“Tüfachi dungu müley tami piwkentukunieafiel”

Pu chaw kiñe kamañfe reke feley. Müley ñi dapiafiel ñi pu yall, femngechi tañi püntütripanoal ti inanieelchi rüpü ka ñi ngünenkangenoal (Prov. 27:23). ¿Chumngechi pu chaw küme wechunenturpuafuy tüfa? Müley tañi elantükünual ñi nütramkayal tañi pu yall engün, tañi kimal chem rakiduam ñi mülen ñi longko mu, ka chem müley ñi piwke mu (Prov. 20:5). Kiñe pengelün dungu: kiñe küme dewmalechi ruka pekan lüfkelay, ka femngechi pu chaw müley ñi pepikayafiel ka yafültukuñmayafiel ñi mupiltun tañi pu yall (1 Kor. 3:10-15). Tati video “Estas palabras tienen que estar en tu corazón” pengeli ñi rume falin-ngen ti rumel müleyechi chillkatun reñma mu. Fey kiñeñtrür peafimün tüfachi video, ka ngüneduamaymün tüfachi ramtun.

1) ¿Chem yeeyew pu Román che ñi doyümwenofiel Ngünechen ñi dungu? 2) ¿Chumngelu küme tripalay ti peñi Román ñi ellakonchi chillkatun ñi reñma mu? 3) ¿Chem ngülam Biblia mu tuwlu doy küme kellukefi tati pu chaw ñi küme tremümafiel tañi pu yall? (Deut. 6:6, 7.) 4) Pu reñma, ¿chem kelluafuy ñi küme nütramkawal? 5) Tati pu yall ñi duamnieel mu, ¿chem müley ñi kiñe püle künuafiel tati pu chaw? 6) ¿Chumngechi ti kurewen Vargas küme kellufi Román ñi pu che? (Prov. 27:17.) 7) Ñi küme tripayal tañi poyeafiel ta Ngünechen reñmawen mu, ¿chem wüne müley ñi pepikawal ti longkolelu reñma mu? 8) ¿Chem chumi ti peñi Román kümelkawal ti dungu tañi pu reñmawen mu? 9) ¿Chumngelu rumel femün mu falin-ngey poyeafiel ta Ngünechen reñmawen mu? (Efe. 6:4.) 10) Taiñ poyeafiel ta Ngünechen reñmawen mu, ¿chem fillke kellu müley? 11) ¿Chumngechi tüngküley ti peñi Román, welu ka yafüluwi kellufilu ta Marcos ñi falintuafiel ñi küme femal chi dungu? (Jer. 17:9.) 12) Ti kurewen Román, ¿chumngechi kellufingu ta Rebeca ñi küme dullial tañi chumal ñi weniyeafiel kam weniyenoafiel ta Justin? (Mar. 12:30; 2 Tim. 2:22.) 13) ¿Chumngechi pengelingu mupiltun ti kurewen Román küme adkünulu ñi mongen engu? (Mat. 6:33.) 14) Tati pu longkolelu reñma mu müley ñi eluwküleal ñi kelluafiel tañi pu reñma ñi weniyeafiel ta Ngünechen, ¿chumngechi pengeli ti video tüfachi dungu? (1 Tim. 5:8.) 15) ¿Chemu eluwküleymi tami femal longkolelu am tami reñma mu?

ÑI KIMNIEAL PU LONGKOLELU ÑI REÑMA MU: Tüfachi pengelün dungu trürlu taiñ mongen famülke mew, pengelngey ti fütra trawün küla antü ngelu 2011 tripantu mew. Feychi antü mu, ¿inaduamimi chumngechi doy küme adkünual tami poyeafiel ta Ngünechen reñmawen mu? ¿Fewla kay? Tami doy küme femal, fürenen, llellipun mu eluwnge tami doy küme adkünutual tüfa, fey rumel kümelkaleay tami reñma (Efe. 5:15-17).