1 PEDRO

1 Iñche ta Pedro, Jesucristo ñi apostol.* Huirintuculelfiñ tüfachi carta tati pu che* huall püle mülelu: Ponto, Galacia, Capadocia, Asia ca Bitinia mapu mu. Cafei huirintuculelfiñ tati pu dullinche. 2 Taiñ Chau Ngünechen dullicünueimünmeu chumngechi ñi pepicacünuel. Elueimünmeu tañi nehuen, femngechi tamün dullinchengeal. Femi tüfa tamün inayafiel tañi feipin ca tamün liftungeal Jesucristo ñi mollfüñ meu.

Llellipulen tamün rume cutranpiuqueyeaeteu Chau Ngünechen ca tamün eluaeteu tüngün.*

3 Püramyengepe taiñ Ñidol Jesucristo ñi Chau Ngünechen,* fei tañi fütra cutranpiuqueyechen elueiñmeu taiñ huiño choyüngetual. Feimu Jesucristo ñi huiñomongetun rangiñ pu layelu nieiñ maneluhun rumel mülequelu. 4 Chau Ngünechen eluaimünmeu mongen* apümcangequenolu ca huesañmauquenolu,* huenu meu nieleimünmeu. 5 Tamün feyentulen mu, Chau Ngünechen ñi nehuen cuñiutucunieaimünmeu tamün montulngeal. Tüfachi montuluhun quimfalcünungeai puucülele ñi afal chi antü. 6 Feimu eimün rume ayüucüleimün, huelu fill huesaque dungu rupayafuimün pichiñma mu. 7 Tüfachi dungu rupaquei ñi quimfalcünungeal tunte ñi nehuentulen tamün feyentun. Feitachi feyentun doi fali ta oro meu,* cütral mu rupalu rume ti oro huesañmauquei. Feitachi feyentun meu saquingeaimün, püramyengeaimün ca yamngeaimün* peufaluule ta Jesucristo. 8 Eimün turpu pelafimün, huelu piuqueyeniefimün. Feula pequelafimün ta Cristo, huelu feyentuquefimün. Cafei rumeñma ayüucüleimün, feipifalngelai rume fente tamün ayühun. 9 Fei ayühun mu montulngeaimün fente tamün feyentun.

10 Tañi pu huerquen huldunguingün tamün rume cutranpiuqueyeaeteu Chau Ngünechen, ayühunquechi ramtuingün ca cüme ngüneduamfingün tüfachi montuluhun dungu. 11 Fei engün nierquei Chau Ngünechen ñi nehuen, fei tüfa feipicünui chem ñi rupayal ta Cristo. Fei pu huerquen cüme ngüneduamingün chumül ñi femtripayal tüfa ca chem dungu ñi müleal. Chau Ngünechen ñi nehuen feipicünui chumngechi ñi cutrancahual ta Cristo ca chumngechi ñi püramyengeal. 12 Chau Dios quimelelfi tati pu huerquen tüfachi dungu: fei engün tañi duam mu huldungulaingün, eimün tamün duam mu llemai. Chau Ngünechen ñi pu huerquen huirintucuingün chem tamün huldungulelngeel. ¿Chumngechi allcütuimün tüfachi dungu? Feichi pu che nielu Chau Ngünechen ñi nehuen huenu mu nagpalu huldungueimünmeu ti cümeque dungu. Tati pu cümeque püllü rume cüpa ngüneduamfingün tüfachi dungu.

13 Feimu llemai pepicaucülemün* tamün cüdahual, cüme raquiduam nieaimün com dungu meu, ca maneluucülemün tamün rume cutranpiuqueyengeal peufaluule ta Jesucristo. 14 Feula eimün Chau Ngünechen ñi yallngeimün, fei feyentuquefimün. Feimu eluulayaimün tamün ngünenieaeteu ti cuifique illutun tamün niequefel petu tamün quimnofiel ta Chau Dios. 15 Doi mai chumngechi lifngei* Chau Ngünechen tamün mangeleteu, eimün ca lif chengeaimün com tamün femün meu. 16 Chau Ngünechen ñi huirintucuel feipilei: “Chumngechi ñi lifngen iñche, eimün ca lif chengeaimün”.*

17 Taiñ Fütra Chau dullintuchequelai ñi juzgayafiel caque quiñeque che tañi femün mu. Fei llellipufilmün, tamün femün mu pengelaimün tamün rume yamniefiel petu tamün mülen tüfachi mapu meu catripanche reque.* 18 Tamün pu cuifiqueche elcünueimünmeu tamün ngünam mongen yenieal. Eimün montulngeimün feichi mongen meu, huelu hulngelai huesañmauquechi chemcün, plata cam oro no rume. 19 Doi mai hulngei Cristo ñi falin mollfüñ, quiñe lif cordero ñi mollfüñ reque nienolu huelulcan. 20 Rüfcünu mai, petu ñi choyüngenon pu che mapu meu, Chau Ngünechen dullicünurquefi ta Cristo, huelu eimün tamün duam mu peufaluhui afaelchi antü meu. 21 Fei ñi duam mu eimün feyentuqueimün Chau Dios mu. Fei huiñomongeltufi rangiñ ti pu layelu, ca elufi tañi saquingeal, femngechi tamün feyentual ca maneluhual Chau Dios mu.

22 Eimün inaniefimün ti rüf dungu, feimu lif chengeimün. Femngechi eimün rüf piuqueyeuqueimün chumngechi piuqueyeuquei pu familia. Feimu com piuque meu hueluquentu piuqueyeuqueaimün. 23 Eimün huiño choyüngetuimün reque. Huelu choyüngetulaimün quiñe laquechi fün meu, doi mai huesañmauquenochi fün meu* choyüngeimün. Chau Dios ñi dungu meu choyüngetuimün, fei rumel mongelequei. 24 “Com pu che cachu reque felei, tañi cüme ad lelfün mülechi rayen reque felei. Ti cachu tonfüquei, fei ti rayen llancüquei, 25 huelu Chau Jehová ñi dungu* rumel mülequei”. ¿Chem am tüfachi “dungu”? Tati cümeque dungu tamün amuldungulelngeel.

2 Feimu famentuumün fill huesaque dungu mu: ngünencan, cüme piuque femfaluhun, ütriruhun ca fill dallucan dungu meu. 2 Tati pichiche rume cüpa lichituquei. Ca femngechi eimün rume illutunieafimün tati cüme lichi reque* ñi hulqueel Chau Dios ñi dungu, femngechi cüme tremaimün ca montulngeaimün, 3 quimlu cai eimün* ñi cüme piuquengen ta Ñidol.

4 Pu huentru illamcafingün tati mongelechi cura, huelu Chau Ngünechen dullieyu ca falintueyu. Fülconpulu eimün* fei meu, 5 mongelechi cura reque elcünungeimün tamün deumangeal quiñe ruca reque, Chau Ngünechen ñi nehuen mu, femngechi dullin sacerdotengeal. Fei tamün adnieteu Chau Ngünechen ñi nehuen, hulaimün chalintucun* Chau Ngünechen ñi ayünieel Jesucristo ñi duam mu. 6 Chau Ngünechen ñi huirintucuel feipilei: “Sion meu elcünun quiñe dullin cura, tati doi falin cura cheu ñi anümngeal ti ruca. Tuchi feyentulu fei meu, turpu huesa duamlayai”.*

7 Feimu llemai Jesús falin-ngei ta eimün meu, feyentulelu cai eimün. Huelu tati feyentuquenochi che meu “ti cura ñi illamtuel pu deumarucafe, feita doi falin curangetui”,* 8 “quiñe cura mutrurquefilu pu che ca quiñe fütra cura huelulcachequelu”.* Fei engün mutrurtucuuquei tañi feyentunofiel Chau Dios ñi dungu. Femngechi felerpuai engün. 9 Huelu eimün “concüleimün quiñe dullin troquiñche meu, quiñe troquiñ lonco ülmen sacerdotengelu, quiñe lif troquiñche, Chau Ngünechen ñi pu dullinche, tamün huldungual huall püle Chau Ngünechen ñi cüme piuquengen”.* Fei ta mangeleimünmeu tamün tripayal dumiñ meu, femngechi tamün müleal tañi afmatufal pelon meu. 10 Eimün troquiñchengelafuimün, huelu feula Chau Dios ñi troquiñchengetuimün. Eimün cutranpiuqueyengelafuimün, huelu feula cutranpiuqueyengeimün.

11 Saquin pu peñi, camapu cüpachi che reque feleimün, catripanche reque tüfachi mapu meu. Llellipuhuiyiñ tamün famentuafiel tamün culpafe cuerpo* ñi illutuqueel. Tüfachi illutun hueichamequei reque* ta eimün meu. 12 Cüme miyauqueaimün mapu mülechi pu che meu. Feimu huesaque che pielmünmeu, fei engün peai tamün cüme femmequen. Femngechi püramyeafingün ta Chau Ngünechen puule chi antü ñi ngüneduamcheal.

13 Ñidol tañi duam mu eluucülemün tamün adnieaeteu com pu autoridad ñi elcünuel pu che, quiñe lonco ülmen doicülelu ta eimün meu 14 cam pu gobernador* huercüngelu ñi castigayafiel tati pu huesalcamequelu, ca ñi saquiafiel tati pu cümelcamequelu. 15 Fei chumngechi ayüniei Chau Dios, tamün cümeque femün meu ñücüfcünuafimün* tati pu huedhued ngam fillpimequelu. 16 Lifrelechi che reque mongelemün. Huelu allmalltulayaimün tamün huesa miyahual tamün lifre chengen mu, doi mai tamün serfiafiel ta Chau Dios. 17 Yamnieafimün itrofill che.* Piuqueyeafimün com pu peñi ca pu lamngen. Rume yamnieafimün ta Chau Ngünechen. Yamafimün tati lonco ülmen.

18 Tati pu cüdaufe, eluucülepe ñi ngünenieaeteu tañi ñidol fütra yamün mu, tati pu tutefalngelu ca cümeque ñidol müten no, tati pu tutefalngenolu cafei. 19 Inei rume yafüluuquelu ñi cüme raquiduam nieal Chau Ngünechen ñi adquiñ mu, nehuentulequei huesaque dungu meu* ca cutrancauquei tañi chumnon rume. Chau Ngünechen cüme troquiquefi feichi che. 20 Hulelcangelmün tamün huesa femün meu, fei nehuentuleimün, ¿chem cümelcamequeimün am? Huelu cutrancahulmün tamün cümeque femün meu, Chau Ngünechen rume ayüquei tamün nehuentulen.

21 Tüfachi dungu mu mangelngeimün, Cristo cutrancahui eimün tamün duam meu. Femngechi pengelcünui tamün chumal, fei tamün cüme inayentuñmayafiel tañi femün. 22 Cristo turpu culpalai,* ngünencan dungulai rume. 23 Huesa pimequengelu, huiñoldungulai* huesaque pin mu. Petu cutrancaumequelu, aneltulafi engün,* doi mai elcünui ñi dungu tati nor juzgachequelu ñi cuhu meu. 24 Clafantucungelu orcon mamüll meu,* meñcu yefi reque taiñ culpan* quisu tañi cuerpo meu, femngechi montuleiñmu culpan dungu mu ca mongeleiñ taiñ femal nor dungu. “Quisu tañi allfen mu, eimün tremolngetuimün”.* 25 Ñamquiyauchi ufisa reque felefuimün, huelu feula huiñotuimün tati camañ ufisa meu, fei tamün cuidanieteu.

3 Cafei eimün pu domo, eluucülemün tamün ngünenieaeteu tamün füta. Femngechi quiñeque engün inanofile Chau Dios ñi dungu, quelluafimün tañi feyentual engün. Huelu tamün dungufiel no, tamün cümeque femün mu llemai, 2 tañi pefiel engün tamün cüme miyahun* ca tamün rume yamquefiel engün.* 3 Re adelcalayaimün tamün cuerpo,* rumeñma adelcalayaimün tamün lonco,* tucutuulayaimün oro llancatu* ca rume falichi tacun no rume. 4 Doi mai mülei ñi cüme adelcahual tamün chumngechi chengen piuque mu. Feimu ñochi duam ca ñom piuque mu adelcahuaimün. Chau Ngünechen rume falintuquefi tüfachi dungu. Femngechi adelcahun turpu huesañmauquelai. 5 Femngechi adelcauquefuingün pu cuifique domo serfiquefilu ca maneluulu Chau Dios mu, fei eluuquefuingün ñi ngünenieteu tañi füta. 6 Chumngechi femi Sara, inaquefui Abrahán ñi feipin, cafei ñidol feipiquefui tañi füta. Eimün inayentuafuimün ta Sara amulele tamün cümeque femün ca eluunolmün chem no rume tamün llicalcayaeteu.

7 Cafei eimün pu füta, ñi quiñentrür müleal tamün domo engu mülei tamün cüme quimafiel chem ñi mülen tañi piuque meu.* Falintuqueafimün tamün domo chumngechi cuñiutucuquefimün quiñe yafüngenochi metahue. Fei engün elungeai mongen eimün reque Chau Ngünechen ñi fütra cutranpiuqueyechen mu. Eimün pu füta, femngechi femülmün, catrütuñmangelayaimün tamün llellipun.

8 Ca quiñe dungu feipihuayiñ: quiñeucülepe tamün raquiduam, hueluconque duamuhuaimün, piuqueyehuaimün chumngechi piuqueyeuquei pu familia, cutranpiuqueyehuaimün, ñom piuquengeaimün. 9 Huiñoleltulayafimün tamün huesa femeteu. Lucatulayafimün* feiti tamün lucatueteu. Doi mai cümelcaqueafimün ta caquelu che, feimu ta mangelngeimün. Femülmün, Chau Ngünechen füreneaimünmeu.

10 “Inei rume ayüle ñi cüme feleal ca ñi ayüucüleal tañi mongen, mülei ñi ngünenieal tañi hun huesa dungu mu ca ngünencan dungunoal. 11 Püntütripape* ti huesa femün meu, cümeque dungu fempe, yafüluupe ñi cümelcaucüleal caquelu che engün, amulepe tañi cümelcaucülen. 12 Chau Jehová ñi nge* peniefi tati pu nor che, tañi pilun allcütuñmaquefi ñi llellipun engün. Huelu Chau Jehová* caiñetuquefi tati pu huesa femquelu”.

13 Eimün com piuque mu femülmün cümeque dungu, ¿inei huesalcayaimünmeu? 14 Huelu cutrancahulmün rume tamün femün nor dungu, ayüucülequeimün. Eimün ngelai tamün llicanieafiel chem ñi llicalcaeteu caquelu che,* fill raquiduamquelayaimün. 15 Tañi Ñidol ngen ta Cristo, piuque mu yamqueafimün. Ramtungelmün chem tamün maneluucülen, rumel pepicaucüleaimün tamün huiñoldungual,* huelu ñom piuque ca rume yamün meu huiñoldunguaimün.*

16 Cüme raquiduam nieaimün. Tamün inaniefiel ta Cristo, cüme miyauqueimün. Feimu chem dunguyengelmün rume, yehuelcahuaingün inei tamün dunguyeteu. 17 Tati huesa femquelu cutrancauquei. Huelu Chau Ngünechen pile tamün cutrancahual cümeque femün meu, doi cümeafui. 18 Ti nor huentru Cristo, quiñe rupa müten lai pu norngenochi che ñi culpan meu,* femngechi tamün cümelcautual Chau Ngünechen eimün. Langümngelu Cristo che cuerpo niefui, huelu huiñomongetulu, püllüngetui. 19 Femngechi amuldungumefi feichi pu püllü presulelu. 20 Fei engün feyentulaingün cuifi, feichi mu Chau Dios ñom piuque mu üngümcülefui Noé ñi antü mu, petu deumamequengelu ti huampo ruca ñi montulngeal co meu pichin che, pura che müten montulngei.

21 Ñi rupan feichi mu trürümafuiñ tati fautizahun. Ti fautizahun montulqueimünmeu Jesucristo tañi huiñomongetun mu. Fautizahun mu liftungequelai ti cuerpo, doi mai llellipuquefimün ta Chau Dios tamün nieal cüme raquiduam. 22 Chau Ngünechen ñi man püle müleputui Jesús, huenu mu amutui, fei elungei ñi ngünenieafiel pu cümeque püllü ca pu autoridadcülelu.

4 Che cuerpo* niefulu Cristo cutrancahui. Ca femngechi eimün pepicahuaimün tamün raquiduamal* chumngechi raquiduamquei Cristo. Inei rume cutrancaule, pengelquei ñi quiñepülecünufiel tati culpan.* 2 Femngechi femhuelayai tati pu che ñi illutuqueel, doi mai femai Chau Ngünechen tañi ayünieel tañi mongen mu. 3 Alüñma femimün mapu müleyechi pu che ñi ayünieel, quim yehuequelafuimün tamün huesaque femün mu,* rume illuquefuimün huesaque dungu, ngollicauquefuimün, fütra fiestaquefuimün,* trahuquefuimün re tamün putual. Cafei ünufalngefui* tamün püramyefiel pu coilaque dios ñi adentun. 4 Huelu eimün elcünuimün feichi huesa mongen, miyauhuelaimün fei engün meu, feimu afmatulehueingün ca huesa dunguyequeimünmeu. 5 Huelu feichi pu che juiciantucungeai tañi femün meu. ¿Inei juiciantucuaeyu engün? Tati pepicaucülelu ñi juzgayafiel pu mongelelu ca pu layelu. 6 Feimu ca quimelelngei Chau Dios ñi cümeque dungu tati pu layelu.* Femngechi juiciantucungelu rume engün chumngechi juiciantucungequei pu che, adnieafeyu tañi mongen Chau Ngünechen ñi nehuen.

7 Deu püllelepai ñi afal com ti müleyechi dungu. Feimu cüme raquiduam nieaimün ca rumel pepicaucülequeaimün* tamün llellipual. 8 Doi mai, hueluconque rume piuqueyehuaimün. Tati piuqueyechequelu rumel eluucülequei ñi perdonacheal. 9 Hueluconque poyehuaimün, fillpiyauquelayaimün. 10 Caque quiñeque eimün elungeimün adümuhun. Feichi adümuhun mu hueluconque serfihuaimün, cümeque cüdaufe reque* lloulu Chau Ngünechen ñi rume cutranpiuqueyechen. Caquerumei chumngechi pengelngequei Chau Ngünechen ñi fütra cutranpiuqueyechen. 11 Tati dungulu, huldungupe Chau Dios ñi feipin. Tati serfiquefilu ta caquelu che, recüluupe Chau Dios ñi nehuen mu. Femngechi com dungu mu püramyengeai ta Chau Ngünechen Jesucristo ñi duam mu. Chau Ngünechen niei pepiluhun ca nehuen rumel meu. Felepe mai.

12 Saquin pu peñi, eimün rupamequeimün fütra huesaque dungu cütral reque. Huelu afmatuquelayaimün, chem tamün rupamequen hue dungu no tati. 13 Doi mai ayüucülequeaimün, cutrancaumequelu cai eimün chumngechi cutrancahui Cristo. Femngechi peufaluule tañi pepiluhun-ngen, rume ayühuaimün. 14 Lucatumequengelmün* Cristo ñi üi meu ayüuqueimün, nielu cai eimün Chau Ngünechen ñi nehuen afmatufalngelu.

15 Quiñe no rume ta eimün ngelai ñi cutrancahual ñi langümchefengen mu, ñi hueñefengen, tañi huesa chengen cam tañi dunguconquen caquelu che ñi mongen meu. 16 Huelu quiñe che cutrancaule ñi inaniefiel ta Cristo, ngelai ñi yehueal, doi mai mülei ñi püramyeafiel ta Chau Ngünechen tañi inaniefiel ta Cristo. 17 Deu puhui ti medin antü ñi juiciantucungeal Chau Dios ñi troquiñche.* Huelu hune juiciantucungeliyiñ, ¿chum tripayai tati pu che inaquenofilu Chau Dios ñi cümeque dungu? 18 “Cafei cüdaungele ñi montulngeal tati nor che, ¿chumngeai tati ngünefalngenolu* ca tati culpafe?”.* 19 Feimu llemai, amulepe tañi cüme femün tati pu cutrancaumequelu ñi femün Chau Ngünechen ñi ayünieel. Elcünupe tañi mongen engün taiñ deumaeteu ñi cuhu meu, fei ta manelfali.

5 Iñche ca loncolen trahunche mu. Pefiñ ta Cristo ñi cutrancahun. Cafei püramyengele pu dullinche, iñche ca saquingean. Feimu llellipuafiñ* tamün pu loncolelu trahunche mu: 2 eimün camañfe reque cuidanieafimün Chau Ngünechen ñi pu ufisa tamün elfalcünulelngeel. Cuñiutucunieafimün tati trahunche. Re tamün feipingeel müten no, doi mai cüme duam mu femaimün Chau Ngünechen ñi adquiñ meu. Cafei diñmatulayaimün* tamün huehual plata, doi mai yafüluhun mu cüdahuaimün. 3 Ngencaulayaimün feichi pu che meu Chau Ngünechen tañi ngen-ngeel, doi mai cüme femqueaimün tamün inayentuaeteu Chau Ngünechen ñi pu ufisa. 4 Fei peufaluule ti fütra camañ ufisa, llohuaimün ti afmatufal cullitu* huesañmauquenolu.

5 Ca femngechi pu huecheque huentru eluucülemün tamün adnieaeteu pu füchaque huentru.* Cafei com eimün cüme yeucülemün ñom piuque mu. Chau Ngünechen quiñepülecünuquefi tati pu mallma che, huelu rume cutranpiuqueyequefi tati pu ñom piuquengelu.

6 Feimu llemai eluucülemün tamün ngünenieaeteu Chau Ngünechen, tati com nehuen nielu.* Fei saquiaimünmeu puuchi antü mu. 7 Chau Ngünechen duamtunieimünmeu. Fei tañi cuhu mu elcünuafimün com tamün fill raquiduamelnieteu. 8 ¡Cüme raquiduam nieaimün ca llihuatulemün!* Tamün caiñe, ti Huecüfü, fütra ñahuauquiyahui* quiñe trapial reque, hualloñmanieimünmeu. Cüpa lümüniefi ta inei rume.* 9 Huelu nehuentulemün tamün famentuafiel, nehuencülepe tamün feyentun. Eimün quimnieimün com pu peñi, com pu lamngen ca femngechi cutrancaumequeingün. 10 Huelu Chau Ngünechen rumeñma cutranpiuqueyechequei. Mangeleimünmeu tamün quiñeucüleal Cristo eimün ca tamün rumel saquingeal. Feimu deu cutrancahulmün pichiñma mu, Chau Ngünechen pepicayaimünmeu com dungu mu. Fei nehuentucuaimünmeu, yafültucuaimünmeu, quelluaimünmeu tamün cüme foliluucüleal reque. 11 Chau Ngünechen mu mülei ta nehuen rumel meu. Felepe mai.

12 Manelfal peñi troquifiñ ta Silvano.* Fei ñi quellun mu huirintuculeluhuiyiñ quiñeque dungun tamün yafültucuafiel ca tamün pengelelafiel Chau Ngünechen tamün rüf cutranpiuqueyeteu. Nehuentulemün Chau Ngünechen ñi fütra cutranpiuqueyechen mu. 13 Lemoria* pieimünmeu ti domo* Babilonia mu mülelu, fei dullinchengei eimün reque. Cafei lemoria pi Marcos, tañi fotüm troquiniefiñ. 14 Hueluquentu chalihuaimün piuqueyen mu.*

Cüme feleaimün com eimün quiñeucülelu Cristo mu.