Balaam tañi burra dungui

Pu Israel che deu miyahuingün epe 40 tripantu huellin mapu mu. Deu hueufingün fentren nehuen-ngechi huaria. Tüfachi rupa pu Israel che toltoucülefuingün Moab ñi laf mapu mu, inaltu Jordán leufü mu, tripahue antü püle. Pichi faltalefui ñi conpual engün tati Feipicünuelchi Mapu mu. Tati lonco ülmencülelu Moab mu, Balac pingelu, feipi: “Müntuñmangepelayan tañi mapu”. Feimu llicai ca feipifi ta quiñe huentru, Balaam pingelu, ñi cüpayal Moab mu, fei ñi malisiayafiel pu Israel che.

Huelu Jehová feipifi ta Balaam: “Malisialayafimi pu Israel che”. Feimu Balaam amulai ta Moab. Ti lonco ülmen Balac ca huiño mangelfi, “eluayu chem rume tami ayüel” pifi, huelu Balaam huiño feipieyu ñi amunoal. Fei Chau Dios feipifi: “Amuafuimi, huelu feipiaimi iñche tañi feipin müten”.

Balaam tañi burra mu amui ta Moab, sur püle. Chau Jehová feipifui ta Balaam ñi malisianoafiel pu Israel che, huelu Balaam ayüfui ñi femal. Chau Jehová huercüfi quiñe cüme püllü ñi catrütuafiel ta Balaam, fei 3 rupa peufaluhui rüpü mu. Huelu Balaam tañi burra müten pei, Balaam pepi femlai. Ti hunen rupa, ti burra famtripai ti rüpü mu, fei coni lelfün mu. Feimu Balaam hulelcaeyu quiñe mamüll mu. Ti epuchi rupa, ti burra fülmafi quiñe cura malal, fei ngütraltucufi Balaam tañi namun, feimu ca huiño hulelcaeyu. Fei hula, ti burra ca pichi trecai, fei huiño pefilu ti cüme püllü trananacümuhui, fei ca huiño hulelcangei.

Fei hula, Chau Jehová elufi ñi dungual tati burra. Fei, ti burra ramtufi ta Balaam: “¿Chumngelu hulelcaen?”. Balaam huiñoldungui: “Quiñe hueluduam reque femcünuen. Niefuli quiñe cuchillo, langümafeyu”. Ti burra feipifi: “Fentren tripantu yeniequeyu. Fei, ¿quiñeque mu huesa femquefeyu am?”.

Fei Balaam elungei ñi peafiel ti cüme püllü ca feipingei: “Chau Jehová feipieimu tami malisianoafiel pu Israel che”. Balaam huiñoldungui: “Huesa femün. Amutuan tañi ruca mu”. Huelu ti cüme püllü feipi: “Amunge müten ta Moab, huelu feipiaimi Chau Dios tañi feipin müten”.

Balaam, ¿quimtucupei mai chem tañi huesa femmequen, fei tañi huiño huelulcaunoal? ¿Chem pimi? Femlai, 3 rupa mu ca huiño eluhui ñi malisiayafiel pu Israel che. Huelu pepi femlai, Chau Jehová elufi ñi cümelcayafiel müten pu Israel che. ¿Ca chem rupai hula? Pu Israel che lefcontufingün ta Moab, fei Balaam lai. Balaam inafule ñi feipieteu Chau Jehová, doi cümeafui, ¿felei? Felei llemai.