Jonatán llicalai ca cüme hueni tati

Saúl ñi hunen fotüm Jonatán pingefui, llicaquelafui ñi hueichayal. David feipi “ti ñamcu matu amuquei, huelu Jonatán doi matu amuquei” ca ñi doi nehuen-ngen ta trapial mu. Quiñe antü Jonatán pefi quiñeque Filistea hueichafe huincul mu miyaulu. Feimu feipifi tañi compañ yenielu tañi escudo: “Lefcontuafiyu feipielimu Chau Jehová. Pu Filistea huentru feipile: ‘Pürapamu’, hueichameafiyu”. Fei pu Filistea hueichafe nehuentu feipingün: “¡Pürapamu taiñ hueichayal!”. Fei Jonatán ca tañi compañ hueumefingu 20 hueichafe.

Jonatán hunelefui Saúl tañi pu fotüm mu. Feimu lale tañi chau, mülefui ñi lonco ülmen-ngeal. Huelu Jonatán quimniefui Chau Jehová ñi dullifiel ta David, feingelu rume, ütrirlafi. Doi mai, cüme hueniyehuingu. Feipicünuhuingu ñi hueluconque quelluhual ca cuñiutucuhual. Tañi cüme hueningen mu, Jonatán elufi ta David tañi tacun, tañi fütra cuchillo, tañi arco ca tañi trarihue.

Lefmaulu David, Jonatán pemefi ca feipifi: “Yafüluhuaimi ca nehuen piuquengeaimi. Eimi dullieimu Chau Jehová tami lonco ülmen-ngeal. Tañi chau cüme quimniei”. ¿Eimi cai? ¿Ayüafuimi fente cüme hueni nieal?

Cuñihun-ngefulu rume, Jonatán fentren rupa quellufi tañi hueni. Quimniefui tañi chau ñi cüpa langümfiel ta David, feimu feipifi: “Langümfilmi ta David, culpayaimi. Chem huesa dungu no rume femlai”. Saúl rume illcutufi ta Jonatán. Quiñeque tripantu rupalu, hueichan mu laingu Saúl ca Jonatán.

Lalu Jonatán, David quintufi ta Mefibóset, Jonatán ñi fotüm. Pefilu, feipifi: “Tami chau rume cüme hueniyeneu, feimu com tami mongen mu cuñiutucuayu. Tañi fütra ruca mu müleaimi, fei quiñentrür tañi mesa mu iyayu”. David piuquentucuniefi tañi hueni Jonatán.