Küme kimfinge ta che

¿Chumkey ta che?

Fentren che allkütulu müten koylake dungu kakelu che mew, eluwingün ñi weda rakiduamal kidu engün mu. Ngüneduamnge koylake dungu ñi rakiduamkeel kiñeke che:

Kiñeke ngen kudaw rakiduamkey pu domo adümuwkülelayngün ka müte newen-ngelayngün. Feymu pepiluwkülelayngün ñi femal kiñeke küdaw.
Pu che mülelu lelfün mew chofü kam ngollife pingekey.
Kiñeke che rakiduamkey pu kutranchewkülelu weñangkiyawkeyngün ka fill antü mulfarkiyawingün.

Tati pu che femngechi rakiduamkelu, ayükey ñi kimfalkünual ñi rüfngen tañi feypikeel. Kafey müte duamtukelafi kakelu che ka rakiduam nielu.

Biblia ñi ngülam

“Kiñe che nienolu kimün, wedakünukey” (PROVERBIOS 19:⁠2).

¿Chem küpa kimeltuy? Küme kimnoliyiñ kom taiñ feypingeel, wedalkayafuiñ. Allküntukuliyiñ ñi feypiyawngeel kiñe che mu, fey pürüm feyentuliyiñ, weda rakiduamürpuafuiñ.

¿Chem kimeltukey Biblia?

Kiñeke che feypikey Biblia ngüchaltukukefi ta che ñi illamkayafiel ta kakelu. Welu ¿rüf feyngepey may tüfa? Ngüneduamnge ñi feypin Biblia.

Kom kiñe tuwün nieiñ. Biblia feypi: Chaw Dios “kiñe wentru mew müten ta elkünuy kom che Mapu mew” (Hecho 17:⁠26).
Chaw Dios kakerumekelay tañi llowcheken. Biblia feypi: “Ngünechen tañi dullitunienofiel kiñeke che müten ti pu kakelu mew. Chuchi tuwünchengeafuy rume, llowkefi kom tati feyentunieetew tati eluwkülelu ñi femal küme dungu” (Hecho 10:⁠34, 35).
Chaw Dios doy falintukey pu che tañi piwke. Biblia feypi: “Ti wentru pekey chem ñi pengelkülen tañi adkiñ mu müten, welu Jewba puwkintukey ponwitu piwke mu” (1 Samuel 16:⁠7).a

a Biblia pengeli iney pingey ta Chaw Dios: Jewba.

Küme kimafiyiñ tati pu che

Eluwliyiñ taiñ küme kimafiel tati pu che, pürüm feyentulayaiñ koylake dungu ñi feypiyawngeel kidu engün mu. Feymu petu taiñ weda rakiduamnon kiñe trokiñche mew, doy kümeafuy taiñ küme kimafiel.

Ñi rupan kiñe wentru: Jovica (Europa püle)

Rupachi trokiñ mu, nütramkaiñ ñi rupan ta Jovica. Chew ñi tremün kidu, radio ka noticia allküngekey ñi weda dunguyengeel kiñe pichi trokiñche. Kidu feypi: “Inche inakonün ñi feypingeel feychi trokiñche mu, ka üderpufiñ engün petu tañi küme kimnofiel rume. Kümelu trokifiñ tañi femngechi rakiduamkefel” pi tüfachi wentru.

Tüfachi wentru ka feypi: “Konlu tati ejercito mew, ka rakiduamnietun. We konlu werküngen ñi kiñentrür mongeleal ka küdawal kiñeke wechekeche küpalu tüfachi pichi trokiñche mu. Fey doy küme kimürpufiñ engün. Kafey eluwün ñi kimürpuafiel tañi kewün dungu ka allkütuafiel tati fillke musica ñi nieel engün. Küme yewkülerpun kidu engün mu, fey küme trokinietufiñ engün. Kuñiwtukuwnoli ka kontupatuafenew wedake rakiduam kidu engün tañi trokiñche mu, fey üderpuafuiñ. Feymu famentukefiñ noticia weda dunguyekefilu tüfachi tokiñche mu. Kafey pekelan pelicula yewentukukefilu tüfachi trokiñche” pi tüfachi wentru.

Chem tami femafel

Longkontukunge: wedake dungu feypingele kiñe trokiñche mew, rakiduamlayaymi kom ñi femngechi chengen engün.
Kimtukunienge: kom küme kimlaymi chi ñi chumngechi chengen ti trokiñche.
Doy küpa kimülmi kiñe trokiñche mu, manelfalngechi dungu kintuaymi.