‘Müte nielaingün pepicahun ca falin huentru troquingelaingün’

1, 2. ¿Chem afmatun dungu femi Pedro engu Juan?

NAGANTÜ MU, pu religioso judio ca caquelu che inaniefilu ta Jesucristo conpuingün Chau Ngünechen ñi ruca mu epe puucülelu “ti hora ñi llellipual” (Hech. 2:46; 3:1).a Pedro engu Juan epe conpuleingu cheu ñi mülefel “Cüme Ad” pingechi conhue. Mülefui fentren che, huaqueñcüleingün. Huelu femlu rume, allcüngequei ñi pediquen plata quiñe cüntro huentru. Tüfa choyüngelu müten cüntro huentrungei ca feichi antü mu niefui doi 40 tripantu (Hech. 3:2; 4:22).

² Feiti cüntro huentru ca pedifi plata ta Pedro ca Juan pefiel mu ñi doi fülmaeteu engu. Pedro feipifi: “Nielan plata, oro no rume, huelu chem tañi nieel eluayu. Ti Nazaret che Jesucristo ñi üi meu, ¡trecatunge!”. Feiti huentru turpu trecaquelafui, fei müna afmatulehuei pu che pefilu ñi trecatun (Hech. 3:6, 7). Rume ayühui feiti cüntro huentru ngüneduamlu ñi cümelcaletun tañi namun, feimu lle rincülen huitrapürai, fei com nehuen mu püramyefi ta Chau Dios.

3. ¿Chem falin dungu elungei tati pu che ca tati huentru tremoltungelu?

³ Ti pu che lefingün cheu ñi mülen Pedro ca Juan, Salomón pingechi rupapeyüm püle. Cuifi mu, Jesús quimeltufi pu che fei püle. Feula Pedro feipifi feichi pu che chem pifel feichi afmatun dungu (Juan 10:23). Fei hula Pedro elufi engün quiñe falin dungu, doi falilu oro ca plata mu, doi falin-ngelu feiti afmatun dungu ñi rupan cütu. ¿Chem am ta tüfa? Elungeingün ñi nor raquiduamtual, femngechi ñi rulpacünungeal tañi culpan engün ca inayafiel ta Jesucristo “lonco elcünungelu ñi eluafiel mongen tati pu che” (Hech. 3:15).

4. 1) Rupai quiñe afmatun dungu, huelu ¿chem eluhuingün ñi femal pu autoridad? 2) ¿Chem dungu inaduamaiñ?

⁴ ¡Müna cüme dungu rupai feichi antü! Tremoltungei quiñe cüntro huentru ca fentren che elungei ñi quimafiel Chau Dios tañi ayüqueel, fei ñi cüme serfiafiel (Col. 1:9, 10). Femfulu rume, pu autoridad cüpa catrütufingün pu discipulo ñi amuldunguhuenoal (Hech. 1:8). Pu autoridadcülelu feipingün Pedro ca Juan “ñi müte nienon pepicahun engu, ca falin huentru ñi troquingenon”, feimu peafiyiñ chem chumingün Pedro engu Juan ca chumngechi quimeltufingu tati pu che (Hech. 4:13).b Caiñetungelu rume, Pedro, Juan ca caquelu discipulo nehuen piuquecünuhuingün. Fei peafiyiñ chumngechi inayentuafuiñ.

Quisu engu tañi nehuen mu femlaingu (Hechos 3:11-26)

5. Pedro ñi chumngechi feipifiel tati pu che, ¿chem quimeltueiñmu?

⁵ Pedro ca Juan amuldungufingu tati pu che, quimnielu rume quiñeque engün huirarfui ñi langümngeal ta Jesús (Mar. 15:8-15; Hech. 3:13-15). Pedro llicalai, feipi feiti cüntro huentru ñi tremotun Jesús tañi üi mu, tüfa pengeli ñi autoridadcülen ta Jesús. Ca femngechi cüme feipifi ñi culpaconün engün ñi langümngen ta Jesús. Huelu feichi pu che quimlafui tañi huesa femmequen, feimu Pedro illcutulafi (Hech. 3:17). Doyelchi mai, Pedro feipifi engün “pu peñi”, ca nütramcalelfi tati cümeque dungu Chau Ngünechen ñi ngünenietual ta mapu. Feipifi ñi repentiutual engün, femngechi “Jehová llemai füshcümai tamün piuque” pifi (Hech. 3:19). Ca femngechi iñchiñ, nehuen piuquecünuhuaiñ taiñ feipial Chau Dios ñi juzgayafiel tati pu che. Huelu cura piuquengelayaiñ, turpu illcutulayafiyiñ ca juzgalayafiyiñ pu che. Doi mai, cüme raquiduamaiñ feichi pu che, taiñ peñi, lamngen-ngerpuafui. Pedro reque, nütramcalelafiyiñ tati cümeque dungu.

6. Pedro ca Juan, ¿chumngechi pengelingün tañi mallmangenon?

⁶ Pu apostol mallma piuquengelaingün, feipiquelafuingün quisu tañi nehuen mu ñi femquen afmatun dungu. Pedro feipifi tati pu che: “¿Raquiduamqueimün cai tayu tremoltufiel tüfachi huentru iñchiu tayu nehuen mu? ¿Cam fente tayu poyefiel ta Chau Dios?” (Hech. 3:12). Pedro ca caquelu pu apostol cüme quimniefuingün Chau Dios ñi elueteu nehuen fei tañi femal cümeque dungu, quisutu tañi nehuen mu femlayafuingün. Feimu feipifingün tati pu che ñi püramyeafiel ca mañumtuafiel ta Jehová ca Jesús.

7, 8. 1) ¿Chem falin dungu eluafuiñ tati pu che? 2) Pedro feipi ñi huecünungetual com dungu, ¿chumngechi femtripamequei tüfa?

⁷ Iñchiñ ca amuldunguqueiñ tati cümeque dungu, feimu mülei taiñ mallma chengenoal. Famülque mu, elungelaiñ nehuen ñi tremoltungeal pu che. Huelu quellucheafuiñ llemai ñi doi maneluhual engün Chau Jehová mu ca Jesús mu, femngechi ñi perdonangeal tañi culpan engün ca ñi füshcümüñmangeal tañi piuque. Fill tripantu fentrenque che allcütuquei tüfachi cümeque dungu, fei eluuqueingün ñi fautizahual ca inanieafiel ta Jesús.

⁸ Pedro feipi ñi puhual ti antü “ñi huecünungetual com dungu”, ¿chumngechi femtripamequei tüfa famülque mu? 1914 tripantu mu, Chau Dios tañi Reino elcünungei huenu mu, femngechi femtripai “ñi feipicünuel Chau Ngünechen tañi pu cuifique huerquen meu” (Hech. 3:21; Sal. 110:1-3; Dan. 4:16, 17). Pichin rupalu hula, Jesús adcünui quiñe troquiñche mapu meu ñi cüme poyengetual ta Jehová. Fei fantepu fentren che eluhui ñi ngünenieaeteu Chau Dios, tüngcüleingün ca quiñentrür poyeniefingün ta Chau Jehová, famentuingün tañi huesaque femün engün ca huengetuingün tañi chumngechi chengen, rüf norngeingün ca manelfalngeingün (Efes. 4:22-24). Chau Dios tañi nehuen mu tremoltungei ti cüntro huentru, ca femngechi, famülque mu Chau Ngünechen tañi nehuen mu pu che cüme elcünutuquei tañi mongen fei ñi poyeafiel ta Chau Dios. Pedro reque, llicalayaiñ ca adümuucüleaiñ fei taiñ cüme quimeltucheal Chau Dios tañi Dungu. Loncontucunieaiñ: Chau Jehová tañi nehuen mu llemai quelluquefiyiñ pu che.

“Fentecünulayaiñ taiñ huldungual” (Hechos 4:1-22)

9-11. 1) Amuldungulu Pedro ca Juan, ¿chem rupai? 2) Feimu, ¿chem feipicünuingu ñi femal?

⁹ Pedro cüme hueupi ca tati huentru tremoltungelu rincürincütui fente tañi ayühun, fei pu che huaqueñcülefui. Feimu tati huentru adcünuquefilu Chau Dios ñi ruca ca ti pu loncolechi sacerdote lef pemefingün chem ñi rupamequen. Feichi pu huentru saduceongepelaingün. Pu saduceo feita quiñe riculechi secta, autoridad nielu ca quelluntucuquefulu ñi cümelcaucüleal pu Roma che engün. Famentufingün tati Ley, feimu trürngelafuingün tati pu fariseo. Cafei feyentuquelaingün tati huiñomongetun mu.c Feimu, rume nüngaituquepelafingün ta Pedro ca Juan ñi quimeltumequen Jesús tañi huiñomongetun.

¹⁰ Fente tañi illculen engün carceltucufingün ta Pedro ca Juan, fei ca antü juiciantucueyu tati Sanedrín. Feichi pu gobernante mallmangefuingün, fei raquiduamqueingün Pedro ca Juan “ñi müte nienon pepicahun engu ca falin huentru ñi troquingenon”. Feimu, cümelai ñi quimeltucheal Chau Dios tañi ruca mu pingün. Pedro ca Juan turpu amulai chem escuela no rume quimeltuquelu religion, feimu ti Sanedrín afmatulehuei tañi cüme dunguquen engu. ¿Chumngelu fente cüme quimeltuchequei? Quiñe dungu, “Jesús engu ñi miyauquen” (Hech. 4:13). Jesús feipiquefui Chau Dios cüpachi quimeltun, feimu rume cüme quimeltuchequefui. Trürümngelafui caquelu che ñi quimeltuchequen (Mat. 7:28, 29).

¹¹ Feichi mu, rume falin-ngefui tañi feipin ti Sanedrín. Juiciantucufilu ta Jesús, feipi: “¡Mülei ñi langümngeal!” (Mat. 26:59-66). Feula feipifi pu apostol ñi fentecünual tañi amuldungumequen. Feingelu rume, Pedro ca Juan llicalaingu ñi dunguafiel feichi pu huentru ricungelu, nielu ta educacion ca rume autoridad nielu. Yamquechi feipifingu: “Chau Dios ñi adquiñ mu, ¿cümepei mai allcütuafiel ta eimün, huelu allcütunoafiel ta Chau Dios? Eimün ta huiñoldungumün. Huelu iñchiñ fentecünulayaiñ taiñ huldungual chem taiñ peel ca chem taiñ allcütuel” (Hech. 4:19, 20).

12. ¿Chem quelluaiñmu taiñ nehuen piuquengeal fei cüme incañpehual?

¹² ¿Eimi cai? ¿Nehuen piuque niepeimi mai Pedro ca Juan reque? ¿Cüdautuquepeimi mai amuldunguafiel pu ricungelu, doi nielu ta educacion ca autoridad nielu? Ayentungelmi tami feyentuqueel mu, ¿chumqueimi? ¿Llicaquepeimi mai? Femngechi rupalmi, huesa duamquilnge, doi cümecünuafuimi. Jesús quimeltui chumngechi ñi cüme incañpehual, nehuencüleal ca yamquechi dungual (Mat. 10:11-18). Cafei feipifi tañi pu inanieteu: “Mülean ta eimün mu fentepuule mapu meu müleyechi dungu” (Mat. 28:20). Cafei adniequefi tati “quim manelfal cüdaufe” taiñ quimeltuaeteu chumngechi cüme incañpehual (Mat. 24:45-47; 1 Ped. 3:15). Fill semana nieiñ ti trahun Taiñ Mongen ca Taiñ Amuldunguqueel ca elungequeiñ fillque publicacion, por ejemplo: ti troquiñ “Fillque ramtun Biblia mu”, jw.org mu mülelu. ¿Trahuluuqueimi ca pünequefimi fillque publicacion? Femmequelmi, doi maneluhuaimi Biblia mu ca doi nehuen piuquengeaimi. Ca pu apostol reque, fentecünulayaimi tami huldunguquen chem tami peel ca chem tami allcütuel.

“Quiñentrür llellipufingün ta Chau Ngünechen” (Hechos 4:23-31)

13, 14.  Caiñetungeliyiñ, ¿chem mülei taiñ femal? ¿Chumngelu cai?

¹³ Lifrecünungelu müten, Pedro ca Juan trahuluhuingu caquelu pu peñi ca pu lamngen engün, fei “quiñentrür llellipufingün ta Chau Ngünechen” ñi nehuentucuaeteu tañi piuque engün fei ñi fentecünunoal tañi huldunguquen (Hech. 4:24). Quiñeque semana müten cuifi, Pedro quisutu maneluufui, feipifi ta Jesús: “Com engün quisucünuelmu rume, ¡iñche turpu quisucünulayayu!”. Huelu chumngechi feipicünui Jesús, Pedro llicai, fei cüla rupa feipi ñi quimnofiel. Feimu feula cüme quimniefui maneluuliyiñ quisu taiñ nehuen mu, pepi femlayafuiñ Chau Dios ñi ayüqueel. Pedro enturpui cüme quimeltun tañi huesa femün mu (Mat. 26:33, 34, 69-75).

¹⁴ Re eluucülelayaiñ müten taiñ huldungual Jesucristo mu, cafei inayentuafiyiñ ñi femün Pedro ca Juan. Caiñetungelmi tami serfihuenoafiel ta Chau Jehová, llellipuaimi tami nehuentucungeal tami piuque. Tami trahunche quelluafeimu, feipiafimi chem tami rupamequen tati pu loncolelu ca caquelu quim peñi, quim lamngen. Fei engün llellipuafuingün eimi mu, Jehová allcütuaeyu fei nehuentucuaimu (Efes. 6:18; Sant. 5:16).

15. Fentecünufulmi tami amuldungual, ¿chem quelluafeimu tami huiño yafüluhual?

¹⁵ Rupachi antü mu, ¿amuldunguhuelafuimi chi? Femülmi, yafüluunge peñi, lamngen. Lalu ta Jesús, pu apostol ca fentecünufuingün ñi amuldungual, huelu pichiñma mu huiño yafüluhuingün (Mat. 26:56; 28:10, 16-20). Rume raquiduamcülelayaimi tami huesa femün mu, doi mai entuaimi cümeque quimeltun tami yafültucuafiel caquelu che.

16, 17. ¿Chem quimeltueiñmu ñi llellipuel pu discipulo?

¹⁶ Caiñetungeliyiñ, ¿chem llellipuafuiñ? Pu discipulo llellipulaingün ñi caiñetungenoal, quimniefuingün Jesús ñi feipicünuel: “Caiñetungeli iñche, eimün ca caiñetungeaimün” (Juan 15:20). Feimu llellipufingün ta Chau Jehová: “Ngüneduamnge taiñ caiñetudungueteu engün” (Hech. 4:29). Pu discipulo quimniefuingün chumngelu tañi caiñetungen engün ca ñi femtripamequen Chau Dios tañi feipiel. Cafei quimniefuingün pu gobiernaquelu catrütulayafui ñi femngeal Chau Dios tañi ayüqueel mapu mu, chumngechi feipi Jesús (Mat. 6:9, 10).

¹⁷ Ñi femal tañi ayüqueel Chau Jehová, pu discipulo llellipufingün: “Quellumuiñ iñchiñ, tami pu serfiqueteu. Femngechi nehuen piuquecünuhuaiñ taiñ huldungual tami huercün dungu”. ¿Chumngechi cai huiñoldungufi ta Jehová? “Ti ruca cheu ñi trahulen nüyüi. Fei Chau Ngünechen elufi ñi nehuen ta com engün, fei nehuen piuquecünuhuingün ñi huldungual Chau Ngünechen ñi dungu” (Hech. 4:29-31). Fei llemai, chem dungu no rume catrütulayafui Chau Dios tañi ayüqueel (Is. 55:11). Doi fentren-ngefui rume taiñ pu caiñe, llellipufiliyiñ ta Jehová, quelluaiñmu taiñ llicanoal ca amuldunguleal.

‘Huentru ta coilatulafimi, Chau Dios llemai’ (Hechos 4:32–5:11)

18. Pu peñi ca pu lamngen Jerusalén mu, ¿chumngechi hueluconque quelluhuingün?

¹⁸ Pichiñma mu, 5 mil che coneltulerpui tati hue trahunche Jerusalén mu.d Caquerumechi tuhun niefulu engün rume, “quiñehui ñi piuque ca tañi raquiduam engün” (Hech. 4:32; 1 Cor. 1:10). Pu discipulo llellipufingün ta Chau Jehová ñi cümelcayaeteu tañi femquen engün. Cafei hueluconque quelluuquefuingün ca yafültucuuquefuingün (1 Juan 3:16-18). Femngechi femi José, Bernabé ca pingequelu, fendei tañi mapu. Fei com ñi cullingeel elufi pu peñi ca pu lamngen camapu cüpalu, fei ñi mülenagal Jerusalén mu tañi doi quimürpual Chau Dios tañi dungu.

19. Chau Jehová, ¿chumngelu langümfi ta Ananías ca Safira?

¹⁹ Quiñe curehuen, Ananías ca Safira pingelu, fendeingu tañi mapu fei ñi quelluntucual. Huelu coilatuingu, raquiduamelfingu tati pu apostol ñi hulün com tati plata (Hech. 5:2). Tunte tañi hulün cümecayafui, huelu huesa duam mu hulingu. Biblia feipi: ‘Coilatulafingu ta huentru, Chau Dios mai coilatufingu’, feimu langümngeingu (Hech. 5:4). Jesús condenafi tati pu che femquelu cümeque dungu re tañi pengeal müten, femngechi femingu Ananías engu Safira. Ayüfui ñi saquiaeteu pu che, raquiduamlaingu chem ñi raquiduamquen ta Chau Dios (Mat. 6:1-3).

20. Chau Jehová, ¿chumngechi ayüniei taiñ quelluntucual?

²⁰ Famülque mu, ca femngechi fentren peñi ca lamngen ayühunquechi quelluntucuquei ñi amuldungungeal tati cümeque dungu huall mapu püle. Chau Jehová ayüquelai taiñ huesa duamquechi femal, doi mai taiñ ayühunquechi cüdahuelafiel, feimu inei no rume dicümtucungequelai ñi femal (2 Cor. 9:7). Chau Dios inaduamquelai tunten taiñ hulqueel, doi mai chem duam mu taiñ femqueel (Mar. 12:41-44). Feimu inayentuquelafiyiñ ta Ananías ca Safira, quintuquelaiñ taiñ saquiaeteu pu che ca taiñ quisutu cümelcaleal müten. Doi mai inayentuquefiyiñ ta Pedro, Juan ca Bernabé, piuqueyeniefiyiñ ta Chau Jehová ca tati pu che, feimu cüdahuelquefiyiñ (Mat. 22:37-40).