Jesabel ti reyna rume weda piwkengey

DEW LALU ti rey Jeroboan, kake rey ngünenielu ti pikungechi reyno nielu mari trokiñ reñma Israel pingelu, wedañmangey engün. Welu doy rume weda rey ngey ta Akab. ¿Kimimi chumngelu (chemu)? Kiñe rume fütra dungu fey ñi domo ñi duam, ti rume wedañma ngey ti reyna Jesabel.

Jesabel Israel che no. Tañi chaw feyta rey Sidon mapu ngey. Poyekefi ti koyla dio Baal pingelu, ka yafkantükukefi Akab ka fentren Israel che engün ka poyekefi Baal. Jesabel üdeniefi Jewba, feymew langümkafi fentren Ngünechen ñi pu pelon wentru. Kakelu müley ñi ellkawal lolo mew ñi langümngenoal. Jesabel ayüniele kiñe dungu, langümchekey ñi nieal tañi ayükeel.

Kiñe antü Akab rume weñangküley. Feymu Jesabel ramtueyew: ‘¿Chumngelu am weñangküleymi fachantü?’

‘Nabot ñi feypietew iñche,’ llowdunguy Akab. ‘Iñche ayüfun ñi ngillayafiel tañi ufad mapu. Welu feypienew: “Pepi nielayafimi”.’

‘Pichi felenge,’ pi Jesabel. ‘Iñche küpalelaeyu.’

Feymew Jesabel wirintükulelfi chillka kiñeke falinke wentru ti waria mu chew ñi mülen Nabot. ‘Feypiaymün kiñeke falinochi wentru ñi feypial engün: “Nabot malisiafi Ngünechen ka ti rey.” Feymu entufimün wekun waria mu, ka ütrüftuafimün kura mew fey langümafimün.’

Kimlu Jesabel dew lan Nabot, pürüm (pür) feypifi ta Akab: ‘Fewla amunge ka nüñmafinge Nabot ñi ufad mapu.’ ¿Rüf ngelay am chi Jesabel müley ñi kastigangeal tüfachi ñi rume weda femün?

Feymu lle, mülen antü mu Jewba werküfi ti wentru, Jeu pingelu, ñi kastigayafiel. Jesabel allkülu ñi küpan Jeu, kolotukünuwi tañi epu nge, ka ayüy ñi küme ad ngeal. Welu akulu Jeu ka pefi fentana ruka mew, feypifi tati pu wentru mülelu rey ñi ruka mew: ‘¡Ütrüfnakümfimün!’ Fey feyentuyngün, chumngechi pengekey adentun mu. Ütrüfnakümngepay, feymu lay. Femngechi afi Jesabel ñi rume weda reyna ngen.