¿KIMKEFUYMI TÜFA?
Ti sinagoga wünen siglo mu: Feyta mu adentukünungey kiñe sinagoga wünen siglo mu. Tüfa müley Gamala mapu mu, 10 kilometro pikun püle Galilea lafken mu. Pengelkeeiñmu ñi chumngekefel chi pu kuyfike sinagoga.
¿Chumngechi mülerpuy tati sinagoga?
TI DUNGUN sinagoga tuwi kiñe dungun griegu kewün mu, tüfa feypiley “fütra trawün” kam “trawüluwün”. Fütra kuyfi mu pu judiu amukefuy sinagoga mu ñi kimeltungeal ka poyeafiel ta Chaw Ngünechen, feymu müna küme üy tukulelngey tüfachi trawüwe ruka. Ebrew Wirintukun mu üytungekelay tati sinagoga. Welu tati Griegu Wirintukun feypi tati sinagoga dew mülekey wünen siglo mu.
Fentren adümuwlu rakiduamkey tati sinagoga mülerpuy feychi püresulefulu pu judiu Babilonia mu. Kiñe lifru feypi: “Pu yengelu Babilonia mu, alü kamapulefuy ti Ngillatuwe Ruka mu, mülekefuyngün kiñe mapu mu tañi kimnoel, fey tañi weñangkülen mu duamniefuy tañi yafültukungeal, feymu kiñeke mu trawüluwkefuy Sabado antü mu peno, fey chillkatukefuyngün ti Wirin Chillka” (Encyclopaedia Judaica). Fey lifreletulu pu judiu, amulepelay tañi trawüluwün ñi ngillatual ka chillkatual ti Wirin Chillka. Fey mülenagpuyngün kakerume lof mu, fey mu ka elkünuyngün ta sinagoga.
Wünen siglo mu, pu judiu mülelu Mediterraneo, Medio Oriente ka Israel mapu mu amukefuy sinagoga mu tañi poyeafiel ta Chaw Ngünechen ka trawüluwkefuy kakerume duam mu. Kiñe wentru kimeltukelu ti Universidad Hebrea de Jerusalen mu, Lee Levine pingelu, feypi: “Sinagoga mu amukefuy pu che tañi chillkatual, imekefuy iyael Sabado antü ka kakelu fiesta mu, jusgangekefuy pu che, trapümngekefuy plata tañi kellucheal, ka trawüluwkefuy che politiko dungu mu kam tañi kiñentrür müleal müten”. Ka feypi: “Welu doyelchi may ti sinagoga falin-ngefuy ñi poyengeal ta Chaw Dios”. Feymu may kimürpuafuiñ chumngelu Jesus fentren rupa amukefuy sinagoga mu (Mar. 1:21; 6:2; Luka 4:16). Fey mu Jesus kimeltukefuy ka yafültukukefuy pu trawülelu. Dew mülerpulu ti kristiano trawünche, apostol Pablo ka amukefuy sinagoga mu tañi amuldungual. Pu che küpa kimniefilu ta Chaw Ngünechen amukefuy sinagoga mu, feymu Pablo puwlu müten kiñe waria mu, amukefuy sinagoga mu tañi amuldungual (Hecho 17:1, 2; 18:4).