Ti lonco ülmen David culpai

Lalu Saúl, David niefui 30 tripantu, fei lonco ülmen-ngerpui. Rupai quiñeque tripantu, fei punlu quiñe antü, huente tañi ülmen ruca mu, David adquintufi quiñe adngechi domo. Fei hula quimürpui ñi ineingen, Bat-Seba pingefui ca fütayefi quiñe hueichafe Urías pingelu. David mütrümfalfi Bat-Seba, cudumuhuingu, fei niepüñeñi. David ayüfui ñi quimngenoal tañi huesa femün. Feimu feipifi tati loncolelu pu hueichafe mu: “Hunentucuafimi ta Urías hueichan mu, fei quisucünuafimün”. Feichi mu lai Urías, fei David niefi ta Bat-Seba.

Huelu Chau Jehová adquintufi com ti huesa dungu ñi rupan. ¿Chumi cai? Huercüfi ti profeta Natán ñi pemeafiel ta David. Natán feipifi: “Quiñe ülmen huentru niefui fentren ufisa, huelu quiñe pofre huentru quiñe saquin ufisha müten niefui. Fei ti ülmen huentru müntuñmaeyu ñi quiñen ufisha”. David rume huesa duami, fei feipi: “¡Langümngepe ti ülmen huentru!”. Feimu Natán feipi: “¡Eimi ta feichi huentru!”. David rume hueñancüi ca feipifi Natán: “Culpan Chau Jehová ñi adquiñ mu”. Feichi huesa dungu rume huesalcafi ta David ca tañi familia. Chau Jehová castigafi ta David, huelu David ñom piuquengefui ca rüf piuque mu entudungui, feimu langümngelai.

David ayüniefui deumayal quiñe ruca ñi poyengeal ta Chau Jehová. Huelu Chau Jehová dullifi David tañi fotüm, Salomón, ñi deumayafiel. Fei David eluhui ñi pepicayal itrofill dungu ñi quelluafiel ta Salomón, ca feipi: “Chau Jehová ñi ruca mülei ñi rume afmatufalngeal. Petu huechengei Salomón, feimu pepicayafiñ com dungu ñi quelluafiel”. David huli fentren plata ñi deumangeal ti ruca. Quintufi adümuhun cüdaufe, trapümfi oro ca plata, ca ngülümi fentren cedro mamüll Tiro ca Sidón mu cüpalu. Epe puulu ñi layal David, elufi ta Salomón ti dibujo pengelquelu chumngechi ñi deumangeal ti ruca, ca feipifi: “Chau Jehová quimeleneu tüfa ñi huirintucuafiel, fei tami eluafiel. Chau Jehová quelluaimu. Llicalayaimi. Yafüluhuaimi, fei femaimi ti cüdau”.