Kümey taiñ kim ngünewal

¿CHUMKEY TATI CHE KIM NGÜNEWLU?

Pu che kim ngünewlu, famngechi küme chengekey:

• ñochi chengey.

• küme rakiduamkey petu ñi femnon kiñe dungu.

• ayünole rume, kom femkey tañi elfalngeel.

• duamchefengey.

¿CHUMNGELU FENTE FALIN-NGEY KIM NGÜNEWAL?

Kiñeke mu, pu pichikeche ngüchaltukungekey ñi femal wedake dungu, “fey tami küme rupaleal” feypingekey. Kim ngünewle engün, eluwlayay ñi welulkayaetew tüfa. Welu tati pu pichikeche kim ngünewnolu wedalkayay ñi femün engün, fey:

• kewatuchefengeafuy.

• depresion kutran kontuafeyew.

• pütremtufengeafuy, putufengeafuy ka drogatufengeafuy.

• kümeke iyael ilayafuy.

Kiñe trokiñche ngüneduami ñi chumngechi chengerpual kim ngünewle tati pu pichikeche. Tüfachi trokiñche kimfalkünuy, tremle engün pu pichikeche müte kontulayaeyew wedake kutran, müte konlayay defen dungu mu ka yamafi tati pu awtoridad. “Pu che kim ngünewlu, müna kümelkangekeyngün”, pi tati profesora Angela Duckworth, küdawkelu kiñe universidad Estados Unidos mu.

NIELMI PICHIKECHE, ¿CHUMNGECHI KIMELTUAFUYMI ÑI KIM NGÜNEWAL?

Mupiaymi tami feypin

BIBLIA ÑI NGÜLAM: “Fey ta famngechi ‘may’ pilmün, femngechi felepe. ‘Felelay’ pilmün, felekilpe” (Matew 5:⁠37).

Feypifilmi tami pichikeche: “Elulayaeyu tami ayükeel”, welu tami pichikeche ngümakawkeyngün ka ümülkawkeyngün elungeal tañi ayükeel, fey ¿chumafuymi? Mupinolmi tami feypin, fey elufilmi ñi ayükeel, tami pichikeche kimtukuay: “Femngechi femli, chem rume tañi ayükeel elungean”.

Welu mupilmi tami feypin, ti pichikeche kimürpuay kiñe falin dungu, fey tüfa: rumel elungekelayay chem rume tañi ayükeel. Tati doctor David Walsh wirintukuy kiñe lifru nütramkalu tüfachi dungu mu, kidu feypi: “Tati pu chaw elufemkefilu tañi pu pichikeche kom ñi ayükeel engün, wedakünukey ñi femken”. Ti doctor ka feypi tati pu che kimürpulu ñi kim ngünewal, doy falintukefi tañi nieel.

Fey elunofilmi tami pichikeche kom tañi ayükeel fewla, tremle engün doy eluway ñi kim ngünewal. Fey ngüchaltukungele tañi drogatual, kudumuwal kiñe che engu ñi niewnon, kam konal fill wedake dungu mu, tami yall kam püñeñ femürpulayay tüfachi dungu.

Rakiduamelafimi tami pichikeche chum triparpual fillke dungu ñi femürpual

BIBLIA ÑI NGÜLAM: “Chumngechi nganle ta che ka femngechi kosechayay tañi femkeel mew” (Galata 6:⁠7).

Kümeafuy tami rakiduamelafiel tami pichikeche chum triparpual fillke dungu ñi femürpual, femngechi kimtukuay kim ngünewnole, weda tripayay llemay. Rakiduamnge, tami pichikeche illkufengele, müte weniyelayafeyew kakelu pu che. Welu illkufengenole ka kim ngünewle üyawtungele rume, pu che küpa weniyeafeyew. Feley llemay, kimeltuafimi tami pichikeche ñi kim ngünewal, femngechi femle küme amuleay ñi mongen.

Kimeltuafimi tami pichikeche ñi femal ti doy falinke dungu

BIBLIA ÑI NGÜLAM: “Femngechi kimaymün tamün dulliael tati doy kümechi dungu” (Filipense 1:⁠10).

Kim ngünewliyiñ, famentuafiyiñ ti wedake dungu ka femaiñ taiñ duamfalchi dungu, ayünoliyiñ rume. Feymu kimeltuafimi tami pichikeche chumngechi dullial tati doy falinke dungu, fey “wünelu mew müley tami femal tüfa” piafimi. Feymu tüfa feypiafuymi tami pichikeche: “Dewmalmi tami tarea, fey wüla awkantuaymi”.

Inayentufalngeaymi

BIBLIA ÑI NGÜLAM: “Iñche ta eluwiyiñ kiñe küme inayentufalchi dungu, fey eymün tamün ka femngechi piwkeyewael chumngechi femün ta iñche” (Juan 13:⁠15).

Kiñe dungu weda duamelelmu, tami pichikeche inaduamafuy tami chumkülen. Fey kim ngünewülmi, kimfalkünuaymi ñi fente küme tripaken femngechi chengeal. Rakiduamnge, wedwedkawle ti pichikeche, ¿chumaymi kay? ¿Illkufemaymi kam ngünewküleaymi?