¿Inei pingei Chau Ngünechen?

Cüpa quimfilmi ta quiñe che, hunelu mu: “¿Inei pingeimi?” ramtuafuimi chi. Ca femngechi, cüpa quimfilmi ta Ngünechen ca: “¿Inei pingeimi?” ramtufilmi, ¿chem huiñoldunguaimu ta quisu?

“Iñche ta Jehová. Tüfa tañi üi” (Isaías 42:8).

Alün che rulpadungufilu chi Biblia, entucünuquei Ngünechen ñi üi cheu ñi mülequefel. Huelutucuquefingün ti üitun “SEÑOR” cam “ÑIDOL” mu, feimu “allcütuquelafun Chau Dios ñi üi”, piafuimi chi. Ellaca mu ñi huirintucungeel Biblia, Ngünechen ñi üi mülei epe 7.000 rupachi, ca famngechi huirintucungefui ebreudungun mu: YHWH cam JHVH. Mapudungun mu “Jehová” pingequei.

Chau Ngünechen ñi üi alünque rupa mülei Hebreo Huirin Chillca mu, ca fentren rulpadungungeelchi Biblia

CHAU NGÜNECHEN ÑI ÜI, ¿CHUMNGELU FENTE FALIN-NGEI?

Quisu falintuniefi tañi üi. Chau Ngünechen inei no rume üituculaeyeu, quisutu üitucuhui. Jehová feipi: “Tüfa tañi üi, rumel müleai, com tamün pu cüpanche quimaeneu tüfachi üi meu” (Éxodo 3:15). Biblia mu, Chau Dios ñi üi doi rupa mülei ta caquelu üitun ñi nieel, quiñeque tüfa: Com Pepiluhun-nielu, Huenu Chau, Ñidol cam Ngünechen. Ca doi rupa mülei caquelu che ñi üi mu, quiñeque tüfa: Abrahám, Moisés, David ca Jesús. Cafei, Jehová ayüquei com pu che ñi quimüñmayaeteu tañi üi. Biblia feipi: “Com che tañi quimal eimi müten tami Alüpüralen itrocom mapu mu, Jehová pingei tami üi” (Salmo 83:18).

Jesús ta falintuniefi Chau Ngünechen ñi üi. Padrenuestro pingechi ngillatun mu, Jesús feipifi tañi pu inanieteu ñi famngechi ngillatuafiel ta Ngünechen: “Rume yamniengepe tami üi” (Mateo 6:9). Cafei, Jesús famngechi ngillatufi ta Chau Ngünechen: “Chau püramyefinge tami üi” (Juan 12:28). Jesús doyümi ñi püramyeafiel Chau Ngünechen tañi üi. Pengeli tüfa ngillatufilu ta Jehová: “Quimeltulelfiñ engün tami üi” (Juan 17:26).

Pu quimfilu ta Chau Ngünechen falintuquefi ñi üi. Pu che poyequefilu ta Jehová cuifi, quimtucuingün tüfa: ñi cuñiutucuaeteu ca montulaeteu Chau Dios, mülefuingün ñi maneluucüleal quisu ñi üi mu. Feimu Biblia feipi: “Jehová ñi üi quiñe nehuen-ngechi ellcaupeyüm reque felei. Üye mu lefmauquei tati norngechi che, fei cuñiutucungequei” (Proverbios 18:10). Ca feipi: “Com tati maneluulu Chau Jehová ñi üi meu, montulngeai” (Joel 2:32). Biblia pengeli trürümlayafui pu poyequefilu ta Jehová tati femquenolu mu, feipi: “Com pu troquiñche miyahuaingün quisu ñi dios tañi üi meu. Huelu iñchiñ rumel miyahuaiñ taiñ Chau Ngünechen Jehová ñi üi mu” (Miqueas 4:5; Hechos 15:14).

CHAU NGÜNECHEN ÑI ÜI, ¿CHEM PENGELI?

Quiñe üi pengelquelu ta Chau Dios müten. Pu adümuuquelu Biblia dungu, feipingün Chau Ngünechen ñi üi cüpa feipi “Femcünuquei ñi femngechingerpual”. Jehová quimeltui chem pifel ñi üi, feipifilu ta Moisés: “Iñchengean Chem tañi Dulliel” (Éxodo 3:14). Feichi üi pengeli Chau Ngünechen deumafi itrocom dungu. Huelu ca dungu pengeli: ñi femürpual tañi ayüqueelchi dungu, Jehová ngerpuafui chem dungu ñi duamnieel, ca quisu femquei com tañi deuman ñi ngerpual ca ñi femqueal chem dungu rume tañi duamnieel. Com tati üitun ñi nieel Chau Dios pengeli quisu ñi alüpüralen, ñi ñidolcülen ca ñi nehuen-ngen. Huelu Chau Ngünechen ñi üi müten rüf pengelquei chumngen ta quisu ca chem ngerpuafui ñi femal chem dungu rume.

Chau Ngünechen ñi üi pengeli ñi duamtuchequen. Tañi üi pengeli quisu duamniefi tañi deumael: pu che ca itrofill mülelu. Jehová quimfalcünui tañi üi quisu ñi pin mu, tüfa pengeli quisu ayüquei taiñ quimafiel. Felei llemai, Chau Dios pilai taiñ feipial: “Ngünechen quimfalcünuuquelai ca alü camapulei iñche mu”. Huelu mai quisu ayüquei com iñchiñ taiñ rüf hueniyeafiel (Salmo 73:28).

Üitufiliyiñ ta Chau Ngünechen, pengelaiñ taiñ duamtuniefiel. Raquiduamaimi ta tüfa: cüpa hueniyefilmi quiñe che, feipiafimi tami üi. Huelu feichi che müchaique üitunoelmu, ¿chum duamcüleafuimi? Epu rume duamcüleafuimi, fei ramtuhuafuimi: “¿Rüf cüpa hueniyeneu ta quisu?”. Chau Dios ca femngechi quimfalcünueiñmu ñi üi ca yafültucuqueiñmu taiñ üituafiel. Femliyiñ tüfa, pengelelafiyiñ ta Jehová taiñ cüpa hueniyefiel. Quisu quimniei tuchi “raquiduamaniefilu Quisu tañi üi” (Malaquías 3:16).

Deu quimnieiñ inei pingei Chau Ngünechen. Huelu taiñ doi cüme quimafiel, duamfali quimal chumngei ta quisu.