Kiñe trawün küdawngenolu ñi femngeal, kimeltukeeiñmu ñi chumngen taiñ Longko Ülmen

1, 2. 1) Feychi falin trawün elkünulu Jesus müte küdawngelay ñi femngeal, ¿chumngelu afmatulkelaeiñmu tüfa? 2) Jesus ñi chumngen mu, ¿chem küla dungu ngüneduamaiñ?

¿KIMNIEYMI chem ñi femngekeel fill tripantu ti Trawün Jesus tañi lan ñi akordangeal? Rüfkünu may, epe kom iñchiñ kimnieiñ chem femngekey Jesus ñi iyael ella pun mu. ¿Chumngelu am (chemu)? Müte küdawngelay ñi pepikangeal tüfachi trawün, welu müna falin-ngey. Fey ramtuwafuiñ: “¿Chumngelu chi kay newe küdawngelay feytachi trawün?”.

² Amuldunguyawlu Jesus Mapu mu, kidu kimeltulelfi pu che falinke dungu, fey müte küdawngelay tañi adümngeal (Mat. 7:28, 29). Ka femngechi kidu elkünuy kiñe falin trawün ñi akordangeal tañi lan, tüfa müte küdawngelay ñi femngeal. Küme ngüneduamaiñ tüfachi trawün elkünulu Jesus ka kiñeke dungu ñi feypin ka femün ta kidu. Fey doy falintuafiyiñ fente ñom piwkengen ta Jesus, ñi llükakenon ka ñi fütra piwkeyen. Ka kimürpuaiñ chumngechi doy küme inayafuiñ ñi femün.

JESUS ÑOM PIWKENGEY

3. 1) Feychi trawün ñi elkünuel ta Jesus nütramkangelu Matew 26:26-28, ¿chumngelu küdawngelay ñi femngeal? 2) ¿Chem adentuley ti kofke ka ti pulku?

³ Jesus elkünuy ñi akordangeal tañi lan mülelu tañi pu 11 manelfalchi apostol engün. Jesus pepikafi tüfachi trawün küdawngenolu ñi femngeal, fey nüfi ti kofke nienolu lefawra ka ti pulku sofralewelu ti Paskua mu (papeltunge Matew 26:26-28). Jesus feypifi tañi pu inanieetew tüfachi kofke adentuley ñi kulpangenochi kuerpu, ka ti pulku adentuley kidu tañi mollfüñ. Fey tüfa ñi wültukungeal kidu engün mu. Tüfachi we trawün ñi elkünuel ta Jesus küdawngelay ñi femngeal, welu pu apostol afmatulayngün. ¿Chumngelu kay?

4. Jesus, ¿chem ngülamtufi ta Marta? Tüfa, ¿chumngechi kellukeeiñmu kimal chumngelu ñi küdawngenon femngeal ti trawün?

⁴ Longkontukuaiñ chem ñi rupan kiñeke küyen petu ñi elkünungenon tüfachi trawün. Feychi küla tripantu ñi amuldunguyawün ta Jesus, pemefi tañi kümeke weni: Lasaru, Marta ka Maria. Fey Jesus eluwi tañi kimeltulelafiel. Marta ka müley ruka mu, welu re küdaweluwküley müten ñi dewmayal fentren iyael ñi tuteafiel ta Jesus. Kidu ngüneduamfilu tüfa, piwkeyen mu ngülamtufi ta Marta, fey pengelelfi ñi duamfalngenon dewmangeal fentren iyael kiñeke mu (Luka 10:40-42). Feymu pichilewelu ñi wültukungeal ñi mongen, Jesus inafi feychi ngülam elufilu ta Marta. Fey pepikakünuy kiñe trawün küdawngenolu ñi femngeal. Tüfa, ¿chem kimeltukeeiñmu Jesus mu?

5. Tüfachi trawün, ¿chem kimeltukeeiñmu Jesus mu? Ka Filipense 2:5-8, ¿chumngechi pengelkey ñi femngechi chengen ta Jesus?

⁵ Jesus ñom piwkengey kom ñi feypin ka femün mu. Feymu afmatulkelaeiñmu ñi ñom piwkengen feychi pun petu ñi lanon (Mat. 11:29). Feychi mu Jesus kimniey ñi wültukual ñi mongen, turpu mülekelay tüfa famngechi chalintukuwün. Ka kimniey ñi wiñomongeltuaetew Jewba, fey ñi Longko Ülmenkülepual wenu mapu. Jesus kimniefuy rume, elkünulay kiñe trawün küdawngelu ñi akordangeal tañi lan, femngechi ñi afmatufaluwal. Doy may, feypifi tañi pu inanieetew ñi pepikayal kiñe trawün küdawngenolu ñi femngeal, fey ñi akordayal tañi lan kiñe rupa fillke tripantu (Juan 13:15; 1 Kor. 11:23-25). Femün mu tüfa, Jesus pengeli ñi mallmangenon. Müna ayüwmakeeiñmu ñi fente ñom piwkengen ta Jesus, iñchiñ taiñ Longko Ülmen wenu mülelu. Biblia feypi: “Nieaymün ta eymün ka femngechi rakiduamün Cristo Jesus reke. [...] Kidu elkünuy kom tañi nieel ka kiñe esclavo reke femkünuwpay ka wentrukünuwpay. Doy may, wentrukünuwpalu kidu illamuwi ka fente feyentulen eluwi ñi layal kütu, feley llemay, langümngey kiñe orkon mamüll mu” (Filipense 2:5; 2:6-8, TNM).

6. Rupaliyiñ wedake dungu mu, ¿chumngechi inayentuafuiñ ta Jesus?

⁶ ¿Chumngechi inayentuafuiñ Jesus ñi ñom piwkengen? Doyümafiyiñ kakelu che ñi kümelkaleal (Filip. 2:3, 4). Rakiduamaiñ ñi femün Jesus feychi pun petu ñi lanon. Kidu kimniey ñi rume kutrankawal tañi layal, welu fill rakiduamküley tañi pu apostol mew. Tüfa engün müna weñangküleafuy lale kidu. Feymu kom feychi pun Jesus eluwi ñi ngülamtuafiel, yafültukuafiel ka tüngduamelafiel engün (Juan 14:25-31). Jesus kidutu duamuwlay, doy may doyümi kakelu che ñi kümelkaleal. ¡Inayentufali llemay ñi ñom piwkengen!

JESUS LLÜKAKELAY

7. We elkünulu Jesus ti iyael ella pun mu, ¿chumngechi pengeli ñi llükakenon?

⁷ We elkünulu Jesus ti iyael ella pun mu, pengeli ñi llükakenon. ¿Chumngechi? Jesus kimniefuy ñi yewelkangeal, ñi koyla dungun mu dalluntukungeal, feymu ñi langümngeal, welu eluwi ñi femal Jewba tañi ayükeel (Mat. 26:65, 66; Luka 22:41, 42). Jesus turpu fentekünulay ñi nor piwkeyefiel ta Ngünechen, femngechi püramyefi Jewba tañi üy, kelluntukufi tañi Ngünenieel ka femkünuy ñi nieafel rumel mongen pu che wiñorakiduamtulu ñi kulpan mu. Ka femngechi Jesus kellufi tañi pu inanieetew ñi chaftual chem kontuaetew engün.

8. 1) Jesus, ¿chem feypifi tañi pu manelfal apostol? 2) Rupalu mufüke tripantu ñi lan Jesus, ¿chumngechi pu disipulu inafingün ñi femün?

⁸ ¿Ka chem ñi femün Jesus pengeli ñi llükakenon? Kidu fill rakiduamkülefuy chi, welu kidutu duamuwlay, doy may longkontukuy chem ñi duamnieel pu manelfal apostol. Dew kechanentufilu Juda, Jesus elkünuy tüfachi trawün. Fey tüfa kelluafuy kom pu dullinche ñi inayaetew tañi longkontukual fente ñi kümelkakeetew Jesus ñi wütruelchi mollfüñ ka ñi koneltulen ti we eldungun mu (1 Kor. 10:16, 17). Jesus feypifi tañi pu inanieetew chem ayükey kidu ka tañi Chaw engu ñi femal kidu engün, femngechi kellufi ñi nor piwkengeal engün fey ñi mülepual wenu mu (Juan 15:12-15). Jesus ka feypifi pu apostol chem wedake dungu ñi kontuaetew engün. Welu “yafüluwkülemün” pifi, femngechi ñi inayentuaetew (Juan 16:1-4, 33). Rupalu mufüke tripantu, pu disipulu amuley ñi inayentufiel Jesus ñi kidutu duamuwnon ka ñi llükanon. Kutrankawfuyngün rume, pu disipulu welukonkechi kelluwingün rupalu wedake dungu mu (Eb. 10:33, 34).

9. ¿Chumngechi inayafuiñ Jesus ñi llükakenon?

⁹ Ka femngechi famülke mu inakefiyiñ Jesus ñi femün, fey llükakelaiñ. ¿Chem dungu mu? Duamfalngey llükanoal taiñ kelluafiel pu peñi, pu lamngen kayñetungekelu tañi feyentun mu. Kiñeke mu pu peñi, pu lamngen karseltukungey fey ñi chumnon rume. Rupale tüfa, kom taiñ pepilel femaiñ ñi kelluafiel engün, fey dunguñpeafuiñ kütu (Filip. 1:14; Eb. 13:19). ¿Ka chem chumafuiñ inayafiel ta Jesus? Eluwaiñ taiñ “ngeno llükan” amuldungual (Hecho 14:3, Ngünechen ñi Neyüntükumuyümchi Chillka [NCH]). Jesus reke eluwküleiñ taiñ amuldungual ti kümeke dungu, katrütueliyiñmu kam kayñetueliyiñmu rume tati pu che. Welu kiñeke mu ngüneduamuwafuiñ taiñ llükalen. ¿Chumafuiñ kay?

10. Fülkülepale ti Trawün Jesus tañi lan ñi akordangeal, ¿chumaiñ? ¿Chumngelu kay?

¹⁰ Rakiduamafuiñ ti maneluwün taiñ nierpuel Kristo ñi lan mu, femngechi llükalayaiñ (Juan 3:16; Efes. 1:7). Fülkülepale ti Trawün Jesus tañi lan ñi akordangeal, yafüluwafuiñ taiñ doy falintual Jesus ñi wülkünuel tañi mongen. Fey eluwaiñ papeltual ti trokiñ Biblia nüwkülelu tüfachi Trawün mu ka küme rakiduamaiñ chem ñi rupan petu ñi lanon ta Jesus ka dew lalu wüla. Femngechi amuliyiñ ti Trawün Jesus tañi lan ñi akordangeal, doy küme kimaiñ chem adentuley ti kofke ka pulku ka ñi fente falin-ngen Jesus ñi wülün tañi mongen. Falintuliyiñ ñi femün Jewba ka Jesus iñchiñ mu ka kimnieliyiñ tunte kümelkakeeiñmu iñchiñ ka taiñ pu che, doy maneluwaiñ ka doy eluwküleaiñ taiñ newenküleal llükanon mu puwle wüla ti afaelchi antü (Eb. 12:3)

11, 12. ¿Chem kimürpuiñ rupaleyechi parrafo mu?

¹¹ Rupaleyechi parrafo mu kimürpuiñ chem pengeli Jesus ñi iyael ella pun mu. Pengeli fente ñi falin-ngen Jesus ñi wülkünuel tañi mongen, welu ka kimeltukeeiñmu Jesus ñi ñom piwkengen ka ñi llükakenon. Jesus amuley ñi femngechi femken wenu mu, kidu taiñ Longkolechi Saserdotengelu kay, dunguñpekeeiñmu taiñ montulngeal, fey ¡müna mañumküleiñ llemay! (Eb. 7:24, 25, TNM). Pengelal fente taiñ mañumkülen, ¿chumaiñ? Akordayaiñ Jesus tañi lan chumngechi ñi feypikünuel ta kidu (Luka 22:19, 20). Niekeiñ tüfachi trawün 14 Nisan küyen mu, tüfa tati doy falin antü ñi mülen tripantu mu.

¹² Jesus ñi iyael ella pun mu kimeltukeeiñmu ka falin dungu kidu mu, fey tüfa kellueyew ñi wülal tañi mongen kom iñchiñ mu. Mülepalu Mapu mu, Jesus kimniengey tañi femngechi chengen. ¿Chem dungu chi?

JESUS PIWKEYEFENGEY

13. Juan 15:9 ka 1 Juan 4:8-10 ñi feypin mu, ¿chumngechi Jewba ka Jesus pengeli ñi piwkeyen? ¿Iney engün kümelkakeeyew tüfachi piwkeyen?

¹³ Kom tañi femün mu, Jesus müna küme inayentufi fente taiñ piwkeyeetew Jewba (papeltunge Juan 15:9; 1 Juan 4:8-10). Doyelchi may Jesus tañi piwkeyen mu eluwi ñi wülal ñi mongen iñchiñ mew. Dullingeliyiñ rume taiñ mülepual wenu mu kam koneltuleliyiñ rume pu “kakelu ufisa”, kom iñchiñ kümelkakeeiñmu Jesus ñi wülkünuel tañi mongen, femlu tüfa pengeli tañi Chaw engu taiñ fütra piwkeyeetew (Juan 10:16; 1 Juan 2:2). Ka rakiduamaiñ, tüfachi Trawün ñi akordangeal müte küdawngelay tañi pepikangeal. Tüfa pengeli Jesus ñi piwkeyefiel ka duamniefiel tañi pu inanieetew. ¿Chumngechi?

14. Jesus, ¿chumngechi pengeli ñi piwkeyefiel tañi pu inanieetew?

¹⁴ Chumngechi ngüneduampeiñ, Jesus elkünuy kiñe trawün müte küdawngenolu ñi femngeal, femngechi pengeli ñi piwkeyefiel tañi pu inanieetew dullingelu ñi mülepual wenu mu. Rupalu ta tripantu, feychi pu dullingelu ka müley ñi pepikayal tüfachi Trawün fillke tripantu chem dungu rupale rume, karselkonküleafuy rume (Apok. 2:10). Feytachi pu dullingelu, ¿inapeafuyngün may Jesus ñi feypin? Femi llemay.

15, 16. Kiñe peñi ka kiñeke lamngen rupalu wedake dungu mu, ¿chumi ñi akordayal Jesus tañi lan?

¹⁵ Fantepu mu, pu rüf kristiano ka eluwkey trawüluwal ñi akordayal Jesus tañi lan. Fey tunte tañi pepilnieel, eluwingün inayal chumngechi ñi femngen Jesus ñi iyael ella pun mu, wedake dungu rupafulu engün rume. Nütramkayaiñ ñi femün kiñe peñi ka kiñeke lamngen. Taiñ peñi Harold King karselkonkülefuy China mapu mu, feymu ñi pepikayal ti Trawün Jesus tañi lan ñi akordangeal mülefuy ñi küme rakiduamal chumngechi tañi femal. Feymu ellkankechi pepikakünuy ti kofke ka ti pulku, ñi femal tüfa nüfi tañi nieel müten karsel mu. Kafey yafüluwi ñi küme nentukuentayal, fey ñi kimal chumül ñi femngeal tüfachi trawün. Fey puwlu chi antü, taiñ peñi Harold kidulelu tañi katrüntuku karsel mu, ülkantuy, ngillatuy ka wüli kiñe wewpin Biblia mu.

¹⁶ Ka nütramkayaiñ ñi femün kiñeke lamngen. Petu ñi mülen ti Epungechi Fütra Weychan (Awkan) kom Mapu püle, feytachi pu lamngen karselkonkülefuy chew ñi rume küdawken pu püresu, fey kuñiwün mu tukuy ñi mongen ñi akordayal Jesus tañi lan. Welu küdawngenolu kay ñi femngeal tüfachi Trawün, taiñ pu lamngen ellkankechi pepikakünuy ti Trawün. Kidu engün feypi: “Wall witraleiñ, rangiñ mu müley kiñe pünotuwe nielu kiñe fülang pañu, wentetu müley ti kofke ka pulku. Kiñe üykülechi fela müten pelontunieeiñmu, üyümfuliyiñ kay doy küme pelontuwe pengeafuiñ. [...] Ka wiñome feypikünufiyiñ taiñ Fütra Chaw kom newen mu kelluntukualu iñchiñ ñi püramyengeal ñi fütra üy”. ¡Afmatufali llemay ñi fütra feyentun engün! Jesus kay pengeli ñi fütra piwkeyen elkünulu kiñe trawün küdawngenolu ñi femngeal, femngechi iñchiñ trawüluwafuiñ akordayal tañi lan chem dungu rupafule rume.

17. ¿Chem kümeafuy taiñ ramtuwal?

¹⁷ Fülkülepale ti Trawün Jesus tañi lan ñi akordangeal, kümeafuy taiñ ramtuwal: “¿Chumngechi doy küme inayentuafun ta Jesus ñi piwkeyen? ¿Doyümniekepen may pu peñi, pu lamngen ñi kümelkaleal? ¿Ayükepefun may pu peñi, pu lamngen ñi femal tañi pepilnoel engün? ¿Kam küme kimnien chem tañi pepilnoel?”. Fill antü inayentuaiñ ta Jesus ka pengelaiñ taiñ piwkeyewün (1 Ped. 3:8).

LONGKONTUKUAIÑ TÜFACHI KIMELTUN

18, 19. 1) ¿Chem küme kimnieiñ? 2) ¿Chem eluwküleymi tami femal?

¹⁸ Rumel trawüluwlayaiñ akordayal Jesus tañi lan. “Küpatule” ta Jesus ti fütra kutrankawün mu, trapümafi “tañi dullielchi pu che” wenu mapu mu. Rupale tüfa, femngewelayay ti Trawün Jesus tañi lan ñi akordangeal (1 Kor. 11:26; Mat. 24:31).

¹⁹ Femngewelayay tüfachi trawün küdawngenolu ñi pepikangeal, welu ¿chem küme kimnieiñ? Küpalechi antü mu, pu poyekefilu ta Jewba ayüwünkechi longkontukuay chem pengelkey tüfachi trawün Jesus mu: ñi ñom piwkengen, llükakenon ka piwkeyen, iney no rume turpu fente küme pengelkelay tüfachi küla dungu Jesus reke. Kafey kom pu trawüluwlu ñi akordayal Jesus tañi lan, nütramkalelafi ta kakelu che tüfachi trawün mu femngewenole tüfa. Müna kümelkayaeyew allkütule engün tüfa. Welu taiñ kümelkayaetew famülke mu, eluwküleaiñ inayentual Jesus ñi ñom piwkengen, llükanon ka piwkeyen. Femngechi femliyiñ, Jewba kümelkayaeiñmu llemay (2 Ped. 1:10, 11).