Ngünechen petu ñi apümkanofiel pu che, ¿yochi küme ngüfetukepefi may?

KIÑE che müley tañi ruka mu, fey ngüneduamfi tati degiñ (volcán), pefi ñi pitrunkülen tati degiñ ka ñi tromükünuwün ti kallfü wenu, “¡treynagpayay ti degiñ!” pi. Feymu matu amuy ñi feypimeafiel kom tañi pu karukatu, fey tañi lefmawal engün tañi montual tüfachi weda dungu mu ñi rupayal.

Ka femngechi Jewba feypikefi kom pu che Mapu mew mülelu ñi fülkülepan kiñe doy fütra weda dungu. ¿Chumngechi femkey tüfa? ¿Chumngelu (chemu) kimnieiñ Jewba ñi yochi küme ngüfetukefiel tati pu che, fey ñi pepi montual? Taiñ wiñoldungual tüfachi epu ramtun, ngüneduamaiñ chumngechi ñi ngüfetufiel Jewba tati pu che kuyfi mu.

NGÜNECHEN, ¿CHUMNGECHI NGÜFETUFI PU CHE KUYFI MU?

Fütra kuyfi mu mülekefuy ta che, kidu tañi ngünewün mu famentukefi Jewba tañi werkün dungu. Feymu kidu fentren rupa feypieyew ñi apümkayafiel engün (Prov. 10:⁠25; Jer. 30:⁠23). Fill rupa, Jewba yochi küme feypikünufi ñi apümkangeal engün, welu ka feypifi chumngechi küme elkünutual tañi femün engün (2 Rey. 17:⁠12-15; Neh. 9:⁠29, 30). Chaw Ngünechen rume ayüniefuy ñi küme feyentual tati pu che, feymu fentren rupa werküfi tañi pu poyekeetew ñi feypiafiel tati pu wedake che tañi chumlerpual engün. Tüfachi pu werken ka feypifi pu wedake che ñi duamfalngen tañi pürüm müten küme elkünutual tañi femün (Amós 3:⁠7).

Kiñe tüfachi pu che ñi werküel ta Jewba, fey ta Noe. Kidu ñi antü mu, pu che kewafengefuy ka podngechi mongen yeniekefuy, feymu Noe fentren tripantu feypifi tati pu che: “Mangiñmayay ta mapu” (Gén. 6:⁠9-13, 17). Noe ka feypifi tati pu che chem müley tañi femal, fey tañi montual engün. Noe rume yafüluwkefuy tañi amuldungucheal, feymu Biblia feypi: ‘Noe amuldungukefuy ta che ñi nieafel lif mongen’ (2 Ped. 2:⁠5).

Fentren amuldunguchelu rume ta Noe, pu che feyentulaeyew ka allkütulafingün Chaw Ngünechen ñi werkün dungu. Feymu küpalu ti fütra mangiñ ko, “kom ürfi engün” (Mat. 24:⁠39; Eb. 11:⁠7). Tüfachi pu che feypilayafuy rume: “Ngünechen feypikünulaeiñmu chem tañi rupayal”.

Welu ka rupa, Jewba feypikünufi pu che tañi apümkangeal pichilewelu müten tañi femal. Femfule rume, Jewba elkünuy antü ñi duamnieel ta che, fey ñi dullial chem tañi chumal engün. Feychi dungu rupay Moyse ñi antü mu, Ngünechen elufi tati pu egiptoche mari fütra wedake dungu. Ngüneduamaiñ chem ñi rupan petu ñi küpalnofiel Jewba tati fütrake pire (llay), fey tüfa tati regle amulechi fütra weda dungu. Jewba werküfi ta Moyse ka Aaron ñi feypiafiel ta faraon ka tañi pu küdawfe: ‘Wüle nagpayay fütrake pire’. Fey, ¿niepeyngün may tiempo pu egiptoche tañi ellkawal engün? Biblia feypi: “Kiñeke che kellukefilu ta Faraon allkütufingün Jewba ñi feypin, fey pürüm yetufingün kake kiñeke tañi pu küdawelkeetew ka tañi kulliñ chew tañi kuñiwtukuwal. Welu pu allkütunofilu Jewba ñi feypin femkünufingün tañi pu küdawelkeetew ka tañi kulliñ lelfün mew” (Éx. 9:⁠18-21). Kimfali llemay, Jewba yochi küme ngüfetufi tati pu egiptoche. Femngechi ñi femün Jewba, pu che pürüm inafilu tañi werkün dungu fente kutrankawlayngün kakelu che reke.

Petu ñi küpalnon tati mari amulechi fütra weda dungu, Chaw Ngünechen feypifi ta faraon ka tañi pu kellukeetew chem ñi rupayal. Welu kidu engün müna wedalkayngün, famentufingün Ngünechen tañi feypietew (Éx. 4:⁠22, 23). Feymu lay tañi pu wünenke fotüm, ¡müna weda! (Éx. 11:⁠4-10; 12:⁠29). ¿Niepeyngün may antü pu egiptoche ñi dullial chem chumal? Feley llemay. ¿Chumngelu feypiafuiñ tüfa? Moyse pürüm feypifi pu israelche ñi küpayal tüfachi weda dungu ka chumngechi ñi montulafiel tañi pu che (Éx. 12:⁠21-28). ¿Tunten che allkütuy Ngünechen tañi werkün dungu? Doy küla millon che peno, fey tripatuyngün Egipto mapu mu. Tüfa mu koneltulefuy pu israelche, kiñeke egiptoche ka kakelu tuwün pu che (Éx. 12:⁠38; inaduamnge ti kimal dungu).

Chumngechi pengelkey feytachi rupan dungu, Jewba yochi küme ngüfetukefi tati pu che, fey ñi dullial chem tañi chumal engün (Deut. 32:⁠4). ¿Chumngelu? Tati apostol Pedro feypi Chaw Jewba ayünielay “iney no rume ñi layael, welu kom che ñi wiñorakiduamtuael ta Ngünechen mew” (2 Ped. 3:⁠9). Feley llemay, Chaw Jewba rume duamtukefi ta che. Feymu petu ñi apümnofiel pu inaniekenoetew, ayüniefuy kidu engün ñi wiñorakiduamtual ka inayal tañi werkün dungu (Is. 48:⁠17, 18; Rom. 2:⁠4).

ALLKÜTUAIÑ NGÜNECHEN TAÑI WERKÜN DUNGU

Famülke mu, amuldungukefiyiñ ta kom che, fey ñi kimal engün chem tañi rupayal. Mülepalu Jesus Mapu mew, kidu feypikünuy ñi apümkangeal kom wedake dungu ñi mülen akule tati “fütra kutrankawün” (Mat. 24:⁠21). Kidu feypikünuy fillke dungu ñi rupayal, fey tañi pu inanieetew peafuyngün feychi dungu ka ngüneduamafuyngün ñi epe akulen feychi fütra kutrankawün. Famülke mu penieiñ ñi rupameken fentren wedake dungu ñi feypiel ta Jesus (Mat. 24:⁠3-12; Luka 21:⁠10-13).

Feymu Jewba feypikefi ta che ñi poyeaetew ka allkütuaetew tañi werkün dungu. Kidu ayüniey pu feyentulechi pu che ñi doy küme mongen nieal famülke mu ka ñi llowal doy kümeke dungu küpalechi antü mu (2 Ped. 3:⁠13). Jewba ayüniey pu che tañi maneluwal tañi feypikünuel, feymu kimeltukefi ti “kümeke dungu ñi Ngünenien mu”, fey ñi montual engün. Jesus feypikünuy tüfachi kümeke dungu “kimelngeay ta kom Mapu mew, femngechi kom trokiñke mapu ñi kimael engün” (Mat. 24:⁠14, TNM). Chaw Ngünechen adkünufi tañi pu che ñi amuldungual, fey femkeyngün feytachi küdaw 240 trokiñ mapu mew. Kidu ayüniey fentren che ñi allkütual tañi werkün dungu, fey ñi montual engün apümkangele pu wedake che (Sof. 1:⁠14, 15; 2:⁠2, 3).

Fey, ¿chem pituafuiñ wüla? Ngünechen, ¿yochi küme ngüfetukepefi may tati pu che petu ñi apümkanofiel? Femkey llemay. Chumngechi taiñ ngüneduampeel, Jewba afkentu yochi küme ngüfetukefi pu che. Welu, ¿pu che kay? ¿Allkütupeayngün may Ngünechen tañi feypin petu ñi puwnon tañi antü? Feychi dungu llemay ta falin-ngey. Feymu kom iñchiñ kellunieafiyiñ doy fentren che ñi montuluwal apümkangele kom wedake dungu.