Chau Jehová dullifi ta Josué

Fentren tripantu mu Moisés adniefi pu Israel che, huelu epe puucülefui tañi layal. Fei Chau Jehová feipieyu: “Eimi adnielayafimi pu Israel che ñi conpual tati Feipicünuelchi Mapu mu. Huelu eluayu tami adquintuafiel ti mapu”. Moisés feipifi ta Chau Jehová: “Loncocünuafimi quiñe huentru, fei ñi cuñiutucuafiel tüfachi troquiñche”. Fei Chau Jehová feipi: “Feipiafimi ta Josué, iñche dullicünufiñ”.

Moisés feipifi pu Israel che: “Pichilehuei tañi mongen. Feimu Chau Jehová dullifi ta Josué tamün adnieaeteu ti Feipicünuelchi Mapu mu”. Fei Moisés feipifi ta Josué: “Llicalayaimi. Chau Jehová quelluaimu”. Fei hula, Moisés pürai Nebo huincul mu. Fei Chau Jehová pengelelfi ti mapu ñi feipicünufiel ta Abrahán, Isaac ca Jacob. Moisés niefui 120 tripantu feichi mu tañi lan.

Chau Jehová feipifi ta Josué: “Rumeaimi Jordán leufü mu, fei conpuaimi Canaán mu. Iñche quelluayu chumngechi quellufiñ Moisés. Fill antü papeltuaimi tati ley ñi elufiel ta Moisés. Llicalayaimi, mülei tami nehuen piuquengeal. Amuaimi, fei femaimi com tañi feipin iñche”.

Josué huercüfi 2 huentru ñi ngüneduamafiel Jericó. Cüpalechi quimeltun mu doi quimaiñ chem rupai üyeu. Huelu huiñotulu engu, feipipaingu: “Feula cümeafui taiñ conal Canaán mu”. Ca antü mu, Josué feipi: “Pepicaumün, amuaiñ”. Hune amuingün pu sacerdote yenielu ti falin caja pengelquelu Chau Dios ñi eldungu. Ti leufü yeniefui fentren co, huelu hue conpulu müten pu sacerdote co mu, arcüi ti leufü. Fei trecalen rupaingün ti arcüchi leufü mu. Huitracünuhuingün rangiñ arcüchi leufü mu, fei ñi rumeal com pu Israel che. Rupalu tüfachi afmatun dungu, ¿acordapeingün mai ñi rupan Quelü lafquen mu?

Fentren tripantu rupai, huelu feula pu Israel che puhuingün tati Feipicünuelchi Mapu mu. Üye mu, deumaingün quisuque tañi ruca ca fillque huaria. Cüdahuingün ti mapu, tañi huerta ca anüm ofad. Feichi cüme mapu mu mülefui lichi ca miel.