Tati pornografia, ¿rüf huesalcapeafeimu mai?

Fachantü apolei Mapu mu feitichi pod dungu, pornografia pingelu.a Mülei television mu, musica mu ca internet mu cütu. Mülei revista mu, videojuego ca celulares mu. Tüfachi dungu mülei quiñe huimtun reque. Cuifi mu pichin che pequeingün tüfachi pod dungu, huelu tüfa hula huall püle alün che pequeingün ti pornografia pingelu. (Pefinge ti huichulechi dungu “¿Chem quimniengei pornografia mu?”).

Raquiduamqueel pu che pornografia mu caletui. Gail Dines, ti profesora, huirintucui: “Pu che cuifi mu, ti pornografia rume pod dungu piqueingün. Huelu tüfa hula, dungu no tati piqueingün”.

Tüfachi dungu mu, ¿chem piafuimi eimi? Ti pornografia, ¿huesalcapeafeimu mai? Jesús feipi: “Com cümeque anümca hulquei cümeque fün, huelu tati huesaque anümca huesaque fün hulquei” (Mateo 7:17). ¿Chem dungu mu rupayafui feitichi pu che pelu pornografia? Taiñ huiñoldungual, peaiñ cüla ramtun ti pornografia mu.

¿Chumquei ti che pequelu pornografia?

¿CHEM PIQUEINGÜN PU QUIMCHE? Ti pequelu pornografia rume illutuquefi. Feimu trürümngeafui quiñe che drogatuquelu.

Brianb pingechi huentru rume illutuquefui peal pornografia internet mu. Quisu feipi: “Reyenien ñi peal pornografia müten, ngollilen reque droga mu. Tañi femün cutrancutrantripaquei tañi lonco tañi huesa duamcülen mu. Rume cüdautun tañi fentecünual, huelu rupai fentren tripantu”.

Feitichi che concülelu feichi pod dungu mu ellcauqueingün ñi chummequen engün ca nütramcaquelaingün no rume. Feitichi che peniequelu pornografia püntütripaqueingün caquelu che mu, illcuqueingün ca rume huesa duamcülequeingün. Quiñeque che fente tañi huesa duamcülen, raquiduamqueingün ñi langümuhual cütu. Sergio pingechi huentru pequei pornografia fill antü tañi celular mu, feipi: “Püntütripan com pu che mu ca huesa duamcülefun. Falinolu, quisulelu troquiuquefun. Chumcaunorume elcünulayan pifun, llicalefun ca yehuequefun ñi femün mu. Feimu quintulan quellu”.

Pichin müten perumefulmi ti pornografia, rume huesalcayafeimeu. Ti doctora Judith Reisman, inaduamquelu ti pornografia, feipi: “Quiñe che peniefilu quiñe adentun pengelquelu pornografia, pinole rume, cüme loncontucunieafi tañi pefiel ca rume cüdaungeai tañi ngoimanentuafiel”. Susan mari ailla tripantu niei, pichicalu perumei pornografia internet mu, feica müten illuturpufi. Quisu feipi: “Cüme loncontucuniequefiñ pod dungu tañi pefiel, raquiduamcülenolu rume acuquei. Turpu ngoimanentulayafun troquifiñ”.

¿CHEM QUIMÜRPUIÑ? Ti pornografia presuntucuniefi reque tati pu che ca huesalcaquefi (2 Pedro 2:19).

Ti pornografia, ¿chumquefi ti pu familia?

¿CHEM PIQUEINGÜN PU QUIMCHE? “Ti pornografia huesalcaquefi ca podümcaquefi pu curehuen ca tati pu familia” (The Porn Trap [Las trampas del porno], ñi huirintucuel Wendy ca Larry Maltz).

Ti pornografia, ¿chumngechi cutrancaquefi tati pu curehuen ca ti pu familia?

• Ti curehuen ñochiquechi piuqueyeuhuelai, maneluuhuelai ca duamtuuhuelai engu (Proverbios 2:12-17).

• Quisutu duamuuquei, hueniyeuhuelai engu ca ayüucülehuelai engu tañi curehuen mu (Efesios 5:28, 29).

• Ti pornografia yequefi ta che ñi illutuafiel huesaque raquiduam (2 Pedro 2:14).

• Tati peniefilu ta pornografia ngüchaltucuafui tañi afcadi ca ñi conal pod cudumuhun mu (Efesios 5:3, 4).

• Tati peniefilu ta pornografia nor piuqueyehuelafi tañi afcadi ca doi eluucülei tañi ngünencayafiel (Mateo 5:28).

Tati Biblia feipi ti pu curehuen ngelai ñi ngünencaunoal (Malaquías 2:16). Quiñe che ñihuañpefile tañi afcadi, püntühuafuingu, hudahuafuingu ca rume cutrancayafi tañi pu yall.

Ti pornografia rume huesalcaquefi pu pichiqueche. Brian feipi: “Tañi chau niefui quiñe revista pengelquelu pornografia. Fei quiñe antü mari tripantu nielu iñche, petu tañi aucantumequen perumefiñ ti revista. Quimquelafun chumngelu tañi ayüniefiel, huelu ellcauquen tañi peafiel. Trempüramün, fentecünulafun tañi pefiel pornografia”. Pu quimche feipiquei peniefiel pornografia yeafeyu pu hueche tañi pürüm conal cudumuhun dungu mu ca eluucüleingün tañi cudumuhual fillque che engu ca ngüneuquelaingün ñi femal ünufal dungu. Caletui ca chuchicalei tañi raquiduam engün, quimfalngelai.

¿CHEM QUIMÜRPUIÑ? Ti pornografia fuñapuhue reque felei, cutrancachequei ca huesalcachequei ca yequei ta che ñi piuqueyeuhuenoal engün (Proverbios 6:27).

¿CHEM PILEI TA BIBLIA PORNOGRAFIA MU?

BIBLIA FEIPI: “Com tati troquiñ ñi nieel tamün cuerpo [...] com ngünenieafimün, tamün femnoal fillque pecan cudumuhun eluñmaquenolu Ngünechen ñi ley ca fillque ünufal dungu, tamün rume illunienoal cudumuhun, ayünienoal ñi femal huesaque dungu, ca tamün diñmanoal, fei tüfa poyequefilu reque pu adentun” (Colosenses 3:5).

Jehovác üdequefi ti pornografia. Jehová ayüniei pu curehuen müten tañi cudumuhual engu, femngechi doi quiñeucüleafuingu, pengelafuingu tañi piuqueyehun ca nieafuingu pichiqueche (Santiago 1:17).

¿Chumngelu Jehová ayüquelafi ti pornografia? Peafiyiñ quiñeque dungu.

• Jehová cüme quimniei fente ñi cuñihun-ngen ti pornografia (Efesios 4:17-19).

• Jehová piuqueyenieiñmu ca ayüniei taiñ cutrancaunoal (Isaías 48:17, 18).

• Jehová cuñiutucuquefi ti pu curehuen ca ti pu familia (Mateo 19:4-6).

• Quisu ayüniei taiñ lif chengeal ca yamnieafiel caquelu pu che (1 Tesalonicenses 4:3-6).

• Taiñ raquiduamqueel cudumuhun dungu meu, mülei ñi trürngeal Jehová tañi raquiduam meu (Hebreos 13:4).

• Jehová quimniei ti pornografia nüucülei Huecüfü ñi raquiduam meu ca ngüchaltucuchequei tañi quisutu duamuhual (Génesis 6:2; Judas 6, 7).

¿CHEM QUIMÜRPUIÑ? Ti pornografia püntünentuqueiñmeu Jehová mu (Romanos 1:24).

Jehová quelluquefi tati pu ayünielu ñi elcünual ti pornografia. Biblia feipi: “Jehová cutranpiuqueyechequei ca cüme piuquengei, müchai müten lladcüquelai ca rume alün-ngei tañi rüf piuqueyen. Quisu am cüme quimnielu chumngechi taiñ deumangen, ca acordaniei taiñ trufür mapungen” (Salmo 103:8, 14). Jehová quelluquefi tati pu ñomngelu, cutranpiuqueyefi ca fürenequefi (Hebreos 4:16; pefinge ti huichulechi dungu “¿Chumafuimi tami elcünual ti pornografia?”).

Fentren che eluhuingün tañi quelluaeteu Chau Dios, ¿cümelcapeyu mai? Peafiñ chem pilen ta Biblia quiñeque che meu elcünulu tañi huesaque huimtun: “Lifngetuimün Chau Ngünechen ñi nehuen mu, dullicünulelngeimün ta Chau Ngünechen, ca nor che pingetuimün taiñ Ñidol Jesucristo ñi üi meu” (1 Corintios 6:11, Traducción del Nuevo Mundo [TNM]). Tüfachi pu che ti apostol Pablo reque raquiduamqueingün. Fei feipi: “Chem rupale rume, tañi eluqueteu nehuen quelluqueneu ñi yafüluucüleal” (Filipenses 4:13, TNM).

Susan elcünui ti pornografia, quisu feipi: “Jehová müten quelluafeiñmeu taiñ elcünual tüfachi huesa huimtun. Llellipufiliyiñ taiñ quelluaeteu, lif mongen nieaiñ ca hueniyenieafiyiñ. Jehová chumcaunorume quisucünulayaiñmu”.