Tati Kiñewkülechi Ngünenielu ñi karta

Kom tati pu piwkeyekefilu ta Jewba:

Jesus ta feypi: “Kimafimün tati rüf dungu, fey ti rüfngechi dungu lifrekünutuaeymünmew” (Juan 8:32). ¡Rume yafültukukeeiñmew tüfachi dungu! Feley, kom iñchiñ kimürpuafuiñ ti rüf dungu, kuñiwün-ngelu rume ti antü ñi mülen, epe puwkülelu am “ñi afael ta antü” wall püle müley tati koylake dungu (2 Timotew 3:1). Rakiduamniepelaymi chi tami rume ayüwkülen kimeltungelu ti rüf dungu mülelu Biblia mew. ¡Rume ayüfali tami femngechi rupan!

Falin-ngey taiñ kimniefiel ti rüf dungu ka taiñ amuldungukefiel pu che, welu ka falin-ngey taiñ inayal ti rüf dungu taiñ mongen mew. Feymu müley taiñ rumel müleal Chaw Ngünechen ñi piwkeyechen mew. Welu, ¿chumngechi femafuiñ tüfa? Epe puwlu ñi layal ta Jesus wiñoldunguy tüfachi ramtun. Kidu feypifi tañi manelfalngechi pu apostol: “Fey müngeltufilmün [feyentufilmün] iñche ñi werkün dungu, müleaymün iñche ñi piwkeyen mew, chumngechi ta iñche müngeltufiñ ta Chaw ñi werkün dungu ka mülen kisu ñi piwkeyen mew” (Juan 15:10).

¿Ngüneduamfimi chumi Jesus ñi rumel müleal Chaw Ngünechen ñi piwkeyechen mew? Ñi allkütufiel mu ñi feypietew tañi Chaw. Iñchiñ ka femngechi müley taiñ femal. Taiñ rumel müleal Chaw Ngünechen ñi piwkeyechen mew, müley taiñ inanieal ti rüf dungu taiñ mongen mu. Feychi pun Jesus ka feypi: “Fewla longkontukufilmün tüfachi dungu, [ka rumel femülmün, TNM], rume sakinngeaymün” (Juan 13:17).

Rume maneluwkeiñ tüfachi lifru tami kelluaetew ñi inanieal ti rüf dungu tami mongen mew, femngechi tami rumel müleal “ta Ngünechen ñi piwkeyechen mew” tami llowal “ta rumel mongen” (Juda 21).