Poyefinge ta Jewba tami reñma engün

Chumngechi inaduamkeymi tüfachi papil, ti Biblia niey fentren kümeke ngülam tami kelluaetew eymi ka tami reñma (pu che). Jewba ayükey tamün ayüwküleal ta eymün. Ka feypikünuy wüne doyümnieafilmün ñi poyengeal ta kidu, “fey kom tamün duamtunieel ka femngechi llowaymün” (Matew 6:33). Ngünechen ayükey tami weniyeaetew. Feymew allmalltuaymi (ulpakünulabuymi) chumngechi tami fülkonal Jewba mew, tüfa doy falin-ngechi dungu nieafel kiñe che (Matew 22:37, 38).

1 YAFÜLTUKUNGE TAMI WENIYEWÜN JEWBA ENGU

BIBLIA TAÑI FEYPILEN: ‘Fey iñche eymün tamün Chawngean, fey eymün iñche tañi pu fotüm ka ñi pu ñawengeaymün. Femngechi feypi Jewba’ (2 Korintio 6:18). Ngünechen ayükey kiñe küme weningeal eymi mu, ka tati ngillatun kelluaeymu tami fülkonal. Feymu Jewba mangelaeiñmu: “Rumel [molkechi] ngillatulekeaymün” (1 Tesalonisense 5:17). Ngünechen ayükey tami nütramkayeafiel tami rume (mütre) rakiduamkülen ka tami rakiduam nieel tami piwke mu (Filipense 4:6). Ngillatufilmi trür (trir tripa) tami reñma, fey engün rakiduamayngün Chaw Ngünechen ñi rüfngen eymi mew.

Welu nütramkafilmi ta Ngünechen, ka müley tami allkütuafiel. ¿Chumngechi wechurpuafuymi (tripawentuabuymi)? Müley tami chillkatual ti Biblia ka fentren papil tuwlu fey mu (Salmo 1:1, 2). Feymew rakiduamnge tami chillkatun mew (Salmo 77:11, 12). Tami doy allkütuafiel ta Ngünechen müley tami amual pu Dungukelu Iney Ngen Jewba ñi trawün mu (Salmo 122:1-4).

Kafey, amuldungufilmi kakelu pu che Ngünechen mu, tüfa kelluaeymu tami yafültukual Jewba tami weniyeafiel. Fey femülmi, doy fülkonaymi kidu mu (Matew 28:19, 20).

TAMI FEMAFEL:

• Elnge antü tami ngillatual ka chillkatual Biblia fill antü

• Kellufinge tami reñma ñi doyümal ti falinkechi küdaw küpalu Chaw Ngünechen mew, welu doyümnoafiel ti fillke adngellüwün dungu

2 AYÜWÜN MU, POYEFINGE NGÜNECHEN TAMI REÑMA ENGÜNa

BIBLIA TAÑI FEYPILEN: “Fülkonmün ta Ngünechen mew, fey kisu fülkonay ta eymün mew” (Santiaw 4:8). Elnge kiñe antü ka kiñe ora tami nieal kiñe adkünungechi dungu tami reñma (pu che) ñi poyeafiel ta Ngünechen (Génesis 18:19). Welu feyta müten no: fill antü müley tami rakiduamal ta Ngünechen mu ka yafültukufinge tami reñma ñi doy fülkonal Jewba mu. Biblia feypi: “Müley tami [...] nütramelafiel [Jewba mu] anükünuwülmi tami ruka mu, ka miawülmi rüpü mu, ka kudulmi, ka witralmi” (Deuteronomio 6:6, 7). Feymew inayentuafimi ta Josue, kidu feypi: “Iñche ka tañi pu che, poyeafiyiñ ta Jewba” (Josué 24:15).

TAMI FEMAFEL:

• Pepikawnge ka adkünunge kiñeke kimeltun tañi kelluafiel kake kiñeke tami reñma ñi duamnieel