Tüngnagi chi antü

ADKINTUFINGE Josue. Feypi: ‘¡Antü, nengümkilnge!’ Ka chi Antü nengümwelay. Feymu mülenagi rangiñ wenu mu kom kiñe antü. ¡Jewba femi tüfa ñi rupael! Welu peayiñ chumngelu (chemu) Josue ayüy ti Antü petu ñi wilüfküleal.

Tüfachi kechu wedake longkolelu Kanaan mapu mu llitulu ñi kewamekefiel Gabaon mew, pu Gabaon che werküy kiñe wentru ñi llellipumeafiel Josue ñi kelluaetew. ‘¡Matu küpange iñchiñ mu!’ pirkey. ‘¡Montulmuiñ! Itrokom pu longkolelu wingkul mapu mu petu kewañmaymu tami pu kona.’

Pürüm (pür) amuy Josue ka tañi pu awkafe (weychafe) engün. Trekayngün kom kiñe pun. Akulu ta Gabaon mew engün, ti kechu longkolelu ñi pu awkafe llükayngün, ka lefmawingün. Josue ñi pu awkafe langümyey kiñekentu, welu Jewba nakümelfi wenu mu fütrake pire kura reke, fey mew doy fentren kayñe awkafe lay ti pire (tranko) mew.

Josue pey epe puy ñi konal ti Antü. Ñi dumiñal, ka kechu wedake longkolelu ñi pu awkafe lefmawayngün. Feymu lle Josue llellipufi ta Jewba, ka inan-ngechi feypi: ‘¡Antü, nengümkilnge!’ Feymu chi Antü petu wilüfkülelu, pu Israel che femngechi mu pepi wewingün ñi awkan.

Müley fentren kake wedake longkolelu Kanaan mu ta üdefi Ngünechen ñi pu che. Epe kayu tripantu rupay ta Josue, ka ñi pu awkafe engün ñi wewfiel ti küla mari kiñe longkolelu feychi mapu mu. Femlu tüfa, Josue wüdamelfi feychi mapu kom pu trokiñ reñma (pu che) mew ñi duamtunieel mapu.

Alün tripantu rupay, ka af mew Josue lay nielu kiñe pataka mari tripantu. Petu mongelen kidu ka tañi pu weni, tati pu che feyentuniekefi (müngeltuniekefi) ta Jewba. Welu lalu tüfachi kümeke wentru, tati pu che wedalkamekeyngün, ka wedake dungu mu koni engün. Fey wüla may duami Ngünechen ñi kelluaetew engün.