Chumngechi kimelelngeafuy tati pu püñeñ

Jewba dewmalu tati pu reñma, elfalkünufi tati pu chaw ñi ngüneytuafiel (inawmenebel) tañi pu yall (Kolosense 3:20). Tati pu chaw elfalkünungey ñi kimeltunieafiel tañi pu yall (püñeñ) ñi piwkeyeafiel ta Jewba, femngechi tremle manelfalchengeal (2 Timotew 1:5; 3:15). Kafey müley tami ngüneduamal chem ñi mülen kidu ñi piwke mu. Femngechi, doy falin-ngey tami femün. Feymu tami kimeltuafiel tami pu yall Ngünechen ñi dungu, eymi wüne müley tami nieal tami piwke mu (Salmo 40:8).

1 KELLUFINGE TAMI PU PICHIKECHE TAÑI NÜTRAMKAYAL EYMI MU

BIBLIA TAÑI FEYPILEN: “Müley tamün wüne allkütuael, welu müley tamün pürümkawnoael tamün dunguael [matudungunoal]” (Santiaw 1:19). Eymi ayükeymi, maneluwün mu nütramkayaetew tami pu yall (püñeñ). Welu müleymi pengelafiel tami pu yall ayükeel tami küme allkütuafiel ñi feypiaetew tañi duamnieel. Tamün nütramkawal tami pu yall engün doy falin-ngey ñi tüngküleal, femngechi tami pu yall doy küdawngelayay ñi nütramkayaetew (Santiaw 3:18). Rakiduamle “yafüdungungean ka weda dungungean” pile engün, feyta doy küdawngeay tami nütramkayaetew piwke mu. Feymew ñom piwke mu, feypikefinge tunten (chumten) piwkeyefiel (Matew 3:17; 1 Korintio 8:1).

TAMI FEMAFEL:

• Allkütufinge tami pu yall duamniele tami nütramkayaetew

• Rumel (molkechi) nütramkange tami pu yall engün, mülele wedake dungu müten mülelay tami nütramkayafiel

2 INADUAMYEFINGE MAY CHEM RÜF RAKIDUAMKÜLEN TAMI PU YALL

BIBLIA TAÑI FEYPILEN: “Tati pengelkelu küme kimün kiñe dungu mu peay ti kümelkan” (Proverbios 16:20). Kiñeke rupa, eymi müley tami doy peal ka küme inaduamyefinge chem rüf ñi rakiduamkülen tami pu yall. Tati pu wechekeche mallmawkelu ñi feypin mu, kam rakiduamkelayngün ñi nütramkan mu. “Kiñe che llowdungulu petu ñi allkütunon kiñe dungu, tüfa re wedwedka dungun-ngey.” (Proverbios 18:13) Feymew pürüm illkufemkilnge (pür lladkübemkilnge) (Proverbios 19:11).

TAMI FEMAFEL:

• Newentunge tami katrütudungunoafiel (katrüpanol) tami yall tami feypietew, ka illkufemkilnge chem dungu no rume tami feypietew

• Tukulpange eymi tami pichichengen mu tami yall reke, ka chem rakiduamkefuymi ka chem doy falintukefuymi

3 KIÑEWKÜLEMU TAMU RAKIDUAM

BIBLIA TAÑI FEYPILEN: “Allkütunge fotüm, tami chaw ñi ngülamtun, ka ngoymakilnge [ungenentukünokilnge] tami ñuke mi kimeleletew” (Proverbios 1:8). Jewba elfalkünufi tati chaw ka ñuke ñi ngünenieal tañi pu yall. Ka mür müley tamu kimeltuafiel tamu pu yall ñi yamchefengeal ka feyentual (müngeltual) (Efesio 6:1-3). Feymew tati pu yall inaduamniekeyngün tañi pu chaw ‘tamu kiñewkülenon kiñerume rakiduam mew müten’ (1 Korintio 1:10). Feymu, kiñewkülenolmu kiñe dungu mu, fillpipiyewkilmu tamu pu yall ñi adkiñ mu, femngechi femülmu yamngewelayafuymu.

TAMI FEMAFEL:

• Trür (trir tripa) müley tamu rakiduamal chumngechi norümal tamu pu yall

• Trür rakiduamnolmu chumngechi ñi kimeltuafiel tamu pu yall, newentunge tami kimal chem rakiduamküley tami kompañ

4 PEPIKAWNGE TAMI ADKÜNUAL CHI DUNGU

BIBLIA TAÑI FEYPILEN: “Adümelfinge [pepikabinge] ti pichi wentru chumngechi feley ñi inayeafiel ñi rüpü kidungealu” (Proverbios 22:6). Ayülmi ñi küme tripayal kimeltufiel tami pu yall (püñeñ), eymi müley tami ngüyülafiel. Feymew müley tami pepikawal kiñe adkünuchi kimeltun ka ñi nieal ngülamtun (Salmo 127:4; Proverbios 29:17). Tati norüm dungu re kastigan dungu müten no, welu may müley tami kelluafiel tami pu yall ñi kimal, chumngechi müley tami feyentuaetew (tañi mupitual) tami feypin (Proverbios 28:7). Ka kimeltuafimi ñi piwkeyeafiel Ngünechen ñi dungu ka ngüneduamal tati kümeke ngülam mülelu Biblia mu (Salmo 1:2). Femngechi kiñe lif küme rakiduam ñi nieal (Ebrew 5:14).

TAMI FEMAFEL:

• Newentunge tami kimelafiel tami pu yall ñi peafiel ta Ngünechen ñi rüfngen, chew tañi maneluwal engün

• Kellufinge ñi kimal ka famentual wedake dungu, fey ñi wedalkanoal tañi lif mongen, kiñeke dungu mülelu Internet mu, kam chumngechi weniyeafuy kake che Internet mu. Kimeltufinge ñi kiñepülekünual tati pu wedake che mu nüntuka pichichekelu