Caiñetufingün ta Chau Jehová

Cangelu rupa, petu ñi miyahun pu Israel che huellin mapu mu, Coré, Datán ca Abiram ca caquelu 250 huentru caiñetufingün ta Moisés ca Aarón. Feipingün: “¡Afeluucüleiñ eimu mu! ¿Chumngelu eimi müten loncoleafuimi? ¿Chumngelu cai Aarón müten hunen lonco sacerdotecünungei? Eimu müten fürenelaeimu Chau Jehová, ca femngechi fürenequeiñmu ta iñchiñ”. Chau Jehová ayülafi ñi feipin engün, “iñche ta caiñetumequemun” pi.

Moisés feipifi ta Coré ca tañi pu quelluqueteu: “Apolafimün tamün braserillo incienso mu. Fei, hule cüpalafimün ngillatuhue tolto ruca mu. Chau Jehová pengelaiñmu inei tañi fürenefiel”.

Ca antü, Coré, 250 huentru ca Moisés trahuluhuingün ngillatuhue tolto ruca mu. Eluhingün ñi lüpümafiel incienso, ñi femquen pu sacerdote reque. Fei, Chau Jehová feipifi Moisés ca Aarón: “Püntütripamün Coré mu ca tañi pu huentru mu”.

Coré amui ngillatuhue tolto ruca mu, cheu ñi mülen Moisés, huelu Datán, Abiram ca tañi pu che amulaingün. Feimu Chau Jehová feipifi pu Israel che: “Püntütripamün cheu ñi toltoucülen Coré, Datán ca Abiram”. Fei müchai müten püntütripaingün. Datán, Abiram ca tañi pu che huitralefuingün huecuntu tañi ruca mu. Fei, repente nülarumei ti mapu, fei ifi reque pu caiñetumequelu. Ca ngillatuhue tolto ruca mu, huenu mu nagrumei cütral, fei apümfi ta Coré ca pu 250 huentru.

Fei hula, Chau Jehová feipifi ta Moisés: “Caque quiñeque troquiñche ñi loncolelu cüpalpe ñi retrü. Fei huirintucuaimi caque quiñeque engün tañi üi ñi retrü mu. Huelu Leví tañi retrü mu huirintucuaimi Aarón tañi üi. Fei hula, ponhuitu tolto ruca mu elcünuaimi com pu retrü. Rayüai ñi retrü feichi huentru ñi fürenefiel”.

Ca antü, Moisés entufi com pu retrü ca pengelelfi pu loncolelu. Aarón tañi retrü rayüi ca niefui afülechi almendra. Femngechi Chau Jehová cüme pengelcünui ñi dullifiel ta Aarón ñi hunen lonco sacerdotengeal.