CAPITULO 3

“Chau Ngünechen ñi nehuen puhui fei engün meu”

Chem ñi rupan Pentecostés mu

1. Pentecostés mu, ¿chem rupaquefui?

RAQUIDUAMNGE tüfa ñi rupan Jerusalén mu.a Chau Dios tañi ruca mu chalintucungei culliñ, pengei ti fitrun tripalu altar mu ca pu levita petu ülcantumequefui fillque Salmo (Salmos de Hallel ca pingequelu, 113 puulu 118). Rüpü mu fentren che trecayahuingün, ca mapu cüpaingün Elam, Mesopotamia, Capadocia, Ponto, Egipto ca Roma.b Trahuluhuingün ñi fiestañmayal tati Pentecostés, fei eluquefuingün ta Jehová “tati hunenque fün” tañi cosechael (Núm. 28:26). Fill tripantu aflu ti cosecha cahuella fei conlu ti cosecha quetran mu femngequefui tüfachi fiesta, rume ayühun-ngefui.

Quiñe mapa pengelquei cheu ñi cüpan caque rume che allcütuquelu ti cümeque dungu Pentecostés mu. Pengeli cheu ñi mülen: Libia, Egipto, Etiopía, Bitinia, Ponto, Capadocia, Judea, Mesopotamia, Babilonia, Elam, Media ca Partia. Ca pengelquei fillque huaria: Roma, Alejandría, Menfis, Antioquía Siria mu, Jerusalén ca Babilonia. Cafei pengelquei fillque lafquen: Mediterráneo lafquen, Curü lafquen, Quelü lafquen, Caspio lafquen ca Pérsico lafquen.

JERUSALÉN, PU JUDIO ÑI FALIN HUARIA

Epe com ñi rupan hunenque capitulo Hechos lifru mu rupai Jerusalén mu. Tüfa quiñe falin huariangerpui pu Israel che mu. ¿Cheu mülefui tüfachi huaria? Inaltu cordillera Judea mapu mu, 55 kilometro camapulei Mediterráneo lafquen mu. Jerusalén hualloñmaquefui ti nehuencülechi huaria Sion huincul mu mülelu. 1070 tripantu mu petu ñi mülepanon Jesús, tati lonco ülmen David nüfi feichi huaria ñi mülepual.

Inaltu Sion huincul mülei tati Moria huincul. “Üye mu Abrahán deumai quiñe altar ñi chalintucuafiel ta Isaac” piquei pu judio. Tüfa rupai mil 900 tripantu petu ñi rupanon ñi feipin Hechos. Huente Moria huincul mu, Salomón deumai Chau Dios tañi hunen ruca. Üye mu, pu che femquefui tañi fillque duam ca poyemefui Jehová.

Fentren judio ca mapu cüpaquefui Jerusalén mu ñi poyeafiel Jehová, chalintuculelafiel culliñ ca femal fillque fiesta. Femngechi inaniequefuingün Jehová tañi feipin: “Cüla rupa tripantu mu, com pu huentru mülei ñi puhual cheu ñi feipicünuel tami Ngünechen, Jehová tañi adquiñ meu” (Deut. 16:16). Jerusalén mu ca trahuluuquefui tati Sanedrín, tüfa tati doi falin tribunal nielu pu judio, ngüneniequefui tati pu che ca adcünuquefui chumngechi ñi poyengeal ta Chau Dios.

2. Feichi 33 tripantu mu, ¿chem afmatufal dungu rupai?

² Ailla hora pulihuen mu, feichi 33 tripantu mu, rupai quiñe afmatufal dungu acordangelu fantepu meu. “Huenu mu allcüngei ñi raracün quiñe fütra cürüf reque” (Hech. 2:2). Trahuluucülefuingün 120 discipulo, fei peingün pichique hueihuiñ cütral reque, tüfa mülei caque quiñeque engün tañi huente lonco meu.c Feimeu müten “Chau Ngünechen ñi nehuen puhui fei engün meu” ca fillque quehun dunguingün. Fei tripalu engün ruca mu, nütramcafingün pu che caque tuhun-ngelu quisuque tañi quehun mu. Tati pu che afmatulehuei (Hech. 2:1-6).

3. 1) ¿Chumngelu rume falin-ngei ñi rupan ti Pentecostés mu? 2) Pedro, ¿chumngechi pünefi ñi hunen elungeelchi llafe?

³ Tüfachi afmatufal dungu ñi rupan rume falin-ngei ñi femtripayal Chau Dios tañi piel, ¿chumngelu? Femngechi dullingei pu cristiano coneltualu “Chau Dios ñi Israel troquiñche” mu (Gál. 6:16). Ca falin dungu mülei ñi rupan. Pedro dungufi fentren che, fei pünefi reque ti hunen llafe tañi elungeel. Caque quiñeque ti cüla llafe ñi elungeel nülai reque quiñe puerta femngechi ñi conal fillque troquiñche (Mat. 16:18, 19). ¿Chumngechi fel tüfa? Tati hunen llafe nülai reque ti puerta pu judio ca tati pu che concülelu pu judio ñi huimtun, fei ñi llohual ti cümeque dungu ca Chau Dios tañi nehuen.d Femngechi conelturpuafuingün Chau Ngünechen ñi Israel troquiñche mu, fei ñi ngünenieal Jesús engu ca sacerdotengeal (Apoc. 5:9, 10). Ca femngechi pu samaritano ca pu judiongenolu ñochiquechi elungefuingün tüfa. ¿Fachantü cai? ¿Chem quimeltuqueiñmu ñi rupan ti Pentecostés mu?

“Trahuluhuingün quiñe ruca mu” (Hechos 2:1-4)

4. Ti hunen cristiano trahunche, ¿chumngechi amulniengei fantepu mu?

⁴ Chumngechi pefiyiñ, 120 discipulo peno “trahuluhuingün quiñe ruca mu”, tüfa tati hunen cristiano trahunche (Hech. 2:1). Fei aflu müten ti antü, doi mil che fautizahuingün fei coneltuingün ti cristiano trahunche mu. Fantepu meu, doi alün-ngerpuingün. Mülei peñi, lamngen, piuqueyeniefilu ta Chau Dios ca amuldunguquelu “tati cümeque dungu Chau Dios ñi ngünenietual ta mapu” huall mapu püle, femngechi “com troquiñche ñi quimal engün” petu ñi afnon mapu meu müleyechi dungu (Mat. 24:14).

5. ¿Chumngelu fente cümei taiñ coneltual ti cristiano trahunche mu?

⁵ Pu dullingelu ca tati pu “caquelu ufisa” reque felelu coneltulei ti cristiano trahunche, femngechi com engün nehuentucungequeingün (Juan 10:16). Trahunche mu hueluconque quelluuqueiñ. Pablo rume falintuquefui tüfa, femngechi huirintuculelfi pu cristiano Roma mu, feipifi: “Rume ayülen tamün peafiel. Femngechi yafültucuhuayiñ tamün doi cüme hueniyeafiel ta Chau Ngünechen. Doi mai, taiñ feyentulen mu hueluquentu yafültucuhuaiñ” (Rom. 1:11, 12).

ROMA, TATI DOI FÜTRA HUARIA

Feichi antü mu rupalu ñi feipin Hechos, Roma tati doi fütra huariangefui mapu meu, ngüneniequefui fentren mapu. Famülque mu, ¿tunte puhui feichi mapu Roma ñi ngüneniequefel? Gran Bretaña puhui África norte püle ca Atlántico lafquen puhui Pérsico lafquen mu.

Pu che mülelu Roma mu, caquerumechi tuhun-ngefui, quehun ca fillque huimtun ca feyentun. Fentren rüpü mülefui, fei cüdautuquelafui pu che ca pu negociaquelu ñi puhual Roma mu. Püllelefui tati puerto Ostia pingelu, üye mu acuquefui fentren farcu cüpalquelu iyael ca itrofillem ñi nieal pu Roma che.

Hunen siglo mu, doi quiñe millon che mülefui Roma mu. Epe 500 mil che peno esclavongequefui, quiñeque huesaque che condenangelu, cuñifall pichiqueche cam fendengelu, cafei quiñeque che presuyengelu hueichan mu. 63 tripantu mu petu ñi mülepanon Jesús, tati falin soltau Pompeyo pingelu, presu cüpalfi quiñeque judio mülefulu Jerusalén mu ñi esclavoyeafiel engün.

Epe com che lifrelelu Roma mu pofrelefui, feimu mülefuingün fillque edificio mu apolelu che mu ca duamniefuingün ñi quelluaeteu ti gobierno fei ñi mongeluhual. Pu gobiernaquelu ñi adelcacünuafiel tañi huaria deumaquefuingün fütraque edificio afmatufalngelu. Deumaingün quiñeque teatro, fütraque estadio cheu ñi femngequen fillque dungu ñi cüme rupaleal pu che cullingenon mu. Pengelngequefui quehuan, cuden ca itrofill dungu.

6, 7. Fachantü, ¿chumngechi amuldungungequei com troquiñ mapu mülechi pu che?

⁶ Fachantü inaqueiñ ti cüdau Jesús ñi elufiel ti hunen trahunche, feipilu: “Amumün com troquiñ mapu mülechi pu che meu, ca quimeltuafimün iñche tañi inayaeteu engün. Fei ti Chau, ti Fotüm ca Chau Ngünechen ñi nehuen tañi üi meu fautizayafimün engün. Cafei iñche tamün huercüfiel ta eimün, com quimeltuafimün ñi inayal engün” (Mat. 28:19, 20). Fütra cüdau tati, huelu ayühuelqueiñmu.

⁷ Chau Jehová elueiñmu ta iñchiñ, pu Dunguquelu Ineingen Jehová, enturpual tüfachi cüdau. Cüdaungeafui amuldunguafiel pu che caque rume quehun dunguquelu, feimu entungequei fentren publicacion ¡doi mil quehun dungun mu! ¿Eimi cai? ¿Trahuluuqueimi? ¿Amuldunguqueimi ti cümeque dungu? ¿Enseñachequeimi ñi discipulongerpual? Femmequelmi, rume ayüucüleaimi. Fentren che petu quimlafi ta Chau Jehová, feimu saquin troquiñchengei pu amuldunguquelu Chau Jehová tañi üi, eimi coneltuleimi tüfa mu.

8. ¿Chem cümeque dungu llouquei pu coneltulelu ti cristiano trahunche mu?

⁸ Chau Jehová elueiñmu taiñ quiñeucüleal pu peñi, pu lamngen, huall mapu püle. Tüfa yafültucuqueiñmu ca ayühuelqueiñmu rupale rume huesaque dungu. Pablo feipifi pu cristiano: “Hueluquentu duamtuniehuaiñ, fei yafültucuhuaiñ ñi pengelal piuqueyehun ca femal cümeque dungu. Fentecünulayaiñ taiñ trahuluhual chumngechi huimtulequei quiñeque che. Huelu mai, hueluconque yafültucuhuaiñ, doyelchi mai püllelepalu cai Chau Dios ñi antü” (Heb. 10:24, 25). Ti trahunche quiñe regalo reque felei taiñ elueteu Chau Jehová. Tüfa mu iñchiñ yafültucuafuiñ caquelu che ca femngechi yafültucungequeiñ iñchiñ. Feimu fülmaucüleaiñ taiñ pu peñi ca pu lamngen iñchiñ, chumcaunorume fentecünulayaiñ taiñ trahuluhual.

Dunguingün “pu che tañi quehun” (Hechos 2:5-13)

Jesús ñi pu discipulo petu amuldungufi pu judio ca tati pu concülelu pu judio ñi huimtun Jerusalén mu. — “Quisuque taiñ quehun meu, allcütufiyiñ ñi dungumequen engün Chau Ngünechen ñi afmatufal dungu” (Hechos 2:11).

9, 10. Quiñeque peñi ca lamngen, ¿chumqueingün ñi amuldunguafiel itrofill che?

⁹ Pu judio ca tati pu concülelu pu judio ñi huimtun rume ayühuingün ñi rupan Pentecostés mu. Feichi mu pu che caquerumei tañi quehun, huelu ñi nütramcahual dunguquepelaingün griego cam hebreo. Feimu allcütufilu engün pu discipulo ñi dungumequen quisuque tañi quehun dungun meu, afmatulehueingün (Hech. 2:6). Allcütufiel mu tati cümeque dungu tañi quehun mu, puhui tañi piuque mu. Famülque mu feichi afmatufal dungu rupaquelai, huelu fentren peñi ca lamngen eluuqueingün ñi amuldunguafiel itrofill che. ¿Chumngechi femqueingün? Quimürpuingün cangelu quehun tañi quelluntucuafiel quiñeque trahunche püllelelu. Caquelu peñi, lamngen, huiñamtuhuingün ca pais mu. ¿Chum tripai tañi femün? Fentren che afmatulehuei fente tañi cüdauquen engün.

¹⁰ Christine ca caquelu peñi ca lamngen coningün quiñe curso mu, fei ñi quimürpual gujarati quehun. Quiñe antü, Christine trafyefi quiñe chaf cüdaufe gujarati quehun dunguquelu, fei “mari mari” pifi tañi quehun mu. Ñi compañ afmatulehuei, ‘cüdaungei quimal tüfachi quehun, ¿chumngelu anta petu quimimi gujarati?’ pifi. Huiñoldungungelu, ca feipi: “¿Rume falin-ngepelai tamün quimeltuqueel?”.

11. ¿Chumafuiñ taiñ amuldunguafiel itrofill che?

¹¹ Quimnieiñ com iñchiñ quimürpulayafuiñ cangelu quehun dungu. Huelu mai cüme pepicahuafuiñ taiñ amuldungucheal caquelu quehun mu. ¿Chumngechi? Raquiduamafuimi chem quehun dungungequei cheu tami mülen, fei quintuafuimi ti aplicacion JW Language^®. Tüfa quelluaimu tami quimürpual chumngechi pentucuafuimi pu che tañi quehun mu, cafei cüme loncontucuafuimi quiñeque frase tami puhual tañi piuque mu. Pengelelafuimi taiñ pagina jw.org, quiñeque video ca publicacion tañi quehun mu. Femülmi com tüfa, ayüucüleaimi ca tati pu che afmatuafui chumngechi ñi rupan pu hunenque cristiano amuldungufilu quisuque engün tañi quehun mu.

PU JUDIO MÜLEPULU MESOPOTAMIA CA EGIPTO MU

Quiñe adümuhun-ngechi huentru, Emil Schürer pingelu, feipi: “Pu asirio ca pu babilonio huemünentufi quiñeque che coneltulelu tati mari troquiñche [Israel mu] ca caquelu coneltulelu ti troquiñche Judá mu, feimu mülepuingün Mesopotamia, Media ca Babilonia mu”. Esdras capitulo 2, versiculo 64 pengelquei 42 mil 360 Israel che müten huiñotuingün Jerusalén lifrecünungelu Babilonia mu. Fei engün huiñoingün 537 tripantu petu ñi mülepanon Jesús. Flavio Josefo feipi Babilonia mu mülefui fentren judio hunen siglo mu. Feichi pu judio mu mülefui quiñeque quimeltufe, Rabí ca pingequelu. Tüfa engün eluhuingün ñi huirintucual tati Babilonia Talmud, siglo 3 puhualu siglo 5 püle. ¿Chem am tati Talmud? Feita quiñeque lifru feipilu chem ñi raquiduamqueel pu Rabí tati Ley mu.

Pengei fillque huirintuculechi papel feipilu ñi mülequefel pu judio Egipto mu siglo 6 püle petu ñi mülepanon Jesús. Feichi mu, Jeremías elufi quiñe huercün dungu ta pu judio mülelu fillque lof Egipto mu. Quiñe tüfa Nof, Menfis ca pingequei (Jer. 44:1). Fentren judio huiñamtuhuingün Egipto mu 323 puulu 30 tripantu petu ñi mülepanon Jesús. Josefo feipi pu hune mülepulu Alejandría mu, fei ta pu judio. Rupachi antü meu, elungeingün ñi ngünenieafiel cheu tañi mülen engün. Hunen siglo mu quiñe judio huentru adümuucülelu, Filón pingelu, feipi quiñe millon pu judio mülefuingün huall Egipto mu, “Libia püle puulu Etiopía mapu mu”.

“Pedro huitrapürai” (Hechos 2:14-37)

12. 1) Pentecostés mu, ¿chumngechi femtripai ñi feipin Joel? 2) Pu discipulo, ¿chumngelu ayüniepelafui ñi femtripayal tüfa?

¹² “Pedro huitrapürai” ñi dunguafiel fentren che caque rume tuhun-ngelu (Hech. 2:14). Quimelelfi engün Chau Dios ñi femün ti afmatufalchi dungu, femngechi femtripai ñi feipin Joel 2, versiculo 28, tüfa mu Jehová feipicünui: “Hulan tañi nehuen itrofill che meu”. Pu discipulo ayüniepelafui ñi femtripayal tüfa, Jesús ca feipicünui: “Iñche llellipuafiñ tañi Chau, fei eluaimünmeu cangelu quellun ñi rumel müleal eimün mu”. ¿Chem quellun am? Jesús feipi: “Elungeaimün Chau Ngünechen ñi nehuen” (Juan 14:16, 17).

13, 14. ¿Chem chumi Pedro ñi puhual pu che tañi piuque mu? Ca, ¿chumngechi inayentuafuiñ?

¹³ Ñi fentecünual tañi feipin, Pedro cüme feipicünufi tati pu che: “Com pu Israel che cüme quimpe tüfachi dungu: Chau Ngünechen, Ñidol ca Cristo cünufi ta Jesús, feichi huentru tamün langümfiel orcon mamüll meu” (Hech. 2:36). Epe com che ñi allcütufiel ta Pedro mülelafuingün feichi antü langümngelu ta Jesús, huelu com engün culpaconingün tañi judiongen mu. ¿Ngüneduamimi? Pedro yamquechi nütramcafi pu judio, ayülafui ñi condenayafiel. Doi mai ayüfui puhual ñi piuque mu engün, fei ñi repentiutual. Fei tati pu che lladcütulai tañi feipieteu Pedro, doi mai “rume cutrantupiuquei engün” ca ramtuingün: “¿Chem mülei taiñ femal?”. Pedro cüme duam mu nütramcai, fei puhui pu che ñi piuque mu, fentren engün repentiutuingün (Hech. 2:37).

¹⁴ Iñchiñ inayentuafuiñ Pedro ñi femün. Ngelai taiñ notucadungual ca müchaique feipilayafiyiñ tañi huelulcaucülen engün. Doi mai quintuaiñ chem dungu ñi feipiel pu che quiñeucülei iñchiñ taiñ quimeltuqueel mu. Nütramcafiliyiñ feichi dungu mu, doi eluucüleafuingün taiñ allcütuaeteu. Fei ñochiquechi quelluafuiñ ñi doi cüme adümafiel Chau Dios tañi dungu. Fei llemai, inayentufiliyiñ chumngechi ñi dunguel Pedro, pu che cüme piuquengelu allcütuaiñmu.

PU CRISTIANO PONTO MEU MÜLELU

Hueupilu Pedro Pentecostés mu, mülefui quiñeque judio cüpalu Ponto mapu mu, tüfa mülei norte püle Asia Menor mu (Hech. 2:9). Huiñotulu Ponto mapu mu, amuldunguingün ti cümeque dungu ñi allcütuel Jerusalén mu. ¿Chumngelu quimfali tüfa? Pedro huirintuculelfi tañi hunen carta “tati pu che huall püle mülelu”, quiñe ta tüfa Ponto mapu (1 Ped. 1:1).g Ñi feipin Pedro pengelquei ñi rupaquen engün “fill huesaque dungu” tañi maneluhun mu (1 Ped. 1:6). Huesa femngeingün ca caiñetungeingün.

Roma ñi lonco ülmen, Trajano pingelu, hueluconque huercüuquefui carta Plinio el Joven pingechi huentru engu, ngüneniequefulu Ponto mapu mu. Feichi fillque carta pengelquei ñi caiñetungequen pu cristiano. 112 tripantu püle, Plinio trürümfi pu cristiano ta quiñe cutran reque huesalcaquefilu itrofill che. Plinio feipifi pu cristiano ñi fentecünual tañi cristianongen, mülefui ñi malisiayafiel ta Cristo cam llellipuafiel coilaque dios ca Trajano ñi estatua, fei ñi langümngenoal. Huelu Plinio cüme quimniefui ñi femnoal feichi dungu pu rüfngechi cristiano.

g Feipin mu “huall püle mülelu”, griegodungun mu feipingequefui ñi üituafiel pu judio troquiñ. Feimu quimnieiñ ñi judio tuhun-ngen quiñeque che cristianongerpulu.

“Com eimün fautizahuaimün” (Hechos 2:38-47)

15. 1) ¿Ca chem feipi Pedro? Fei, ¿chum tripai? 2) Feichi pu che fautizaulu Pentecostés mu, ¿rüf pepicaucülepefui mai?

¹⁵ Feichi antü, Pedro ca feipifi pu judio ca pu concülelu pu judio ñi huimtun: “Nor raquiduamtumün. [...] com eimün fautizahuaimün” (Hech. 2:38). Fei, ¿chum tripai? Doi 3 mil che fautizahuingün. ¿Cheu? Jerusalén mu mülefui quiñeque piscina reque, fei mu amupelaingün tañi fautizahual.e ¿Rüf pepicaucülepefuingün mai ñi fautizahual? Pepicaucüleingün llemai. Biblia quimeltuquei chem che rume fautizahuafui, pu pichiqueche cütu, huelu mülei ñi pepicahual fei ñi fautizahual. Com feichi pu judio ca pu che coneltulelu pu judio ñi huimtun inaniequefuingün Chau Dios tañi dungu. Cafei tañi troquiñche dullingei ñi poyeafiel ta Jehová. Quiñeque engün pengelingün fente ñi piuqueyefiel Jehová alü camapu cüpalu ñi fiestañmayal ti Pentecostés. Ca quimtucuingün Jesús mu ñi femtripan Chau Dios tañi piel. Com tüfa pengelqueiñmu ñi pepicaucülen engün ñi fautizahual, fei ñi inanieafiel ta Cristo. Femngechi amuleafui ñi serfiafiel ta Chau Jehová.

¿CHEM CHE CONCÜLEQUEFUI PU JUDIO ÑI HUIMTUN MU?

Pentecostés 33 tripantu mu, pu “judio che ca tati pu concülelu pu judio ñi huimtun” allcütufingün Pedro ñi feipin (Hech. 2:10).

¿Inei engün am concülequefui pu judio ñi huimtun mu? Pu che judiongenolu, huelu inayentuquefilu ñi feyentun. Famentuquefingün pu coilaque dios ñi poyerpuafiel ta Chau Jehová, inaniequefuingün Moisés ñi ley ca pu huentru circuncidangequefui. Feimu ca tuhun-ngefule rume, judio troquingequefuingün. Quiñe ejemplo, Nicolás ‘inaquefui pu judio ñi huimtun’ ca dullingei ñi femal quiñe “falin cüdau”, eluafiel iyael pu peñi ca pu lamngen (Hech. 6:3-5).

Pu judio mülequefulu Babilonia mu, lifrecünungeingün 537 tripantu mu petu ñi mülepanon Jesús. Ca mapu mülen mu engün rume, elcünulaingün tañi huimtun ca feyentun. Fei pu che huall püle Israel mu ca doi alü camapu cütu quimürpuingün pu judio ñi feyentun. Cuifi mu, Horacio, Séneca ca caquelu huentru adümuucülelu feipingün fentren che inafül mülelu Israel mu ayüquefuingün pu judio ñi huimtun ca feyentun, feimu inayentuniefingün.

16. Pu hunenque cristiano, ¿chumngechi pengelingün ñi rüf piuqueyehun engün?

¹⁶ Com pu hue feyentulu trür mülequeingün ca epuñpüle eluuquefuingün tañi nieel engün. Cafei fendeingün ñi mapu ca tañi nieelchi fillem ca hudamcaingün tañi plata chumngechi ñi duamnieel quisuque engün, feimu quimfali Chau Jehová rüf fürenefi feichi troquiñche (Hech. 2:44, 45).f Com pu rüfngechi cristiano ayünieiñ taiñ inayentuafiel ñi rüf piuqueyehun engün.

17. ¿Chem mülei ñi femal quiñe che ñi fautizahual?

¹⁷ Biblia feipi pu che mülei ñi femal quiñeque dungu ñi hultucual tañi mongen Jehová mu ca fautizahual. Hunelu, mülei ñi quimafiel Chau Dios tañi dungu (Juan 17:3). Mülei ñi maneluhual Jehová mu ca rüf repentiutual tañi huesa femquefel (Hech. 3:19). Cafei mülei ñi cüme elcünutual ñi femün ca femal cümeque dungu ñi ayühuelafiel ta Chau Dios (Rom. 12:2; Efes. 4:23, 24). Feula llellipuafi ta Chau Jehová ñi hultucual tañi mongen, fei ñi fautizahual (Mat. 16:24; 1 Ped. 3:21).

18. ¿Chem falin cüdau elungei pu fautizaucülelu?

¹⁸ ¿Eimi cai? ¿Hultucuimi tami mongen Jehová mu ca fautizahuimi? Femülmi, falin cüdau elungeimi. Chau Ngünechen ñi nehuen puhui pu discipulo hunen siglo mu. Fei engün reque, ca femngechi eimi elungeimi Chau Dios tañi nehuen tami amuldungucheal ca femal tañi ayüqueel.

a Inaduamnge ti huichulechi dungu: “Jerusalén, pu judio ñi falin huaria”.

b Inaduamnge ti cüla huichulechi dungu: “Roma, tati doi fütra huaria”, “Pu judio mülepulu Mesopotamia ca Egipto” ca “Pu cristiano Ponto meu mülelu”.

c Feiti “hueihuiñ” cütralngelai, doi mai “cütral reque” felefui. ¿Chumngelu? Puulu Chau Dios tañi nehuen, cütral reque pengefui fente ñi huilüfcülen.

d Inaduamnge ti huichulechi dungu: “¿Chem che concülequefui pu judio ñi huimtun mu?”.

e Cangelu antü mu fentren che fautizahui. Fei ta 7 conchi agosto, 1993 tripantu. Ucrania mapu mu femngei quiñe fütra trahun. 7 mil 402 che fautizahui cayu piscina mu. ¿Tunteñmai ti fautizahun? Epu hora ca 15 minuto.

f Fentren che mülenagingün quiñeque antü Jerusalén mu ñi doi quimürpual Chau Dios tañi dungu. Feimu pu peñi ca pu lamngen adcünuhuingün ñi quelluafiel. Obligangequelaingün ñi femal, doi mai rüf piuque mu femingün (Hech. 5:1-4).