Tami tukulpayal ti fütra trawün küla antü ngealu
Tunteñma amuay chi fütra trawün. Nülangeay ti wülngiñ 8:00 konchi liwen mew. Küla antü mew tati tayültun dungu llituay ellakon mu ti trawün 9:20 ora. Feychi mu kom müley taiñ anüleal ti wangku mu, femngechi küme llituay ti trawün. Vierne ka sabado antü mu, ti trawün dewpelayay 5:00 konchi nagantü mew, ka domingo antü mu deway dew rupale 4:00 konchi nagantü mew.
Fillke ülkantun taiñ püramyeafiel Jewba. Kuyfi mu, Chaw Ngünechen tañi pu che püramyefingün ta Jewba fillke ülkantun mew. Famülke mu, petu falin-ngey tati ülkantun taiñ rüf poyeafiel Jewba (Sal. 28:7). Tati fütra trawün ñi fillke trokiñ llituy kiñe tayültun mew. Tüfachi tayültun re ülkantun no tati, welu pepikangey taiñ püramyeafiel Jewba ka kimürpual ñi küme dungu. Feymew, tati longkolelu ‘amuleay ti tayültun’ feypile, kom müley taiñ anüal ka küme allkütuafiel, nütramkalayafiyiñ kakelu che. Femngechi pengelaiñ falintuniefiel pu peñi ka lamngen tañi fütra küdaw ñi femkeel engün tati orkesta Watchtower mew. Epu rupa tati tripantu mu, kidu engün kullikeyngün ñi amual Patterson mew (Nueva York) ñi dewmangeal fillke tayültun dungu ayüfalngelu iñchiñ taiñ ayüwküleal. Fey allkütuliyiñ ti tayültun dungu, püramyeafiyiñ ta Jewba kiñe ülkantun tañi Ngünenien mew.
Chew ñi elngekem tati auto. Iñchiñ ngünenieliyiñ chew ñi elngekem ti auto, kullilayaymi tami elkünual ti auto, ka ñi akumeken mu adkünuniengeay. Kiñeke mu rume alükelay chew ñi elngekem auto, feymu mangeluwayiñ tamün amual kiñe auto mu müten. Tati pu kutrankülechi che nieyngün chew ñi elngekem auto, welu fey mu müten müleay tati auto nielu tati letrero kam ti patente pengelkelu ñi kutrankülen ti che.
Wangku. Nülangele tati wülngiñ, lefkinolnge tami kintual ti wangku tami doy ayülen, notukayawkilnge. Piwkeyechefengeaymi, anülelmi rume chew tami ayünoel. Kiñe püle künufiliyiñ taiñ kidutu kümelkawal, pengelafuiñ taiñ rüf kristiano ngen ka feychi che taiñ penieetew püramyeafingün ta Ngünechen (Juan 13:34, 35; 1 Kor. 13:5; 1 Ped. 2:12). Tukulpange tami dullial ti wangku tami miyawülelchi che tami auto mew, tami ruka mu nieelchi pu che, ka tati pu chillkatukelu Biblia eymi mu. Elkünulayaymi tami weshakelu kiñe wangku tami duamnienoel. Femngechi, pu che peayngün ñi anüam. Wichulekey kiñeke wangku ñi anüam pu füchakeche ka kutrankülelu. Pichin wangku mülelu am, tati kutrankülelu kam füchalu pepi kompañnielaeyew kom tañi pu che. Fürenemuaiñ, elelfinge tüfachi wangku tati pu füchakeche ka tati pu kutrankülelu ka tati pu kellukeetew.
Küme takun. Ti fütra trawün mew, müley taiñ kümeke ka ayüfalngechi takun yenieal, ka inalayafiyiñ chumngechi ñi weda adkülelu ñi takun tati pu che tüfachi Mapu mew (1 Tim. 2:9). Ka wirintukufiliyiñ taiñ üy ti hotel mew, wiñoleltufiliyiñ ti katrüntuku chew ñi umawtumum, ka tripaliyiñ dew afle ti fütra trawün, ngelay taiñ pekan takun yenial. Femngechi yewelayaiñ taiñ yenieal ti tarjeta nielu taiñ üy ka taiñ amuldungual chew rume. Taiñ küme ad nien ka kümeke femken mu, tati küme piwkengechi che llowayngün tati werkün montuluwün dungu Biblia mew tuwlu, ka ayüwülafiyiñ ta Jewba (Sof. 3:17).
Chumngechi püneafiel ti elektroniko chemkün. Yenielmi kiñe celular kam kakelu elektroniko chemkün, küme adkünufinge, femngechi katrütulayafimi kakelu che ñi allkütual. Adümulmi kiñe kamara fotografika, de video, kiñe tablet kam kakelu chemkün, fey kakelu che tañi wedaduamkülenoal ka tañi küme peal chew ñi wewpingekem. Yamfalchengeaymi, feymu werkülayaymi duamfalngenochi dungu tami telefono mew, kam fillke electroniko chemkün mu petu amulelu chi trawün.
Iyael. Yenieaymi tami iñmual, femngechi ngillakamelayaymi ti ürkütun mew. Yeafuymi kiñe pichi nevera, mülepe miñche tami wangku mew. Yeniekilnge fidrio chemkün ka fütrake nevera tati fütra trawün mew.
Ayüwün ñi wülkeel. Pengelafuiñ taiñ mañumniefiel tüfachi fütra trawün Jewba ñi eluel, feymu ayüwünkechi wülaiñ taiñ plata taiñ kelluafiel tati küdaw wall Mapu püle femngekelu. Wülülmi tami plata kiñe cheque mew, müley tami wirintukual “Asociación Cristiana Testigos de Jehová” nentualu tati plata.
Lawen. Tati lawentuchefe eluñmale tami lawentual, fürenemuaiñ, yenieaymi tami duamfalchi lawen, tati fütra trawün am elungelayay lawen. Diabete kutran nielmi ka duamülmi jeringa ka aguja, chew rume tranakünulayafimi, müna kuñiwün-ngelu am. Ütrüfentulayafimi chew ñi elngekem ti pod fütra trawün mew ka ti hotel mew.
Ñi allfüwnoal tati pu che. Müna falin-ngey tañi allfünoal tati pu che tañi maynawün mew kam tañi trayafün mu. Fill tripantu allfükey kiñeke che yenienon mu kümeke sapatu ñi pünoam, ka tukunien mu alüpüralechi sapatu. Feymu küme sapatu yenieaymi tami küme trekayawal, femngechi kuñiwngelayay tami amual eskalera, rampa, rejilla, ka itrofill dungu mew.
Tati pu che müte allkütukenolu. Tati fütra trawün ka allkütungeay frecuencia modulada (FM) chew taiñ trawüken mu. Tami allkütual tüfa, müley tami yenieal kiñe pichi radio nielu bateria ka audifono.
Yenialu pu we püñeñ ka tati wangku teyfüfalngelu. Yeniekilnge feyti chem yeniealu pu we püñeñ ka ti wangku teyfüfalngelu chew taiñ trawüken mu. Yenieafuymi ñi anüam pu pichikeche, welu küme nüwkülele ti wangku mew.
Kolonia. Epe kom fütrake trawün femngekey ponwi kiñe fütra ruka mew, nielu kiñe makina tañi füshküleal. Feymu, tukuñmulayaymi kolonia rume nümün ngelu, femngechi pengelaymi tami piwkeyechen, tüfachi dungu am allfülafuy tati che kütrankülelu, pepi küme neyükenolu ka fill kutran nielu (1 Kor. 10:24).
Tati formulario Persona que mostró interés (S-43). Tüfachi formulario mew wirintukuafuymi tati pu che tami amuldunguel chew rume, feychi antü mu petu amulelu chi fütra trawün, ka doy küpa kimle. Dew wirintukulmi, eluafuymi tati Küdaw-we wülkelu papil, kam tati longkolelu ngüneduamkelu fillke werküelchi dungu tami trawünche mew dew afle ti fütra trawün.
Chew imeal. Taiñ kümeke femkeel chew taiñ imeal püramyekefi Jewba tañi fütra üy. Feymew küme takun yenieaymi kiñe kristiano Jewba ñi adkünuel reke. Ka wimtungele ñi elkünual propina, femaymi.
Hotel:
Elfalkünunge tati katrüntuku tami umawtual tami duamnieal müten, ka eluñmangenolmi doy che ñi umawtual tami katrüntuku mew, femkinolnge.
Kiñe weda dungu mülerumele, mütrümfemfinge ti hotel, ka feypiafuymi ‘duamlayan ti elfalkünuelchi katrüntuku’, femngechi ka che umawtuafuy chi hotel mu (Mat. 5:37). Femngechi dungu rupalmi ka mütrümülmi telefono mew, wirintukuafuymi tami elungeelchi numero. Epu antü mew mütrümnolmi, wiñoleltungelayaymi tami plata.
Tukulpange, pünefilmi tami tarjeta kullial ti hotel mu, tati hotel ngünenieay tunte plata ñi duamnieel tami tarjerta mu, femngechi kullial ti katruntuku, ka fillke chemkün wedañmawle tami tuntukufiel mu, petu tami mülen ti hotel mu. Püneafuymi feychi plata müfü antü mu amutulmi wüla, dew ngewenole chem dungu no rume tami kullial.
Pepikaküngele tati karo tami yenieal tami chemkün, fey müten yenieafuymi, ka wiñolfemtufinge kakelu che ñi püneafiel ti hotel mu.
Wimtungele, eluafuymi pichin plata tati küdawkelu hotel mew kellukelu ñi yenieal tami kutama, ka tati liftukelu ti katrüntuku.
Pepi dewmangele iyael ti katrüntuku mew, femafuymi.
Nentunielayaymi ti yafütun, kafe kam ti hielo wülkelu ti hotel ñi iñmual tati pu che ñi mülepan ti hotel mu, tami yeal tati fütra trawün mew.
Inayafimi chem ñi femkeel tati llowkelu Ngünechen ñi newen, femngechi kümelkayafimi tati küdawkelu ti hotel mew. Tukulpayaymi tati pu küdawfe kellukefingün ta fentren che, feymu tüfachi pu küdawfe müna mañumküleyngün iñchiñ taiñ piwkeyechen mu, ngenoafeluwün-ngen ka taiñ küme rakiduam nieel.
Tati pu chaw müley ñi küme ngüneytual tati pu pichikeche ñi mülen ti hotel mu, tati asensor mew, pisina, gimnasio ka ponwitu ti hotel mew.
Tati Lista de hoteles recomendados pengeli tunte tami kullial fill antü, welu feypilay tati impuesto. Doy kofrangetulmi, kullilayaymi ka pürüm feypintukunge tati Küdaw-we peal ñi umayam.
Kiñe weda dungu mülele tami katrüntuku mew, feypintukunge tati Küdaw-we peal ñi umayam, petu tami mülen ti fütra trawün mew.
Ti küpa kellukelu. Kom tati küpa kellukelu müley tañi amual tüfachi küdaw-we mu. Tati pu nienolu 16 tripantu ka küdawafuy, welu müley tañi kompañaetew tañi chaw, kam tañi ñuke, kam tañi ngüneytukeetew kam kiñe che kidu engün ñi elkünuel.