Abigail ka David

¿EYMI kimfimi iney tüfachi küme ad domo ñi pemeafiel David? Abigail pingey. Kidu kim rakiduamkey, ka katrütuy David ñi weda femal. Welu petu taiñ kimnon tüfa, peayiñ chem dungu mu ñi rupameken David.

Fey wüla David lefmawlu Saul mew, ellkawi kiñe lolo mew. Tañi pu peñi ka ñi reñma (pu che) engün, küpayngün chew ñi mülen kidu. Meli pataka wentru chi küpay kidu mu, ka David longkongerpuy fey engün. Fey mew David amuy ñi pemeafiel Moab rey, ka feypifi: ‘Füreneen may, elkünuan tañi chaw ka tañi ñuke mülekayayngün eymi mew, peli wüla ñi chumlerpual iñche.’ Fey wüla, David ka tañi pu wentru engün, amuy ñi ellkawkiawal wingkul mew.

Rupachi antü mu, David kimfi Abigail. Abigail ñi wentru, Nabal pingey, kiñe ülmen wentru ngey nielu fentren mapu. Niey küla warangka ufisa ka kiñe warangka kapüra. Nabal rume weda piwkengey. Welu tañi domo Abigail kimi ñi femal tati kümeke dungu, ka müna küme ad domo ngey. Kiñe rupa ka montulfi tañi pu che. Peafiyiñ chumngechi.

David ka tañi pu wentru engün kümelkakefi Nabal. Kellukeyngün ñi ngüneytufiel tañi pu ufisa. Kiñe antü, David werküy kiñeke tañi pu wentru ñi llellipuafiel ñi füreneaetew Nabal. Puwingün Nabal mew petu kidu, ka tañi pu kellukeetew kediñufisamekeyngün. Fey kiñe ayekan dungu antü, ka Nabal niey fentren kümeke iyael (yagel). Fey mu David ñi pu wentru feypingün: ‘Iñchiñ kümelkakewiyiñ. Weñeñmawlayiñ eymi kiñe ufisa no rume, welu kelluwiyiñ ñi ngüneytuafiel. Fürenemuiñ, elumuafuyiñ kiñeke iyael müten.’

‘Iñche elukelafiñ tañi iyael eymün femngechi wentru,’ pi Nabal. Rume weda nentuy ñi dungu, ka wedake dungu dunguyefi David mew. Tüfachi pu wentru feypifilu David tüfa, rume lladküy. ‘¡Nüfimün tamün fütrake kuchillu!’ pifi engün. Ka amuyngün ñi langümafiel Nabal, ka tañi pu wentru engün.

Nabal ñi kiñe wentru allkülu Nabal ñi weda dungun, feypifi Abigail chem dungu rupan. Pürümka müten Abigail pepikawi kiñeke iyael, püramfi wente kiñeke furiku (burro), ka tripay. Trafmelu David engu, nagi ñi furiku mew, lukutunagi ka feypi: ‘Füreneen ñidol, allkütukilnge tañi füta Nabal ñi feypin. Wedwedngey, ka wedwedngechi dungu femkey. Tüfa nieymi kiñe yewün. Füreneen tüfey, llowfinge, ka wiñoduamtumuiñ ka tukulpakilnge chem ñi rupan.’

‘Kim domo ngeymi. Eymi ta katrütuen tañi langümafiel Nabal, iñche wiñolelafulu tañi weda femün. Fewla tüngün amutunge tami ruka mew,’ llowdunguy David. Fey wüla, lalu Nabal, Abigail David ñi kangelu kurengerpuy.