Chau Jehová elufi nehuen ta Sansón

Fentren pu Israel che ca huiño eluhuingün ñi poyeafiel coilaque dios. Feimu Chau Jehová catrütulafi ñi ngünenieaeteu pu Filistea che. Huelu quiñeque Israel che poyeniefingün ta Chau Jehová, quiñe tüfa Manóah. Manóah ca tañi domo nielafuingu pichiqueche. Huelu Chau Jehová huercüfi quiñe cüme püllü ñi feipiafiel Manóah ñi domo: “Nieaimi quiñe huentru püñeñ montulafilu pu Israel che pu Filistea che mu. Nazareo chengeai”. Eimi, ¿quimimi chumquefui pu nazareo? Nazareo pingequefui ta che huichucünungelu ñi serfiafiel ta Chau Jehová ca elungequelafui ñi cupilngeal.

Manóah tañi domo engu nierpui quiñe pichi huentru, Sansón üitucufingu. Chau Jehová elufi ñi nehuen huentrungerpual. ¡Langümfi quiñe trapial quisu tañi cuhu mu müten! Ca quiñe rupa langümfi 30 Filistea huentru, inei no rume quellulaeyu. Feimu, üdeniequefeyu pu Filistea che, ayüniefuingün ñi langümaeteu. Quiñe pun, Sansón umautumequefui Gaza huaria mu. Tañi pu caiñe esperamefeyu Gaza puerta mu, “tripale ta antü, langümafiyiñ” pingün. Huelu petu dumiñcülelu, Sansón amui Gaza cura malal mu, fei entuñmafi ñi puerta. Meñcu yefi pu puerta huechuñ huincul mu, tüfachi huincul inafülcülefui ta Hebrón huaria.

Pu Filistea che feipimefingün ta Dalila, Sansón ñi ayün domo: “Ayünieiñ taiñ presuntucuafiel ta Sansón. Feipimuiñ chumngelu fente nehuen-ngei. Femülmi, cullihuaiñ fentren plata”. Dalila diñmatufi ti plata, fei eluhui tañi femal. Sansón pilai ñi feipial chemu ñi nehuen-ngen. Huelu, fente ñi dicümtucueteu Dalila, afeluhui, fei entudungui. Feipi: “Iñche ta nazareo, elungequelan ñi cupilngeal. Cupilngeli, nehuen-ngehuelayan”. ¡Müna huesa dungu fel Sansón ñi feipilelfiel ta Dalila!, ¿felei no am?

Feimeu müten Dalila feipifi pu Filistea che: “¡Feula queta quimün!”. Fei umahuelfi ta Sansón huente tañi lucu meu ca cupilngei. Dalila nehuentu feipi: “¡Sansón, mülepaingün pu Filistea che!”. Sansón trepei, huelu nehuen-ngehuelai. Pu Filistea che nüfingün, entuñmafingün tañi nge ca carceltucufingün.

Fentren Filistea che trahuluhuingün cheu ñi poyequefiel tañi dios Dagón. Nehuentu feipingün: “¡Taiñ dios ñi duam mu hueufiyiñ ta Sansón! ¡Cüpalelmuiñ taiñ pichi ayentuafiel!”. Fei Sansón huitracünungei rangi 2 fütraque orcon mu tañi ayentungeal. Sansón nehuentu feipi: “¡Ahuem, Chau Jehová! Füreneen, ca quiñe rupa eluafen tami nehuen”. Deu huiño tremürquefui tañi lonco. Feimu, com tañi nehuen mu ültrefi ti 2 fütraque orcon, ti fütra ruca trañmanacümeyu engün. Com laingün, Sansón cafei.