Tati rüf dungu, ¿chumngechi puhuafui tami pu che ñi piuque meu?

JESÚS feipifi quiñe huentru: “Huiñotunge ruca mu tami pu che engün, fei nütramcalelfinge com ñi femün Jehová eimi tami duam mu, ca chumngechi tami cutranpiuqueyeteu”. Jesús feipilu tüfachi dungu mülefui Gadara pingechi huaria mu, fülcülelu Galilea fütra lafquen mu. Ñi feipiel Jesús pengeli fente ñi quimnieel pu che ñi chumngen, ¿chem am chi? Tati pu che ayüquei nütramcalelafiel tañi familia chem dungu tañi ayüqueel (Mar. 5:19, Traducción del Nuevo Mundo [TNM]).

Chem tuhun nieliyiñ rume, com iñchiñ ca femngechi ayüqueiñ taiñ femal. Feimu quiñe che Dunguquelu Ineingen Jehová ngerpulu, rume ayüquei ñi nütramcalelafiel tañi pu che Chau Dios ñi dungu. Huelu, ¿chumngechi femafui? ¿Chumngechi puhuafui tañi pu che ñi piuque mu? ¿Chumafui cangelu religion niele cam feyentunole engün Chau Dios ñi mülen? Femngechi dungu rupaliyiñ, Biblia rume quelluaiñmu.

“PEFIYU TATI MESÍAS”

Hunen siglo mu, quiñe che ñi quimnieel Jesús ñi Mesíasngen, fei ta Andrés. Quisu tañi quimürpuel, ¿inei am pürüm feipifi? Biblia feipi: “Andrés hune pefi tañi peñi Simón. Fei feipifi: ‘Pefiyu tati Mesías’. Tüfa ‘Cristo’ ñi pingequen tati”. Fei hula yefi ta Simón Pedro cheu ñi mülen ta Jesús, femngechi quellueyu ñi ca inayentuafiel ta Jesús (Juan 1:35-42, TNM).

Cayu tripantu rupalu, Pedro mülefui Jope huaria mu feipingei ñi amual Cesarea huaria mu, tüfa mu pemeafi ta Cornelio tañi ruca mu. ¿Inei am engün trahuluquefui ñi ruca mu? Biblia feipi: ‘Cornelio üngümniefui ta Pedro ca tañi pu compañnieteu. Fei trahuli tañi pu pariente ca tañi pu cümeque hueni’. Femngechi Cornelio elufi tañi pu pariente ca tañi pu hueni ñi allcütual ta Pedro, ca elufi engün quisutu dullial ñi feyentuleal cam femnoal (Hech. 10:22-33, TNM).

Andrés ca Cornelio cüme duamelfingu tañi pu che, ¿chem quimeltuqueiñmu tüfa?

Quisu engu cüme raquiduamingu chumngechi ñi quelluafiel tañi pu che. Andrés quellufi ta Pedro ñi quimafiel ta Jesús ca Cornelio trahulquefi tañi pu che ñi allcütuafiel ta Pedro. Huelu dicümtucuquelafingu tañi pu che ñi feyentuleal. ¿Chem quimeleiñmu tüfa? ¿Chumngechi inayentuafiyiñ engu? Nütramcalelafuiñ taiñ pu che quiñe dungu taiñ inaduampeel Biblia mu. Chumafuiñ rume ñi peal engün chem quimeltuquei Biblia. Cafei quelluafiyiñ engün ñi quimafiel caquelu peñi ca lamngen. Huelu mülei taiñ yamnieafiel chem ñi dulliel engün ca huesa duamel-layafiyiñ. Taiñ cüme femal, peaiñ ñi rupan quiñe curehuen Jürgen ca Petra pingei engu ca tuhuingu Alemania mapu mu.

Petra eluhui ñi chillcatual ta Biblia ca fautizahui. Tañi füta soltaungefui, ca ellaca mu pilai Petra ñi poyefiel ta Chau Jehová. Rupan mu ta antü, ngüneduamurpui tati pu Dunguquelu Ineingen Jehová rüf quimeltuquei. Feimu fautizahui ca feula loncolequei quiñe trahunche mu. Quisu nütramcai chumngechi quelluafuiñ quiñe pariente ca religion nielu.

Jürgen feipi: “Dicümtucuquelayafimi tami pariente ñi feyentuleal eimi reque, ca fentren dungu quimeltulayafimi. Tüfa ngünaituafui tami pariente ca püntüafeimu. Doi cümeafui ñochiquechi quimelelafiel pichique dungu, cafei quelluafimi ñi hueniyeafiel caquelu peñi ca lamngen chaf tripantu niele ca trür femngechi dungu ayüle, tüfa müna quelluafui”.

Pedro ca Cornelio tañi pu pariente cüme lloufingün Biblia ñi quimeltun, huelu ca mülefui quiñeque che alüñmalu tañi femal.

JESÚS ÑI PU PEÑI

Mülepalu Mapu mu, Jesús fentren tañi pu pariente feyentueyu. Santiago ca Juan primoyefuingu chi ta Jesús, ca tañi ñuque engu Salomé ca inafi ta Jesús. Femngechi feipi tati Biblia: “Fentren domo serfiquefi ta Jesús ca pu apostol tañi nieelchi chemcün meu” (Luc. 8:1-3, TNM).

Quiñeque pariente ñi nieel ta Jesús feyentulaeyu. Ngüneduamaiñ quiñe dungu ñi rupan, doi quiñe tripantu rupai ñi fautizahun mu ta Jesús. Quisu quimeltulelquefi fentren che quiñe ruca mu, ¿chem rupai? Biblia feipi: “Jesús tañi pu che quimlu ñi chem rupamequen, amui engün ñi yemeafiel. ‘Hueluduamcülei’ pi engün”. Pichin antü rupalu hula tañi pu peñi ramtueyu chumül amuafui Judea mu, huelu Jesús feipilafeyu chem tañi chumal, ¿chumngelu femlai? Biblia feipi: “Rüfcünu mai, tañi pu peñi feyentulai Jesús mu” (Mar. 3:21; Juan 7:5 TNM).

¿Chumngechi Jesús troquiniefi tañi pu pariente chem quimeltuqueiñmu? Huesa duamcülelai tañi pu pariente feipilu rume ñi hueluduamcülen. Jesús rumel yafültucufi tañi pu che, feimu deu huiñomongetulu yafültucufi tañi peñi Santiago. Ñi femngechi peufaluhun ta Jesús quellupelaeyu ta Santiago ca tañi caquelu peñi, fei ñi feyentuleal engün Jesús tañi Mesíasngen. Pichin antü rupalu, Jesús tañi pu peñi ca tati pu apostol trahuluquefuingün Jerusalén huaria meu, feimu Pentecostés mu Jehová ca elueyu engün tañi nehuen. Rupan mu ta antü, Santiago ca Judas, Jesús tañi pu peñi, elungei engu falinque cüdau (Hech. 1:12-14; 2:1-4; 1 Cor. 15:7).

QUIÑEQUE PARIENTE DOI ALÜÑMAYAFUI ÑI FEYENTUAL

Cuifi reque famülque mu, taiñ pu pariente alüñmayafui taiñ feyenturpual. Peaiñ ñi rupan quiñe lamngen Roswitha pingelu, quisu catolicangefui. 1978 tripantu mu tañi füta fautizangei, fei ñi poyeafiel ta Chau Jehová. Feimu Roswitha rume illcui. Huelu rupan mu ta tripantu, Roswitha cüme raquiduamtui. Ngüneduami ñi rüf quimeltuqueel tati pu Dunguquelu Ineingen Jehová. Feimu 2003 tripantu mu fautizangei. ¿Chem dungu quellueyu? Ñi cüme femün tañi füta. Roswitha huesa troquiniefilu tañi füta, quisu illculai, doi mai quellufi tañi domo ñi cüme raquiduamnietual. ¿Chem ngülam feipiafeiñmu Roswitha? “Ñi cüme tripayal ti dungu duamnieiñ ñom chengeal ca nieal fentren paciencia”.

Monika fautizangei 1974 tripantu mu, mari tripantu rupalu tañi epu püñeñ huentru ca fautizangei. Tañi huentru Hans pingelu turpu catrütulaeyu ñi poyefiel ta Chau Jehová, huelu aluñmai tañi fautizangeal, fei 2006 tripantu mu femi. Monika tañi familia, ¿chem ngülam elueiñmu? Quisu engün feipieiñmu: “Com piuque mu poyeafimi ta Chau Jehová ca elulayaimi chem no rume tami catrütuaeteu tami feyentun”. ¿Chem quellueyu ta Hans? Tañi familia pengelelfi tañi piuqueyeniefiel ca maneluhuingün Hans ñi poyerpuafiel ta Chau Jehová.

QUELLUAFIYIÑ ÑI QUIMAFIEL TATI RÜF DUNGU

Jesús trürümfi tati rüf dungu tati co hulquelu rumel mongen (Juan 4:13, 14). Iñchiñ ayünieiñ taiñ pu pariente ñi quimafiel tati rüf dungu co reque felelu. Huelu ayülaiñ mürilafiel lefpütocon mu co. Taiñ huesa duamelnoafiel cuñiutucuhuaiñ chumngechi taiñ amuldunguquefiel. Biblia feipi: “Ti nor chengelu ñi piuque cüme raquiduamquei chem ñi feipial”. Cafei “quiñe quimche cüme dulliquei tañi feipial. Tañi feipin puuquei piuque mu”. Tüfachi feipin Biblia mu, ¿chumngechi quellupeafeiñmu taiñ mongen mu? (Prov. 15:28; 16:23).

Quiñe domo ayüle ñi quimelelafiel tañi füta, ¿chem mülepefui ñi femal? Mülei ñi cüme raquiduamal petu ñi lloudungunon. Cüme dulliquei chem ñi feipial ca aporiauquelai ñi feipial. Pu domo ngelai tamün feipial: “Iñche doi quimün nien, eimi quimlaimi”. Feimu cüme raquiduamülmi chem tami feipial, rume quelluafimi tami füta ca ayüucüleaimu ca tüngcüleaimu. Cüme quimchengeaimi tami dungual. Eimün pu domo ramtuhuafuimün: “¿Chumül doi cümelcalei tañi füta tayu nütramcayal? ¿Chem ayüquei ñi dungual? ¿Chem dungu chillcatuquei? ¿Ayüquei ñi nütramcayal ciencia, politica cam deporte? ¿Chumngechi quellupeafuimi ñi quimal ta Biblia? ¿Chumpeafuimi ñi respetayafiel tañi chum duamcülen ca ñi raquiduamcülen?”. Cüme raquiduamliyiñ chem ñi ayüqueel taiñ afcadi doi cüme nütramcalelafiyiñ.

Taiñ puhual ñi piuque taiñ familia testigongenolu mülei taiñ pichique dunguafiel, huelu fei ca müten no, chem taiñ chumquen iñchiñ mülei taiñ pengelal taiñ feyentulen.

TAIÑ CÜME CHUMNGEN

Jürgen ñi feipin: “Fill antü mülei taiñ femqueal chem taiñ quimeleteu Biblia, femngechi taiñ pu che quimnofilu ta Jehová peaingün taiñ cüme chumquen iñchiñ, ‘cüme femqueimi’ pilafeimu rume”. Hans, 30 tripantu rupan ñi fautizahun tañi domo, fei ca fautizahui. Fei feipi: “Chem ñi chumün iñchiñ fei ta re cümeque dungu. Femngechi taiñ pu familia peaingün taiñ cüme femquen iñchiñ, inaniefiel mu Biblia tañi ngülam” pi taiñ peñi. Cafei taiñ familia peaingün taiñ feyentulen doi cüme chengetuiñ.

Tati apostol Pedro elufi tüfachi ngülam tati pu domo nielu füta feyentuquenolu: “Eimün pu domo, eluucülemün tamün ngünenieaeteu tamün füta. Femngechi quiñeque engün inanofile Chau Dios ñi dungu, quelluafimün tañi feyentual engün. Huelu tamün dungufiel no, tamün cümeque femün mu llemai, tañi pefiel engün tamün cüme miyahun ca tamün rume yamquefiel engün. Re adelcalayaimün tamün cuerpo, rumeñma adelcalayaimün tamün lonco, tucutuulayaimün oro llancatu ca rume falichi tacun no rume. Doi mai mülei ñi cüme adelcahual tamün chumngechi chengen piuque mu. Feimu ñochi duam ca ñom piuque mu adelcahuaimün. Chau Ngünechen rume falintuquefi tüfachi dungu. Femngechi adelcahun turpu huesañmauquelai” (1 Ped. 3:1-4, TNM).

Pedro feipi quiñe cüme domo puhuafui tañi füta ñi piuque mu tañi cüme femmequen mu müten. Quiñe lamngen Christa pingelu inaniequei tüfachi ngülam. 1972 tripantu mu fautizahui, fautizaulu müten nehuentuquei ñi tuafiel tañi huentru ñi piuque. Tañi füta chillcatumequei ta Biblia pu testigo engün, huelu petu elulai ñi cüdahuelafiel ta Jehová. Amuquei quiñeque trahun mu, cüme lloungequei pu peñi ca pu lamngen, fei engün respetaquefingün chem tañi chumal. ¿Chem chummequei taiñ lamngen Christa ñi puhual tañi piuque mu?

Quisu lloudungui: “Iñche femquen chumngechi ñi ayüqueel ta Jehová, huelu ca nehuentulen ñi cüme duamelafiel tañi füta, tañi dungun mu müten no, doi mai tañi femün mu. Chaftunole chem pin ta Bibia, chem rume femquen ñi ayühulafiel tañi füta. Ca yamquefiñ ñi femqueel tañi füta, com elcünufiñ Jehová tañi chumal”.

Christa tañi rupan pengeli ñi duamfalngen ñom chengeal. Quisu niefulu rume fentren duam: amual trahun mu ca amuldungual, huelu sapiquefi tañi füta. Quisu quimniei ñi duamnieel tañi füta ñi poyenieafiel ca quiñentrürcüleal engu. Com iñchiñ mülei taiñ ñom chengeal ca peal ñi chumngen taiñ pu familia, fei taiñ pengelelafiel taiñ piuqueyefiel engün. Biblia feipi: “Mülei quiñe medin antü ñi femngeal itrocom dungu”. Feimu cümeafui taiñ quiñentrür rupamequeal taiñ pu familia testigongenolu. Doyelchi mai pu nielu quiñe afcadi poyenofilu ta Jehová, quiñentrürcülen mu doi cüme nütramcauqueingu. Tati curehuen nütramcalu engu quelluquefi tañi afcadi quisulelu troquiunoal ca ñi rümpelnoal ca müritunoal (Ecl. 3:1).

TURPU AFLAYAI TAIÑ MANELUHUN

Quiñe peñi Holger pingelu, tañi chau fautizahui deu rupalu 20 tripantu ñi fautizahun tañi familia. Quisu feipi: “Rume falin-ngei ñi quimal taiñ familia taiñ piuqueyenieafiel ca llellipual quisu engün mu”. Christa ca feipi: “Turpu aflayai tañi maneluhun quiñe antü tañi afcadi ñi ca fautizahual. Rumel mülei taiñ cüme raquiduamnieal taiñ pu familia mu, ca rume maneluucüleaiñ taiñ pu familia ñi testigongerpual”.

Mülei taiñ cüme yeucüleal taiñ familiahuen-ngen. Fei ñi quelluafiel ñi quimürpual tati rüf dungu ca puhual quisuque tañi piuque mu engün. Ca ‘ñom piuque ca rume yamün meu huiñoldunguaiñ’ (1 Ped. 3:15, TNM).