Pengelngekey piwkeyewün ka nor dungu femngele wedake dungu (Trokiñ 3; 4 trokiñ nüwkülelu)

1. Tañi feypilen Salmo 5:4-6, ¿chem rakiduamkey Jewba ti wedake dungu mu?

CHAW JEWBA üdekey kom wedake dungu. Biblia feypi: “Eymi Chaw Ngünechen ayüwmakelaymi wedake dungu mu. Kiñe weda chengelu no rume mülenaglayafuy eymi mu. Kiñe mallma che no rume witralelayafuy eymi tami adkiñ mu. Üdekefimi kom pu wedalkakelu. Apümkayafimi kom pu koylatukelu. Jewba üdekefi pu che kewatufengelu ka ngünenkachekelu” (Salmo 5:4-6). Feymu lle rume üdekefi podngechi dungu ñi femngen pu pichikeche, fey tüfa kiñe fütra weda dungu ka rume ünufali. Ka femngechi iñchiñ, üdekefiyiñ podngechi dungu ñi femngeken pu pichikeche, fey newentun mew famentuafiyiñ mülerumele tüfachi weda dungu ti trawünche mew (Rom. 12:9; Eb. 12:15, 16).

2, 3. Pu femkefilu podngechi dungu tati pu pichikeche, ¿chumngechi kayñetukefi “Kristo tañi ley dungu”?

² Pu che podngechi dungu femfilu pu pichikeche kayñetukefi “Kristo tañi ley dungu” (Gal. 6:2). ¿Chumngechi femkey tüfa? “Kristo tañi ley dungu” fey ta kom ñi kimeltuel Jesus tañi feypin ka tañi femün mu, fey tüfa nüwküley piwkeyen mu ka rumel norngey chumngechi ngüneduamiyiñ rupachi chillkatun mu. Welu pu femkefilu podngechi dungu pu pichikeche kidutu duamuwkey müten ka wedalkakefi pu pichikeche, feymu tüfa engün rakiduamürpukey “iney no rume ingkañpekelaenew ka piwkeyelaenew rume”. Iñchiñ, pu rüf kristiano ngen, inaniekefiyiñ tüfachi ley, feymu küme trokituniekefiyiñ pu pichikeche, femngechi pekeyngün taiñ duamniefiel ka piwkeyeniefiel.

³ Wall Mapu püle femngey podngechi dungu pu pichikeche, ¡müna weda dungu tüfa! Kiñeke trawünche mu ka rupakey tüfachi dungu. ¿Chumngelu (chemu)? Famülke mu müley fentren che “wesake piwkengelu ka tati ngünenkachekelu”, kiñeke engün ayüniey ñi konal trawünche mu (2 Tim. 3:13). Kafey kiñeke poyekefulu ta Jewba eluwingün ñi inayal tañi weda illutukeel, fey podngechi dungu ñi femafiel pu pichikeche. Fewla ngüneduamaiñ chumngelu tüfa kiñe fütra kulpan tati. Nütramkayaiñ ñi chumken pu longkolelu podngechi dungu femngele pu pichikeche ka mülele kakelu fütrake kulpan. Ka ngüneduamaiñ chumngechi pu chaw ka ñuke kuñiwtukuafuy tañi pu pichikeche.b

KIÑE FÜTRA KULPAN

4, 5. Tati pu pichikeche podngechi dungu femngekelu, ¿chumngechi duamkülekeyngün?

⁴ Pu pichikeche femngelu podngechi dungu kutrankawkey fentren tripantu. Ka femngechi kutrankawkey pu che tañi piwkeyeetew engün: tañi familia ka pu peñi ka lamngen trawünche mu. Feychi che femfilu podngechi dungu ta kiñe pichi wentru kam kiñe pichi malen rume wedalkay ka fütra kulpay.

⁵ Rume wedalkafi tati pichi wentru kam tati pichi malen. Kiñe che wedalkafilu tañi chafche ka kutrankafilu, kulpakey llemay. Küpalechi chillkatun mu doy ngüneduamaiñ tüfa, welu feychi che femfilu podngechi dungu ta kiñe pichi wentru kam pichi malen rume kutrankakefi fillke dungu mu. Tañi weda femngen mu, ti pichi wentru kam pichi malen kidutu maneluwkelay ka küme felewetulay ñi mongen no rume. Feymu müley taiñ kuñiwtukuafiel pu pichikeche ñi nüntukangenoal ka ñi femngenoal podngechi dungu. Kafey müley taiñ yafültukuafiel ka kelluafiel pu rupalu tüfachi weda dungu mu (1 Tes. 5:14).

6. Pu femkefilu podngechi dungu tati pu pichikeche, ¿chumngelu fente wedalkafi ti trawünche?

⁶ Rume wedalkafi tati trawünche. Kiñe kristiano femfile podngechi dungu ta kiñe pichi wentru kam kiñe pichi malen, weda dunguyengeay tati trawünche (Mat. 5:16; 1 Ped. 2:12). ¡Müna weda! Feychi che müten weda femi, welu fentren peñi ka lamngen weda dunguyengeafuy yafüluwkülelu rume ñi ayüwülafiel ta Jewba (Juda 3). Iñchiñ famentukefiyiñ chem kristiano rume femle wedake dungu ka norümtunole ñi rakiduam, fey ñi femün mu weda dunguyengeafuy ti trawünche.

7. Pu femkefilu podngechi dungu tati pu pichikeche, ¿chumngelu yamlafi pu awtoridad?

⁷ Yamlafi pu awtoridad. Pu kristiano müley tañi “yamnieafiel tati mülechi pu awtoridad” (Rom. 13:1). Inayaiñ tüfachi ngülam, yamniefiliyiñ ka inaniefiliyiñ ti ley dungu ñi mülen taiñ trokiñ mapu mew. Kiñe peñi kam lamngen femfile podngechi dungu pu pichikeche kam femle chem dungu rume ñi katrütukeetew tati ley, pengelay ñi yamnofiel pu awtoridad (ka ngüneduamafuymi Hecho 25:8). Pu longkolelu feypimekelafingün tati trawünche ñi inayafiel pu awtoridad ñi ley. Welu kiñe kristiano femle tüfachi podngechi dungu kam nüntukan dungu, tati pu longkolelu ingkalayafingün pu awtoridad mew (Rom. 13:4). Chumngechi ñi femün tati kulpalu, ka femngechi kosechayay (Gal. 6:7).

8. Kiñe che wedalkafile ta kangelu che, ¿chem rakiduamay Jewba?

⁸ Doyelchi may kulpay Chaw Ngünechen mew (Sal. 51:4). Kiñe che wedalkafile ta kangelu che, kulpayay Chaw Jewba mu. Longkontukuaiñ chem pilen ti Ley dungu Jewba ñi elufiel pu israelche. Feytachi Ley feypi iney rume ngünenkafile tañi chafche, fey kulpayay Chaw Ngünechen mu (Lev. 6:2-4). Feymu llemay kiñe kristiano femfile podngechi dungu ta kiñe pichi wentru kam kiñe pichi malen kulpayay Chaw Dios mu. Tañi femün mu tüfachi kristiano, küme felewetulayay tati pichi wentru kam tati pichi malen ka weda dunguyengeay ta Jewba. Feymu llemay feypiafuiñ pu femkefilu podngechi dungu pu pichikeche fütra kulpakey Chaw Ngünechen mu, fey feley taiñ üdeafiel tüfachi weda dungu.

9. Rupayechi tripantu mu, ¿chem kümeke kimeltun wülkey Jewba tañi trokiñche? ¿Chumngelu kay?

⁹ Rupayechi tripantu mu, Jewba tañi trokiñche wülkey fentren kimeltun Biblia mew tripalu, fey tüfa nütramkakey tüfachi weda dungu mu ñi femngeken pu pichikeche. Ngüneduamaiñ kiñeke tüfa. Ti chillka Ti Werken ka ¡Tami kimafel! nütramkay ñi chumafel pu che femngelu podngechi dungu petu pichikalu engün, femngechi tañi doy küme duamtual. Tüfachi epu chillka ka nütramkay chumngechi kelluafuiñ ka yafültukuafuiñ feyti rupalu tüfachi weda dungu mu, ka chumngechi pu chaw ka ñuke kuñiwtukuafuy tañi pu pichikeche. Jewba tañi trokiñche elukefi pu longkolelu fillke ngülam Biblia mew tripalu, femngechi kimnieyngün chem chumal kiñe kristiano femfile podngechi dungu tati pu pichikeche. Kafey Jewba tañi trokiñche wiño ngüneduamniekey tüfachi ngülam ñi elukefiel pu longkolelu tañi doy küme chaftuafiel tüfachi weda dungu, femngechi kom taiñ pu longkolelu doy küme inakefingün Kristo ñi ley dungu.

WEDA KULPALE KIÑE CHE, ¿CHUMAY PU LONGKOLELU?

10. Weda kulpale kiñe peñi kam kiñe lamngen, ¿chem longkontukuay pu longkolelu? ¿Chem fillke dungu femkeyngün?

¹⁰ Weda kulpale kiñe peñi kam kiñe lamngen, pu longkolelu longkontukunieafingün Kristo ñi ley dungu, tüfa werküeyew ñi femal chem ñi norngen Jewba tañi adkiñ mu, ka femngechi piwkeyenkechi kelluafiel pu peñi ka pu lamngen. Feymu kimün mu pu longkolelu kiñe che ñi weda kulpan trawünche mu, femkeyngün fillke dungu. Kidu engün doyümkey ñi püramyengeal ta Jewba ka ñi weda dunguyengenoal (Lev. 22:31, 32; Mat. 6:9). Kafey pu longkolelu kellukefi kakelu peñi ka pu lamngen tañi püntütripanoal Jewba mu ka yafültukukefi pu weda femngelu.

11, 12. Tañi feypilen Santiaw 5:14, 15, ¿chem eluwkey ñi femal pu longkolelu?

¹¹ Kafey pu longkolelu ngüneduamfile ñi rüf wiñorakiduamtulen tati kulpalu, kelluafingün tañi weniyetuafiel ta Jewba (papeltunge Santiaw 5:14, 15). Feychi kristiano inafilu ñi weda illutukeel ka weda kulpalu müte weniyewelafi Jewba, feymu kutranküley reke.c Pu longkolelu trürümafuiñ pu doctor mu. Kidu engün eluwkey ñi kelluafiel tati kulpalu, fey tañi tremotual reke. Fey elukefingün tati kulpalu kümeke ngülam Biblia mu mülelu, femngechi tañi fülkontual Jewba mu. Welu tati kulpalu müley tañi rüf wiñorakiduamtual, femngechi müten kelluaeyew pu longkolelu (Hecho 3:19; 2 Kor. 2:5-10).

¹² Feley llemay, pu longkolelu niey kiñe fütra küdaw. Jewba elfalkünueyew ñi kuydayafiel pu peñi ka pu lamngen, feymu kidu engün müna piwkeyefi tati trawünche (1 Ped. 5:1-3). Pu longkolelu ayüniey kom pu peñi ka pu lamngen ñi küme duamküleal tati trawünche mu. Feymu kimlu engün kiñe che ñi femfiel podngechi dungu ta kiñe pichi wentru kam kiñe pichi malen, müchay müten ngüneduamkefingün feychi weda dungu. Ka femngechi femkey kimlu ñi mülen kakelu fütrake kulpan. Taiñ doy kimal, ngüneduamafiyiñ ti ramtun ellakonlu parrafo 13, 15 ka 17.

13, 14. Pu longkolelu allküle ñi femngen podngechi dungu kiñe pichi malen kam kiñe pichi wentru, ¿kimelelpeafingün may pu awtoridad? ¿Chumngelu?

¹³ Pu longkolelu allküle ñi femngen podngechi dungu kiñe pichi malen kam kiñe pichi wentru, ¿kimelelpeafingün may pu awtoridad? Femkey llemay, femngechi ñi inayafiel ti ley dungu. Kiñeke trokiñ mapu niey ley dungu, tüfa feypiley pu che allküle ñi femngen podngechi dungu pu pichikeche müley ñi kimelelafiel tati pu awtoridad. Feychi ley chaftukelafi Chaw Dios tañi ley dungu, feymu pu longkolelu inakefi (Hecho 5:28, 29; Rom. 13:1). Pu longkolelu allküle ñi femngen podngechi dungu kiñe pichi wentru kam kiñe pichi malen, müchay müten eluway ñi kimal chumngechi inayafiel ti ley dungu ñi kimelelafiel tati pu awtoridad.

¹⁴ Pu pichikeche femngelu podngechi dungu pu longkolelu nütramkakefi tüfa engün ka tañi pu chaw ka ñuke, kafey kom kimfilu tüfachi dungu, fey feypikefingün: “Weda dungu no amulmün tati pu awtoridad mew”. Welu kiñeke mu kiñe che trawünche mu dalluntukungeafuy ñi weda femfiel kiñe pichi wentru kam kiñe pichi malen, fey kom püle kimngerpuafuy ti dallukan dungu. Rupale tüfa, kiñe kristiano dalluntukule ngelay ñi weda duamal. Kidu ñi dalluntukun mu weda dunguyengelayay ta Jewba, welu tati kulpalu ñi femün mew mayfe.

15. Kiñe trokiñ longkolelu ñi ramtukadunguafiel ti kulpalu, ¿chumngelu duamfali epu che ñi dalluntukual chumngechi feypiley 1 Timotew 5:19?

¹⁵ Kiñe trokiñ longkolelu ñi ramtukadunguafiel ti kulpalu, ¿chumngelu duamfali epu che ñi dalluntukual? Femngechi ñi inayal engün Biblia ñi feypin tañi müleal nor dungu. Kiñe che entudungunole tañi kulpan, duamfali epu che tañi dalluntukuaetew, femngechi müleay kiñe trokiñ longkolelu ñi ramtukadunguafiel ti kulpalu (Deut. 19:15; Mat. 18:16; papeltunge 1 Timotew 5:19). Welu epu che dalluntukunofile kiñe che ñi weda femfiel pu pichikeche, ¿dalluntukungepeafuy may pu awtoridad mu? Femafuy llemay. Kiñewkülenole rume epu che tañi dalluntukun, pu longkolelu kam iney rume trawünche mu ayüle, amuafuy pu awtoridad mu ñi dalluntukuafiel kangelu che ñi femün rume weda dungu, duamfalngelay epu che ñi dalluntukun.

16. Kiñe che trawünche mu dalluntukungele ñi femfiel podngechi dungu pu pichikeche, ¿chumay pu longkolelu?

¹⁶ Kiñe che trawünche mu dalluntukungele ñi femfiel podngechi dungu pu pichikeche, ¿chumay pu longkolelu? Wüne, eluway ñi inayal chem pin pu awtoridad ñi ley dungu. Ka epu, ngüneduamayngün chem ñi rüf rupan. Fey wüla, Biblia ñi feypilen mu dulliayngün ñi duamfalngepen may kiñe trokiñ longkolelu ñi ramtukadunguafiel ti kulpalu. Ti dalluntukungelu feypile ñi kulpanon, pu longkolelu nütramkayafingün kakelu che kimlu chi tañi chem rupan. Kiñe trokiñ longkolelu ñi ramtukadunguafiel ti kulpalu duamfali epu che rume ñi dalluntukual: tati dalluntukufilu ti kristiano ka kangelu che feypilu ñi rüfngen tati dalluntukun kam feypilu feychi che ñi femfiel podngechi dungu ta kakelu pichikeche.d Kiñe che müten dalluntukule, tüfa feypilay tañi koylatumeken. Kiñeke mu ngelay kangelu che feypilu ñi rüfngen tüfachi dallukan dungu, welu pu longkolelu kimniey ñi weda kulpan chi tati dallukangelu ka rume wedalkafi chi ta kakelu che. Feymu llemay pu longkolelu amuley ñi kellukefiel pu wedalkangelu. Kafey kuñiwtukukefingün tati trawünche, fey tañi chumnoaetew tati dallukangelu (Hecho 20:28).

17, 18. Femngele podngechi dungu, ¿chumay ti trokiñ longkolelu?

¹⁷ Ti trokiñ longkolelu ñi ramtukadunguafiel ti kulpalu, ¿chumkey? Kiñe kristiano weda kulpale, tüfachi trokiñ longkolelu dulliay ñi mülekayal trawünche mu kam ñi wemünentungeal. Welu tüfachi pu longkolelu jusgalayay tüfachi kulpafe tañi püresuntukuaetew pu awtoridad. Doy may pu longkolelu kimniey, pu awtoridad feley ñi jusgayafiel pu yamnofilu ti ley dungu (Rom. 13:2-4; Tito 3:1).

¹⁸ Welu trawünche mu pu longkolelu elfalkünungey ñi ramtukadunguafiel tati kulpalu. Feymu Biblia tañi feypilen mu, tüfachi trokiñ longkolelu kimtukukeyngün ñi rüf wiñorakiduamtukepen may tati kulpalu. Wiñorakiduamtunole ti kulpalu, wemünentungeay ka feypingeay tati trawünche feychi che ñi koneltuwenon pu Dungukelu Iney Ngen Jewba mu (1 Kor. 5:11-13). Welu wiñorakiduamtule ti kulpalu mülekayay trawünche mu, fey pu longkolelu feypiaeyew ñi elungenoal elfal küdaw trawünche mu fentren tripantu kam tuntepun ñi mongen chi. Pu longkolelu rume ayüniey ñi kümelkaleal pu pichikeche, fey wichu feypiafi pu nielu pichikeche: “Kuñiwtukuafimu tamu pichikeche fülkülele feychi che”. Welu feypile tüfa pu longkolelu, feypilayay chem pichikeche ñi femngen podngechi dungu.

¿CHUMNGECHI KUÑIWTUKUAFUYMI TAMI PU PICHIKECHE?

19, 20. Pu chaw ka pu ñuke, ¿chumafuymün kuñiwtukuafiel tamün pu pichikeche?

¹⁹ Eymün pu chaw ka pu ñuke, Chaw Dios llemay elueymünmew tamün pichikeche, fey kiñe falin regalo reke feleyngün (Sal. 127:3). Feymu müley tamün kuñiwtukuafiel tamün pichikeche chem kuñiwün dungu mu rume.e Fey, ¿chumafuymün am ñi femngenoal podngechi dungu tamün pichikeche?

²⁰ Wüne, eluwnge tami doy kimal. Kimürpunge chem che femkefi podngechi dungu tati pu pichikeche ka ñi chumken tañi ngünenkayafiel. Inaduamfinge chem dungu kuñiwün-ngeafuy ka chem che wedalkayafuy tami pu pichikeche (Prov. 22:3; 24:3). Fentren pichikeche wedalkakeeyew kidu ñi kimelchi che ka tañi manelniefiel.

21. Pu chaw ka pu ñuke, ¿ka chem femafuymün kuñiwtukuafiel tamün pu pichikeche?

²¹ Epu, küme nütramkange tami pu pichikeche engün (Deut. 6:6, 7). Kafey kim allkütuafimi engün (Sant. 1:19). Longkontukuaymi, pu pichikeche ta femngelu podngechi dungu küdawtukey ñi nütramkayal tüfa. Kiñeke pichikeche llükalekey ñi feyentungenoal. Ka kiñeke mu kakelu pichikeche aneltungekey ñi nütramkanoal chem ñi rupan. Feymu kangentufilmi tami pu pichikeche, piwkeyenkechi ramtuafimi, fey küme allkütuafimi ñi chem pial.

22. ¿Ka chem femafuymün pu chaw ka pu ñuke? (Inaduamnge ti adentun wenulelu).

²² Küla, kimeltufinge tami pu pichikeche. Nütramkalelafimi kudumuwün dungu mu. Welu tami femal tüfa, longkontukunge tunten tripantu niey tami pu pichikeche ka tunte kimafuy. Kafey kimeltufinge chem femafuyngün ka chem piafuyngün ta iney rume ayüle ñi malütuaetew. Inaduamfinge chem ñi kimeltuel Jewba tañi trokiñche ñi kuñiwtukuafiel pu pichikeche, femngechi tami küme kimeltulelafiel engün (inaduamnge ti wichulechi dungu “Ñi doy kimal pu chaw ka pu pichikeche”).

23. 1) Ñi femngen podngechi dungu pu pichikeche, ¿chem rakiduamkeiñ? 2) ¿Chem ramtun ngüneduamaiñ küpalechi chillkatun mu?

²³ Iñchiñ pu Dungukelu Iney Ngen Jewba üdekefiyiñ ñi femngeken podngechi dungu pu pichikeche, fey tüfa kiñe weda kulpan ka rume ünufali. Kom iñchiñ inaniekefiyiñ Kristo tañi ley dungu, feymu iney no rume ellkalkelafiyiñ tañi weda femfiel pu pichikeche. Küpalechi chillkatun mu ngüneduamaiñ tüfa: ¿chumngechi kelluafuiñ pu nüntukangelu ka femngelu podngechi dungu?