Pu papeltuquelu ñi ramtuqueel

Ñi feipin 2 Tesalonicenses 3:14, ¿inei mülei ñi femal? ¿Pu loncolelu cam quisuque iñchiñ?

Ti apostol Pablo huirintuculelfi pu Tesalónica che: “Quiñeque che femnole taiñ feipin tüfachi carta mu, cuñiutucuhuaimün feichi che mu” (2 Tes. 3:14). Cuifi, quiñe cristiano pinole ñi inayafiel Chau Jehová tañi Dungu, pu loncolelu mülefui ñi hulal quiñe hueupin ñi cuñiutucuafiel ti trahunche. Femngechi rupafule, quisuque pu peñi ca pu lamngen fentecünuingün ñi rume fülmaucüleal feichi che engün. Trahuluuquefuingün amuldungun ca trahun mu müten.

Huelu feula doi cüme quimürpuiñ ñi feipin Pablo. Tüfa mu Pablo quimfalcünui ñi femal quisuque pu cristiano. Feimu cüme miyaunole quiñe cristiano, feula pu loncolelu ngelai ñi hulal quiñe hueupin trahunche mu. ¿Chemu am feletui tüfa? Raquiduamaiñ chem ñi nütramcan Pablo feipilu tüfachi ngülam.

Pablo ngüneduami feitachi trahunche mu mülefui quiñeque cristiano “cüme miyauquenolu”. Fei engün famentufingün Chau Dios ñi ngülam. Quiñe rupa Pablo pemefilu, fei ngülamtufi engün: “Inei rume pinole ñi cüdahual, ilayai”. Huelu quiñeque cüdahuafui, huelu femlaingün, chofüqueingün. Cafei dunguconqueingün caquelu che ñi dungu. Pu cristiano, ¿chumngechi troquiafuingün pu cüme miyauquenolu? (2 Tes. 3:6, 10-12).

“Cuñiutucuhuaimün feichi che mu” pi Pablo. Griego quehun mu cüpa feipi ñi cuñiutucuhual feichi che tañi huelulcanoaeteu. Pablo ngülamtufi com ti trahunche, pu loncolelu müten no (2 Tes. 1:1; 3:6). Feimu quisuque pu cristiano inaduamlu quiñe che ñi inanofiel Biblia ñi feipin, mülefui ñi ‘hueniyehuenoafiel’ feichi che.

¿Entungelu trahunche mu troquingequepefui mai? Femlai. Pablo feipi: “Ngülamtunieafimün chumngechi ngülamtuquefimün quiñe peñi”. Feimu quisuque pu cristiano trahuluhuafui feichi cristiano engu trahun ca amuldungun mu. Huelu trahuluulayafui tañi cüme rupaleal feichi che engu, ¿chumngelu? “Femngechi yehueleai” pi Pablo. Femngechi femle pu peñi ca pu lamngen, feichi che yehueafui tañi huesa femün mu ca nor raquiduamtuafui (2 Tes. 3:14, 15).

¿Famülque mu cai? ¿Chumngechi inayafuiñ Pablo ñi feipin? Hune mülei taiñ cüme ngüneduamal feichi cristiano ñi rüf cüme miyaunon. Tati pu cristiano inaquefilu rume ta Biblia caquerumeafui tañi chumal, feimu quiñeque mu ayülayafuiñ chi ñi femün caquelu peñi cam lamngen. Ca quiñeque mu taiñ culpafe chengen mu huesa duamelafeiñmu engün. Huelu, ¿feichi che mu püntütripapeaiñ mai? Femlai, Pablo nütramcalai feichi dungu mu. Doi mai nütramcai feichi pu che quisu ñi pin mu feyentunofilu Chau Dios ñi ngülam.

Feimu ngüneduamliyiñ ti cristiano ñi famentumequefiel Jehová tañi ngülam,a quisuque iñchiñ eluhuaiñ taiñ hueniyenoafiel. Huelu nütramcalayafiyiñ caquelu pu che taiñ dulliel, taiñ familia müten feipiafiyiñ. Trahuluhuafuiñ feichi cristiano iñchiñ trahun ca amuldungun mu müten. Huelu norcünutule tañi femmequen, fei hula huiño fülmaucüleaiñ feichi cristiano engu.