1 JUAN

1 Huirintuculeluhuiyiñ tati mülequefulu ellaca mu, fei cüpalquei ti dungun hulquelu mongen, fei ta allcüiñ iñchiñ. Cafei cuhu mu nüfiyiñ. 2 Felei, tati mongen peufaluhui, iñchiñ pefiyiñ. Huldungumequeiñ ca nütramcamequehuiyiñ ti rumel mongen taiñ Fütra Chau mu mülelu, fei pengelelngeiñ ta iñchiñ. 3 Nütramcamequehuiyiñ chem taiñ peel ca taiñ allcütuel, femngechi taiñ quiñeucüleal.* Iñchiñ cai quiñeucüleiñ taiñ Fütra Chau mu ca tañi Fotüm Jesucristo. 4 Huirintuculeluhuiyiñ tüfachi dungu taiñ rumeñma ayüucüleal.

5 Allcütuñmafiyiñ ta Cristo tüfachi huercün dungu, fei huldungumequehuiyiñ. Chau Ngünechen mu cüpai ti pelon, nielai chem dumiñ no rume. 6 “Fei iñchiñ quiñeucüleiñ” feipiliyiñ, huelu dumiñ mu miyauliyiñ, coilatumequeafuiñ. Rüf dungu mu miyaulaiñ. 7 Chau Ngünechen pelon mu mülei. Feimu pelon mu miyauliyiñ, quiñeucüleaiñ iñchiñ. Cafei tañi Fotüm Jesús ñi mollfüñ liftuñmaqueiñmeu com taiñ culpan.*

8 “Iñchiñ culpaquelaiñ”* feipiliyiñ, quisu ngünencaumequeiñ. Fei feyentuquelafiyiñ ti rüf dungu. 9 Chau Ngünechen manelfali ca nor dungu femquei. Feimu nentudunguliyiñ taiñ culpan,* rulpacünuquei taiñ huelulcan ca liftuñmaqueiñmeu com taiñ huesaque femün. 10 “Iñchiñ culpaquelaiñ”* feipiliyiñ, coilatuquei Chau Dios pimequeiñ reque. Fei feyentuquelaiñ tañi dungun.

2 Saquin pu hueni,* huirintuculeluhuiyiñ tüfachi dungu tamün culpanoal.* Huelu quiñe che culpale, nieiñ inei taiñ quelluaeteu:* Jesucristo. Nor chengei, quiñentrür tañi Chau engu mülei. 2 Jesucristo quiñe chalintucun reque felei* taiñ cümelcautual Chau Ngünechen iñchiñ, feimu rulpacünuñmangeiñ taiñ culpan.* Huelu iñchiñ taiñ culpan müten no,* com mapu müleyechi pu che ñi culpan llemai.* 3 ¿Chumngechi pengelafuiñ taiñ quimürpufiel?* Inanieliyiñ tañi huercün dungu. 4 Tati feipilu “Iñche quimürpufiñ”, huelu inanofile tañi huercün dungu, coilatumequei. Rüf dungu feipiquelai. 5 Huelu tati inaniefilu Cristo ñi feipin pengelquei ñi rüf piuqueyefiel ta Chau Ngünechen. Femngechi femliyiñ, pengelaiñ taiñ quiñeucülen fei iñchiñ. 6 Tati feipilu ñi quiñeucülen fei engu, amulepe ñi miyahun chumngechi miyahui Jesús.

7 Saquin pu peñi,* huirintuculeluulayiñ quiñe hue huercün dungu. Doi mai huirintuculeluhuiyiñ quiñe cuifi huercün dungu, tüfa ta lloufimün ellaca mu. Tati dungu tamün allcütuel, fei tati cuifi huercün dungu. 8 Huelu mai huirintuculeluhuiyiñ quiñe hue huercün dungu. Cristo inafi tüfachi huercün dungu, eimün cafei. Felei llemai, tati dumiñ petu ñamconi, tati rüfngechi pelon huilüfcülei.

9 Iñche ta pelon meu mülen feipile quiñe che, huelu üdefile tañi peñi, petu mülei ta dumiñ meu. 10 Tati piuqueyefilu tañi peñi pelon mu miyauquei, fei conquelai culpan meu.* 11 Huelu tati üdefilu tañi peñi, dumiñ mu mülei, dumiñ mu miyauquei. Fei quimlai cheu ñi miyahun, ti dumiñ traumalnieñmaeyu tañi nge.

12 Saquin pu hueni, fei tañi üi mu rulpacünuñmangeimün tamün huelulcan, feimu huirintuculeluhuiyiñ. 13 Pu chau, eimün quimürpufimün feiti ellaca mu mülelu, feimu huirintuculeluhuiyiñ. Pu hueche, eimün hueufimün ti Huecüfü,* feimu huirintuculeluhuiyiñ. Saquin pu yall, eimün quimürpufimün taiñ Fütra Chau, feimu huirintuculeluhuiyiñ. 14 Pu chau, eimün quimürpufimün feiti ellaca mu mülelu, feimu huirintuculeluhuiyiñ. Pu hueche, eimün nehuentuleimün, feyentuquefimün Chau Dios ñi dungu, fei hueufimün ta Huecüfü. Feimu huirintuculeluhuiyiñ.

15 Piuqueyelayafimün pu huesaque che ñi femquen ca chumngechi ñi yenieel tañi mongen engün. Tati piuqueyefilu com tüfachi dungu piuqueyelafi ta Fütra Chau. 16 Mapu müleyechi pu che ayüniequei tüfachi dungu: chem ñi illutuqueel tañi cuerpo* ca tañi nge, cafei ñi afmatungeal chem tañi nieel engün.* Huelu tüfachi dungu taiñ Fütra Chau mu cüpalai, huesaque che mu cüpai. 17 Cafei tüfachi pu che ca chem ñi illutuel engün aftuai. Huelu tati femquelu Chau Ngünechen ñi ayünieel rumel mongeleai.*

18 Saquin pu hueni, pichilehuei ta antü. Eimün quimnieimün ñi cüpalen feiti caiñetuquefilu ta Cristo.* Feula ta peufaluumequei fentren che caiñetuquefilu ta Cristo, feimu mai ta quimnieiñ ñi pichilehuen ta antü. 19 Iñchiñ mu tripai engün, huelu rüf coneltulelafuingün iñchiñ taiñ troquiñche meu. Femngechi femngefule engün, turpu tripatulayafuingün. Huelu amutuingün, femngechi quimfalngei com pu che ñi rüf coneltulenon iñchiñ meu. 20 Chau Ngünechen tañi nehuen mu dullieimünmeu, cafei com eimün nieimün quimün. 21 Eimün quimlaimün ti rüf dungu pilayafun, quimniefimün llemai. Cafei quimnieimün, chem coila dungu no rume cüpalai ti rüf dungu mu, feimu huirintuculeluhuiyiñ.

22 ¿Inei am tati coilatufe? Feiti feyentuquenolu ñi Cristo ngen ta Jesús. Feiti feyentuquenofilu ta Fütra Chau ca tañi Fotüm, fei caiñetuquefi ta Cristo. 23 Com pu che feyentuquenofilu ti Fotüm, quiñeucülelai Fütra Chau engu. Huelu tati feyentuquefilu ti Fotüm, quiñeucülei Fütra Chau engu. 24 Eimün cai piuquentucunieafimün feichi dungu tamün allcütufiel ellaca mu. Femülmün, quiñeucüleaimün ti Fotüm ca taiñ Fütra Chau eimün. 25 Chau Ngünechen mai ta* feipicünueiñmeu tüfachi dungu: taiñ rumel mongeleal.

26 Quiñeque che cüpa ngünencaeimünmeu, feimu huirintuculeluhuiyiñ tüfachi dungu. 27 Eimün cai, Chau Ngünechen dullieimünmeu quisu tañi nehuen mu. Feichi nehuen eimün meu mülei, duamnielaimün inei no rume tamün quimeltuaeteu. Felei llemai, tamün dullieteu Chau Ngünechen rüfngei, coilangelai. Fei quimeltuniengeimün com dungu. Chumngechi quimeltungeimün, quiñeucülequeaimün fei eimün. 28 Feimu saquin pu hueni, quiñeucüleaimün fei eimün. Femngechi peufaluule, maneluucüleaiñ.* Fei mülele iñchiñ meu,* yehuelen püntütripalayaiñ.* 29 Eimün quimnieimün ñi nor chengen, ca quimnieimün, com tati femquelu nor dungu* Chau Ngünechen ñi yall pingei.

3 ¡Müna piuqueyenieiñmu taiñ Fütra Chau! ¡Chau Dios ñi pu yall pingeiñ! Feingei tati, huelu mapu müleyechi pu che quimlaeiñmeu ta iñchiñ, fei engün quimlafi ta Chau Ngünechen. 2 Saquin pu peñi, saquin pu lamngen, Chau Ngünechen ñi pu yallngetuiñ. Huelu petu quimngelai taiñ chumleal. Peufaluule* Chau Ngünechen, rüf peafiyiñ, feimu fei reque ngetuaiñ. 3 Fei lifngei, feimu com tati pu femngechi maneluucülelu fei meu, mülei ñi yenieal lif mongen.

4 Com pu culpamequelu* famentumequefi ti ley. Culpan mu* famentungequei ti ley. 5 Eimün quimnieimün, Jesús cüpai* ñi rulpacünungeal taiñ culpan,* fei nielai culpan.* 6 Inei rume quiñeucülelu Jesús engu culpaquelai.* Inei rume culpaquelu* pequelafi ca quimlafi ta Jesús. 7 Saquin pu hueni, cuñiutucuhuaimün tamün ngünencangenoal. Tati femquelu nor dungu,* nor chengei Jesús reque. 8 Ti culpaquelu,* Huecüfü meu cüpai. Fütra cuifi* culpamequei* ti Huecüfü. Feimu cüpai Chau Ngünechen ñi Fotüm, ñi apümcayafiel chem ñi femün ti Huecüfü.

9 Chau Ngünechen ñi pu yall quiñe no rume culpaquelai* nielu cai fei tañi nehuen.* Chau Ngünechen ñi yallngei, feimu culpaquelai.* 10 Tüfachi dungu mu quimngequei Chau Ngünechen ñi pu yall ca ti Huecüfü ñi pu yall: tati femquenolu nor dungu* ca tati piuqueyenofilu tañi peñi, Chau Ngünechen mu cüpalai. 11 Raquiduamtucunieafimün tüfachi huercün dungu tamün llohuel ta cuifi: hueluquentu piuqueyehuaiñ. 12 Inayentulayafiyiñ ta Caín. Huecüfü mu cüpai, fei langümfi tañi peñi. ¿Chumngelu* langümfi? Quisu tañi femün huesalcalerquei, huelu tañi peñi nor dungu femquefui.

13 Pu peñi, mapu müleyechi pu che üdequeimünmeu, feimu afmatuquelayaimün. 14 La reque felefuiñ, huelu feula mongetuiñ taiñ piuqueyefiel pu peñi. Tati piuqueyechenolu la reque felei. 15 Com tati üdequefilu tañi peñi, langümchefengei. Eimün quimnieimün, quiñe langümchefe no rume nielayai rumel mongen. 16 Jesucristo lai iñchiñ taiñ duam mu, feimu iñchiñ quimürpuiñ chem am tati piuqueyehun. Feimu mülei taiñ eluucüleal taiñ layal pu peñi tañi duam mu. 17 Raquiduamaimün: quiñe che niei com tañi duamnieel, fei ngüneduami tañi peñi ñi nienon chem tañi duamnieel, huelu pilai ñi cutranpiuqueyeafiel. ¿Piuqueyefiñ ta Chau Dios pipeafui mai feichi che? 18 Saquin pu hueni, re huenche hun mu müten piuqueyechequelayaimün. Doi mai tamün femün mu quimfalngepe tamün piuqueyehun, piuque mu tripape.

19 Femngechi quimaiñ taiñ inaniefiel ti rüf dungu, fei piuquentucunieaiñ* taiñ piuqueyeteu ta Chau Dios. 20 Feipintucueliyiñmu quisu taiñ piuque, raquiduamtucuqueaiñ Chau Ngünechen doicülei iñchiñ taiñ piuque mu, fei com quimniei. 21 Saquin pu peñi, saquin pu lamngen, feipintucunoeliyiñmu taiñ piuque, maneluhun mu llellipuafiyiñ* ta Chau Ngünechen. 22 Cafei iñchiñ inaniequeiñ tañi huercün dungu ca femqueiñ quisu tañi ayünieel, feimu eluqueiñmeu com taiñ llellipufiel. 23 Fei tüfa lle tañi huercün dungu: feyentuqueaiñ Jesucristo tañi üi mu, fei tañi Fotüm, ca hueluquentu piuqueyehuaiñ chumngechi feipicünui taiñ femal. 24 Tati che inaniequelu tañi huercün dungu, quiñeucülequei Chau Dios engu. Cafei Chau Ngünechen quiñeucülequei feichi che engu. Fei elueiñmeu tañi nehuen, feimu quimnieiñ ñi quiñeucülen ta iñchiñ meu.

4 Saquin pu peñi, saquin pu lamngen, quiñe huercün dungu Chau Ngünechen mu cüpai pingele, feyentulayafimün. Doi mai cüme ngüneduamafimün ñi cüpapen mai ta Chau Dios mu. Mapu meu mülei fentren che Chau Ngünechen ñi huerquen femfaluuquelu.

2 Femngechi quimaimün ñi cüpapen mai ta Chau Dios mu quiñe huercün dungu: com ti huercün dungu Chau Dios mu cüpalu, quimeltuquei Jesucristo ñi cüpan huentru reque. 3 Chau Ngünechen mu cüpalai feichi huercün quimeltuquenolu ta Jesús ñi cüpan huentru reque. Feichi huercün dungu hulquei tati caiñetuquefilu ta Cristo. Eimün allcüimün ñi cüpayal, deu mülepai mapu mu.

4 Saquin pu hueni, eimün cüpaimün Chau Ngünechen mu, cafei hueufimün feichi pu che. Tati quiñeucülelu eimün meu doi nehuen-ngei, tati quiñeucülelu mapu müleyechi pu che meu fente nehuen-ngelai. 5 Fei engün mapu tuhun-ngei, feimu nütramcaqueingün mapu müleyechi dungu, fei mapu müleyechi pu che allcütuqueyu engün. 6 Iñchiñ Chau Dios mu tuhuiyiñ. Tati quimürpufilu ta Chau Ngünechen allcütuqueiñmeu, huelu tati cüpanolu Chau Dios mu allcütuquelaeiñmeu. Femngechi quimqueiñ chuchi huercün rüfngei ca chuchi huercün coilangei.

7 Saquin pu peñi, amulepe taiñ hueluconquechi piuqueyehun. Chau Ngünechen mu cüpai ti piuqueyehun. Fei com pu piuqueyechequelu Chau Ngünechen ñi yallngei ca quimniefi ta Chau Ngünechen. 8 Chau Ngünechen fei ta piuqueyen,* feimu tati piuqueyechequenolu quimlafi ta Chau Ngünechen. 9 Femngechi pengelelngeiñ Chau Ngünechen ñi piuqueyechen: fei huercüi tañi quiñen Fotüm mapu meu taiñ rumel mongeleal tañi Fotüm ñi duam mu. 10 Chau Ngünechen huercüi tañi Fotüm quiñe chalintucun reque* taiñ culpan meu,* femngechi taiñ cümelcautual Chau Ngünechen iñchiñ. Femi ta tüfa fente taiñ piuqueyeteu, iñchiñ tañi piuqueyefiel mu no.

11 Saquin pu hueni, fente taiñ piuqueyeteu Chau Dios, iñchiñ mülei taiñ hueluconque piuqueyehual. 12 Inei no rume turpu pequelafi ta Chau Ngünechen. Amulele taiñ hueluconque piuqueyeuquen, Chau Ngünechen afcadinieaiñmeu. Fei tañi piuqueyechen doi tutelcaleai iñchiñ meu. 13 Fei elueiñmeu tañi nehuen, feimu quimnieiñ iñchiñ quiñeucüleiñ fei iñchiñ, cafei quisu quiñeucülei iñchiñ meu. 14 Cafei taiñ Fütra Chau huercüi tañi Fotüm ñi montulafiel mapu müleyechi pu che. Iñchiñ pefiyiñ ca huldunguqueiñ feichi dungu. 15 Inei rume com piuque mu feipile “Jesús ta Chau Ngünechen ñi Fotüm”, Chau Ngünechen quiñeucüleai feichi che engu ca quisu quiñeucüleai Chau Dios engu. 16 Iñchiñ quimürpuiñ taiñ piuqueyenieteu Chau Ngünechen, fei feyentuqueiñ tañi piuqueyechen mu.

Chau Ngünechen fei ta piuqueyen,* fei tati piuqueyeniefilu ta Chau Dios quiñeucülei fei engu.* Cafei Chau Ngünechen quiñeucülei feichi che engu. 17 Femngechi tutelcaletui taiñ piuqueyefiel ta Chau Dios. Chumngechi ñi felen Jesucristo, ca femngechi feleiñ iñchiñ mapu meu. Feimu feichi juiciantucungele pu che, maneluhun mu dunguaiñ.* 18 Tati che piuqueyefilu ta Chau Dios llicaquelai. Tutelcalele taiñ piuqueyehun, llican chengelayaiñ. Llican ta catrütuqueiñmeu. Quiñe che llican mu tutelcalelai tañi piuqueyehun. 19 Chau Ngünechen hune piuqueyeiñmeu ta iñchiñ, feimu piuqueyefiyiñ.

20 Quiñe che feipiafui “Iñche piuqueyefiñ ta Chau Ngünechen”, huelu üdefile tañi peñi, coilatumequei. Peniefi tañi peñi, huelu piuqueyequelafi. Fei, ¿chumngechi piuqueyeafui ta Chau Dios tañi pequenofiel? 21 Fei feipieiñmeu taiñ femal tüfachi dungu: tati piuqueyefilu ta Chau Dios ca mülei ñi piuqueyeafiel tañi peñi.

5 Com tati feyentulu Jesús ñi Cristo ngen, Chau Dios ñi yallngei. Cafei com tati piuqueyefilu ta Chau Ngünechen, piuqueyeñmafi tañi pu yall. 2 Iñchiñ piuqueyefiyiñ ta Chau Ngünechen ca inaniequeiñ tañi feipin, feimu quimnieiñ taiñ piuqueyeñmafiel tañi pu yall. 3 Piuqueyefiliyiñ ta Chau Ngünechen, femaiñ tüfachi dungu: inañmayafiyiñ tañi feipin. Tañi feipin cüdaungelai ñi inangeal. 4 Chau Ngünechen tañi pu yall hueuquefi mapu müleyechi pu che. ¿Chem quellueiñmu taiñ huehuafiel mapu mu müleyechi pu che? Taiñ feyentun.

5 ¿Inei huehuafui mapu müleyechi pu che? Tati feyentulu Jesús Chau Ngünechen ñi Fotümngen, ¿felelai? 6 Co engu mollfüñ mu cüpai Jesucristo. Co müten no, co engu mollfüñ llemai. Chau Ngünechen ñi nehuen quimfalcünuquei ti rüf dungu, feimu quimfalcünui tüfa. 7 Cüla dungu quimfalcünuquei ñi ineingen ta Jesús: 8 Chau Ngünechen ñi nehuen, ti co ca tati mollfüñ. Trürcülei chem ñi quimfalcünuel tüfachi cüla dungu.

9 Iñchiñ llouqueiñ chem ñi quimfalcünuel pu che, huelu chem ñi quimfalcünuel Chau Ngünechen doicülei. Tüfa ñi quimfalcünuel ta Chau Ngünechen: ñi ineingen tañi Fotüm. 10 Tati feyentulelu Chau Ngünechen tañi Fotüm mu, pengelquei tañi piuquentucuniefiel chem ñi quimfalcünuel Chau Ngünechen. Tati feyentuquenolu Chau Dios mu, coilatufe piquefi reque. Feyentuquelai Chau Ngünechen ñi quimfalcünuel ñi ineingen tañi Fotüm. 11 Tüfachi dungu quimfalcünui Chau Ngünechen: Chau Dios elueiñmeu rumel mongen, femngechi mongen nieiñ tañi Fotüm ñi duam mu. 12 Tati quiñeucülelu Chau Dios tañi Fotüm mu niei feichi mongen. Huelu tati quiñeucülenolu Chau Dios tañi Fotüm mu nielai feichi mongen.

13 ¿Chumngelu* huirintuculeluhuiyiñ tüfachi dungu? Femngechi eimün, tati pu feyentulelu Chau Ngünechen ñi Fotüm tañi üi meu, quimaimün tamün maneluhun: ti rumel mongen. 14 Tüfachi dungu maneluucülequeiñ:* chem rume nüucülelu Chau Dios tañi ayünieel mu llellipuafuiñ, fei allcütuqueiñmeu. 15 Chem rume taiñ llellipuel, quimnieiñ taiñ allcütuqueteu Chau Ngünechen. Llellipuquefiyiñ ta Chau Ngünechen, feimu maneluucüleiñ taiñ llohual chem taiñ llellipuel.

16 Quiñeque culpan meu* ti che condenangequelai ñi layal. Feimu inei rume pefile tañi peñi ñi culpamequen* feichi dungu meu, ngillatuñmayafi, fei Chau Ngünechen eluaeyu mongen tati culpalu.* Tüfa ñi rupan ti che culpalu,* huelu condenangelai ñi layal. Huelu caquelu culpan dungu meu,* pu che condenangequei ñi layal. Fei feipiquelan ñi ngillatuñmangeal ti che feichi dungu meu culpalu.* 17 Com tati norngenolu, culpan dungu tati.* Huelu quiñeque culpan meu* condenangequelai ta che ñi layal.

18 Iñchiñ quimnieiñ Chau Ngünechen ñi pu yall culpaquelai.* Chau Ngünechen ñi Fotüm cuñiutucuqueyu engün,* feimu ti Huecüfü* pepi nüquelaeyu. 19 Chau Dios mu tuhuiyiñ iñchiñ. Huelu com mapu müleyechi pu che ngünenieyu ti Huecüfü,* quimnieiñ ta tüfa. 20 Ca quimnieiñ ñi cüpan Chau Ngünechen ñi Fotüm. Fei elueiñmu adümuhun taiñ quimafiel taiñ rüfngechi Ngünechen. Feimu tañi Fotüm ñi duam mu, Jesucristo, quiñeucüleiñ fei iñchiñ. Fei taiñ rüfngechi Ngünechen ca tati hulquelu rumel mongen. 21 Saquin pu hueni, cuñiutuculemün pu coilaque dios ñi adentun meu.*