“Huall mapu püle”

1. Pu testigo, ¿chem dungu mu trürcüleiñ pu hunenque cristiano famülque mu?

PU HUNENQUE cristiano cüme huldunguingün tati cümeque dungu com tañi nehuen mu. Ñom piuque mu eluhuingün ñi quelluaeteu ca adnieaeteu Chau Jehová tañi nehuen. Inantucungelu rume, fentecünulaingün ñi amuldungual. Feimu Chau Jehová rume cümelcafi engün. Feichi pu cristiano reque, iñchiñ ca femngechi rupaqueiñ famülque mu.

2, 3. Ti lifru Hechos, ¿chumngelu falin-ngechi lifru feipiafuiñ?

² ¡Falin-ngei llemai ti lifru Hechos! Deu ngüneduamfiyiñ tañi feipin, fei rume nehuentucuqueiñmu, doi maneluucüleiñ. Tüfachi lifru mu müten Chau Dios nütramcaqueiñmu ñi femün pu hunenque cristiano.

³ Ti lifru Hechos üitufi 95 che, 32 mapu, 54 huaria ca 9 huapi. Ca nütrameleiñmu ñi rupan fillque che, quiñeque loncolechi religioso mallma piuquengelu, caquelu politico dios troquiuquelu ca llicafalchi che inantucufilu pu cristiano. Huelu, tati doi falin-ngechi dungu ñi nütramcan tüfachi lifru fei ñi rupan taiñ hunenque pu peñi ca pu lamngen. Fei engün chaftuquefingün cüdaungechi dungu, huelu fentecünulaingün ñi huldungual tati cümeque dungu com nehuen mu, ca femngechi femqueiñ iñchiñ famülque mu.

4. ¿Chem mu rume piuqueyeniefiyiñ ta Pablo, Tabita ca caquelu cristiano?

⁴ Doi cüme quimfiyiñ Pedro ca Pablo, com tañi nehuen mu cüdahuelfingu ta Chau Jehová. Cafei quimürpuiñ tati saquin doctor Lucas, ñi rume fürenechequen Bernabé, ca fente ñi nehuen piuquengen Esteban. Ca femngechi cüme quimürpuiñ tañi cüme chengen Tabita, tañi poyechefengen Lidia, ca ñi femquen fentren peñi ca lamngen. Epe 2 mil tripantu rupafui ñi mülequefel engün, huelu rume piuqueyeniefiyiñ, ¿chumngelu? Fei engün reque, iñchiñ ca huercüngeiñ ñi quimelelafiel pu che tañi inayafiel Jesús (Mat. 28:19, 20). ¡Rume ayühulqueiñmu tüfachi cüdau!

5. Jesús tañi pu inanieteu, ¿cheu püle hune amuldunguingün?

⁵ Pichi raquiduamaiñ Jesús ñi feipifiel tañi pu inanieteu, feipi: “Elungelmün Chau Ngünechen ñi nehuen, yafüluhuaimün. Fei huldunguaimün iñche meu Jerusalén püle, com Judea, Samaria ca huall mapu püle” (Hech. 1:8). Hune, Chau Jehová ñi nehuen adniefi engün ñi amuldungual “Jerusalén püle” (Hech. 1:1–8:3). Ca femngechi, fei hula amuldunguingün com Judea ca Samaria (Hech. 8:4–13:3). Fei, amuldungurpuingün tati cümeque dungu “huall mapu püle” (Hech. 13:4–28:31).

6, 7. ¿Chem quellu nieiñ famülque mu taiñ amuldungual?

⁶ Taiñ hunenque pu peñi ca pu lamngen nielafuingün fillque publicacion tañi amuldungual ca niefuingün quiñeque troquiñ Biblia müten. Por ejemplo, Mateo huirintucungei 41 tripantu püle, Hechos huirintucungei 61 tripantu püle, ca feichi mu mülefui quiñeque carta müten ñi huirintucuel Pablo. Cafei, petu tañi cristianongenon, pu judio nienolu quisu tañi Hebreo Huirintucun, mülefui ñi amual ngillatuhue ruca mu tañi allcütual ti papeltun tüfachi troquiñ Biblia (2 Cor. 3:14-16). Epe com pu judio nielafuingün quisu tañi huirintucun, feimu amuldungulu engün nütramcaquefuingün chem tañi allcütuel müten.

⁷ Famülque mu, epe com pu testigo quisuque nieiñ taiñ Biblia ca fentren publicacion. Cafei, amuldungumequeiñ tati cümeque dungu fillque quehun mu ca quelluquefiyiñ ta che ñi cristianongerpual doi 240 mapu ca fillque lof mu.

Chau Dios ñi nehuen quellufi engün

8, 9. 1) Lloulu Chau Dios tañi nehuen, ¿chem femürpuingün Jesús ñi pu discipulo? 2) Ti quim manelfal cüdaufe, ¿chem femquei Chau Dios tañi quellun mu?

⁸ Jesús huercüfilu tañi pu inanieteu, feipifi: “Elungelmün Chau Ngünechen ñi nehuen, yafüluhuaimün”. Chau Jehová ñi nehuen adniefi pu discipulo ñi amuldungual huall mapu püle. Huelu feica müten no, Chau Jehová ñi nehuen quellufi Pedro ca Pablo ñi tremoltuafiel pu cutrancülelu, huemünentuafiel pu huecüfü ca huiñomongeltuafiel pu layelu. Doi mai, Chau Jehová ñi nehuen quellufi pu hunenque cristiano ñi femal tati doi falin-ngechi cüdau: quimeltucheal ti rüfngechi quimün hulquelu rumel mongen (Juan 17:3).

⁹ Feichi antü Pentecostés 33 tripantu mu, Jesús tañi pu inanieteu “fillque quehun dunguingün chumngechi ñi adcünueteu Chau Ngünechen ñi nehuen”, femngechi huldunguingün “Chau Ngünechen ñi afmatufal dungu” (Hech. 2:1-4, 11). Famülque mu, Chau Dios femquelai afmatun dungu taiñ dungual fentren quehun mu. Huelu mai, quelluniequefi tati quim manelfal cüdaufe ñi pepicayal fentren publicacion fillque quehun mu. Quiñeque tüfa fei tati revista Ti Huerquen ca ¡Tami quimafel! fill cüyen entuhuiringei fentren tüfa. Cafei, taiñ pagina jw.org mu mülei fentren publicacion ca video doi mil quehun mu. Com tüfa quelluqueiñmu taiñ amuldungulelafiel itrofill che “Chau Ngünechen ñi afmatufal dungu” (Apoc. 7:9).

10. Ti quim manelfal cüdaufe, ¿chem dungu doi eluhui ñi femal 1989 ta fantepu mu?

¹⁰ Conlu 1989 tripantu ta fantepu mu, ti quim manelfal cüdaufe doi eluhui ñi rulpadunguafiel fentren quehun mu tati Hue Mapu ñi Biblia. Feimu, deu rulpadungungei doi 200 quehun dungun mu ca deu entuhuiringei doi 240 millon rupa, ca ¡doi amulei ti cüdau! Chau Jehová ñi nehuen mu müten pepi femngequei tüfachi fütra cüdau.

11. ¿Chumngechi femngequei ti cüdau ñi rulpadungungeal fillque publicacion?

¹¹ Ca femngechi rulpadungungequei taiñ fillque publicacion. Doi 150 mapu mu, fentren peñi ca lamngen ayühunquechi cüdauqueingün ñi rulpadungual, cofraquelaingün ñi femal. Afmatufali, huelu quimfali llemai: Chau Dios adniemequefi tüfachi troquiñche müten ñi cüme huldungungeal “Chau Ngünechen ñi ngünenietual ta mapu”, ñi quimngeal tati Mesías ñi lonco ülmen-ngen ca tañi ngüneniemequen huenu mu (Hech. 28:23).

12. ¿Chem quellu niefui Pablo ca caquelu cristiano ñi femal tañi cüdau?

¹² Cuifi mu, ca femngechi Chau Dios tañi nehuen quellufi pu hunenque cristiano ñi huldungual tati cümeque dungu. Por ejemplo, Pablo amuldungufi pu judio ca pu judiongenolu Antioquía, Pisidia mu. Fei, “com pu che ayünielu ñi llohual ti rüf dungu, fei ñi nieal rumel mongen, feyentuingün” (Hech. 13:48). Cafei, aflu ti lifru Hechos, Lucas feipi Pablo ñi amuldunguchequen “nehuen piuque mu”, “chem no rume catrütulaeyu” pi (Hech. 28:31). ¿Cheu amuldungumequefui? Tati doi nehuen-ngechi gobierno ñi falin huaria mu, Roma pingelu. Quimfali llemai, feichi pu cristiano Chau Jehová mu entuquefui tañi nehuen.

Caiñetungeliyiñ rume, amuleiñ taiñ amuldungun

13. Caiñetungeliyiñ, ¿chumngelu falin-ngei taiñ llellipuafiel Chau Jehová?

¹³ Hue caiñetungelu pu hunenque discipulo llellipufingün ta Chau Jehová ñi nehuentucuaeteu. Fei, ¿chem rupai? Chau Dios tañi nehuen quellueyu engün ñi llicanoal tañi amuldungucheal (Hech. 4:18-31). Caiñetungen mu iñchiñ, ca femngechi llellipuquefiyiñ Chau Jehová taiñ eluaeteu nehuen ca quimün, fei taiñ amuldunguleal (Sant. 1:2-8). Chau Jehová tañi quellun mu müten pepi femqueiñ tüfachi cüdau. Cutrancangeafuiñ, caiñetungeafuiñ, huelu chem no rume catrütuquelaeiñmu taiñ huldunguchequen. Taiñ com cüme femal tüfa duamnieiñ Chau Jehová ñi quellu, tañi quimün ca tañi nehuen (Luc. 11:13).

14, 15. 1) Doi caiñetungei ti trahunche lalu Esteban, huelu ¿chem cüme dungu tripai? 2) Pu Siberia che, ¿chumngechi quimürpuingün ti rüf dungu?

¹⁴ Petu ñi langümngenon, Esteban amuldungui llicanon mu (Hech. 6:5; 7:54-60). Feichi mu, “amultucungei ñi rume caiñetufiel tati trahunche”. Feimu, epe com pu discipulo lefmahuingün Judea ca Samaria püle, pu apostol müten lefmaulaingün. Feingelu rume, catrütungelai ti amuldungun cüdau. Por ejemplo, Felipe amui ta Samaria ñi ‘amuldungulelafiel pu che Cristo ñi dungu’, ¡rume cüme tripai tüfa! (Hech. 8:1-8, 14, 15, 25). Doi mai, Biblia feipi: “Langümngelu Esteban, caiñetungei pu feyentulelu. Fei lefmahuingün ta Fenicia, Chipre ca Antioquía huaria mu. Huelu amuldungulelfingün ti huercün dungu pu judio müten. Huelu quiñeque huentru Chipre ca Cirene huaria tuulu, amuingün ta Antioquía huaria mu. Fei amuldungulelfingün pu che griegodunguquelu. Fei quimelelfingün Ñidol Jesús ñi cümeque dungu” (Hech. 11:19, 20). ¿Inaduamimi? Caiñetungeingün pu cristiano, huelu tüfa quellueyu engün ñi doi alü camapu puhulafiel Chau Dios ñi dungu.

¹⁵ Ca femngechi dungu rupai mülefulu tati Unión Soviética. Presuyengeingün fentren testigo ta Siberia mapu, 1950 puulu 1960 tripantu püle. Fill püle yengeingün, femngechi puhulfingün ti rüf dungu huall püle feichi fütra mapu mu. Presuyengenofule pu cristiano, fente camapu puulayafui ti rüf dungu, doi 10 mil kilometro puhui cütu, pu peñi ca pu lamngen nielafuingün plata ñi fente camapu amual. Huelu ti Gobierno huercüfi engün. Quiñe peñi feipi tati pu autoridad quelluntucufi pu Siberia che ñi quimürpual ti rüf dungu.

Chau Jehová rume cümelcaqueiñmu

16, 17. Hechos, ¿chumngechi pengelqueiñmu Chau Jehová ñi cümelcaquefiel pu hunenque cristiano?

¹⁶ Chau Jehová cümelcafi llemai pu hunenque cristiano. Pablo ca caquelu cristiano nganingün ti fün ca hutrocofingün, huelu “Chau Ngünechen tremümquefi” (1 Cor. 3:5, 6). Hechos cüme pengeli Chau Jehová ñi cümelcaquefiel, feimu fente tremi. Biblia feipi: “Huall püle puhui Chau Ngünechen ñi dungu, Jerusalén meu doi alün-ngerpui pu inayerpufilu ta Jesús” (Hech. 6:7). Cafei “com püle Judea, Galilea ca Samaria mapu mu tüngcületui ti trahunche, fei nehuen-ngetui. Fei engün feyentufi ta Jehová. Cafei Chau Dios ñi nehuen yafültucueyu engün. Feimu doi alün-ngerpui pu inaniefilu ta Jesús” (Hech. 9:31).

¹⁷ Antioquía, Siria mapu mu, fentren cristiano llicalaingün ñi amuldungual pu che hebreodungulu ca griegodungulu. “Chau Jehová quelluntucunieyu engün. Feimu fentren che feyentui, cafei inaniefingün ta Ñidol Jesús” (Hech. 11:21). ¿Ca chem rupai hula? “Huall püle amulei ñi puhun Chau Jehová ñi dungu, cafei fentren che feyentuingün” (Hech. 12:24). Pablo ca caquelu cristiano ñi quellun mu, fentren judiongenolu quimürpuingün ti rüf dungu, fei “Chau Jehová ñi pepiluhun mu com püle puhui tañi dungu. Fei doi fentren che feyentui” (Hech. 19:20).

18, 19. 1) ¿Chumngelu maneluuqueiñ Chau Jehová taiñ quelluntucunieteu? 2) ¿Chem rupan dungu pengeli Chau Jehová ñi quisucünunofiel tañi pu che?

¹⁸ ‘Chau Jehová quelluntucuniefi’ pu cristiano cuifi mu, ca femngechi femquei famülque mu. Feimu, fentren che llohuingün ti rüf dungu, hulcünuingün ñi mongen Chau Jehová mu ca fautizahuingün. Caiñetungeiñ ca cutrancangequeiñ chumngechi ñi rupan Pablo ca caquelu cristiano cuifi mu, huelu ca femngechi nieiñ Chau Jehová tañi quellu, feimu müten huechunentuqueiñ taiñ cüdau (Hech. 14:19-21). Chau Jehová ‘quellueiñmu ca cuñiutucueiñmu rumel mu’ (Deut. 33:27). Loncontucunieaiñ: “Tañi fütra üi ñi duam mu, Chau Jehová quisucünulayafi tañi pu che” (1 Sam. 12:22; Sal. 94:14).

¹⁹ Inaduamaiñ ñi rupan taiñ peñi Harald Abt, pu nazi presuntucueyu ñi rume cüdahual quiñe campo de concentracion mu, Sachsenhausen pingelu. Mayo 1942 tripantu mu, pu soltau lefcontufingün tañi ruca, fei presuyeñmafi tañi domo Elsa ca tañi ñahue. Elsa feipi: “Com ti tripantu ñi rupan cheu ñi rume cüdauquen pu presu quimürpun falinque dungu: afmatufali fente taiñ quellueteu Chau Jehová tañi nehuen rupamequeliyiñ fütra huesaque dungu. Petu ñi presuyengenon, papeltufiñ quiñe carta tañi elueteu quiñe lamngen. Ti carta feipifui, contueliyiñmu huesaque dungu, Chau Jehová tañi nehuen tüngduamelqueiñmu. Nehue feyentuquelafun. Huelu, rupalu hula iñche huesaque dungu, ngüneduamün fente ñi rüfngen tañi feipin. Feingei llemai. Rupanolmi femngechi dungu, cüdautuafuimi tami feyentual. Huelu iñche femngechi rupan tati”.

¡Amulepe taiñ cüme huldunguchequen!

20. Presulelu tañi ruca mu, ¿chumi Pablo? Tañi femün, ¿chumngechi quelluquefi fentren cristiano?

²⁰ Aflu ti lifru Hechos, Pablo presulefui ñi ruca mu Roma mu mülelu. Feimu elungequelafui ñi amuldungual fill ruca püle. Huelu amuldungulelfi com tañi pu huitran Chau Dios ñi ngünenietual ta mapu (Hech. 28:31). Famülque mu, fentren taiñ pu peñi ca lamngen cutrancülelu, cam füchalelu engün, pepi tripaquelaingün ñi amuldungual fill ruca mu. Huelu tañi piuqueyeniefiel ta Chau Jehová caletuquelai, rume ayünieingün ñi huldungual. Llellipufiliyiñ ta Chau Jehová, feipiafuiñ ñi quelluafiel engün, fei ñi peafiel pu che cüme piuquengelu ca ayünielu ñi quimürpual ti rüf dungu.

21. ¿Chumngelu rume duamfali taiñ amuldungun cüdau?

²¹ Epe com iñchiñ catrütungequelaiñ amuldungual fill ruca püle ca cheu rume. Feimu com piuque mu amuldunguaiñ Chau Jehová ñi ngünenietual ta mapu, quelluntucuqueiñ ñi quimngeal tüfa “huall mapu püle”. Rupamequei llemai com tati dungu pengelquelu taiñ mülen afchi antü meu (Mat. 24:3-14). Ngünamcalayaiñ taiñ tiempo, rume duamfali taiñ ‘rume cüdaucüleal Ñidol tañi dungu mu’ (1 Cor. 15:58).

22. Petu taiñ üngümcülen ñi acual Jehová ñi antü, ¿chem eluucüleiñ taiñ femal?

²² Pichilehuei, acuai “Jehová ñi fütra afmatun antü” (Joel 2:31). Petu ñi acunon feichi antü, amulepe taiñ cüme amuldunguleal llicanon mu. Pu Berea che reque, petu mülei fentren che eluucülelu “ñi llohual Chau Ngünechen ñi dungu” (Hech. 17:10, 11). Feimu fentecünulayaiñ taiñ amuldunguchequen feipicangeliyiñ reque hula: “¡Müna cüme femimi, cüme manelfal cüdaufe!” (Mat. 25:23). Amulepe taiñ ayühunquechi huldunguchequen, püntütripalayaiñ Chau Jehová mu. Femngechi femliyiñ, rumel cüme duamcüleaiñ taiñ ‘huldungulelfiel engün Chau Ngünechen ñi ngünenietual ta mapu’.