Kimeltuafimi ñi nor chengeal

¿CHUMKEY TATI NOR CHENGELU?

Tati nor chengelu fente küme kimniey chem ñi kümen ka chem ñi kümenon. Fey tüfachi che küme kimeltulelngey tüfachi dungu, fey rumel inaniekefi tañi mongen mu. Feyti che chum duamkülele rume kam peniengenole rume, femkey kümeke dungu.

¿CHUMNGELU FENTE FALIN-NGEY NOR CHENGEAL?

Kiñeke pichikeche küme kimeltulelngey chem ñi kümen ka chem ñi kümenon. Welu kolegio mu, ti musika ka tati television kütu weluley ñi feypiel pu che chem ñi kümen ka chem ñi kümenon, fey kom tüfa welurakiduamelafeyew pu pichikeche.

Doyelchi may welurakiduamelafeyew pu wechekeche. Kiñe lifru ngülamtukefi pu chaw ñi kimeltuafiel tañi “pu wechekeche rume ngüchaltukungeay ñi femal kakelu che ñi ayükeel. Feymu pu wechekeche müley ñi inayal kümeke ngülam femngechi ñi kümeke dungu femal, fey ñi pu weni femle wedake dungu rume”. Rüfkünu llemay, pu chaw müley ñi kimeltuafiel kom tüfa petu pichikalu tañi pu yall ka püñeñ.

¿CHUMNGECHI KIMELTUAFUYMI ENGÜN ÑI NOR CHENGEAL?

Küme kimeltuafimi tami pu pichikeche chem ñi kümen ka chem ñi kümenon

BIBLIA ÑI NGÜLAM: ‘Pu fütakeche [...] ta dew kimniey tañi ngüneduamafiel kom dungu, ka dew kimniey chem dungu ñi kümen kam ñi kümenon’ (Ebrew 5:⁠14).

• Tami feypin mu kimfalkünungepe chem ñi kümen ka chem ñi kümenon. Fill antü kimeltuafimi tami pichikeche ñi adümal kümeke dungu. Tüfa tami femafel: kiñe che koylatule, feypiafimi tami pichikeche: “Feyta kümelay tañi femün, pu nor che femngechi femkelay”. Welu tami pichikeche rüf dungule, “rume kümey tami femün, nor chengeymi” piafimi. Kafey, kiñe che kellunofile kiñe kushe papay, “müna wedakünuy feyti che, piwkeyechekelay” feypiafimi tami pichikeche. Welu tami pichikeche kellufile kiñe kushe papay, “kümey tami femün, femkey ta che” piafimi. Femngechi tati pichikeche kimürpuafuyngün fey ñi femal ka ñi femnoal.

• Kimeltuafimi chumngelu ñi kümen kam ñi kümenon kiñe dungu. Ramtuafuymi tami pichikeche: “¿Chumngelu fente kümey tami rüf dungual? ¿Chumngelu kümelay tami koylatuafiel tami pu weni? ¿Chumngelu kümelay tami weñeal?”. Femngechi rakiduamelfilmi tami pichikeche, tüfa kimürpuay chem ñi kümen ka chem ñi kümenon.

• Küme kimeltuafimi fente ñi kümelkayaetew nor chengeal. Feypiafuymi tami pichikeche: “Rüf dungulmi, kakelu che maneluway eymi mu”. Ka feypiafuymi: “Duamtuchefengelmi, tati pu che küpa weniyeafeymu”.

Kimfalngepe tami familia ñi inakefiel kümeke dungu

BIBLIA ÑI NGÜLAM: “Küme ngüneduamuwmün eymün kisutu” (2 Korintio 13:⁠5).

• Kom tami pu che kiñewkülele ñi rakiduamken chem ñi kümen ka chem ñi kümenon, eymi feypiafuymi:

  • “Iñchiñ koylatukelaiñ”.

  • “Iñchiñ wülelkelafiyiñ ta kakelu che ka wirarelkelafiyiñ no rume”.

  • “Weda dungukelafiyiñ ta che”.

Femngechi kiñewkülele tamün rakiduam, tami pichikeche kimtukunieay eymün re feypikelaymün chem ñi kümen ka chem ñi kümenon, doy may inakefimün tüfa tamün mongen mu.

• Fill antü nütramkalelafimi tami pichikeche, fey ñi kimal engün chem ñi kümen ka chem ñi kümenon. Tüfa tami femafel: trürümafuymi tamün femken ka ñi femken pu che escuela mew ka pu tripakelu television mew. Fey ramtuafimi tami pichikeche: “¿Inayentupeafuymi may feychi che tañi femken? ¿Iñchiñ kay? ¿Rakiduamkeiñ feychi che reke?”.

Kelluafimi ñi inanieal kümeke dungu.

BIBLIA ÑI NGÜLAM: “Femaymün kümeke dungu femngechi nieaymün tüngkülechi rakiduam” (1 Pedro 3:⁠16).

• Sakiafimi tañi küme femün mu. Kümeke dungu femle tami pichikeche, sakiafimi ka feypiafimi chumngelu fente kümey tañi femün. Fey, tami pichikeche rüf dungule, feypiafuymi: “Müna kümey tami femün, rume ayüwülenew”. Kafey, weda femle tami pichikeche, welu entule tañi weda femün, ¿chumafuymi? Wüne sakiafimi tañi entudungun, fey wüla norümafimi.

• Weda dungu femle tami pichikeche, norümafimi. Rakiduamelafimi tami pichikeche weda femle, weda tripayay tañi femün llemay. Fey tüfa weda femle feypiafimi chumngelu kümelay tañi femün ka chumngelu ñi femün trürlay ñi femken tañi pu che. Ti pichikeche weda dungu femle, kiñeke chaw chem feypikelaeyew rume femngechi ñi weda duamelnoafiel. Welu kakelu chaw feypikefi tañi pu pichikeche chumngelu kümelay tañi femün, femngechi kellukefi engün ñi ngüneduamal chem ñi kümen ka chem ñi kümenon.