¿Inei am ta Job?

Uz pingechi mapu mu, mülefui quiñe huentru poyequefilu ta Chau Jehová. Job pingequefui, ülmen huentrungefui ca fütra familia niefui. Cafei, cüme huentrungefui, quelluquefui pu pofre, pu lantu domo ca pu pichiqueche nienolu chau ca ñuque. Cümeque dungu femquefui Job. Feimu, ¿feipipeafuiñ mai ñi rupaquenon huesaque dungu mu?

Job quimlafui tañi adquintuniequeteu Huecüfü. Chau Jehová feipifi tati Huecüfü: “¿Inaduamfimi ñi femquen Job, tañi saquin poyequeteu? Trürlai inei mu no rume mapu mu. Inaniequei iñche tañi feipin ca rume cüme femquei”. Huecüfü huiñoldungui: “Eimi cuñiutucuquefimi, cümelcaquefimi, eluquefimi mapu ca culliñ... Feimu inaniequeimu tami feipin. Com müntüñmafilmi, fei poyehuelayaimu”. Chau Jehová catrütulafi ti Huecüfü ñi femal tañi ayüqueel, ¿chumngelu catrütulafi? Porque maneluucülefui Job mu, ñi fentecünunoal tañi poyeeteu.

Huecüfü fentren dungu mu huesalcafi ta Job. Hune adniefi pu sabeo che ñi hueñeñmayaeteu tañi huaca, toro ca burro. Fei ca lüfconi tañi pu ufisa. Pu caldeo hueñeñmaeyu tañi pu camello. Cafei, layei tañi pu cüdaufe cuidaquefilu tañi pu culliñ. Huelu doyeli cangelu huesa dungu: laingün tañi pu fotüm ca ñahue, ti ruca trañmanacümeyu engün. Job rume hueñancüi, huelu amulei tañi poyefiel Chau Jehová.

Huecüfü doi huesalcayafi ta Job, allfülcafi com tañi cuerpo, ¡rume cutrani! Job quimnolu rume chemu tañi fente cutrancaucülen, amulei ñi poyefiel Chau Jehová. Feimu, Chau Jehová pefilu com ñi cüme femün ta Job, rume ayühui.

Fei hula ti Huecüfü adniefi 3 huentru ñi doi huesalcayafiel ta Job. Feipifingün: “¿Ellcaniepelaimi huesa dungu tami femün? Feimu Chau Dios castigamequeimu”. Job huiñoldungui: “Chem huesa dungu rume femlan”. Huelu raquiduamürpui: “Chau Jehová huesalcamequeneu, norngelai iñche mu”.

Ti hueche huentru Elihú allcütulerquefui ti nütram, huelu chem no rume feipilafui. Fei hula eluhui ñi dungual, feipi: “Com eimün huelulcaleimün. Fente ñi alüpüralen Chau Jehová, adümürpulayafuiñ rume com tañi raquiduam. Chumcaunorume femlayafui huesa dungu. Com quimniei, fei quelluquefi pu che huesa rupamequelu”.

Chau Jehová cafei feipifi ta Job: “Deumalu iñche com tati mülelu, ¿cheu mülefuimi eimi? ¿Chumngelu raquiduamqueimi tañi nor femquenon? Dungumequeimi, huelu cüme quimlaimi chem ñi rupamequen”. Job quimtucui ñi huelulcalen, feimu feipi: “Huelulcahun tañi feipin. Perdonaen. Re allcüntucuquefun eimi mu, huelu feula cüme quimnieyu, com pepiluhun nieimi”.

Femngechi afi tañi cutrancangen Job, püntütripalai Chau Jehová mu cüdaungefulu rume, feimu rume cümelcangei. Chau Jehová tremoltueyu ca doi elungei tañi niequefel cuifi mu. Job fentren tripantu ayühun mongen nietui. ¿Eimi cai? ¿inayentupeafimi mai ta Job? ¿Rumel poyeafimi ta Chau Jehová cüdaungefule rume?