¡Rumel weniyefinge Dio!

Nieal weni ka ñamümnoafiel, küdawngey. Tami küdawel weniyefiel Dio ka amuleal tañi wenikan, eluaymu alün kümeke dungu. Jesu feypifi tañi pu feyentunietu: “Fey ti rüfngechi dungu lifrekünutuaeymünmew” (Juan 8:32). ¿Chem küpa feypi?

Fachantü ayüküleafuymi neykümkülen dungu mu. Neykümaymu koyla kimeltun ka itrokom koyla dungu püdümniel Satana. Ka neykümaymu ngenochi maneluwün mu nielu rume fentren che kimnofilu Jewba (Romanu 8:22). Dio ñi pu weni ka neykümküley “llükaniekefulu engün am tati lan dungu” (Ebrew 2:14, 15).

Ayükuleafuymi tami neykümkülen Dio ñi we mapu mu. ¡Chem afmangechi neykümkülen nieaiñ küpalechi antü mew! Tüfachi Mapu kiñe küme rumel mülewe ngetule, ngewelayay awkan (weychan), kutran ka weda femün. Ngewelayay kuñifall (pofre) ka ngüñün. Neykümgeaiñ tachi füchan ka lan, ka llükan mu, ngeñkawün mu ka nor dungunon. Biblia feypi Dio mu: “Nülanentunieymi tami küwü ka eluniefimi kom ñi duamtuniel kom pu mongelelu” (Salmo 145:16).

Dio ñi pu weni nieayngün afnoachi mongen. Kintulu weniyefiel Dio, elungeay küme rumel mongen, doy falichi wülkeel (Romanu 6:23). ¡Ngüneduamge tañi chumgeal tami rumel mongen!

Fentren antü nieaymi chemküfchi tami dewmayal. Küpa adümafuymi dungulal kiñe dungulwe, adümal fillke ngüren kam mamüll küdawal. Kafey eymi küpa kimafuymi pu kulliñ, ka anümka mu. Küpa amuafuymichi kimael kake mapu ka chi pu che mülelu. Afnoachi mongen am niealu eymi, femafuymi kom tüfachi dungu.

Fentren antü nieaymi tami peal fentren weni. Afnoachi mongen am niealu eymi, kimafimi ka fentren Dio ñi pu weni. Kimüñmafimi tañi kümeke adümkawün ka kümeke chumgen, kafey kidu weniyeafimi. Piwkeyeafimi, ka kidu engün piwkeyeaymu (1 Korintio 13:8). Rumel mongen am niealu eymi, weniyeafimi ta itrokom che mülelu tüfachi Mapu mew. Petu doy kümey, tami weniyefiel Jewba, tremküleay doy newentu rupalu patakakechi tripantu mu. ¡Rumel weniyefinge Dio!