei ti rayen ca aftuquei tañi cüme adngen. Ca femngechi afrumetuai ti ricu che ñi diñmatufiel ta plata.*

12 Ayühun-ngei ti huentru amulelu ñi nehuentulen rupalu huesaque dungu mu. Fei cüme troquieliyu Chau Ngünechen, llohuai mongen cullitu reque.* Chau Jehová* feipicünufi tüfachi dungu tuchi tañi piuqueyenieteu. 13 Rupan mu huesaque dungu, inei no rume ngelai ñi feipial: “Chau Ngünechen ngüchaltucumequeneu”.* Chau Ngünechen pepi ngüchaltucungequelai ñi femal huesaque dungu, ca ngüchaltucuquelafi inei no rume. 14 Huelu mai caque quiñeque che ngüchaltucuqueyu quisu tañi illutuqueel, fei tüfa mainatunieyu reque. 15 Fei piuque mu foliluulu ti illutun, tati che culpaquei.* Fei tüfa yequeyu ñi layal.

16 Saquin pu peñi, quisu ngünencaulayaimün. 17 Com tati cümeque dungu ca com tati tutengelu Chau Ngünechen mu cüpai, huenu meu mülelu. Fei deumafi huenu mülechi pelon, cafei caletuquelai* chumngechi caletuquei ta llaufeñ. 18 Feyentulu iñchiñ Chau Dios ñi rüfngechi dungu, fei elueiñmu mongen quisu tañi pin mu. Femngechi com tati deumangelu, iñchiñ hune dullingeafuiñ.

19 Saquin pu peñi, ayünien tamün quimal tüfachi dungu: com eimün eluucülemün tamün allcütual,* matucaulayaimün tamün dungual ca illcufemlayaimün.* 20 Tati illcufe* inaquelai Chau Dios ñi norngechi dungu. 21 Feimu llemai quiñe püle nentuafimün com tati podngelu ca com tati huesaque dungu. Cafei ñom piuque mu eluucülemün ñi foliluhual tamün piuque mu Chau Ngünechen ñi dungu. Tüfa montulafui tamün mongen.

22 Huelu mai inanieafimün Chau Dios ñi dungu, re allcüquelayafimün müten, quisu ngünencaulayaimün coilaque raquiduam mu. 23 Inei rume allcüle Chau Ngünechen ñi dungu, huelu inanofile, trürümngeafui quiñe huentru reque lelihulfilu tañi ange comütuhue meu.* 24 Lelituuquei, huelu amutulu müten, ngoimafemtuquei* tañi chumngechi chengen. 25 Huelu tati che cüme lelihulfilu ti ley huelulcaquenolu ca lifrechequelu, fei com piuque mu inaniefile, trürümngelayafui quiñe che ngoimaquelu,* doi mai trürümngeafui quiñe che femquelu Chau Dios ñi feipin, fei ayüucüleai tañi femün mu.

26 Iñche püramyequefiñ ta Chau Dios pile quiñe che,* huelu ngünenienole tañi quehun, quisu ngünencauquei,* fei falilai tañi püramyequefiel ta Chau Dios. 27 Huelu mülei taiñ quelluafiel pu cuñifall ca pu lantu domo rupan mu huesaque dungu, ca püntütripaleaiñ* pu feyentuquenolu ñi femün podngechi dungu. Fei chumngechi taiñ püramyequefiel ta Chau Ngünechen* lifngeai ca nielayai huelulcan fei tañi adquiñ meu.

2 Saquin pu peñi, eimün deu feyentuleimün taiñ fütra Ñidol Jesucristo meu. Fei, ¿chumngelu am* dullintuchequeimün? 2 Tamün trahun meu amule quiñe huentru oro ihul cuhu nielu ca cüme tucutuucülelu, huelu ca amule quiñe pofre pod tacun yenielu, 3 ¿cüme llouquefimün tati huentru cüme tucutuucülelu? ¿“Fau püle anüpange tati doi cüme mülehue” piquefimün? Tati pofre cai, ¿“huitralecange” piquefimün? Cam, ¿“iñche tañi namun püle anünge” piquefimün? 4 Femngechi femülmün, doicülelu troquiquefimün quiñeque che ta caquelu meu. Fei juezcünuuqueimün tamün huesa juzgacheal, ¿felelai?

5 Saquin pu peñi, allcütumün. Chau Ngünechen dullifi tati pu che pofre troquingelu tüfachi mapu meu ñi ricu chengeal reque feyentun mu, ca conpuaingün Chau Ngünechen ngünenietule ta mapu chumngechi ñi feipicünufiel tañi pu piuqueyeteu. 6 Huelu eimün illamcaquefimün pu pofre. Pu ricu huesalcaqueimünmeu ca huingüdyequeimünmeu tribunal meu, ¿rüfngei no am? 7 Huesa dunguyequefingün tañi cüme üi tati ngen-ngelu eimün meu. 8 Chau Ngünechen ñi huirintucuel feipilei: “Piuqueyefinge tami chafche* chumngechi piuqueyehuimi ta eimi”. Feimu müna cümelcaqueimün inaniefilmün tüfachi doi cüme ley dungu.* 9 Huelu amulele tamün dullintuchequen culpamequeaimün,* fei tati ley quimfalcünuai tamün culpamequen.*

10 Inei rume inaniefile com ñi feipin Moisés ñi ley, huelu quiñe dungu meu müten huelulcaule, culpaconai* ñi rulpacünufiel com ti ley. 11 Feiti feipilu “ñihuaquelayaimi”, ca feipi “langümchequelayaimi”. Feimu ñihuanolmi, huelu langümchelmi, culpayaimi* tami rulpacünufiel ti ley. 12 Mülei quiñe ley adniefilu tati lifrelechi troquiñche. Eimün ta femngechi troquiñche, feimu pengelqueaimün tüfa tamün feipin ca tamün femün mu. 13 Juzgangele tati cutranpiuqueyechequenolu, cutranpiuqueyengelayai. Tati cutranpiuqueyechequelu hueutripaquei tañi juiciantucungen mu.*

14 Saquin pu peñi, ¿falin-ngepei mai quiñe che feipile ñi feyentulen, huelu tañi femün meu pengelnole ñi feyentun? ¿Montulpeafeyu mai feichi feyentun? Femlayafui. 15 Raquiduamaiñ: quiñe peñi, quiñe lamngen duamniei tacuhun* ca fill antü nielai ñi duamnieelchi iyael, 16 huelu quiñe ta eimün feipile “¡Cüme felenge! Nieaimi mai tacuhun ca iyael”, huelu elunofile chem ñi duamnieel tañi mongeam, ¿falin-ngepei mai? 17 Ca femngechi femnoliyiñ cümeque dungu, falilai* taiñ feyentun.

18 Huelu quiñe che feipiafui: “Eimi feyentuimi, huelu iñche femquen cümeque dungu. ¿Chumngechi pengelafen tami feyentun femnolmi cümeque dungu? Iñche mai tañi cümeque femün meu pengelelayu tañi feyentun”. 19 ¿Feyentuqueimi mai ñi quiñelen ta Chau Ngünechen? Cümei tati, huelu pu huecüfü ca feyentuqueingün, llicaniefingün ta Chau Ngünechen.* 20 ¡Ahuem huedhued huentru! Femnoliyiñ cümeque dungu, falilai taiñ feyentun, ¿ngüneduamlaimi am? 21 Taiñ cuifi lacu Abrahán nor che troquingei tañi femün meu, ¿felelai? Felei llemai. Huente altar* elcünufi tañi fotüm Isaac, fei nor che troquingei. 22 ¡Quimfali llemai! Tañi femün meu Abrahán pengei tañi feyentun, tañi femün mu cüme pengeli ñi rüf feyentulen. 23 Femngechi femtripai Chau Ngünechen ñi huirintucuel, feipi: “Abrahán feyentui Chau Jehová mu,* fei nor che pingei”. Fei Chau Jehová* hueni pieyu.

24 ¿Ngüneduamimün? Nor che troquingei ta che tañi femün mu, feyentun meu müten no. 25 Ca femngechi ti cüri domo* Rahab tañi femün mu nor che troquingei, ¿felelai? Felei llemai. Cüme lloufi tati pu huerquen ca quellufi ñi lefmahual, fei nor che troquingei. 26 Ti cuerpo* nienolu neyen laquei. Ca femngechi femnoliyiñ cümeque dungu, lai reque taiñ feyentun.

3 Saquin pu peñi, fentren eimün quimeltuchefengelayafuimün.* Eimün quimnieimün, iñchiñ doi fütra juiciantucungeaiñ. 2 Com iñchiñ fentren rupa huelulcauqueiñ.* Feiti turpu huelulcaquenolu tañi dungun meu, culpan chengelai,* fei pepicaucülei ñi ngünenieafiel com tañi cuerpo.* 3 Ñi ngünenieafiel ti cahuellu, hun meu tuculelquefiyiñ huitrantucuhue, fei ngüneniequefiyiñ ti cahuellu. 4 Ngüneduamfimün tati farcu, fütrañmangelu rume ca fütraque cürüf nengümqueyu, huelu ngüneniequeyu quiñe pichi chemcün, timon pingelu. Fei ti che adniefilu ti timon, cheu rume yequefi ti farcu.

5 Ca femngechi femquei taiñ quehun, pichingelu rume taiñ cuerpo mu, huelu fütra mallma dunguquei. ¡Ngüneduamaimün chumngechi quiñe pichi cütral lüpümquefi quiñe fütra mahuidantu! 6 Ti quehun cütral reque felei. Com ti troquiñ ñi nieel taiñ cuerpo, ti quehun apolei norngenochi dungu mu, podümquefi com ti cuerpo, huesalcaquefi ta che ñi mongen, Gehena reque felei* tañi huesalcachequen mu. 7 Ngüneniengequei fillque auca culliñ,* üñüm,* tati huinolquiyauquelu* ca tati lafquen mu mülelu, pu che ta ngüneniequeyu. 8 Huelu chem che rume pepi ngüneniequelai ti quehun. Ngünefalngelai ca huesalcachequei, rume niei veneno* langümchequelu. 9 Quehun mu püramyequefiyiñ taiñ Fütra Chau Jehová,* huelu quehun mu ca malisiaquefiyiñ pu che, deumangeingün rume “ñi trürümfalngeal Chau Ngünechen mu”. 10 Hun meu püramyequefiyiñ ta Chau Dios ca malisiachequeiñ.

Saquin pu peñi, tüfachi dungu ñi rupamequen cümelai. 11 Quiñe hufco mu müten* tripaquelai cochü co ca füre co,* ¿felelai? 12 Saquin pu peñi, ti higuera anümca hulquelai aceituna, ca ti anüm ofad hulquelai higo. Cafei cotrü co mu entungequelai cochü co, ¿felei no am?

13 ¿Inei ta eimün niei quimün ca adümuhun? Mülei ñi cüme miyahual, femngechi pengelai ñi femquen itrocom dungu ñom piuque mu. Tañi quimün elueyu ñi ñom piuquengeal. 14 Huelu tamün piuque mu nielmün fütra ütriruhun ca yafcahun,* mallmauquelayaimün tamün quimün meu. Femülmün, coilatuafuimün. 15 Feichi quimün huenu mu cüpalai, mapu mu tuhui, Huecüfü mu cüpai. Tuchi inaquefilu quisu tañi illutuqueel müten niei feichi quimün. 16 Cheu ñi mülen ütriruhun ca yafcahun,* müleai pofolcahun ca itrofill huesaque dungu.

17 Tati nielu huenu mu cüpachi quimün, femngechi chengei: hunelu mu lif piuquengei, cafei tüng chengei,* ñom piuquengei,* eluucülequei ñi femal tañi feipingeel, rume cutranpiuqueyechequei, fentren cümeque dungu femquei, dullintuchequelai ca cüme piuque femfaluuquelai. 18 Tuchi cüme yeucülequelu caquelu che engün, quelluquei ñi müleal tüngün. Fei, ¿chum tripaquei? Norngei tañi femquen engün.

4 ¿Chumngelu* quehuaqueimün ca yafcauqueimün? ¿Tamün huesa illutun meu tripapelai tüfachi dungu? Tamün illutun quehuamequei reque tamün ngünenieaeteu. 2 Eimün cüpa nieimün, huelu nielaimün. Amulei tamün üdechequen* ca tamün diñmatuquen,* huelu pepi nielaimün tamün ayünieel. Amulei tamün quehuamequen ca tamün yafcaumequen. Eluen piquelaimün, feimu nielaimün. 3 Eimün huesa piuque mu eluen piqueimün, femngechi tamün femal tamün culpafe cuerpo* ñi illutuqueel, feimu llemai elungequelaimün.

4 Eimün pu elcünufilu ta Chau Ngünechen,* ¿quimlaimün am? Tuchi hueniyefilu mapu müleyechi pu che caiñetuquefi ta Chau Ngünechen. Feimu llemai inei rume cüpa hueniyefilu mapu müleyechi pu che, Chau Ngünechen ñi caiñengetui. 5 Chau Ngünechen ñi huirintucuel feipilei: “Taiñ piuque ngüchaltucuqueiñmeu taiñ ütrircheal, feimu rume illuniequeiñ fillque dungu”. ¿Ngünam huirintuculei tüfachi dungu? 6 Huelu Chau Ngünechen ñi fütra cutranpiuqueyechen quelluqueiñmeu taiñ huehuafiel feichi illutun. Feimu Chau Ngünechen ñi huirintucuel feipi: “Chau Dios quiñepülecünuquefi pu mallma che, huelu rume cutranpiuqueyequefi tati ñom piuquengelu”.

7 Feimu llemai eluucülemün tamün ngünenieaeteu Chau Ngünechen. Huelu nehuentulemün tamün famentuafiel ta Huecüfü, fei lefmahuai eimün meu. 8 Fülconmün* Chau Ngünechen mu, fei fülconai ta eimün meu. Eimün pu culpafe,* liftuumün tamün huesaque femün meu. Eimün pu epu rume raquiduamquelu, liftumün tamün piuque. 9 Mülei tamün rume hueñancüleal ca ngümayal. Cümelai tamün ayecaucüleal, doi mai mülei tamün ngümayal. Cümelai tamün ayüucüleal, doi mai mülei tamün hueñancüleal. 10 Ñom piuque mu eluucülemün tamün ngünenieaeteu Chau Jehová,* fei saquiaimünmeu.

11 Pu peñi, fentecünumün tamün hueluquentu dunguyeumequen. Inei rume dunguyefile cam juzgafile tañi peñi, dunguyequefi ca juzgaquefi ti ley. Feimu juzgafilmi ti ley, juez reque feleimi, inahuequelafimi ti ley. 12 Quiñelei müten tati hulquelu ley ca juzgachequelu, fei müten montulafui cam apümcayafui quiñe che. Huelu, ¿inei am ta eimi tami juzgayafiel tami chafche?*

13 Allcütumün, eimün feipiqueimün: “Fachantü cam hule amuaiñ feichi huaria mu, quiñe tripantu mülepuaiñ, negociapuaiñ, fei huehuaiñ plata” piqueimün. 14 Huelu quimlaimün ñi chumleal tamün mongen ta hule. Trucur reque feleimün, pichiñmaquei, fei ñamrumetuquei. 15 Huelu mai, mülefui tamün feipial: “Chau Jehová pile* mongeleaiñ, fei femaiñ tüfa cam feiti”. 16 Huelu eimün mallmauqueimün ca rume checauqueimün. Huesalcalei tüfachi mallmahun. 17 Huelu inei rume quimle tañi femal tati cümeque dungu, huelu femnole, deu culpamequei tati.*

5 Eimün pu ricu che, allcütumün. Ngümayaimün, hueñancüleaimün tati huesaque dungu tamün contupayaeteu. 2 Funalei tamün falinque fillem ca piruñmalei tamün tacun. 3 Huesañmahui tamün oro* ca tamün plata. Tüfachi dungu ñi huesañmaucülen quimfalcünuai tamün huelulcalen, fei apümcayaimünmeu. Chem tamün ngülümcünuel tamün nieal afaelchi antü meu, cütral reque felei. 4 Eimün cullilafimün tati pu cüdaufe cosechaquelu tamün lelfün meu, feimu amulei ñi huirarmequen engün. Chau Jehová,* tati Ñidolcülelu pu hueichafe mu, allcütui tati pu cosechaquelu ñi huirarmequen tañi quellungeal. 5 Mapu meu eimün ülmen mongen nierpuimün ca eluhuimün tamün cüme rupaleal müten. Eimün icahuimün ca motrileimün, chumngechi motrilei chi culliñ puulu chi antü tañi ilotungeal. 6 Condenafimün ca langümfimün tati nor che, feimu fei caiñetueimünmeu.

7 Feimu llemai pu peñi, ñom piuque mu üngümcülemün mülele iñchiñ mu taiñ Ñidol.* ¡Ngüneduamafimün tati cüdauquelu mapu! Ñom piuque mu üngümcülequei tati mapu ñi hulal ñi falin-ngechi fün aculu hula tati hunenque mahun ca tati inan acuquelu. 8 Eimün ca, ñom piuque mu üngümcülemün, nehuentulepe tamün piuque, püllelepai ñi müleal iñchiñ mu taiñ Ñidol.*

9 Pu peñi, hueluconque illcutuulayaimün,* femngechi tamün juzgangenoal. ¡Pichiñma mu cüpayai* ti juez! 10 Pu peñi, inayentuafimün Chau Ngünechen ñi pu huerquen, dunguingün Chau Jehová ñi üi meu.* Fill huesaque dungu mu cutrancahuingün, huelu ñom piuque mu nehuentuingün. 11 Ayüucülelu troquiquefiyiñ tati pu che nehuentulelu. Eimün allcütuqueimün Job tañi nehuentulen ca quimimün ñi cümelcaeteu Chau Jehová.* Feimu quimnieimün Chau Jehová* ñi rume poyechefengen ca ñi cutranpiuqueyechen.

12 Saquin pu peñi, feitachi dungu rume falin-ngei: feipicünulu tamün chumal,* eldungucünulayaimün ti huenu cam ti mapu ñi duam mu cam chem dungu rume tañi duam. Doi mai feman pilmün, femaimün. Ca femlayan pilmün, femlayaimün. Femngechi Chau Ngünechen juzgalayaimünmeu.

13 ¿Eimün meu mülei quiñe che cutrancaucülelu? Llellipulepe. ¿Mülei quiñe che ayüucülelu? Ülcantupe salmo. 14 ¿Eimün meu mülei quiñe che cutrancülelu?* Mülei ñi mütrümafiel pu loncolelu trahunche mu, fei ngillatuñmayaeyu engün. Lonco meu tuculelngeai aceite Chau Jehová ñi üi meu.* 15 Fei ti cutrancülelu* tremotuai* ngillatuñmangelu feyentun mu, cafei Chau Jehová* huitrañpüramtuaeyu. Fei culpafule* ti che, rulpacünuñmangeai tañi culpan.*

16 Feimu llemai, hueluconque entudunguhuaimün tamün culpan* ca ngillatuñmahuaimün, femngechi tamün tremotual. Tati nor che ñi llellipun rume nehuen-ngei ca quelluchequei. 17 Elías iñchiñ reque duamcülequefui tañi piuque. Huelu com piuque mu llellipulu ñi mahunnoal, cüla tripantu ca cayu cüyen mahunlai feichi mapu meu. 18 Fei ca quiñe rupa llellipui, huenu mu nagpai mahun, fei ti mapu huli ñi fün.

19 Saquin pu peñi, quiñe ta eimün püntünentungele* ti rüf dungu meu, fei cangelu che quellueliyu ñi huiñotual, 20 feichi che quellufile tati culpafe* ñi elcünutual tañi huesa rüpü, montulafi ñi lanoal ca quelluafi ñi rulpacünuñmangeal tañi culpan.*