Jesús niei autoridad pu huesaque püllü mu

FÜTRA cuifi, Chau Dios quiñe tañi cüme püllü Huecüfü cünuhui. ¿Acordaimi chemu femi tüfa?...a Quisutu duamuhui ca ayüi fei tañi püramyengeal, feimu caiñetufi ta Chau Dios. ¿Inaeyu quiñeque cümeque püllü?... Mai, tüfa engün huesaque püllü pingequei Biblia mu (Apocalipsis 12:9).

Feitachi huesaque püllü, ¿quimnieingün ñi mülen ta Dios? ¿Chem pimi?... Biblia feipi fei engün quimnieingün (Santiago 2:19). Ca llicaleingün, quimnieingün Chau Dios ñi castigayaeteu tañi huesa femmequen engün. ¿Chumngechi huesalcamequeingün? ¿Chem pimi?...

Tüfachi püllü deumangefui ñi müleal huenu mu, huelu Biblia feipi ñi nagpan engün mapu mu. Che adcünuutuingün, ayüingün ñi nieal cüme ad domo mülelu mapu mu (Génesis 6:1, 2; Judas 6). ¿Quimimi chumquei epu che nieulu?...

Chau Dios eli tati huentru ca ti domo ñi niehual tañi trür müleal. Chau Dios adcünufi ñi piuqueyen mu cudumuhual, femngechi nierpual pichiche ca trür poyehun mu tremümafiel. Chau Dios elcünui pu nieulu chi che müten tañi cudumuhual, huelu pu püllü deumangelai tañi femngechi femal.

Femfulu rume, feiti pu huesaque püllü che adngetulu niefingün pu domo, fei nierpuingün ñi pu yall. Huelu caquelu che reque felelaingün, rume fütraque huentrungefuingün, gigante pi ta huinca. Ca rume huesa chengefuingün ca cutrancachequefuingün. Feimu Chau Dios adcünui quiñe Fütra Mangin Co tañi apümafiel feichi pu gigante ca com tati pu huesaque che. Huelu ñi montuluhual tati pu cümeque che, Chau Dios feipifi ta Noé ñi deumayal quiñe fütra huampo ruca cam quiñe fütra farcu. Jesús ngülamtui taiñ loncontucual chem ñi rupan tati Fütra Mangin Co meu (Génesis 6:3, 4, 13, 14; Lucas 17:26, 27).

¿Quimimi ñi chumün tati pu huesaque püllü aculu ti Fütra Mangin Co?... Elcünuingün tañi che cuerpo, cüpa huiñotuafel huenu mu. Huelu Chau Dios eluñmalaeyu, femngechi quiñehuingün Huecüfü engün. ¿Chem rupai fei engün tañi pu yall?... Laingün ca com ti pu che feyentunofilu ta Chau Dios.

Rupalu chi Fütra Mangin Co, Chau Dios chumcaunorume eluñmahuelafi ñi nieal che cuerpo tati pu huesaque püllü. Taiñ pepi penofiel rume, huelu tati pu huesaque püllü dicümtucuchequei ñi femal huesaque dungu. Famülque mu, doi huesalcamequei quechanacümngepalu am mapu meu.

¿Quimimi chemu pequelafiyiñ tati pu huesaque püllü?... Fei engün am trürnolu iñchiñ mu, feimu pengequelai. Pengequenolu rume, rüfngei tañi mülen engün. Biblia feipi tati Huecüfü “ngünencamequefi com mapu müleyechi pu che” tati pu huesaque püllü ñi coneltun mu (Apocalipsis 12:9, 12).

Satanás ca tañi pu huesaque püllü, ¿ca ngünencayafeiñmu iñchiñ? ¿Chem pimi?... Mai, femafui cuñiutucuunoliyiñ. Huelu ngelai taiñ llicaleal. Jesús feipi: ‘Tati Huecüfü ngünenielaeneu ta iñche’. Feimu pülleconcüleliyiñ Chau Dios mu, fei cuñiutuaiñmu taiñ ngünencanoaeteu Huecüfü ca tañi pu huesaque püllü (Juan 14:30).

Falin-ngei taiñ quimal chem huesaque dungu ngüchaltucuafeiñmu Huecüfü taiñ femal. Feimu raquiduamnge: ¿chem huesaque dungu femingün tati pu huesaque püllü nagpalu mapu mu?... Petu acunolu ti Fütra Mangin Co, cudumfingün pu domo fei engün ñi femnoafel. Ca femngechi famülque mu, tati pu huesaque püllü ngüchaltucuchequei ñi conal pecan cudumuhun mu. ¿Loncontucuimi inei engün am adcünungei ñi cudumuhual?... Pu curehuen müten.

Famülque mu quiñeque huechequeche petu nieunolu cudumuuquei, huelu fei cüme dungu no. Biblia feipi Chau Dios deumafilu tati huentru ca tati domo elufi quisuque tañi chemcün. Tati huentru niei pene ca tati domo niei vulva. Jehová femngechi deumafi tati huentru ca ti domo ñi cüme duameluhual, huelu pu curehuen müten. Tati pu huesaque püllü ayüuquei tati pu che femlu Jehová tañi üdequeel. Fei epu pichiqueche hueluconque malütuule, ayühuelafingün tati pu huesaque püllü. Ayülaiñ taiñ ayühuelafiel tati pu huesaque püllü, ¿felelai?...

Mülei ca dungu ñi ayüqueel tati pu huesaque püllü, huelu Jehová üdequefi. ¿Chem am tüfa?... Tati quehuan dungu (Salmo 11:5). Tati quehuafengelu cutranpiuqueyechequelai ca huesalcaquefi caquelu che. ¿Acordafimi? Femngechi femquefui tati huesaque püllü ñi pu yall.

Tati pu huesaque püllü ca ayüquei ñi llicalcayafiel ta pu che. Quiñeque mu tati pu huesaque püllü layechi che reque cünuuquei, ca inayentuñmaquefi ñi dungun cütu. Femngechi ngünencaquefi tati pu che, raquiduamelquefi ñi amulen ñi mongen tati pu layelu ca ñi pepi dunguquefiel pu che. Feimu fentren che feipiquei ñi mülen huitranalhue cam fantasma.

Feimu mülei taiñ llihuatuleal tati pu huesaque püllü taiñ ngünencanoaeteu. Biblia feipiqueiñmu: “Satanás quiñe cüme püllü femfaluuquei. Satanás ñi pu cüdahuelqueteu nor femquelu femfaluuqueingün” (2 Corintios 11:14, 15). Huelu tati pu huesaque püllü, huesalcachequei. Peafiyiñ chumngechi ngünencayafeiñmu.

Tati quehuan dungu, pecan cudumuhun ca fantasma ñi mülen, ¿cheu quimeltungequei?... Tati television meu ca pelicula, videojuego, internet ca quiñeque lifru mu. Com tüfa taiñ üitupeel, ¿püllentucupeiñmu mai ta Chau Dios mu cam püllentucuqueiñmu tati pu huesaque püllü meu? ¿Chem pimi?...

¿Inei cai ayüquei taiñ peafiel ca allcütuafiel huesaque dungu?... Satanás ca tañi pu huesaque püllü. Feimu, ¿chem mülei taiñ femal?... Mülei taiñ peafiel, allcütuafiel ca papeltuafiel re cümeque dungu taiñ püllentucuaeteu Jehová mu. ¿Chem üituafuimi taiñ peal cam allcütual?...

Femliyiñ cümeque dungu, ngelai taiñ llicayafiel tati pu huesaque püllü. Jesús nielu am Chau Dios tañi nehuen, doicülei tati pu huesaque püllü mu. Quiñe antü tati pu huesaque püllü llicalen ramtufingün ta Jesús: “¿Apümcamupaiñ am?” (Marcos 1:24). Feichi mu apümcangelaingün, huelu cüpalechi antü mu Jesús apümcayafi tati Huecüfü ca tati pu huesaque püllü. Fei ¡rume ayüucüleaiñ ñi rupayal tüfa! ¿Chem pimi?... Huelu petu ñi mülecan, Jesús cuñiutunieaiñmu pülleconcüleliyiñ quisu mu ca tañi Chau mu.