Eluunge tami femürpual tami ayünieel ñi püramyeafiel Chau Dios
QUIÑE che quimnole chem ñi chumal mongen mu, ñamquiyauquei. Feimu rume falin-ngei taiñ quimal chem dungu ayüqueiñ taiñ femürpual mongen mu.
Biblia mu mülei fillque che eluulu ñi femürpual tañi ayüqueel mongen mu. Por ejemplo, Noé cüdahui 50 tripantu ñi deumayal “quiñe huampo ruca ñi montulafiel tañi pu che”. Cafei Chau Ngünechen ñi huerquen Moisés pingelu “müna üngümniequefui llohual tañi cullitu” (Hebreos 11:7, 26). Ca lalu hula Moisés, Chau Dios elfalcünufi ta Josué ñi nüafiel Canaán pingechi mapu (Deuteronomio 3:21, 22, 28; Josué 12:7-24).
Jesús feipi “tati cümeque dungu Chau Dios ñi ngünenietual ta mapu amuldungungeai huall mapu püle”. Jesús tañi feipin yafültucueyu Pablo ñi doi cüdahuelafiel ta Jehová (Mateo 24:14). Hunen siglo mu, Jesús tañi feipin ca tati afmatun dungu ñi pengelelngeel ta Pablo, rume nehuentucueyu Pablo. Cafei elfalcünungei ‘ñi huldungual Jesús mu pu catripanche’. Pablo ñi cüdau quelluntucui ñi müleal fillque trahunche Asia Menor ca Europa mu (Hechos 9:15; Colosenses 1:23).
Chau Jehová ñi pu che rumel eluhui ñi femürpual cümeque dungu, femngechi ñi doi püramyeafiel ta Jehová. Famülque mu, ¿chumngechi eluhuafuiñ taiñ doi cüdahuelafiel Jehová? ¿Chem dungu cümeafui taiñ femürpual? Ca, ¿chumngechi femafuiñ? Peafiyiñ.
Ngüneduamaiñ chem mülei taiñ piuque mu
Fentren dungu eluhuafuiñ taiñ nieal mongen mu. Huall mapu mu pu che eluuquei ñi nieal fentren plata ca autoridad. Huelu ayüliyiñ nieal femngechi dungu, cümelayafui. Doi mai eluucülequeiñ ñi femal fillque dungu, fei ñi püramyeafiel ta Jehová ca ñi quelluntucuafiel ta Chau Dios tañi ngünenietual mapu (Mateo 6:33). Femngechi femqueiñ fente taiñ piuqueyeniefiel Chau Dios ca tati pu che. Ca femqueiñ taiñ serfiafiel Chau Dios com piuque mu (Mateo 22:37-39; 1 Timoteo 4:7).
Taiñ nieal doi cüdau Chau Dios tañi troquiñche mu ca taiñ doi cüme cristianongeal, hune ngüneduamaiñ taiñ piuque, femngechi cüme duam mu femaiñ. Huelu ayüliyiñ rume taiñ femal fillque dungu, quiñeque mu femlayafuiñ. Fei taiñ doi quelluntucual Chau Jehová ñi troquiñche, ¿chumafuiñ?
Com piuque mu femaiñ taiñ ayünieel
Peafiyiñ chumngechi Jehová deumai ti fütra huenu. Chau Jehová feipilu: “Mületui nagantü ca pulihuen”, pengeli ñi rupan quiñe antü ñi deumangen (Génesis 1:5, 8, 13, 19, 23, 31). Ellaconlu quisuque antü, Chau Jehová deu quimniefui chem ñi chumal, femngechi deumai com ñi ayüel (Apocalipsis 4:11). Cuifi quiñe huentru Job pingelu feipi Chau Jehová ayünielu femal quiñe dungu, femquei tati (Job 23:13). “Chau Ngünechen pefilu com tañi deumael, rume cümelcalei pi”, ¿cüme duamcülepelai? (Génesis 1:31).
Com piuque mu ayüliyiñ doi cüdahuelafiel Jehová, fei ta quelluaeiñmu taiñ femal chem taiñ ayüel. ¿Chumngechi femafuiñ tüfa? Ellaca mu ti mapu cüme ad nielafui ca huellilefui, huelu Jehová tañi raquiduam mu deu quimniefui chem ad ñi ngeafel. Fente ñi cüme adngen ti mapu, Chau Dios püramyengeafui. Ca femngechi iñchiñ raquiduamliyiñ chum tripayai taiñ ayünieel ca chem cümelcan llohuafuiñ, doi eluhuaiñ taiñ femürpuafiel taiñ ayünieel. Peafiyiñ ñi rupan quiñe hueche 19 tripantu nielu Tony pingelu. Turpu ngoimalai ti hunen rupa ñi amun quiñe Betel ruca Europa mapu mu. Tony ramtuuquefui “¿chum duamcüleafun müleli ca cüdauli Betel mu?”. Raquiduamtucuniefui ñi müleal Betel mu, feimu eluhui ñi doi cüdahual ñi femürpual. Rupalu chi tripantu mangelngei ñi cüdahual Betel mu ca rume ayühui ñi piuque.
Taiñ quiñentrür müleal pu che deu huechurpulu ñi ayünieel yafültucuafeiñmu taiñ ca femürpual taiñ ayünieel. Jayson nielu 30 tripantu nütramcai ñi ayünon amuldungual petu ñi huechengen, huelu tripalu colegio mu precursor regularngerpui. ¿Chem quellueyu? Fei feipi: “Nütramcayal pu precursor engün ca amuldungual fei engün mu quellueneu ñi cüme elcünutual ñi raquiduam”.
Huirintucuaiñ chem taiñ ayünieel
Huirintuculiyiñ cam feipiliyiñ chem taiñ raquiduamqueel, doi cüdaungelayai taiñ femal. Salomón huirintucui ti cümeque feipin quelluafeiñmu ca yafültucuafeiñmu taiñ cüme yenieal taiñ mongen (Eclesiastés 12:11). Huirintuculiyiñ taiñ raquiduam, piuquentucuafiyiñ ca raquiduamtucuafiyiñ taiñ ayünieel. Feimu Jehová huercüfi Israel ñi pu lonco ülmen ñi quisutu huirintucufiel chem ñi feipin Moisés ñi ley (Deuteronomio 17:18). Cümeafui taiñ huirintucual chem taiñ ayünieel ca chumngechi femürpuaiñ. Ca huirintucuafuiñ chem dungu catrütuafeiñmu ca chumngechi chaftuafuiñ. Cafei cümeafui ngüneduamal chem mülei taiñ chillcatual, chem adümuhun duamnieafuiñ ca inei quelluafeiñmu.
Quiñe peñi Geoffrey pingelu precursor especialngelu, fentren tripantu yeniei ñi amuldungun Asia troquiñ mapu mu. Tañi domo larumei ¡müna huesa! Rupalu chi antü, rume quellueyu ñi raquiduamal chem dungu ayüquei ñi femal. Fei eluhui ñi femürpual quiñeque dungu, femngechi ñi doyümnieafiel ti amuldungun cüdau tañi mongen mu. Huirintucui chem dungu ayüniefui ñi femal ca llellipufi ta Chau Jehová tañi quelluaeteu, fei eluhui ñi peal 3 che ayülu ñi chillcatual Biblia feichi cüyen mu. Fill antü ngüneduamquefui chem ñi femün amuldungun mu. Cafei rupalu 10 antü ngüneduamquefui chum amulei ñi amuldungun cüdau. ¿Chum tripai ñi femün? Meli che eluhuingün ñi chillcatual Biblia. ¡Müna cüme tripai!
Ñochiquechi femürpuaiñ fütraque dungu
Quiñeque dungu taiñ ayüqueel “turpu femlayafun” piafuiñ. Femngechi rupai ta Tony, taiñ deu nütramcapeel. Fei “turpu cüdaulayan Betel mu” raquiduamquefui. ¿Chumngelu? Huesa mongen yeniequefui ca petu hultucuquelafui ñi mongen Chau Dios mu. Huelu Tony eluhui ñi inayafiel Chau Jehová ñi ngülam. Cafei cüme elcünutui ñi mongen ñi fautizahual. Deu fautizaulu, eluhui tañi precursor auxiliarngeal, fei hula precursor regularngerpui. Ñi femal tüfa marcacünui calendario mu chumül ñi femal. Deu precursorngelu, quimtucui ñi femürpuafel tañi ayüqueel: cüdahual Betel mu.
Ca femngechi, ayüliyiñ taiñ femal fütraque dungu cüpalechi antü mu, hune raquiduamaiñ chem pichique dungu femafuiñ. Femal tüfa quelluaeiñmu ñi ñochiquechi femürpual ti fütra dungu taiñ ayünieel. Fill antü ngüneduamliyiñ taiñ femün, quelluaiñmu taiñ cüdaucüleal ñi femürpual taiñ ayünieel. Ca quiñe dungu quelluaeiñmu, llellipunieafiel Jehová taiñ ayünieelchi dungu. Feimu ti apostol Pablo feipieiñmu “llellipulequeaimün” (1 Tesalonicenses 5:17).
Yafüluhuaiñ ca amuleaiñ taiñ cüdahual
Cüme pepicauliyiñ rume taiñ femal quiñe dungu com taiñ piuque mu, quiñeque mu femlayafuiñ. Raquiduamnge ñi rupan Juan Marcos. Tati epuchi rupa Pablo ñi amuldunguyauquefel fill mapu mu, pilai ñi compañaeteu Juan Marcos. Feimu, ¿rume hueñancüpelai Marcos? (Hechos 15:37-40). Marcos mülefui ñi entual quiñeque quimeltun tañi rupan mu ca raquiduamal cangelu dungu tañi femal, femngechi tañi doi cüdahuelafiel Chau Dios. Fei, ¿femngechi fempelai? Mai, rupalu chi tripantu, Pablo cüme dungui Marcos mu. Fei Marcos quiñentrur cüdahui Pedro engu Babilonia mu (2 Timoteo 4:11; 1 Pedro 5:13). Cafei Marcos elungei quiñe falin cüdau, Chau Jehová adnieyu ñi huirintucual Jesús tañi mongen mu ca tañi amuldungun.
Iñchiñ yafüluuliyiñ rume taiñ femal taiñ ayünieel, rupayafuiñ cüdaungechi dungu. Huelu afeluulayaiñ, doi mai ngüneduamaiñ chem taiñ femürpuel, raquiduamaiñ cangelu dungu taiñ femal ca cüme elcünutuaiñ chem rume duamfalngele. Feimu mülele cüdaungechi dungu, yafüluhuaiñ ca amuleaiñ taiñ cüdahual fei taiñ chaftuafiel. Ti quim lonco ülmen Salomón feipi: “Jehová meu elcünuaimi com tami femquen, fei cüme tripayai tami pepicacünuel” (Proverbios 16:3).
Huelu quiñeque mu femlayafuiñ taiñ ayünieel. Por ejemplo, cutranrumeafuiñ cam cambiayafui chem ñi duamnieel taiñ familia. Huelu loncontucuaiñ, tati doi cüme dungu taiñ femürpual fei taiñ nieal rumel mongen mapu mu cam huenu meu (Lucas 23:43; Filipenses 3:13, 14). ¿Chumafuiñ taiñ nieal rumel mongen? Ti apostol Juan huirintucui: “Tati femquelu Chau Ngünechen ñi ayünieel rumel mongeleai” (1 Juan 2:17). Femürpunoliyiñ rume chem taiñ ayünieel, ‘rume yamnieafiyiñ tati rüfngechi Ngünechen ca inanieafiyiñ tañi huercün dungu’ (Eclesiastés 12:13). Eluuliyiñ taiñ cüdahual Jehová ñi troquiñche mu, quelluaeiñmu taiñ femal Chau Dios ñi ayüqueel. Feimu eluhuaiñ taiñ doi cüdahuelafiel Chau Jehová, femngechi püramyeafiyiñ.
[Huichulechi dungu]
Cümeque dungu taiñ femürpual
○ Fill antü papeltuaiñ Biblia
○ Tripale Ti Huerquen ca ¡Tami quimafel!, com papeltuafiyiñ
○ Doi cüme entuaiñ taiñ llellipun
○ Eluhuaiñ taiñ adnieaeteu Chau Dios ñi nehuen taiñ doi cüme chengeal
○ Doi amuldunguaiñ
○ Cüme pepicaucüleaiñ taiñ amuldungual ca quimeltucheal
○ Eluhuaiñ taiñ cüme amuldungual telefono mu, negocio ca cheu rume taiñ miyahun