Kimeltuafimi ñi newentuleal wedake dungu rupale rume

¿CHUMKEY TATI CHE NEWENTULELU?

Femngechi pu che newentuwkey ka küme duamküleketuy, rupalu rume wedake dungu. Tañi rupaken mongen mu kelluafeyew tañi femngechi chengeal. Rakiduamnge tüfa: pu pichikeche trekakantulu kiñeke rupa tranayafuy, welu femngechi kim trekayay. Ka femngechi, tami pichikeche kiñeke mu wedake dungu rupayay, welu kimürpule tañi newentuleal, küme tripayay tañi mongen mu.

¿CHUMNGELU FENTE FALIN-NGEY NEWENTULEAL?

Kiñeke pichikeche küme tripanole tañi dungu, rupale wedake dungu kam feypingele ñi welulkawken engün weñangkülekey, kakelu pichikeche fente ñi weda duamkülen afeluwkeyngün ñi femken. Welu kidu engün duamniey ñi kimürpual tüfachi dungu:

• Yafüluwliyiñ rume taiñ küme femal, welulkawafuiñ (Santiaw 3:⁠2).

• Kom iñchiñ weda ruparumeafuiñ (Eclesiastés 9:⁠11).

• Feypingeliyiñ chem dungu welulkawkeiñ, femngechi müten küme elkünutuafuiñ taiñ femün (Proverbios 9:⁠9).

Feymu tami pichikeche kimürpule newentuleal rupan mu wedake dungu, tüfa maneluway ñi küme tripayal küpalechi antü mew, rupale rume wedake dungu mu.

¿CHUMNGECHI KIMELTUAFUYMI ENGÜN ÑI NEWENTULEAL?

Welulkawle tami pichikeche

BIBLIA ÑI NGÜLAM: “Tati nor chengelu tranafuy regle rupa, welu witratuay tati” (Proverbios 24:⁠16).

Welulkawle tami pichikeche, kelluafimi ñi küme ngüneduamal tañi rupakeel, fey femngechi ramtuwafuy: “¿Fütra dungu am ta tüfa kam pepilfalngey?”. Rakiduamnge tüfa: tami pichikeche weda tripale kiñe prueba colegio mu, kidu afeluwafuy, fey “¡chem no rume küme femkelan!” feypiafuy.

Femngechi dungu rupale tami pichikeche, kelluafimi ñi rakiduamal chumngechi doy küme tripayafuy küpalechi antü mu. Femngechi tami pichikeche kimürpuay ñi küme elkünutual tañi weda dungu, fey küme duamkülewetuafuy.

Feymu norümlayafimi tami pichikeche ñi weda dungu, doy may kelluafimi ñi rakiduamal chumngechi kidutu norümafuy ñi dungu. Fey tami pichikeche weda tripale kiñe prueba colegio mu, ramtuafuymi: “¿Chumafuymi tami doy küme adümafiel tüfachi dungu?”.

Ruparumele wedake dungu

BIBLIA ÑI NGÜLAM: “Kimlaymün rume ñi chumleael tamün mongen ta wüle” (Santiaw 4:⁠14).

Pu che tañi mongen kalerumeafuy. Fey rikungele kiñe che, pofrerumengeafuy, ka kiñe külfün che, kutranrumeafuy. Chumngechi feypi Biblia “tati pu matu lefkelu rumel wewkelayngün ti kuden, tati pu newen-ngelu rumel wewkelayngün ti weychan, [...] kom engün am weda ruparumeafuyngün” (Eclesiastés 9:⁠11).

Eymi eluwkülepelaymi tami ingkañpeafiel tami pichikeche, fey tañi küme feleal engün. Welu fente newentulelmi rume, ingkalayafuymi ñi rupanoal chem weda dungu no rume.

Fey tami pichikeche weniyewenofile ta kiñe che, lale kiñe tañi piwkeyenieelchi che,a ka rupale kakelu weda dungu ñi weñangkülafetew, kelluafimi ñi newentuleal. Femngechi kelluafimi ñi pepikawküleal rupale wedake dungu tremle kidu. Fey niewetunole küdaw kam niele pichin plata, kidu kimay chem chumal.

Feypingele ñi küme elkünutual tañi femngen

BIBLIA ÑI NGÜLAM: “Allkütunge tati ngülam [...], femngechi tami kimchengerpual küpalechi antü mu” (Proverbios 19:⁠20).

Kiñe che feypifile tami pichikeche ñi doy küme elkünutual tañi femngen, kidu ayülelay ñi weda duamelafiel tami pichikeche, doy may tüfa ayüniey ñi kelluafiel tañi doy küme femürpual.

Kellufilmi tami pichikeche ñi llowafiel feychi ngülam, rume kelluaeyew ta kidu ka eymi kütu llemay. Kiñe wentru nielu küla yall, John pingey, feypi: “Tati pu pichikeche eluwkülenole ñi norümafiel tañi welulkan, tüfa engün turpu kimlayafuyngün ñi küme adkünuafiel tañi mongen. Fey tremle engün doy wedake dungu nierpuafuyngün. Tüfachi dungu rupale, eymi chaw ka ñuke, aflayafuy tami kellunieafiel tüfa engün. Femngechi femürpulmi, eymi ka tami pu yall kam püñeñ küme felelayafuymün mongen mu”.

Feymu feypingele tami pichikeche ñi doy küme elkünutual tañi femngen, ¿chumngechi kelluafuymi ñi küme llowal tati ngülam? Tami pichikeche ngülamtungele colegio mew kam chew rume, feypirumelayaymi “tañi pichikeche duamtulay ñi norümngeal”. Doy may, ramtuafuymi:

• ¿Chumngelu chi feyti che norümeymu? ¿Chem rakiduamimi?

• ¿Chumngechi doy küme elkünutuafuymi tami femngen?

• Ka antü ngülamturumengelmi, ¿chem chumafuymi?

Longkontukunge, ngülamtungele tami pichikeche ñi doy küme femngen nieal, kelluaeyew fewla kafey doy tremle kütu.