14 KIMELTUN

Küme pengelnge ti doy falinke dungu tami wewpin mu

Ebrew 8:⁠1

DUAMFALI TAMI KIMAL: Kellufinge pu allkütukelu ñi küme adümal kom tami wewpikeel. Kimfalkünunge chem wewpimekeymi, chumngelu (chemu) ka chuchi am tati doy falinke dungu. Ka pengelnge chumngechi nüwküley kom tüfa.

CHUMAFUYMI

Longkontukunienge chumal am wewpiaymi. Ramtuwnge: “Tañi wewpin mu, ¿küpa kimeldungufiñ pu allkütukelu, küpa norümfiñ ñi rakiduam kam küpa yafültukufiñ engün?”. Fey femngechi adkünufinge tami wewpin. Ti doy falinke dungu tami feypial, müley tami kelluaetew ñi femngechi tripayal tüfa.

Kafey rakiduamnge: “¿Chem ramtuwafuy pu allkütukelu? Wiñoldungungele, ¿ka chem ramtuwafuy?”. Fey femngechi adkünunge chem ñi ngüneduamngeal tami wewpin mu. Tüfa kelluafi pu allkütukelu ñi adümafiel ka küme llowafiel.
Küme pengelnge chem küpa kimeltuymi. Petu tami wewpimeken, wiño feypiafuymi kiñeke dungun pengelkelu chem küpa kimeltuymi tami wewpin mu.
Kimfalngepe ti doy falinke dungu. Küme dullinge chem falinke dungu tami feypial. Fey wewpinge tüfa ti elkünungeelchi tiempo mu ka nüwkülepe ti kimeltun mu. Fentren falinke dungu ngüneduamlayaymi ka küme kimfalkünunge kiduke tüfa. Petu tami rupanon kangelu falin dungu mu, ñüküfküleweafuymi, fey pichiñma mu feypiafuymi chem ngüneduamaymi fewla.

Ella konle tami wewpin, feypiafuymi chem doy falinke dungu kimeltuaymi. Femngechi pu allkütukelu adümafi tüfa petu tami wewpimeken. Kam epe afle tami wewpin, wiño feypiafuymi tati doy falinke dungu, fey pu che doy longkontukunieweafi.