Pu domo, ¿chumngelu mülei ñi yamnieafiel tañi füta ñi loncolen?
“Ti huentru loncolei ti domo meu” (1 COR. 11:3).
1, 2. 1) Chumngechi ñi feipin Pablo, ¿chem falin dungu adcünui Jehová? 2) ¿Chem ramtun lloudunguaiñ tüfachi troquiñ mu?
APOSTOL Pablo feipi “Cristo loncolei com pu huentru meu”, ca femngechi “Chau Ngünechen loncolei Cristo mu”. Fei tüfa Jehová tañi adcünuel (1 Cor. 11:3). Jesús ayühun mu eluucülei ngünenieaeteu tañi Chau Jehová. Ca femngechi pu huentru mülei ñi yamnieafiel Jesús ñi loncolen. Chumngechi ñi femquefel Jesús tati pu che, ca femngechi pu huentru mülei ñi cüme duamelafiel caquelu che, cüme dunguafiel ca cutranpiuqueyeafiel, doyelchi mai tañi domo.
2 ¿Tati pu domo mu cai? ¿Inei loncolei? Pablo feipi ti huentru loncolei quisu tañi domo meu. ¿Chem piafui cai quiñe cristiana domo? Tañi huentru poyenofile cai Ngünechen, ¿mülepei mai tañi yamnieafiel? Ti domo ñi yamniefiel mu ñi füta, ¿feipipei mai ñi turpu dungunoal mülele quiñe falin dungu curehuen mu? ¿Ca chem femafui quiñe domo tañi doi poyenieaeteu tañi huentru?
‘Deumalelafiñ quiñe compañ’
3, 4. Pu curehuen, ¿chumngechi quelluqueyu Jehová ñi adcünuelchi dungu?
3 Jehová llemai feipicünui huentru ñi loncoleal tañi domo meu. Deu deumafilu Adán, Jehová feipi: ‘Cümelai tañi quisuleal ta huentru. Deumalelafiñ quiñe compañ tañi quelluaeteu’. Fei deumafi Eva. Adán rume ayühui elungeel tañi compañ, feimu feipi: “¡Fei tüfaque ta iñche ñi calül niei ca iñche ñi foro niei!” (Gén. 2:18-24). Femngechi tüfachi epu che elungei quiñe rume cüme duam: ñi chauyeafiel fentren culpan-ngenochi che, fei tañi rumel mongeleal tüfachi Mapu mu.
4 Huelu mai huelulcahuingu Dios mu, feimu elungehuetulai tañi nieafel rumel mongen (papeltunge Romanos 5:12). Femlu rume, Jehová cacünutulai tañi raquiduam: loncoleal ti huentru tañi domo meu. Feula ca femngechi felei. Quiñe huentru cüme loncolele tañi ruca mu ca ti domo yamniefile tañi huentru, ayüucüleai tañi mongen meu engu. Quiñe curehuen rume ayüucüleafui Jesús reque, quisu rume ayüucülefui ñi ngünenieteu Jehová (Prov. 8:30). Mai, tañi culpan mu ti huentru quiñeque mu cüme loncolelayafui ca tati domo cüdautuafui tañi yamnieaeteu. Huelu mai tati curehuen yafüluule, nieafuingu ayühun mongen culpan chengefule rume.
5. ¿Chumngelu pu curehuen mülei ñi inayal Romanos 12:10 ñi ngülam?
5 Ayüucüleal pu curehuen, rume falin-ngei ñi inayal tüfachi ngülam: “Piuqueyehuaimün chumngechi piuqueyeuquei ta peñihuen. Huneleaimün tamün huelucontu yamuhual” (Rom. 12:10). Ca femngechi cümeafui tañi inayafiel engu tüfachi cangelu ngülam: “Hueluquentu fürenehuaimün, duamtuniehuaimün, cutranpiuqueyehuaimün, ca hueluquentu perdonahuaimün com piuque mu” (Efes. 4:32).
Tañi huentru poyenofile ta Jehová, ¿chumafui ti domo?
6, 7. Quiñe cristiana yamniefile ñi füta poyenofilu ta Jehová, ¿chem rupayafui?
6 Quiñeque curehuen mu, ti domo müten poyequefi ta Jehová. Femngechi dungu mu rupamequele quiñe domo, ¿ca mülefui ñi yamnieafiel tañi füta? Biblia feipi: “Eimün pu domo, eluucülemün tamün ngünenieaeteu tamün füta. Femngechi quiñeque engün inanofile Chau Dios ñi dungu, quelluafimün tañi feyentual engün. Huelu tamün dungufiel no, tamün cümeque femün mu llemai, tañi pefiel engün tamün cüme miyahun ca tamün rume yamquefiel engün” (1 Ped. 3:1, 2).
7 Biblia feipi ti domo yamnieafiel tañi huentru poyenofile rume ta Jehová. Femngechi femle ti domo, ¿chem rupayafui? Tañi huentru afmatuafui tañi cüme femquen, fei eluhuafui tañi estudiayal Biblia, ca femngechi feyenturpuafui Jehová mu.
8, 9. Ti cristiana lladcütueliyu ñi füta, ¿chem mülefui ñi femal?
8 Huelu mai ti huentru turpu pinole ñi poyeafiel Jehová, ¿chumafui ti domo? Biblia ngülamtuquefi ti domo ñi cüme piuque mu poyenieafiel tañi huentru cüdaungefule rume. Biblia ca pengeli tati nielu piuqueyechen lladcüfemquelai (1 Cor. 13:4). Feimu tati domo poyeniepe tañi füta ca ñi pürüm illcufemnoal (Efes. 4:2). Dios tañi nehuen müten, feita quelluaeyu tañi femngechi quim domongeal.
9 Pablo huirintucui: “Itrofill dungu mu yafüluucülequen Chau Ngünechen ñi duam mu, fei eluqueneu nehuen” (Filip. 4:13). Ca femngechi Chau Dios tañi nehuen quelluaeyu ti cristiana quisu tañi pepilnoafel. Quiñe dungu: tami huentru lladcütuelmu, eimi ca femngechi lladcütuafiñ piafuimi. Huelu Biblia feipi: “Huesa femngelmün, huiñoleltulayaimün huesa femün. [...] Chau Ngünechen ñi huirintucuel feipilei: ‘“Iñche mülei ñi cutrancayafiel engün. Huiñoleltuafiñ tunte tañi huesa femün” pi Chau Jehová’” (Rom. 12:17-19). Ca ngülamtuqueiñmu: “Cuñiutuculemün, inei no rume ngelai ñi huesalcayafiel feiti tañi huesa femeteu. Doi mai yafüluhuaimün tamün hueluconque cümelcaniehual ca cümelcayafiel caquelu che” (1 Tes. 5:15). Rüfcünu, Jehová tañi nehuen müten ñochi duamelafeyu ti domo, fei ñi huiñoleltunoafiel tañi füta ñi huesa pieteu cam ñi huesa femeteu. Feimu rume falintufali ngillatuafiel Dios ñi nehuen.
10. Feichi huesa pingen ca huesa femngen Jesús, ¿chem pi?
10 Inayentufali Jesús tañi femün huesa pingen ca huesa femngen mu. Biblia feipi: “Huesa pimequengelu, huiñoldungulai huesaque pin mu. Petu cutrancaumequelu, aneltulafi engün, doi mai elcünui ñi dungu tati nor juzgachequelu ñi cuhu meu” (1 Ped. 2:23). Biblia ngülamtuqueiñmu inaquintunieafiel Jesús tañi femün, femngechi huesa pinoafiel taiñ huesalcaqueteu, doi mai taiñ ñom piuquengeal ca cutranpiuqueyecheal (1 Ped. 3:8, 9).
¿Coneltupelayafui mai ñi dunguconal pu domo?
11. Jehová, ¿chem falin cüdau elufi fentrenque domo?
11 Ti huentru loncolelu am ti familia mu, ¿coneltuquilpe ti domo piafuiñ? Femlai. Jehová ca femngechi elufi ti domo ñi coneltual. Cafei Jehová eluquefi falinque cüdau huentru ca domo. Raquiduamnge Jehová ñi dullifiel fentrenque domo tañi coneltual tati 144.000, fei ñi ngüneleal Cristo engün (Gál. 3:26-29). Femngechi quimfalcülei Jehová ñi falintuquefiel pu domo, feimu eluquefi falinque cüdau.
12, 13. ¿Chumngelu feipiafuiñ ñi profetizaquefel quiñeque domo?
12 Biblia pengeli cuifi mu quiñeque domo profetizaquefui, feipiquefui Ngünechen tañi huercüeteuchi dungu. Ñi feipin ti lifru Joel, Jehová feipicünui: “Eluafiñ tañi nehuen ta com che. Fei tamün pu fotüm ca pu ñahue dunguaingün iñche tañi huercüfielchi dungu, […] ca eluafiñ tañi nehuen feichi pu illam huentru ca pu illam domo tañi cüdahuelqueteu” (Joel 2:28, 29).
13 Feichi Pentecostés 33 tripantu, trahuluhui 120 discipulo quiñe ruca Jerusalén meu. Fei mu mülerquefui huentru ca domo. Femngechi, Jehová com engün elufi ñi nehuen. Fei Pedro ngüneduami feichi antü ñi femtripan Joel tañi feipicünuel, feimu feipi: “Doi mai, femtripamequei chumngechi ñi feipin Joel, Chau Ngünechen ñi huerquen. Feipi: ‘“Afchi antü meu hulan tañi nehuen itrofill che meu” pi Chau Ngünechen. “Tamün pu fotüm ca tamün pu ñahue huldunguaingün Chau Ngünechen ñi quimelün dungu. Tamün huechequeche afmatun dungu peaingün, ca tamün füchaqueche peumayaingün. Feichi antü pu huentru ca domo ñi cüdahuelqueteu, eluafiñ tañi nehuen, fei huldunguaingün iñche ñi feipicünuel”’” (Hech. 2:16-18).
14. Pu apostol ñi antü mu, ¿chumngechi quelluntucuingün tati pu domo?
14 Pu apostol ñi antü mu, pu domo rume cüdauquefuingün tañi amuldungucheal Chau Dios ñi cümeque dungu ca quelluntucuingün duamfalchi cüdau mu (Luc. 8:1-3). Pablo huirintuculelfilu pu romano, üitufi ta Febe ñi rume quellufiel cüdau trahunche mu. Ca femngechi lemoria pifi fentren domo trahunche mu. Fei üitufi Trifena ca Trifosa, feipi ñi rume quelluntucufiel Jehová ñi dungu mu. Ca huercülfi lemoria ta Pérsida tañi nehuentu cüdahun mu (Rom. 16:1, 12).
15. Famülque mu, ¿chumngechi quelluntucuquei tati pu domo?
15 Famülque mu, fentren pu amuldunguquelu domongeingün (Mat. 24:14). Fentren hunelequei amuldungun mu, misionerangeingün ca betelita. Huechutriparpui David tañi feipin: “Jehová feipi quiñe huercün dungu. Quiñe fütra troquiñ hueichafe reque, fentren-ngei pu domo huldunguquelu cümeque dungu” (Sal. 68:11). Jehová rume falintuquei tañi femqueel tati pu domo ñi amuldungual ca quellual ñi femtripayal ñi ayüqueelchi dungu. Tüfa pengelqueiñmu: tañi füta loncolefui rume, tüfa feipilai tañi coneltunoal chem dungu mu no rume.
Tachi epu domo, ¿chumngechi cüme entui tañi raquiduam?
16, 17. ¿Chumngechi pengeli Sara ñi dunguconal pu domo?
16 Jehová rume falintuquefilu tati domo, ca ti füta mülei tañi ca femngechi femal. Petu ñi femnon falinque dungu, cümeafui ti huentru ñi ramtuafiel tañi domo. Biblia pengeli quiñeque domo ñi dunguconün ca ñi quelluntucun fei ñi feipinoeteu rume tañi füta. Peafiyiñ epu domo tañi rupan.
17 Sara feipifi ñi füta tañi huemünentuafiel tañi cangelu domo ca tañi püñeñ fente tañi illamcamequeteu. Abrahán huesa duamelfeyu rume tañi feipieteu, Ngünechen calefui ñi raquiduam, feimu feipifi Jehová ta Abrahán: “Ngelai tami hueñancüluhual tati pichi huentru meu, ca tami cüdahuelqueteuchi domo meu. Femaimi itrocom tami feipieteu ta Sara” (Gén. 21:8-12). Abrahán feyentufi Chau Jehová tañi feipin ca femi Sara tañi ayüqueel.
18. ¿Chem chumi ta Abigaíl feipinofiel mu rume tañi füta?
18 Nütramcayaiñ ñi femün Abigaíl, Nabal tañi domo. David lefmauquiyaulu Saúl mu, mülenagpui inafül Nabal ñi quechan ufisa mu. David quellueyu ñi camañnieafiel tati pu ufisa, huelu cofralai quiñe ufisa no rume. Huelu Nabal rume huesa chengefui, feimu David huercülu ñi eluaeteu iyael, quisu pilai ca huesa pifi tati huerquen. Quiñe re huesa huedhuedngefui. Abigaíl quimlu chem ñi chumün Nabal, ¿chem chumi? Quimnon mu rume tañi füta, nüi cofque, pulcu, ufisa ca fentren iyael, fei yelelfi ta David. ¿Ayüi Jehová tañi femün ta Abigaíl? Ayüi llemai. Biblia pengeli Jehová langümfi ta Nabal. Rupachi antü, Abigaíl niehui David engu (1 Sam. 25:3, 14-19, 23-25, 38-42).
Saquifalngechi pu domo
19, 20. ¿Chumngelu saquifalngei tati pu domo?
19 Biblia mu falintungequei ca saquingequei pu domo ñi femquen Jehová tañi ayüqueel, feimu ti lifru Proverbios feipi: “Quiñe cüme puhulfalchi domo, ¿inei am peafui? Quisu ta doi fali tati llancatu coral mu. Tañi huentru com ñi piuque mu maneleyu. Tañi huentru chem rume duamnielai. Com ñi mongen mu quisu cümelcaquefi tañi füta, huesa dungu ta femlafi. Quimün meu dunguquei ca piuqueyen meu entuquei ñi feipin. Quisu llihuatulequei com ñi cüme amulen tañi ruca mu, ca chofülequelai tañi femquen mu. Tañi pu püñeñ huitrapüraingün ca cüme dunguyeyu engün; tañi huentru huitrapürai ca saquiyeyu” (Prov. 31:10-12, 26-28).
20 ¿Chumngelu saquifali tati pu domo? Proverbios ca feipi: “Quiñe che ayüfalngelu troquingele ngünencahun-ngeafui, cafei quiñe che ñi cüme adngen pichiñmayafui. Huelu quiñe domo yamniefile ta Jehová, püramyengeai” (Prov. 31:30). Tati domo yamniefile ta Chau Dios, ca femngechi yamnieafi tañi füta ñi loncolen. Chumngechi ñi feipin Biblia, “Cristo loncolei com pu huentru meu, ti huentru loncolei ti domo meu, Chau Ngünechen loncolei Cristo mu” (1 Cor. 11:3).
Mañumafiyiñ Jehová ñi elcünufiel pu curehuen
21, 22. 1) Pu curehuen, ¿chem dungu mu mañumtuafuingün ta Dios? 2) ¿Chumngelu yamnieafiyiñ Jehová ñi adcünufiel ti familia ca tati trahunche? (Inaduamnge ti huichulechi dungu “¿Chumngelu yamnieafiyiñ Jehová ñi adcünuelchi dungu?”).
21 Pu curehuen cristiano fillque dungu mu mañumtuafuingün ta Dios. Quiñe dungu ta tüfa, quiñentrür ayühunquechi amuleal tañi mongen mu. Huelu doi ayühuelqueyu quiñehun poyenieafiel ta Jehová engu (Rut 1:9; Miq. 6:8). Jehová deumafilu am pu curehuen, feimu quimniei chem duamniei ñi ayüucüleal engu. Feimu cümei ñi inayal chem ngülam ñi eluqueteu Jehová. Femngechi fillque huesaque dungu mu rupalele rume, ayüucüleaingu Jehová ñi duam mu (Neh. 8:10).
22 Tati cüme füta poyequefi ñi domo quisu ñi poyehun reque, feimu cüme piuque mu adniefi tañi domo. Tati quim domo yamniefiel mu ta Jehová, ca femngechi com ñi piuque mu yamquefi tañi huentru, feimu tañi huentru doi poyequeyu. Doyelchi mai cüme yenieulu chi curehuen, rume püramyequefi ta Chau Jehová.
¿Quimtucufimi?
• Jehová, ¿chumngechi adcünufi ti familia ca ti trahunche?
• ¿Chumngelu mülei ñi yamniehual pu curehuen?
• Tañi huentru poyenofile ta Jehová, ¿chem mülefui ñi femal ti domo?
• Petu ñi femnon falinque dungu, ¿chumngelu ti huentru cümeafui ñi ramtuafiel tañi domo?
[Huichulechi dungu]
¿Chumngelu yamnieafiyiñ Jehová ñi adcünuelchi dungu?
Huenu mu ca mapu mu Jehová feipicünui inei ñi loncoleal ca chumngechileal, femngechi poyeafuiñ ta Jehová quiñeucülen ca tüngcülen mu (Sal. 133:1).
Pu dullin cristiano yamniefi Jesús ñi loncolen ti trahunche mu (Efes. 1:22, 23). Ca femngechi Jesús fente ñi yamniefiel Jehová tañi loncolen, “eluhuai ñi ngünenieaeteu Chau Ngünechen, feiti elufilu tañi Fotüm ñi ngünenieal itrocom dungu. Femngechi Chau Ngünechen müten ngünenietuai itrocom dungu” (1 Cor. 15:27, 28). Feimu, com pu cristiano mülei ñi yamnieafiel chumngechi ñi adniefiel Jehová tati trahunche ca tati familia (1 Cor. 11:3; Heb. 13:17). Femngechi femliyiñ, Jehová rume cümelcayaiñmu (Is. 48:17).
[Adentun]
Tati domo ngillatule, quelluaeyu yamnieafiel ñi füta.
[Fill adentun]
Jehová falintuquefi com ñi femqueel pu domo Jehová ñi troquiñche mu.