“Inei no rume ta lalayai”

1, 2. Tüfachi rupa ñi amun ta Roma, ¿chem dungu mu rupai Pablo? Ca, ¿chem mu fill raquiduamcülefui?

FESTO feipifi ta Pablo: “Roma ñi Lonco Ülmen juiciantucuaimu llemai”. Feimu, ¿Pablo fill raquiduamcülepelafui? Deu rupafui 2 tripantu ñi presulen, fei ¿ayüupelafui ñi tripayal tañi amual ta Roma? (Hech. 25:12). Femün mu rume, quimniefui ñi cuñihun-ngen amual farcu mu ca fill raquiduamcülefui ñi nütramcameafiel tati lonco ülmen Roma mu.

² Pablo feipi: “Cuñihun dungu mu rupan [...] lafquen meu”. Cüla rupa ñamconi lafquen mu, ca quiñe rupa, com quiñe antü ca quiñe pun, mülenagi rangi lafquen mu (2 Cor. 11:25, 26). Ellaca mu, Pablo presulelafui, quisu tañi pin mu amuquefui ca mapu ñi amuldungual. Huelu tüfachi rupa tripalu Cesarea mu ñi amual ta Roma presulen amulefui, alüñmayafui ñi puhual, doi 3 mil kilometro mülefui ñi rumeal. Tüfachi rupa, ¿mongetripapei mai? Ca juiciantucueyu ti doicülechi lonco ülmen ñi mülen feichi antü meu, fei ¿chem rupai? Ngüneduamafiyiñ.

3. Pablo, ¿chem eluucülefui ñi femal? Fei, ¿chem inaduamaiñ?

³ Cüme quimnieiñ ñi chumngechi chengen Pablo, fei ¿raquiduampeafuiñ mai ñi müllmüllcülen fente ñi llican? Femlayafuiñ llemai. Pablo quimtucuniefui ñi rupayal huesaque dungu, huelu chumngechi ñi rupayal quimlai. Pepi ngünenielai chem tañi rupayal, fei raquiduamtucunielafi feichi dungu. Femfule, ayühunquechi amuldunguhuelayafui (Mat. 6:27, 34). Cheu rume ñi miyauquen Pablo, allmalltuquefui ñi amuldungual itrofill che, pu lonco ülmencülelu cütu, tüfa ñi ayünieel Chau Jehová (Hech. 9:15). Rupan mu rume huesaque dungu, eluucülefui ñi cüme femal tañi cüdau. Inaduamafiyiñ com ñi rupan Pablo, fei taiñ inayentuafiel.

“Trafyenieiñmeu ti cürüf” (Hechos 27:1-7)

4. ¿Chumngechingefui ti farcu ñi amulen Pablo? ¿Inei compañnieyu cai?

⁴ Julio pingechi Roma soltau presuyeniefi ta Pablo ca caquelu presu. Julio dulli ñi pürayal engün quiñe farcu mu aculu ta Cesarea, Adramitio huaria mu cüpai. Asia Menor mu mülefui Adramitio, püllelefui ta Lesbos, cheu ñi mülen Mitilene huaria. Püralu engün farcu mu, hune amuingün norte püle, fei hula conhue antü püle. Huall püle coningün ñi elcünual ca yemeal itrofillem negociayalu. Tüfachi farcu pepicalelai ñi yeal che, doyelchi mai pepicalelai ñi yeal pu presu (inaduamnge ti huichulechi dungu “Farcu mu miyauquefuingün lafquen mu”). Fentren huesaque che amulefui farcu mu, huelu Pablo quisulelai, compañeyu Aristarco ca Lucas. Fei Lucas huirintucui com ñi rupan. ¿Cullipeingün mai tañi pasaje, cam re elungeingün müten ñi amual tañi compañafiel Pablo? Quimngelai (Hech. 27:1, 2).

5. Pablo, ¿inei engün pefi Sidón huaria mu? Fei, ¿chem quimeltueiñmu tüfa ñi rupan?

⁵ Rupalu quiñe antü tañi amulen engün, amuingün 110 kilometro, fei puhuingün ta Sidón, Siria ñi inaltu lafquen mu. Julio quimniefui ñi Roma chengen Pablo ca ñi petu condenangenon, ¿feimu peno huesa femlafi chumngechi ñi femngequen caquelu presu? (Hech. 22:27, 28; 26:31, 32). Puulu engün ta Sidón, Julio fürenefi ta Pablo ñi pemeafiel tañi pu peñi ca pu lamngen. Fei engün quimniefui alüñma ñi presulen Pablo, feimu ayühunquechi lloufingün. ¿Iñchiñ cai? ¿Chumngechi pengelafuiñ taiñ inayentuquefiel feichi pu cristiano? ¿Inei pengelafuiñ taiñ piuqueyefiel? Loncontucuaiñ: cümelcafiliyiñ pu che tunte taiñ pepilnieel, llohuaiñ fentren cümelcan (Hech. 27:3).

6-8. Tripalu engün Sidón mu, ¿chem dungu mu rupaingün ñi puhual Cnido? Ca, ¿chem allmalltupelai Pablo ñi amuldungucheal?

⁶ Tripalu engün Sidón mu, amuingün norte püle. Fei hula amuingün conhue antü püle, conpulaingün chem huaria no rume, rupaingün inafül Tarso huaria, cheu ñi tremün Pablo, fei amuleingün Cilicia ñi inaltu lafquen mu, huelu ‘trafyenieyu ti cürüf’ (Hech. 27:4, 5). Cuñihun-ngetui ñi amulen ti farcu. Huelu chem dungu rupafulu rume, Pablo allmalltuquefui ñi amuldungucheal. ¿Nütramcapelafi pu presu, pu pasajero, pu cüdauquelu farcu mu, pu soltau? Ca, ¿ amuldunguchepelai cheu ñi puhun engün? ¿Iñchiñ cai? ¿Femqueiñ Pablo reque?

⁷ Asia Menor mapu mu, sur püle mülei Mira huaria. Puulu engün üyeu, cangelu farcu mu püraingün ñi puhual ta Roma (Hech. 27:6). Hunen siglo mu, Egipto hunelefui ñi fendelelafiel fillque fün ta Roma, fei fentren farcu miyahulquelu cachilla conpuquefui Mira huaria mu. Julio pefi quiñe farcu, fei com püraingün pu presu ca pu soltau. Tüfa doi fütra farcungefui, yeniefui fentren cachilla ca 276 che, quiñeque tüfa pu cüdauquelu farcu mu, pu soltau, pu presu ca quiñeque che ayünielu ñi puhual ta Roma. Doi fentren che amulelu tüfachi farcu mu, doi amuldungui Pablo.

⁸ Tripaingün Mira huaria mu ñi puhual ta Cnido. Quiñe antü meu müten puhuafuingün quellueliyu ti cürüf. Huelu Lucas feipi: “Fentren antü ñochiquechi amuiñ, fei ngellu puhuiyiñ Cnido huaria mu” (Hech. 27:7). ¿Doyelcülerputui chi ti cürüftucu? ¿Feimu peno ngellu puhuingün? (Inaduamnge ti huichulechi dungu: “Mediterráneo cürüf cuñihun-ngefui”). ¡Müna huesa dungu! Fütra cürüftucu mu, ¿rumeñma nengümcauquepelafui ti farcu cheu ñi amulen engün?

“Ti cürüftucu mahun rumeñma mütroucaniefi ti farcu” (Hechos 27:7-26)

9, 10. ¿Chem cuñihun dungu rupaingün inafül Creta mu?

⁹ Ti capitan ayüfui ñi amual conhue antü püle, huelu Lucas feipi: “Catrütunieiñmeu ti cürüf” (Hech. 27:7). Amulen mu ti farcu inaltu lafquen mu ti co quelluqueyu ñi cüme amuleal. Huelu ti farcu doi ponhuitu lafquen mu amui, fei ti cürüf norte püle cüpalu amulniefi sur püle, matu yeniepelafi. Feimu chumngechi femingün inaltu Chipre mu, ca femngechi femingün rupalu Salmone, amuingün inaltu Creta mapu mu sur püle ñi müte huesalcanoaeteu ti cürüf. Pichiñma müten cümelcaletuingün, fülmaeyu ti puquem, fei doi cüdaungeafui miyahual farcu mu.

¹⁰ Inaltu Creta mu amulelu engün, müte huesalcalaeyu ti cürüf. Femlu rume, ‘ngellu huallmeingün’, fei puhuingün quiñe huaria “Cüme Acuquem Farcu pingelu”. Inaltu lafquen amulele ti farcu, puhuafui norte püle peno. Huelu feiti huaria mu pichi huallmequefui ti co lafquen, fei tüngcülen elngei ti farcu. ¿Tunteñma mülenagingün üye mu? Lucas feipi “alüñmaiñ”. Huelu coni septiembre cam octubre cüyen peno, fei mülefuingün ñi pürüm tripayal. Doi mülenagle engün, doi cuñihun-ngeafui amuleal farcu mu (Hech. 27:8, 9).

11. ¿Chem ngülamtui Pablo, huelu chumi pu che?

¹¹ Pablo fentren rupa miyaufui Mediterráneo lafquen mu, ¿feimu peno ramtungei chem tañi pin? Pablo ngülamtui ñi amulenoal engün, feipifi: “Femliyiñ, lafquen mu ñamconai ti farcu, ñamümaiñ itrocom, cafei layafuiñ”. Huelu ti amulquelu ti farcu ca ti ngen farcu inalaingu ñi ngülam, ¿ayüniepelafuingu ñi matu puhual ta quiñe doi cüme puerto? Feipifingu ta Julio ñi amuleal, fei epe com che ayüfuingün ñi amuleal müten tañi puhual Fenice ñi puerto mu. Üye mu, doi huallmequefui peno ti co lafquen, fei doi tüngcüleafui ñi elngeal ti farcu tañi rupayal puquem. Fei pichi cürüflu müten, sur mu cüpalu, allmalltuingün ñi amual ta Fenice norte püle mülelu (Hech. 27:10-13).

12. Tripalu Creta mu, ¿chem cuñihun dungu mu rupaingün? ¿Chumingün cai pu amulniefilu ti farcu?

¹² Doyeli ti dungu, norte püle “tripai quiñe fütra cürüf”. Quiñe pichi huapi Cauda pingelu catrütuñmaquefeyu ti cürüf pichiñma mu. Cauda 65 kilometro camapulefui ta Cüme Acuquem Farcu pingechi puerto. Cuñiutucuhun mu rume, ti cürüf yeafeyu engün sur püle, fei puhuafuingün huircolechi cuyüm inaltu lafquen África mu. Pu amulniefilu ti farcu rume llicalefuingün, ayülafuingün femngechi huesa rupayal. Feimu, püramfingün ti pichi huampo ñi yenieel ti farcu, esquife pingelu. Ti huampo, ¿apolepelafui co mu? Fei, ¿rume cüdaungepelafui ñi püramngeal? Fei hula, cüme traricünufingün ti farcu, miñche mu rulpacünufingün fütraque llasu cam cadena ñi teifücanoal. Cafei, nacümfingün ti chem pünengequelu ñi amulnieafiel ti farcu, ¿tüfa tati vela peno? Fei hula, rume cüdahuingün ñi rumeal ti cürüftucu mahun. ¡Aungeingün, müna huesa dungu! Com tüfa ñi femün engün quellulaeyu, Lucas feipi: “Ti cürüftucu mahun rumeñma mütroucaniefi ti farcu”. Feimu, ti cülachi antü mu, ütrüfentufingün itrofillem ñi doi fanenoal ti farcu, fei ñi ñamconnoal co mu (Hech. 27:14-19).

13. ¿Chum duamcülepelafui pu che farcu mu, chem rupaingün?

¹³ Rume llicalefuingün. Huelu Pablo ca tañi pu compañ tüngcülefuingün, Jesús ca quiñe cüme püllü feipifeyu ta Pablo ñi huldungual Roma mu, feimu com quimniefuingün ñi mongetripayal (Hech. 19:21; 23:11). Feingelu rume, 2 semana mu amulei ti cürüftucu mahun, fei mütroucamequefi ti farcu. Cafei pengequelafui pu huangülen ca ti Antü no rume, feimu quimlafuingün cheu ñi mülen ca cheu ñi amulen no rume. Pepi ilaingün. Huelu, ¿inei no rume ayülafui ñi iyal peno? Müna hutrengefui, mahunmequefui, llicalefuingün ca huiyulefui ñi lonco.

14, 15. 1) Pablo feipifi ti pu che “mülefui tamün allcütual tañi ngülam”, ¿chumngelu feipi? 2) Pablo elufi maneluhun tati pu che, ¿chem raquiduameleiñmu tüfa?

¹⁴ Pablo huitracünuhui, fei feipifi engün “mülefui tamün allcütual tañi ngülam”. Huelu feipilai ñi culpatuafiel, doi mai ayüfui ñi raquiduamelafiel engün ñi falin-ngen tañi feipin. Fei feipi: “Feipihuayiñ tamün nehuen piuquecünuhual, inei no rume ta lalayai. Farcu müten ñamconai” (Hech. 27:21, 22). ¡¿Rume cüme duampelaingün?! Ca femngechi ayühui Pablo tañi adnieteu Jehová, fei ñi yafülduamelafiel feichi pu che. Fei llemai, Chau Jehová rume duamtufi caque quiñeque che. Fente ñi piuqueyefiel “ayünielai ta inei no rume ñi apümcangeal. Ayüniei ta com pu che ñi nor raquiduamtual” (2 Ped. 3:9). Feimu, ¡müna falin-ngei taiñ amuldungucheal ti cümeque dungu! Femngechi doi fentren che taiñ yafülduamelafiel. Loncontucunieaiñ: cuñihun dungu mu mülei rume fentren che, huelu Chau Jehová rume falintuniefi caque quiñeque engün.

¹⁵ Farcu mu, Pablo amuldungulelfi tati pu che Chau Dios ñi feipicünuel ca tañi maneluhun, ¿femi fentren rupa peno? (Hech. 26:6; Col. 1:5). Femlu rume, feichi mu epe ñamconlu ti farcu, nehuentucufi ñi maneluhual tañi mongetripayal engün, feipifi: “Feichi Dios iñche ñi serfiquefiel ca ñi püramyequefiel, trafia huercüleneu quiñe cüme püllü. Feipieneu: ‘Ngelai tami llicayal, Pablo. Mülei tami puhual cheu ñi mülen Roma ñi Lonco Ülmen. Cafei Chau Dios montulaimu eimi ca tati pu che farcu mu mülelu’. Pu peñi, iñche feyentuquefiñ ta Chau Dios, maneluuquen ñi femtripayal tañi feipin, feimu nehuen piuquecünuumün. Huelu troncüpuhuaiñ quiñe huapi meu” (Hech. 27:23-26).

“Com engün cümelcalen puhuingün mapu meu” (Hechos 27:27-44)

16, 17. 1) ¿Chem dungu ñi rupan allmalltui Pablo ñi llellipual, ca chum duamelfi tati pu che? 2) ¿Chumngechi femtripai Pablo tañi feipin?

¹⁶ Epu semana mu ti cürüf mütrocauyeniefi ti farcu 870 kilometro. Fei pu amulniefilu ti farcu ngüneduamingün ñi puhual mapu meu, ¿allcüpelaingün ti reu ñi puumequen inaltu lafquen mu? Feimu furitu farcu püle ütrüftucufingün 4 pañillhue nülcühue, ancla ca pingelu, fei ñi huitracünuafiel ti farcu ca amulnieafiel hula inaltu lafquen mu. Feichi mu, pu cüdauquelu farcu mu cüpa allmalltuingün ñi lefmahual, huelu Pablo feipifi tati loncolechi ca caquelu soltau: “Farcu mu mülenagcülenole tüfachi pu huentru, eimün montulayaimün”. Feimu, catrütufingün ñi lefmahual. Doi tüngcületui ti farcu, feimu Pablo feipifi com tati pu che ñi iyal, fei ca huiño feipifi ñi mongetripayal engün. Fei hula, “mañumtufi ta Chau Ngünechen fei engün ñi adquiñ mu” (Hech. 27:31, 35). Inayentufali ñi femün Pablo. ¿Lucas ca Aristarco inayentupelafi? Ca femngechi com iñchiñ inayentuafuiñ allcütueliyiñmu caquelu che taiñ llellipun. Cümeafui taiñ ramtuhual: “¿Tañi llellipun mu yafülduamelquefiñ tañi pu allcütueteu?”.

¹⁷ Llellipucünulu Pablo, “com yafüluhuingün, fei eluhui ñi iyal engün” (Hech. 27:36). Ütrüftucufingün ti cachilla lafquen meu fente ñi fanenoal ti farcu, “femngechi doi cüdaungelayai ñi puhual inaltu lafquen mu” pingün. Hunlu, catrüfingün ti llasu trariniefilu ti pañillhue nülcühue, fei ütrüfconi lafquen meu. Nentupürolfingün tati remo, cafei püramfingün ti pichi ünifpüralechi pañu, trinquete pingelu. Femngechi, doi cüme amulnieafuingün ti farcu. Huelu ti huechuñ farcu rüngaconi cuyüm cam fotra mu, ca tati fütraque reu huatrocafi ti furitu farcu. Quiñeque soltau ayüfuingün ñi langümafiel pu presu ñi lefmaunoal, huelu Julio catrütueyu. Doi mai feipifi com engün ñi puhual mapu meu chumngechi rume. Femtripai Pablo ñi feipin, 276 che mongelen puhuingün mapu meu (Hech. 27:44). ¿Cheu mapu anta puhuingün? Peafiyiñ.

“Rumeñma füreneeiñmeu” (Hechos 28:1-10)

18-20. Pu Malta che, ¿chumngechi pengelingün ñi rume fürenechequen? Ca, ¿chem afmatun dungu rupai?

¹⁸ Sur püle Sicilia mu mülefui quiñe pichi huapi Malta pingelu, üye mu puhuingün (inaduamnge ti huichulechi dungu “¿Cheu mülei Malta?”). Pu Malta che pefingün ñi cüpalen com feichi pu che mongetripalu lafquen meu, focholefuingün ca trüntrünmequefuingün, feimu ‘rumeñma fürenefingün’ (Hech. 28:2). Mahuncülefui, rume hutrengefui, feimu cütraltuingün ñi eñumtual engün. Fei quiñe afmatun dungu rupai.

¹⁹ Pablo ayüfui ñi quellual, ñimitui chimillco ca tucufi cütral mu. Huelu triparumei quiñe venenongechi filu ca ünatunieñmaeyu ñi cuhu. “Chau Dios ñi duam mu castigangei” pi tati pu che.a

²⁰ Pu che raquiduami ñi cunahual Pablo tañi lipang. Griegodungun mu ti palabra rulpadungungelu “cunahual” feipingequefui medicodungun mu. Lucas doctorngefui, feimu llemai huirintucui feichi palabra (Hech. 28:6; Col. 4:14). Fei, ¿chem rupai? Pablo ütrüfentufi ti filu ca chumngelai rume.

21. 1) Taiñ ngüneduampeel mu, ¿chem dungu pengeli Lucas ñi cüme huirintucuel chem ñi rupan? 2) ¿Chem afmatun dungu femi Pablo? Fei, ¿chumi pu Malta che?

²¹ Malta mu mülefui quiñe huentru Publio pingelu, ülmen huentrungefui, fentren mapu niefui, Roma chengefui ca doicülefui ñi autoridad Malta mu, feimu Lucas üitufi “ti doi falin huentru ti huapi meu”. Trür femngechi üitungequei 2 huirintucun pengelu Malta mu. Publio rume cüme lloufi Pablo ca tañi pu compañ, 3 antü umañelfi tañi ruca mu. Huelu tañi chau cutrancülefui. Feimu ti doctor Lucas feipi: “Aling cutrancülerquei, rume huesa cutranpütralei, feimu tranaconcülei ngütantu mu”. Tüfa mu, griegodungun mu, Lucas ca huiño feipi quiñeque palabra medicodungun mu. Pablo llellipucünufi ta Chau Dios, fampuhulelfi ñi cuhu, fei tremoltufi. Pu che rume afmatulehuei, feimu yelelfi caquelu che cutrancülelu ñi tremoltuafiel. Cafei yelelfingün fentren chemcün ca regalo Pablo ca tañi pu compañ, elufingün com ñi duamnieel tañi cüme puhual engün ta Roma (Hech. 28:7-10).

22. 1) Quiñe adümuhun huentru, ¿chumngechi saquifi Lucas tañi huirintucuel? 2) ¿Chem inaduamaiñ cüpalechi capitulo mu?

²² Lucas com cüme huirintucui tüfachi rupan dungu taiñ ngüneduampeel. Feimu, quiñe adümuhun huentru feipi: “Lucas rume cüme huirintucui caque quiñeque dungu ñi rupan, tüfa mu doicülei ta caquelu lifru Biblia meu. Rume cüme feipi chumngechi ñi amulniengequefel farcu hunen siglo meu ca ñi chumngechilen ta antü Mediterráneo püle”. Lucas, ¿entupelai feichi quimün quiñeque dungu mu ñi huirintucuel pu cüdauquelu farcu mu? Cam, ¿Lucas peno huirintucui caque quiñeque dungu ñi rupan miyaufulu feichi farcu mu? Felefule, ca femngechi fentren dungu huirintucui petu ñi puunon ta Roma. Fei, ¿chem dungu mu rupai Pablo puulu ta Roma? Inaduamafiyiñ tüfa cüpalechi capitulo mu.