Montuyngün kiñe wapi mew

¡ADKINTUNGE, chi farku petu ñamkoni! ¡Petu teyfuy! ¿Pefimi tati pu che ñi ütrüftükuluwkülen ta pu ko mew? Kiñeke dew (chay no) puwküley engün tati inaltu lafken mew. ¿Mülepey may Pablo üye mew? Peafiyiñ chem ñi rupameken ta Pablo.

Tukulpange, Pablo epu tripantu presuniengey Sesarea mew. Fey mu tukungeyngün Pablo, ka kakelu presulelu kiñe farku amualu ta Roma waria mew. Inafül kiñe wapi (isla) Kreta pingelu, kiñe küfküfkülechi fütra kürüf lefyawüleyew engün. Tati pu wentru pepi ngünelafingün ti farku. Antülelu pepi pelayngün chi Antü, ka punkülelu (trafialelu) pepi pelayngün chi wangülen. Af mew, rupalu fentren antü wüla, tati pu amulelu farku mu dew montunoalu trokiwingün.

Fey mew Pablo witrapüray ka feypi: ‘Kiñe no rume ta eymün mew ñamümlayaymün (ñapümlayaymün) tamün mongen; tati farku müten llümkonay (llafkonay). Trafia küpay Ngünechen ñi werken püllü iñche mew ka feypienew: “¡Llükalekilnge, Pablo! Müley tami mülepual feychi ngünenielu tati pu Roma che, Sesar pingelu. Ka Ngünechen kom montulafi tati mülelu eymi engün ti farku mew.”’

¡Dew rupalu mari meli antü ñi amulen ti küfküfkülechi fütra kürüf, rangipun mu, tati pu marineru ngüneduami engün tati lafken müte llüfüngelay (alükonlay)! Llükaleyngün ñi traftralofal kiñeke fütrake kura dumiñ mu, fey mew ütrüftükuyngün tati angkla. Wünmalu pefingün kiñe inaltu ngüyon tripalechi inaltu lafken. Adüwlu engün ñi yenieafiel tati farku inaltu lafken üyew.

Fey mu, püllepulu (püchü tripalepulu) ti inaltu lafken mew, tati farku puwi chew ñi wirkolemumchi kuyüm, fey anükonkülewepuy. Tati rew (ola) lafken rume (mütre) newentu litraflitrafngepulu tati farku mew, ka amuy ñi teyfukawal. Tati elfalkülelu, tati kapitan ngünenielu tati pu soldaw, feypi: ‘Kom tati kim weyül-le, weyülmün tamün puwael ta mapu mew; fey kakelu kay ütrüftükuluwaymün ta pu ko ñi inaleael, ka püneaymün nüleftripachi trafla ti farku mew tamün kenayam (kenkenam).’ Femngechi femi engün, ka tati epu pataka regle mari kayu che mülefulu farku mew, akuyngün tati inaltu lafken mew ka montuyngün, chumngechi feypikünulu ti werken püllü.

Tati wapi Malta pingey. Tati pu che rume kutranpiwkechen ngeyngün, ka kellufi tati pu mülefulu farku mew. Liflu ti antü, Pablo elkünungetuy ka farku, ka yengey Roma waria mew.