Fente ñi huesa duamcülen langümfi ñi peñi

Adán engu Eva tripatulu Edén mu, fentren pichiqueche nierpuingu. Ti hunen fotüm Caín pingefui. Nganquefui fillque tucucan ca anümca. Caín ñi inan peñi Abel pingefui, fei cuidaquefui pu ufisa.

Quiñe antü, Caín engu Abel elufingu ta Chau Jehová quiñe chalintucun. Eimi, ¿quimimi chem pifel chalintucun? Tüfa quiñe falin regalo elungequelu ta Chau Dios. Ñi hulün Abel, ayühulfi Chau Jehová, huelu ñi hulün Caín, ayülafi. Fei Caín rume enojaocülefui, feimu Chau Jehová feipieyu: “Amulelmi tami femngechi raquiduamcülen, huesa dungu femaimi”. Huelu Caín allcütulafi ñi feipingen.

Fei Caín feipifi ta Abel: “Amuayu lelfün püle”. Quisulelu engu, Caín lefcontufi tañi peñi, fei langümfi. ¿Chumi Chau Jehová? Castigafi Caín, quechanentufi tañi pu che mu, fei alü camapu amui. Turpu pepi huiñotulayafui.

¿Chem quimeltueiñmu tüfa? Quiñeque mu, cüme tripanole taiñ femün, huesa duamafuiñ. Fei amulele taiñ femngechi raquiduamcülen, cam caquelu che pefile taiñ enojaoquiyahun, mülei taiñ ngüneniehual, fei taiñ tüngcületual. Pürüm femnoliyiñ, taiñ piuque ngünencayafeiñmu, fei huesa dungu femafuiñ.

Abel rume piuqueyefui Chau Jehová ca femquefui cümeque dungu, feimu Chau Jehová rumel loncontucunieyu. Doi mai, huiñoleltuafi tañi mongen tati hue mapu mu.