3 Chumngechi newenküleal rupalmi wedake dungu mu

Famülke mu küme elkünutulayafuiñ kiñeke weda dungu ka famentulayafuiñ rume. Kiñeke tüfa lale taiñ piwkeyen che kam nieliyiñ kiñe weda kutran nienolu lawen. Fey müley taiñ newenküleal ñi chaftuafiel feychi dungu. Biblia, ¿kellupeafeiñmu may ñi chaftual tüfachi wedake dungu?

WEDAKE KUTRAN

Rosa feypi: “Nien kiñe weda kutran, tüfa rumel kutrantuniekeenew. Feymu müna küdawngetuy tañi mongen”. Kiñeke mu Rosa tañi rakiduam nampiyawkey ngüneduamlu ta Biblia ka femlu kakelu dungu ñi poyeafiel ta Jewba, tüfa weda duamelkeeyew. Welu müna kellueyew Jesus ñi feypin Matew 19:26 mu: “Ngünechen ta pepilniey” itrokom dungu. Rosa kimürpuy ñi femal ka dungu tañi ngüneduamal Chaw Jewba ñi dungu. Kiñeke rupa tañi kutran mu pepi papeltukelay Biblia, feymu eluwi ñi allkütual audio nütramkalu Biblia ka fillke papel.a Kidu feypi: “Mülenofule feychi kellu weniyewelayafun ta Chaw Ngünechen”.

Rosa pepi femwenolu am tunte ñi femkefel kuyfi weñangkünagkey, welu yafültukueyew 2 Korintio 8:12: “Fey elufilmün ta Ngünechen ayüwkülen tamün nieelchi chemkün, Ngünechen ayüley tunten tamün wülel mew. Ngünechen ta ‘eluen’ pikelafi tati nienolu ñi wülael”. Tüfa rakiduamelfi ta Rosa Chaw Dios ñi ayüwkülen tunte tañi femkeel kidu, femlu am kom tañi pepilnieel kutrankülen mu rume.

WEÑANGKÜN

Delia nütramkangelu nga feypi: “Lalu tañi domo püñeñ 18 tripantu nielu, müna weñangkünagün ka katrünentungelu tañi piwke trokiwkefun. Rume kaletuy tañi mongen”. Welu yafültukueyew Salmo 94:19, tüfa mu ti wirintukulu feypifi ta Ngünechen: “Rume fentrelu iñche mew tañi fill rakiduamkülen, eymi newentuen ka yafüduamelen”. Delia feypi: “Ngillatukefiñ ta Jewba ñi kelluaetew ta kimal chem chumal ñi müte weñangkülenoal”.

Delia eluwi ñi kellucheal fillke dungu mu. Feychi mu trürümuwi ta kiñe lapiz mu ñi nieel kiñe pichi wentru, ti lapiz trafolele rume petu kellukey ñi wirial. Ka femngechi Delia trafolefuy reke tañi weñangkün mu, welu kelluafuy ta kakelu che. Kidu feypi: “Iñche kimeltukefilu pu che Jewba ñi rakiduam Biblia mülelu tañi yafültukuafiel, kimtukun Chaw Dios tañi küme duamelkeetew ka yafültukukeetew”. Delia wirintukuy kiñeke che fütra weñangkülu Biblia mew nütramkangelu. Ka feypi: “Kom engün af ngillatukelafingün ta Jewba”. Ka kimürpuy ñi duamfalngen papeltual Biblia ñi chaftual tañi weda rupameken.

Biblia kellufi ta Delia ñi longkontukual chem ñi rupayal küpalechi antü mu ka ñi rakiduamwenoal chem ñi rupan kuyfi. Müna yafültukueyew ti maneluwün feypilelu Hecho 24:15: “Tati pu layelu tañi wiñomongetuael engün tati lif piwkengelu ka tati wesake piwkengelu”. ¿Rüf maneluwpey may ñi wiñomongetual tañi püñeñ? Delia feypi: “Peyeniekafiñ reke tayu trawületual tañi püñeñ iñchiw tayu ruka mu. Chumngechi piwkentukuniefiñ feychi antü ñi choyüngen tañi püñeñ, ka femngechi maneluwkülen ñi wiño petuafiel ti antü ñi feypikünuel tañi Wenu Chaw”.

a Fentren feychi audio müley jw.org internet mu.

Biblia yafültukuafeymu fütra wedake dungu rupalmi rume

¿CHUMNGECHI KELLUAFEIÑMU CHAW DIOS?

Biblia feypi: “Jewba fülmaniefi kom ñi pu mütrümkeetew, kom pu mütrümkeetew rüf dungu mu. Kidu elukefi ñi ayünieel tañi pu ekunieetew; llellipukelu engün kellun mu, kidu allkütukefi ka montulkefi” (Salmo 145:18, 19). ¡Tüfa müna yafültukukeeiñmu llemay! Welu Chaw Dios, ¿chumngechi kellukefi pu che ngillatulu ñi kelluaetew?

ELUKEEIÑMU NEWEN:

Yafüngewelayafuiñ taiñ rupan wedake dungu mu ka katrütuñmakeeiñmu taiñ weniyefiel ta Chaw Dios (Proverbios 24:10). Welu Jewba “newentuniefi tati pu ürkülelu, ka eluniefi fentren pepiluwün tati pu ngañwadkülelu” (Isaías 40:29). Apostol Pablo ka chaftufi fütra wedake dungu nielu am “fütra pepiluwün [...] ñi küpan ta Ngünechen mew” (2 Korintio 4:7). Pablo ka kellueyew Chaw Dios ñi newen, eymi ka ngillatuafuymi tami eluaetew tañi newen (Luka 11:13).

ELUKEEIÑMU KIMÜN:

¿Duamliyiñ kay kellu ñi kimürpual ka inayal Biblia ñi feypin? Disipulo Santiaw wirintukuy: “Kiñeke eymün nienolmün Ngünechen ñi kimün, ngillatufimün ta kisu, fey Ngünechen ta eluaeymünmew. Kisu elukefi itrokom che ñi kimael kisu ñi küme dungu ka chem dungu rume ñi feypiel felekey müten” (Santiaw 1:5). Papeltulmi ka inanielmi Biblia femürpuaymi chumngechi tami ngillatukeel (Santiaw 1:23-25). Femngechi kimürpuaymi fente tami kümelkakeetew Chaw Dios ñi ngülam.

ELUKEEIÑMU KÜME FELEN:

Fill rakiduamküleliyiñ, Chaw Jewba kelluafeiñmu taiñ tüngküleal ka küme feleal. Biblia feypi: “Chem mew no rume ta welulekilpe tamün rakiduam itrofill mew kom eymün tamün nieelchi dungu, nütramelkeafimün ta Ngünechen. Ngillatufimün, kelluen piafimün ka femngechi mañumtukeafimün. Fey ta famngechi ta Ngünechen eluaeymünmew kisu tañi küme tüngün, fey tüfachi fütra küme tüngün ta doy kümey che ta pepil-layafuy ñi nieael ta küme tüngün, fey Ngünechen tamün eluetewchi küme tüngün yafülnieñmayaeymünmew tamün piwke ka tamün rakiduam, eymün am kiñewkülelu ta Cristo Jesus mew” (Filipense 4:6, 7). ¿Kümepelayafuy may ngillatuafiel ta Jewba tami eluaetew küme felen?

Welu, ¿pürüm entuñmangenolmi kay tami weda rupameken? Rakiduamkilnge tami kidukünuetew Chaw Ngünechen. Alüñmale rume tami weda rupameken, Chaw Dios kelluafeymu ka yafültukuafeymu tami wewtripayal (1 Korintio 10:13). ¡Biblia ka feypi ñi apümngeal kom taiñ wedake dungu!