Kellufinge ti pu trawma ñi kimafiel Jewba
1. ¿Chumngechi pengeli Jesu ñi kutranpiwkeyefiel pu trawma?
1 Pichilewechi antü Jesu ñi lagümngeal. Amulelu ñi tripayal Jeriko waria mu, epu trawma llellipueyew: “¡Ñidol, [...] kutranpiwkeyemuyu!” Jesu rakiduamkülelu am ñi weda dungu mu ñi rupayal, fey witrakünuwi, mütrümfi ti epu wentru ka tremolfi (Matew 20:29-34). ¿Chumngechi inayentuafuiñ Jesu ñi kutranpiwkeyefiel pu trawma?
2. Trafyerumefiliyiñ kiñe trawma engu ti rüpü mew, ¿chumngechi amuldungulelafuiñ?
2 Kellufechengeaymi: Trafyerumefilmi kiñe trawma rüpü mu chi, pürüm kimüwfalunge ka eluwnge tami kelluafiel. Ti trawma kiñeke mu maneluwkelay iñchiñ mu, rumel mülelu am tati che ñi illamkeetew. Welu, pengelfilmi tami rüf weniyeafiel ka küme duamtuniefilmi, fey tüfa tüngüñmafeyew. Tukulpange ka müley kakewme trawmangen, tüfa pengelafeymu tunten kellun duamniey ti pu trawma. Dew kellufilmi, fey feypiafuymi tami koneltulen kiñe küdaw ñi kimeltuafiel Biblia ñi dungu. Papeltulelafuymi kiñe texto Biblia mu mülelu, tüfachi Salmo 146:8 ka Isaías 35:5, 6. Feymu ti trawma kim papeltufile braille wirintukun, feymew ramtufinge ayüafuy chi ñi nieal kiñe papil braille wirintukulelu Biblia tuwlu. Ka femngechi kelluafuymi ñi entual fillke chillka ñi allkütungeal ti audio jw.org mu. Kafey, tati trawma niele kiñe komputador nielu kiñe programa ñi papeltual ti wirinkonkülelu pantalla mew, kafey kelluafeyew ñi allkütuafiel fillke papil nentuwirin-ngekelu mülelu jw.org mu, ka trür ti papil ñi entungekelu ti formato mew RTF (formato de texto enriquecido) pingelu. (Pefinge chi inapüle dungu “Kellukefiliyiñ kiñe trawma...”).
3. ¿Chumngechi kintuafuiñ pu trawma mülelu taiñ lof mu?
3 Kintufinge ti pu trawma: kiñeke mu müten pekeiñ trawmangechi che taiñ amuldungun fill ruka püle, fentren trawma newe ayükelay ñi nütramkayal kimnofiel ti che ñi akulu tañi ruka mew. Feymu lle, duamfali taiñ yafüluwal ñi ‘kintuafiel’ tüfachi pu che ñi amuldungulelafiel (Mat. 10:11). Tami küdaw mu kam chillkatuwe ruka mu, ¿nieymi kiñe kompañ trawmangelu? Eluwnge tami nütramkalelafiel rüf dungu mu. Tami lof mu mülele kiñe chillkatuwe ruka kimeltukefilu pu trawma, ramtufinge tati longkokünungelu ti chillkatuwe ruka ayüfule ñi yelelngeal fillke lifru ka papil wirintukulelu braille mu ñi müleam chew ñi elngekem lifru mu. ¿Kimnieymi kiñe reñma nielu kiñe trawma? ¿Müley tami lof mu chew ñi kellungeken pu trawma kam, kiñe ruka chew ñi müleken pu trawma? Feypifinge ti ngen reñma, ka elfalkülelu, ka ti longkokünungelu ti chillkatuwe ruka, ti pu Dungukelu Iney Ngen Jewba rume ayüwküleiñ ñi kelluafiel ti pu trawma, ka eluwnge tami küpalelafiel kiñe papil braille mu wirintukulelu kam ti audio mülelu. Kafey, Biblia mu, pengelfinge Chaw Ngünechen feypikünuy ñi tremoltuafiel ti trawma kutran. Ka femngechi, pengelelafuymi ti video “No se que haria sin ella” pingelu, jw.org mu mülelu. Tüfachi video feypiley chem ñi rupan kiñe peñi trawmalelu, ka chumngechi ti Biblia wirintukulelu braille mew kümelkaeyew. Fey küme feypifiliyiñ chumngelu taiñ witrañmamefiel, tüfa kelluafeiñmew taiñ pemeafiel pu trawmangechi che.
4. Janet ñi rupan mu, ¿chem kimeleleiñmu tüfa?
4 Janet, kiñe lamngen trawmalelu, amukefuy kiñe ruka chew ñi müleken pu trawma, ka nütramkalelfi kiñe üllcha domo, ka Janet feypifi: “Jesu mülepalu Mapu mu, tremoltufi kiñeke trawma ñi pengelal chem chumay küpalechi antü mu kom pu trawma mu.” Ka, ngüneduamkeyngu chem piley Apokalipsi 21:3, 4, ka Janet feypi chumngechi Ngünechen ñi Ngünenien wechurpuay feychi feypikünuelchi dungu. Ka tüfachi üllcha domo pichi ñüküfkülewi, ka fey wüla feypi: “Wüne feypienew tüfachi dungu kiñe trawma. Epe kom che ñi pekeel, rakiduamkeyngün ti pu che trawmangelu kidu ñi duam mu, kam ñi pu kuyfike che yem ñi femün mu trawmangeyngün.” Janet werkülelfi kiñe chillka yenielu kiñe nüwkülechi dungu ñi peal internet mu ti lifru Enseña pingelu, ka famülke mew mür chillkatukeyngu ti Biblia epu rupa fill semana mu.
5. Pepil-laiñ tremoltuafiel pu trawma, welu duamkeiñ kelluafiel engün, ¿chumngechi tüfa kümelkakeeyew tañi mongen mu?
5 Fey llemay, iñchiñ pepil-laiñ tremoltuafiel pu trawma chumngechi femi Jesu. Fey Weküfü ta trawmalnieñmafi fentren che ñi kimün reke, ka kiñeke tüfa engün rüf trawmalelu. Welu, iñchiñ kelluafuiñ ta kom pu che ñi kimal tati rüf dungu mülelu Ngünechen ñi Dungu mu (2 Kor. 4:4). Jesu kutranpiwkeyefi epu trawma, inafül Jeriko waria mu, feymew tremoltufi engu (Mat. 20:34). Ka femngechi iñchiñ rume duamkeiñ kelluafiel pu trawma, ka kelluafuiñ engün ñi kimafiel ta Jewba, fey apümkayafi ti trawma kutran rumel mew.