Gedeón hueufi pu Madián che

Pu Israel che huiño püntütripaingün Chau Jehová mu ca poyefingün coilaque dios. Pu Madián che 7 tripantu mu hueñeñmaquefingün pu Israel che ñi culliñ, ca huesalcaquefuingün tañi cosecha. Pu Israel che ellcauquefuingün lolo meu ca mahuida mu ñi cuñiutucuhual. Feimu llellipuingün ñi montulngeal. Fei Chau Jehová huercüi quiñe cüme püllü ñi feipiafiel tati hueche huentru Gedeón: “Chau Jehová dullieimu tami nehuen-ngechi hueichafengeal”. Gedeón huiñoldungui: “Iñche ta falin huentrungelan rume, ¿chumngechi montulafun pu Israel che?”.

Gedeón ayüniefui ñi rüf maneluucüleal tañi dullieteu Chau Jehová. Feimu, ¿chumi? Mapu mu elcünui pichi cal ufisa, fei feipifi ta Chau Jehová: “Hunle, cülchafcülele tüfachi cal ufisa, huelu ancülele ti mapu, rüf maneluucülean eimi dullicünuen ñi montulafiel ta Israel”. Hunlu, ¡femtripai! Feimu, Gedeón ca quiñe dungu feipifi ta Chau Dios: “Ca antü hunle, ancülepe ti cal ufisa, huelu ti mapu cülchafcülepe”. Tüfa ca huiño femtripai. Feulaque maneluhui ñi dullieteu Chau Jehová. Feimu trahulfi tañi pu hueichafe ñi lefcontuafiel pu Madián che.

Chau Jehová feipifi ta Gedeón: “Quelluafiñ pu Israel che tañi huehual. Huelu fentren hueichafengeimün, com amufule, ‘hueutripaiñ iñchiñ taiñ nehuen mu’ piafuingün. Feimu feipiafimi pu llicalelu ñi amutual”. Fei 22 mil huentru amutuingün, huelu 10 mil mülehueingün. Chau Jehová feipi: “Petu fentren mülehuei. Yeafimi engün ti huitrunco mu, fei ñi pütocoal. Quiñeque engün pepicaucüleaingün ñi hueichayal pütocomequelu rume. Feichi pu huentru müten dulliaimi”. Fei 300 huentru müten dullingei. Chau Jehová feipicünui feichi pichi troquiñche ñi huehuafiel pu 135 mil Madián hueichafe.

Feichi pun, Chau Jehová feipifi ta Gedeón: “Feula queta lefcontuafimün pu Madián che”. Gedeón elufi pu hueichafe quiñeque cullcull ca quiñeque metahue nielu pelontuhue, fei feipifi: “Adquintumuchi, fei inayentumuan”. Gedeón dungulfi ti cullcull, nengümfi ti pelontuhue, fei trafolfi ti metahue ca huirari: “¡Tüfa Chau Jehová ca Gedeón ñi fütra cuchillo!”. Pu 300 huentru ca inaye femingün. Pu Madián che rume llicaingün, fei lefcülen tripaingün huall püle. Fente ñi pofolcahun engün, hueluconque langümuhuingün. Femngechi, ca quiñe rupa Chau Jehová quellufi pu Israel che ñi huehuafiel tañi pu caiñe.