2 PEDRO

1 Iñche ta Simón Pedro, Jesucristo ñi apostol* ca tañi cüdaufe. Huirintuculeluhuiyiñ tüfachi carta ta eimün, tati pu lloulu ti rüf quimeltun rume falilu. Com iñchiñ ca llohuiyiñ feichi quimeltun, ¿chumngelu cai?* Tañi norngen ta Chau Ngünechen ca Jesucristo, taiñ Montulchefe.

2 Tamün cüme quimfiel ta Chau Dios ca taiñ Ñidol Jesús, llellipulen tamün doi cutranpiuqueyengeal ca tamün nieal cüme felen. 3 Chau Ngünechen ñi nehuen elueiñmeu* com taiñ duamnieel, femngechi mongeleiñ taiñ serfiafiel com piuque meu. Llohuiyiñ tüfachi dungu taiñ cüme quimfiel ta Chau Ngünechen. Fei tañi afmatufalngen ca tañi cüme piuquengen mu mangeleiñmeu ta iñchiñ. 4 Chau Dios tañi afmatufalngen ca tañi cüme piuquengen mu elueiñmeu* tañi cümeque feipin rume falilu. Femngechi püllüngetuaimün Chau Ngünechen reque. ¿Chumngelu* femi tüfa? Tamün inahuequenofiel mapu müleyechi huesa mongen, fei tüfa huesaque illutun mu cüpai.

5 Feimu llemai rume yafüluumün tamün nieal feyentun, tamün femal cümeque dungu, tamün nieal quimün. 6 Rume yafüluumün tamün quim ngüneniehual, tamün nehuentuleal, ca tamün serfiafiel ta Chau Dios com piuque meu. 7 Rume yafüluumün tamün piuqueyeafiel pu peñi, pu lamngen ca com pu che. 8 Eimün fill antü femülmün com tüfachi dungu, cüme cüdaucüleaimün ca chofülayaimün. Fei inanieafimün chem tamün cüme quimürpuel taiñ Ñidol Jesucristo meu.

9 Huelu inei rume femnole tüfachi dungu, trauma reque felei, pilai ñi peal ta pelon. Ngoimatui* tañi rulpacünuñmangeel tañi cuifique culpan.* 10 Pu peñi,* eimün ta mangelngeimün ca dullingeimün. Feimu yafüluucülemün tamün doi cüme troquingeal. Femngechi femülmün, turpu famentungelayaimün. 11 Cafei rume fürenengeaimün, fei elungeaimün tamün conpual ngünenietule taiñ Ñidol Jesucristo, taiñ Montulchefe. Fei rumel ngünenietuai.

12 Feimu ayünien tamün raquiduamelafiel com tüfachi dungu ñi huirintucuel. Eimün deu quimniefimün ca cüme foliluucülequeimün tati rüf dungu tamün quimeltungeel. 13 Huelu petu ñi mülen tüfachi cuerpo mu,* cümelu troquifiñ tamün huiño raquiduamelafiel tüfachi dungu. 14 Iñche quimnien pichiñma müten mülecayan tüfachi cuerpo mu,* femngechi quimeleneu taiñ Ñidol Jesucristo. 15 Iñche rume yafüluuquen tamün raquiduamelafiel tüfachi dungu. Femngechi deu amutuli, quisu acordayafimün.*

16 Iñchiñ quimeleluhuiyiñ taiñ Ñidol Jesucristo ñi nehuen ca tañi müleal iñchiñ meu,* huelu inalaiñ coilaque nütram pu che mu cüpalu. Doi mai iñchiñ ta pefiyiñ tañi fütra pepiluhun-ngen. 17 Chau Ngünechen, feiti hulquelu pepiluhun, saquifi feipilu: “Tüfa iñche tañi poyen Fotüm, iñche tañi ayühuelqueteu”. 18 Felei llemai, allcüiñ feichi dungun huenu mu nagpalu quiñentrür mülelu Jesús iñchiñ Chau Ngünechen ñi dullielchi huincul mu.*

19 Feimu doi cüme quimnieiñ ñi femtripayal Chau Ngünechen ñi feipicünuel. Fei tüfa quiñe cüdetuhue reque felei* tamün piuque meu, pelontuquefi ti dumiñ, hunle hula ca peufaluule ti hunelfe.* Feimu müna cümei tamün ngüneduamniefiel. 20 Eimün cüme quimnieimün tüfachi falin dungu: chem rume feipicünungelu Chau Ngünechen ñi huirintucuel mu, pu che ñi quimün mu cüpalai. 21 Pu che ñi pin mu turpu hulngelai Chau Ngünechen ñi feipicünuel. Huelu mai pu huentru dunguingün Chau Ngünechen tañi pin mu, fei tañi nehuen adnieyu engün.*

2 Cuifi Israel mapu meu quiñeque che Chau Ngünechen ñi huerquen femfaluhui. Ca femngechi eimün meu müleai coilaque quimeltuchefe. Ñochiquechi püntülcayafingün ti trahunche,* fei huesalcayafingün tamün feyentun. Cafei famentuafingün ta Jesús, feiti tañi ngillanentueteu engün.* Feimu matu apümcangeaingün. 2 Fei engün quim yehuequelai tañi huesaque femün meu.* Fentren che inayentuaeyu, feimu huesa dunguyengeai ti rüfngechi quimeltun. 3 Tañi diñmatufengen mu,* cüpa ngünencayaimünmeu coilaque dungun mu. Huelu fütra cuifi deu condenangei engün, alüñmalayai ñi femtripayal. Rüfcünu mai apümcangeaingün.

4 Chau Ngünechen huiño huitraulai ñi cutrancayafiel tati pu püllü culpalu,* doi mai ütrüftucufi engün Tártaro meu.* Fütra dumiñ mu traricünungei cadena meu engün* puule hula tañi juiciangeal.* 5 Cafei huiño huitraulai ñi cutrancayafiel mapu müleyechi pu che Noé ñi antü meu. Cüpali ti Fütra Mangin Co ñi apümcayafiel pu huesaque che mapu mu mülelu, huelu montulfi ta Noé cangelu regle che engün. Noé amuldunguquefui Chau Dios ñi nor dungu. 6 Cafei Chau Dios itrocom lüpümfi ta Sodoma ca Gomorra huaria, re trufquen müten mülehuetui. Femngechi condenafi engün ca pengelcünulelfi pu huesaque che chem ñi rupayal. 7 Ca montulfi tati nor huentru Lot. Feichi mu pu huesaque che* quim yehuequelafui tañi huesaque femün mu,* feimu Lot rume cutrantupiuquelefui. 8 Feichi nor huentru rangiñ pu huesaque che mu mülequefui, pequefui chumngechi tañi miyahun engün* ca allcüquefui tañi feipimequen, feimu fill antü hueñancülequefui. 9 Feimu rupan mu huesaque dungu, Chau Jehová* quimniei chumngechi ñi montulafiel tati pu che ñi serfiqueteu com piuque mu. Ca quimniei chumngechi ñi apümcayafiel pu norngenochi che puule chi antü ñi cutrancangeal engün, 10 doyelchi mai feichi pu che inaquelu tañi culpafe cuerpo* ñi illutuqueel. Fei podümquefi ta caquelu che, cafei illamcaquefi tañi pu ngünenieteu.

Yamchequelaingün* ca yafü piuquengeingün. Feimu llicaquelaingün ñi huesa dunguyeafiel tati pu yamfalngelu.* 11 Pu cümeque püllü doi niei nehuen ca pepiluhun, huelu yamniefingün ta Chau Jehová.* Feimu huesaque pin mu dalluntucuquelafingün tati pu coilaque quimeltuchefe. 12 Huelu tüfachi pu huentru culliñ reque feleingün. Pu culliñ raquiduamquelai ñi chumal, elcünungei ñi nüngeal ca ñi langümngeal. Cafei tüfachi pu huentru huesa dunguyequefingün chem tañi quimnoel. Tañi huesaque femün mu apümcangeaingün. 13 Tañi huesalcaquen mu, huesalcaleaingün.

Rume ayünieingün ñi femal tañi culpafe cuerpo* ñi illutuqueel, antü meu rume. Pod reque feleingün, fei podümquefingün ti trahunche. Petu imequelu quiñentrür eimün meu, rume ayüqueingün ñi ngünencacheal tañi quimeltun mu. 14 Rume illunieingün ñihuan dungu,* pepi elcünulafingün ti culpan,* ngüchaltucuquefingün ñi huesa femal tati pu nehuencülenolu tañi feyentun,* rume diñmatufe piuque nieingün.* Chau Ngünechen condenaeyu engün. 15 Elcünuingün ti cüme rüpü, feimu ñihuiyauqueingün.* Inaingün ñi femün Balaam, Beor ñi fotüm, fei huesalcai müna ayünielu ñi cullingeal. 16 Tañi famentufiel ti cümelu, norümtungei. Quiñe burro pepi dunguquelai, huelu che reque dungueyu. Catrütueyu ñi huedhuedquiyahun tüfachi huerquen.

17 Ancülechi huitrunco reque feleingün, trürümngequei trucur reque ñi pimuyahuleteu ti cürüftucu mahun. Chau Ngünechen elelnieyu engün quiñe mülehue rume dumiñmalelu. 18 Rume mallmauquei tañi feipin engün, huelu falilai tañi dungun. Quim yehuequelai engün tañi huesaque femün mu.* Ngüchaltucuchequeingün ñi huiño nietual huesaque illutun, femngechi ñi huiño femtual ti huesaque dungu ñi hue elcünuel engün. 19 Tüfachi huesaque che, lifre chengeaimi piquefingün tañi pu inanieteu, huelu ti culpan* ngünenieyu engün. Inei rume* ngüneniefile ta cangelu che, quisu tañi esclavongetuquei feichi che. 20 Ñi cüme quimfiel engün ta Ñidol Jesucristo, taiñ Montulchefe, elcünuingün mapu müleyechi pod huesaque femün. Huelu ca huiño reyüconqueingün* tüfachi dungu mu, fei hueungequei engün. Feimu llemai doi huesalcalequei chumngechi ñi felefel ellaca mu. 21 Doi cümefui quisu engün ñi quimnofiel ti cüme rüpü. Fei engün llohui ca cüme quimniefingün Chau Ngünechen ñi huercün dungu, huelu quiñepülecünufingün. 22 Fei engün mu femtripai chumngechi feipingequei: “Tati trehua huiñotui quisu tañi rapin mu, ca tati sañhue deu müñetungelu huiño ümülcautui fotra meu”.*

3 Saquin pu peñi, saquin pu lamngen, ca quiñe carta huirintuculeluhuiyiñ. Chumngechi feipihuiyiñ ti hunen carta mu, ayünien tamün acordayal* feichi dungu, femngechi tamün cüme raquiduamal. 2 Cafei raquiduamtucunieaimün chem ñi feipicünuel Chau Ngünechen ñi pu huerquen manelfalngelu, ca chem ñi huercüel ta Ñidol, ti Montulchefe. Feimu huercüngei pu apostol tamün quimelelafiel. 3 Mülei tamün quimal tüfachi dungu: epe puucülele ñi afal müleyechi dungu mapu mu, tati pu che ayentunieafi ti cüme dungu, fei femaingün huesaque dungu chumngechi tañi illutuqueel. 4 Feipiai engün: “¿Cheu mülei feiti feipicünulu ñi cüpayal? Taiñ pu cuifiqueche yem ñi antü ca fantepu mu felecai müten ta dungu, chumngechi ñi felefel hue deumangelu pu che mapu meu”.

5 Pilai ñi acordayal engün* tüfachi dungu: fütra cuifi ñi mülen ti callfü huenu. Cafei Chau Ngünechen ñi pin mu ti mapu püntünentungei ta co meu,* huelu rangiñ co meu elcünungei. 6 Tüfachi dungu mu ta apümcangei pu che feichi mangiñmalu com ti mapu. 7 Cafei Chau Ngünechen ñi pin mu ti huenu ca ti mapu fantepu mülelu elcünungei ñi apümcangeal cütral meu, feichi juiciantucungele ca apümcangele pu che yamquenofilu* ta Chau Ngünechen.

8 Saquin pu peñi, ngoimalayaimün* tüfachi dungu: quiñe antü, huaranca tripantu reque felei Chau Jehová ñi adquiñ meu.* Cafei huaranca tripantu, quiñe antü reque felei. 9 Chau Jehová* alüñmaquelai ñi huechurpual tañi feipicünuel, chumngechi raquiduamquei quiñeque che. Doi mai Chau Ngünechen ñom piuquengei eimün meu, fei ayünielai ta inei no rume ñi apümcangeal. Ayüniei ta com pu che ñi nor raquiduamtual. 10 Huelu mai Chau Jehová ñi antü* acurumeai quiñe hueñefe reque. Feichi mu fütra trününrumeai ti huenu, fei mülehuetulayai. Chem ñi mülen huenu ca mapu meu rume cofileai, fei lliurumeai. Cafei ti mapu ca com ñi deumael pu che tüfa mu, quimfalcünungeai.

11 Femngechi lliurumeai com tüfachi dungu. Feimu raquiduamaimün tamün chumngechi chengeal ta eimün: mülei tamün femal lif cümeque dungu ca serfiqueafimün ta Chau Ngünechen com piuque meu. 12 Cafei üngümnieafimün ca raquiduamtucunieafimün* Chau Jehová ñi antü.* Feichi mu ti huenu apümcangeai cütral meu. Fei fente tañi cofilen chem ñi mülen ti huenu ca mapu meu, lliurumeai. 13 Huelu iñchiñ maneluucüleiñ ñi müleal hue huenu ca hue mapu, chumngechi feipicünui Chau Dios. Tüfa mu rumel mületuai nor dungu.

14 Saquin pu peñi, saquin pu lamngen, eimün üngümnieimün tüfachi dungu. Feimu rume yafüluhuaimün tamün lif chengeal Chau Ngünechen ñi adquiñ meu, tamün nienoal huelulcan ca tamün cümelcaucüleal Chau Ngünechen eimün. 15 Ca raquiduamaimün, taiñ Ñidol ñi ñochi duamngen mu pu che elungeai ñi montual. Femngechi huirintucui taiñ saquin peñi Pablo Chau Ngünechen ñi elueteuchi quimün meu. 16 Tañi fillque carta mu Pablo nütramcai tüfachi dungu. Huelu quiñeque dungu müte adümfal-lai. Tati pu quimquenolu ca pu nehuencülenolu tañi feyentun* huelucünuquefi feichi dungu ca com ñi feipilen Chau Ngünechen ñi huirintucuel, feimu apümcangeai engün.

17 Saquin pu peñi, saquin pu lamngen, eimün quimnieimün tüfachi dungu. Feimu llemai llihuatulemün,* femngechi huelulcalayaimünmeu pu huesaque che* ñi culpan* feichi pu che reque. Fei nehuencüleaimün ti cüme rüpü meu. 18 Huelu mai ayülen tamün doi cutranpiuqueyeaeteu taiñ Ñidol Jesucristo, ti Montulchefe. Ca ayülen tamün doi cüme quimafiel. Fei ta püramyengepe feula ca rumel meu. Felepe mai.