Jesukristo, tati feypikünuelchi Mesia

CHAW JEWBA kimelelfi tati pu pelon wentru wirintukulu Biblia, fillke dungu Mesia mu, ti feypikünuelchi Montulchefe. Tüfa küdawngelay ñi kimnieael ti Mesia, fey pu pelon wentru pengelkelu am chumngechi ñi choyüngeal, tañi amuldungual ka tañi lan mu. Afmatufalngey chumngechi ñi femtriparpun itrokom pelon dungu ñi feypikünungeel Jesukristo mew. Inaduamaiñ ti pelon dungu ñi rüfngen, kafey peaiñ kiñeke pengelkelu Jesus ñi choyüngen ka tañi pichi wentrungewma.

Tati pelon wentru Isaia feypikünuy chew ñi tuwün-ngen ti Mesia, David ñi pu che mu (Isaías 9:7). Femngechi femtriparpuy: Jesus, tati Longko Ülmen David tuwün-ngey (Matew 1:1, 6-17).

Ka kiñe pelon wentru, Mikea pingelu, feypikünuy ti Mesia ñi choyüngeal “Belen Efrata” pingechi waria mew, ka ñi longko ülmen-ngerpual (Miqueas 5:2). Welu choyüngelu Jesus, Israel mew mülekefuy epu waria Belen pingelu. Kiñe mülekefuy pikunchi trokiñ mapu mu, inafül Nasaret püle, kangelu Juda mew mülekefuy inafül Jerusalen püle. Ka tüfa Efrata üytungekefuy. Ka tüfachi waria mu choyüngey Jesus, femngechi wechurpuy tüfachi pelon dungu (Matew 2:1).

Ka kiñe pelon dungu mülelu Biblia mu, feypikünuy Chaw Ngünechen mütrümafi tañi Fotüm ñi tripatual “Egipto mew”. Femngechi rupay, petu pichi wentrungelu am Jesus Egipto mapu mew yengey, fey lalu wüla Erode, wiñometuy kidu tañi mapu mew. Ka femngechi femtriparpuy tüfachi pelon dungu (Oseas 11:1; Matew 2:15).

Tati wichulechi dungu, feypilelu “Fillke pelon dungu Mesia mu”, peaymi chew feypilelu “Pelon Dungu”, tüfa pengeli fillke versikulo Biblia mu feypikünulu fentren dungu tati Mesia mew. Füreneen trürümafimi tüfachi texto kakelu texto mu, feypilelu “Femtriparpuy”. Femngechi doy longkontukuaymi ñi rüfngen Chaw Ngünechen ñi Dungu.

Ngüneduamülmi tüfachi texto, ngoymakilnge tüfa: fentren pataka tripantu mu petu ñi choyüngenon Jesus, tati pelon dungu wirintukungey. Kafey Jesus feypi: ‘Femtriparpuy kom ti wirikonkülechi dungu iñche mew Moyse ñi ley dungu mew ka tati pu pelon wentru ñi wirielchi dungu mew ka tati pu Salmo lifru mew’ (Luka 24:44). Rüfkünu llemay itrokom pelon dungu wechutriparpuy, femngechi inaduamafuymi tami Biblia mu.