Quiñe domo judio tuhun-ngelu ngüneduami ñi cümepen mai tañi feyentun

Nütramcamuiñ tami ineingen.

1979 tripantu choyüngen Estados Unidos mapu mu. Cüla tripantu nielu iñche tañi chau ca tañi ñuque hudaingu. Tañi ñuque quimeltueneu tati religion judia, fei escuela judia mu amuquen, yeshiva pingelu. Regle tripantu nielu Israel mapu mu huiñamtuhuiyiñ, lelfün mu mülequei tañi escuela. Quiñe tripantu rupalu huiñamtuhuiyiñ ta México mapu mu.

Cheu tañi mülen ngelafui cheu ñi trahuluuquen pu judio, huelu inaniequefun tañi huimtun. Sabado antü üyümquefun vela, papeltuquefun pu judio ñi huirintucun, Torá pingelu. Tañi ngillatual pünequefun quiñe lifru nielu fentren ngillatun. Escuela mu feipiquefiñ tañi pu hueni ñi nieel tati rüf religion. Iñche turpu papeltuquelafun ti Nuevo Testamento nütramcalu Jesús ñi femün, papeltulayaimi ti Nuevo Testamento pieneu tañi ñuque, hueluraquiduamafuimi pieneu.

¿Chumngelu eluhuimi tami papeltuafiel ti Nuevo Testamento?

Mari regle tripantu nielu huiñotun ta Estados Unidos mapu mu ñi estudiayal. Quiñe hueni feipieneu ñi cristianongen. Quimnofilmi ta Jesús, tami mongen falilayai pieneu.

Pu che inafilu ta Jesús, re ngünencangei tati pifiñ.

¿Papeltufimi cai ti Nuevo Testamento?

Femlan, pifiñ.

Fei, ¿chumngelu femngechi raquiduamqueimi? Pu quimchengenolu müten dunguquei quimnon mu pieneu.

Iñche ca femngechi raquiduamquefun, feimu afmatulehuen tañi feipin mu. Elueneu quiñe Biblia, fei yehuelen mu lloumafiñ, ruca mu yetufiñ, fei papeltufiñ ti Nuevo Testamento.

¿Chumngentufimi tañi papeltuel?

Quimlafun pu judio ñi huirintucuel ti Nuevo Testamento. ¡Afmatulehuen! Amulelu ñi papeltun, ngüneduamün ta Jesús ñi cüme piuquengen, ñi duamtuchequen ca ñi ñom chengen. Ayülafui ñi ngünencacheal. Biblioteca mu amun, fei papeltufiñ quiñeque lifru nütramcalu ta Jesús meu. Huelu quiñe no rume feyentual-laeneu tañi Mesías ngen. Quiñeque lifru feipiquei ñi Dios ngen ta Jesús, coila dungu tati piquen. ¿Inei cai ngillatuquefui Jesús? ¿Quisu ngillatuupefui mai? Cafei Jesús lai, huelu Biblia feipi Chau Ngünechen laquelai.a

Fei, ¿chumimi cai?

Quiñelei müten ti rüf dungu, fei iñche eluucülefun ñi quimafiel. Fei com piuque meu ngillatufiñ ta Chau Ngünechen, llancünagi cütu ñi cülleñu. Papeltulafiñ rume tañi lifru nielu fillque ngillatun. Fentecünulu ñi llellipun, acurumei tañi ruca mu epu Dunguquelu Ineingen Jehová. Nütramcaiñ, fei elungen quiñe folleto. Feichi folleto ca chem taiñ nütramcan pengeleneu tañi quimeltuqueel engün Biblia mu tripai. Pu testigo raquiduamquelai Jesús ñi coneltulen trinidad mu, Chau Ngünechen ñi Fotümngei piqueingün,b ca tati hunelu ñi deumael Chau Ngünechen.c

Fei hula huiñotun ta México mapu mu, fei pu testigo quellueneu ñi ngüneduamal chem ñi feipicünuel Biblia ñi rupayal tati Mesías. Fentren dungu feipicünungei. Ellaca mu cüdautun ñi feyentual. Ramtuuquefun ¿Jesús müten huechunentui com tüfa ñi feipicünuel Biblia? ¿Mesías femfaluhui chi ñi ngünencacheal?

¿Chem quellueimu tami cüme feyentual?

Pu testigo quellueneu ñi ngüneduamal, quiñe che Mesías femfaluulu, pepi huechunentulayafui com ñi feipicünuel Biblia. Quiñe dungu: doi regle pataca tripantu petu ñi choyüngenon ti Mesías Biblia feipicünui ñi choyüngeal Belén huaria mu.d ¿Inei cai dulliafui cheu ñi choyüngeal? Cafei Isaías feipicünui ti Mesías ñi langümngeal quiñe huesa che reque, huelu ñi rüngaltucungeal pu ricu che engün.e Jesús huechunentui com tüfachi dungu.

Iñche doi quellueneu ñi quimal Jesús tañi tuhunche. Biblia feipi David ñi cupanchengei ti Mesías.f Pu judio cüme huirintucuniefui tati pu che ñi tuhunche. Feimu David ñi cupanchengenofule ta Jesús, tañi pu caiñe huldunguafui tüfa. Huelu pepi femlaingün, Jesús rüf cüpalu cai David meu. Fütraque troquiñche, eimi David ñi fotüm feipifingün ta Jesús.g

37 tripantu rupalu deu ñi lan Jesús, Roma ñi pu soltau apümcafingün ta Jerusalén. Fei ñamtui ti lifru huirintucunielu tati pu che ñi tuhun. Feimu ti Mesías peufaluhui petu ñi rupanon ta tüfa, femngechi ngüneduamngeafui ñi tuhunche.

¿Chem raquiduamürpuimi?

Deuteronomio 18:18, 19 feipi Chau Ngünechen ñi elcünual quiñe huerquen Moisés reque. Fei feipi ñi ramtucadunguafiel tuchi allcütunofilu. Deu ñi ngüneduamfiel com tati Biblia, feyentun Jesús ti Nazaret che fei ta Chau Ngünechen ñi huercüel.