Üicülechi zarza

Moisés 40 tripantu mülenagi Madián mu. Üye mu, niehui quiñe domo engu ca nierpui pichiqueche. Quiñe rupa, petu camañfilu tañi pu ufisa inafül Sinaí huincul mu, pei afmatun dungu. Quiñe zarza üicülefui cütral mu, ¡huelu lüflai! Moisés doi fülcontufi ñi adquintuafiel, fei allcüi quiñe dungun. Feipieyu: “¡Moisés! Felenge. Entunge tami ocota, lif mapu mu müleimi”. Chau Jehová adniefi quiñe cüme püllü ñi dunguaeteu.

Moisés llicai, tacucünufi tañi ange. Fei feipingei: “Pu Israel che rume cutrancaumequeingün. Montulafiñ, entuafiñ Egipto mu, fei adnieafiñ engün ñi mülepual cüme mapu mu. Eimi elfalcünuayu tami entuafiel engün”. ¿Afmatulehuepelai Moisés? ¿Chem pimi?

Moisés feipi: “Ramtungeli ‘¿inei huercüeimu?’, ¿chem pian?”. Chau Dios huiñoldungueyu: “Feipiafimi engün: ‘Chau Jehová huercüeneu, tüfa tati Dios ñi poyequefiel Abrahán, Isaac ca Jacob’”. Moisés feipi: “Feyentunoelimu pu Israel che, ¿chem feman?”. Fei Chau Jehová feipieyu: “Ütrüfnacümfinge tami retrü”. Femlu Moisés, ¡ti retrü filucünuhui! Moisés nüfi ti filu, fei ¡huiño retrüngetui! Femngechi, Chau Jehová pengelfi ta Moisés ñi quelluaeteu, cafei feipieyu: “Femülmi tüfa, pengelcünuaimi Iñche ta huercüeyu”.

Moisés ca feipi: “Cüdautuquen ñi dungual”. Fei Chau Jehová feipicünueyu: “Iñche quimelayu tami chem pial, ca huercülelayu tami peñi Aarón tami quelluaeteu”. Moisés maneluhui Chau Jehová ñi quisucünunoaeteu, feimu amui Egipto tañi familia engün.